1 ಜೆಹುದಾಚೊ ರಾಜಾ ಜೆಹುಜಾಕಿಮ್ ಮನ್ತಲ್ಯಾಚ್ಯಾ ರಾಜ್ವಡ್ಕಿತ್ ತಿನ್ವೆಚ್ಯಾ ವರ್ಸಾತ್ ಬಾಬಿಲೊನಾಚೊ ರಾಜಾ ನೆಬುಕದ್ನೆಚರ್ ಮನ್ತಲ್ಯಾನ್ ಜೆರುಜಲೆಮಾಕ್ ಅಪ್ನಾಚ್ಯಾ ಸೈನಿಕಾಕ್ನಿ ಘೆವ್ನ್ ಘೆರೊ ಘಾಲುನ್, ಯೆವ್ನ್ ಲಡಾಯ್ ಕರುನ್, ತೆಜೊ ರಾಜ್ ಕಾಡುನ್ ಘೆಟ್ಲ್ಯಾನ್. 2 ತನ್ನಾ ಸರ್ವೆಸ್ಪರಾನ್ ಜುದಾಚೊ ರಾಜಾ ಜಹುಯಾಕಿಮಾಕ್ ಹಾರಿ ಸಾರ್ಕೆ ಕರ್ಲ್ಯಾನ್, ದೆವಾಚ್ಯಾ ಗುಡಿತ್ಲಿ ಲೈ ಆಯ್ದಾನಾ ತೆಕಾ ಗಾವಿಸಾರ್ಕೆ ಕರ್ಲ್ಯಾನ್, ತೆನಿ ತೆ ಸಗ್ಳೆ ಸಿನಾರ್ ಮನ್ತಲ್ಯಾ ದೆಶ್ಯಾಕ್ ಧಾಡುನ್ ದಿವ್ನ್ ಅಪ್ಲ್ಯಾ ದೆವಾಚ್ಯಾ ಗುಡಿತ್ ಥವ್ಲ್ಯಾನ್. 3 ಮಾನಾ ತ್ಯಾ ರಾಜಾನ್ ಅಪ್ಲ್ಯಾ ಕಂಚುಕಿಯಾತ್ನಿ ಮುಖಂಡ್ ಹೊಲ್ಲ್ಯಾ ಅಶ್ಪೆನಜಾಕ್; ತಿಯಾ ಇಜ್ರಾಯೆಲಾತ್ನಿ ಮಟ್ಲ್ಯಾರ್, ರಾಜಾಚ್ಯಾ ಘರಾನಾತ್ನಿ, ಅನಿ ಕುಟ್ಮಾತ್ನಿ, ಉಲ್ಲ್ಯಾ ದಾಂಡ್ಗ್ಯಾ ಮಾನ್ಸಾಕ್ನಿ ಎಚುನ್ ಘೆವ್ಕ್ ಹುಕುಮ್ ದಿಲ್ಯಾನ್. 4 ಅನಿ ಪ್ರಧಾನ್ ಹೊತ್ತ್ಯಾತ್ನಿ ಕಾಯ್ಬಿ ಆಂಗ್ ದೊಶ್ ನಸಲ್ಲೆ, ಸುಂದರ್ ಅನಿ, ಸಗ್ಳೆ ಶಾಸ್ತ್ರ ಗೊತ್ತ್ ಹೊತ್ತಿ ಪಂಡಿತಾ, ಶಿಕ್ಷನ್ ಹೊತ್ತೆ ಅನಿ ರಾಜಾಚ್ಯಾ ದರ್ಬಾರಾತ್ ತೆಚ್ಯಾ ಇದ್ರಾಕ್ ಸೆವಾ ಕರುಕ್ ಶಕ್ತ್ ಹೊತ್ತ್ಯಾ ಉಲ್ಲ್ಯಾ ದಾಂಡ್ಗ್ಯಾ ಮಾನ್ಸಾಕ್ನಿ ಹಿತ್ತೆ ಬಲ್ವುನ್ ಹಾನುನ್, ತೆಂಕಾ ಬಾಬಿಲೊನಾಚಿ ಭಾಶ್ಯಾ ವಾಚುಕ್ ಅನಿ ಲಿವ್ಕ್ ಶಿಕ್ವುಚೆ ಮನುನ್ ಹುಕುಮ್ ದಿಲ್ಯಾನ್. 5 ಯೆವ್ಡೆಚ್ ನಸ್ತಾನಾ ಹೆಚ್ಯಾನ್ ಫಿಡೆ ತೆನಿ ಮಾಜ್ಯಾ ಇದ್ರಾಕ್ ಸೆವಾಕರುಕ್ ತಯಾರ್ ಹೊವ್ಕ್ ಸಾಟ್ನಿ ಅಪ್ನಿ ಖಾತಲೆ ಖಾನ್ ಅನಿ ಫಿತಲೆ ವಾಯ್ನ್ ತೆಂಕಾ ಸದ್ದಾ ದಿವ್ಚೆ, ಅನಿ ತೆಂಕಾ ತಿನ್ ವರಿಸ್ ಬಾಳ್ಗುಚೆ ಮನುನ್ ಹುಕುಮ್ ದಿಲ್ಯಾನ್, ಹಿ ತಿನ್ ವರ್ಸಾ ಕಳದಲ್ಲ್ಯಾ ಮಾನಾ ತೆನಿ ರಾಜಾಚ್ಯಾ ಇದ್ರಾಕ್ ಯೆವ್ಚೆ. 6 ತ್ಯಾ ಎಚುನ್ಗೆಟಲ್ಯಾ ದಾಂಡ್ಗ್ಯಾ ಮಾನ್ಸಾತ್ನಿ ದಾನಿಯೆಲ್, ಹನನ್ಯಾ, ಮಿಶಾಯೆಲ್, ಅಜರ್ಯ್ ಮನ್ತಲಿ ಜುದೆವ್ ಕುಳಿಚಿ ಲೊಕಾಬಿ ಹೊತ್ತಿ. 7 ಕಂಚುಕಿಯಾಂಚ್ಯಾ ಮುಖಂಡಾನ್, ದಾನಿಯೆಲಾಕ್ ಬೆಲ್ತೆಶಚ್ಚರ್, ಹನನ್ಯಾಕ್ ಶದ್ರಕ್, ಮಿಶಾಯೆಲಾಕ್ ಮೆಶೆಕ್, ಅಜರ್ಯಾಕ್ ಅಬಿದ್ನೆಗೊ ಮನುನ್ ಬದ್ಲುನ್ ನ್ಹವಿ ನಾವಾ ಥವ್ಲ್ಯಾನ್. 8 ದಾನಿಯೆಲಾನ್ ಅಪ್ನಿ ರಾಜ್ಯಾಚೆ ಜೆವಾನ್ ಕರುನ್, ಅನಿ ರಾಜಾಚೆ ವಾಯ್ನ್ ಫಿವ್ನ್, ಅಪ್ನಾಕ್ ಬುರ್ಸೆ ಕರುನ್ಗೆವ್ಚೆ ನ್ಹಯ್ ಮನುನ್ ನಿರ್ದಾರ್ ಕರುನ್, ಕಂಚುಕಿಯಾಂಚ್ಯಾ ಮುಖಂಡಾಕ್, ಮಿಯಾ ಅಶುದ್ದ್ ಹೊವ್ಕ್ ಹೊಯ್ನಾ ಕ್ಷಮಾಕರ್ ಮನ್ತಾನಾ, 9 ದೆವಾನ್ ತ್ಯಾ ಮುಖಂಡಾಚ್ಯಾ ಮನಾತ್ ಬೊಲುನ್ ದಾನಿಯೆಲಾ ವರ್‍ತಿ ದಯಾ ದಾಕ್ವಿಸಾರ್ಕೆ ಕರ್ಲ್ಯಾನ್. 10 ತಿ ಮಾಗ್ನಿ ಆಯ್ಕುನ್ ಕಂಚುಕಿಯಾಂಚ್ಯಾ ಮುಖಂಡಾನ್ ದಾನಿಯೆಲಾಕ್, ತುಮ್ಕಾ ಜೆವ್ನಾಕ್ ಅನಿ ಫಿವ್ಕ್ ತಯಾರಿ ಕರಲ್ಲೊ ಮಾಜೊ ಯಜಮಾನ್ ಹೊಲ್ಲ್ಯಾ ರಾಜಾನ್ ತುಮ್ಚ್ಯಾ ವಾಂಗ್ಡಾ ಯೆಚುನ್ ಕಾಡಲ್ಲ್ಯಾ ಹುರಲ್ಲ್ಯಾ ದಾಂಡ್ಗ್ಯಾ ಮಾನ್ಸಾಂಚ್ಯಾಂನ್ಕಿ ತುಮ್ಚಿ ತೊಂಡಾ ಬಾವಲ್ಲಿ ಬಗುನ್, ಮಾಜೆ ಟಕ್ಲೆ ರಾಜಾನ್ ತೊಡ್ಸುಕ್ ತುಮಿ ಕಾರನ್ ಹೊತ್ಯಾಸಿ, ಮನುನ್ ಭಿಂವ್ನ್ ಗೆತ್ ಸಾಂಗ್ಲ್ಯಾನ್. 11 ತನ್ನಾ ದಾನಿಯೆಲಾನ್ ಅಪ್ನಾಕ್, ಹನನ್ಯಾಕ್, ಮಿಶಾಯೆಲಾಕ್ ಅನಿ ಅಜರ್ಯ್ ಹೆಂಕಾ ಬಗುನ್ಗೆವ್ಕ್ ಕಂಚುಕಿಯಾಂಚ್ಯಾ ಮುಖಂಡಾನ್ ನೆಮಲ್ಲ್ಯಾ ಮಾನ್ಸಾಕ್ಡೆ, 12 ಸಾಯ್ಬಾ, "ಧಾ ದಿಸಾಂಚ್ಯಾ ಪತರ್ ತುಜಿ ಸೆವಕಾ ಹೊವ್ನ್ ಹೊತ್ತ್ಯಾ ಅಮ್ಕಾ ಪರಿಕ್ಷಾ ಕರುನ್ ಬಗ್, ಜೆವ್ನಾಕ್ ಭಾಜಿಪಾಲೊ ಅನಿ ಫಿವ್ಕ್ ಪಾನಿ ತವ್ಡೆಚ್ ದಿ". 13 ತೆಜ್ಯಾ ಮಾನಾ ರಾಜಾಚೆ ಜೆವಾನ್ ಜೆವ್ತಲ್ಯಾಂಚಿ ಅನಿ ಅಮ್ಚಿ ತೊಂಡಾ ಬಗ್, ಅನಿ ತಿಯಾ ಬಗಟಲ್ಲ್ಯಾಕ್ ಸಮಾ ಹೊಯ್ ಸಾರ್ಕೆ ಅಮ್ಕಾ ಚಾಲ್ವು, ಮನುನ್ ಮಾಗ್ನಿ ಕರ್ತಾನಾ, 14 ತೆನಿ ತೆಂಚ್ಯಾ ಮಾಗ್ನಿಕ್ ಆಯ್ಕುನ್ ಒಪ್ಕಿ ದಿಲ್ಯಾನ್, ಅನಿ ಧಾ ದಿಸಾಂಚ್ಯಾ ಪತರ್ ಪರಿಕ್ಷಾ ಕರ್ಲ್ಯಾನ್. 15 ಧಾ ದಿಸಾ ಹೊಲ್ಲ್ಯಾ ಮಾನಾ, ತೆನಿ ರಾಜಾಚೆ ಜೆವಾನ್ ಖಾತಲ್ಯಾ ಹುರಲ್ಲ್ಯಾ ದಾಂಡ್ಗ್ಯಾ ಮಾನ್ಸಾಂಚ್ಯಾಂಕಿಂತಾ ಲೈ ಸುಂದರ್ ಅನಿ ಘಟ್ಮುಟ್ ದಿಸುಕ್ ಲಾಗಲ್ಲೆ. 16 ತ್ಯಾ ದಿಸಾಕ್ನಾ ಮಾನಾ ತ್ಯಾ ಇಚಾರ್ನಿ ಕರ್‍ತಲ್ಯಾ ಮಾನ್ಸಾನ್, ತೆಂಕಾ ನೆಮಲ್ಲೆ ಜೆವಾನ್ ಅನಿ ವಾಯ್ನ್ ಕಡೆಕ್ ಥವ್ನ್, ತೆಂಕಾ ಭಾಜಿಪಾಲೊ ದಿವ್ಕ್ ಲಾಗ್ಲೊ. 17 ಅಸೆ ರ್‍ಹಾತಾನಾ ದೆವಾನ್ ತ್ಯಾ ಚಾರ್ ದಾಂಡ್ಗ್ಯಾ ಮಾನ್ಸಾಕ್ನಿ, ಸಗ್ಳ್ಯಾ ನಮುನ್ಯಾಚ್ಯಾ ಶಾಸ್ತರಾತ್ನಿ, ಅನಿ ಶಿಕ್ಷನಾತ್ನಿ ವಿವೆಕ್ ಅನಿ ಬುದ್ದ್ ದಿಲ್ಯಾನ್, ದಾನಿಯೆಲ್ ಸಗ್ಳ್ಯಾ ನಮುನ್ಯಾಚಿ ಸಪ್ನಾ ಅನಿ ದಿವ್ಯಾ ದರ್ಶನಾ ಬಗ್ತಲ್ಯಾತ್ ಫಿಡೆ ಹೊಲೊ. 18 ರಾಜಾನ್ ನೆಮಲ್ಲೊ ಎಳ್ ಕಳ್ದುನ್ ದಾಂಡ್ಗ್ಯಾ ಮಾನ್ಸಾಕ್ನಿ ರಾಜಾಚ್ಯಾ ಜಗ್ಗೊಳ್ ಹಾನ್ತಲೊ ಎಳ್ ಯೆಲ್ಲ್ಯಾ ತನ್ನಾ, ಕಂಚುಕಿಯಾಂಚ್ಯಾ ಮುಖಂಡಾನ್ ತೆಂಕಾ ನೆಬುಕದ್ನೆಚರಾಚ್ಯಾ ಇದ್ರಾಕ್ ಬಲ್ವುನ್ ಹಾನ್ಲ್ಯಾನ್. 19 ರಾಜಾನ್ ತೆಂಚ್ಯಾ ವಾಂಗ್ಡಾ ಬೊಲ್ತಾನಾ, ತ್ಯಾ ಸಗ್ಳ್ಯಾ ದಾಂಡ್ಗ್ಯಾತ್ನಿ ದಾನಿಯೆಲ್, ಹನನ್ಯಾ, ಮಿಶಾಯೆಲ್ ಅನಿ ಅಜರ್ಯ ಸಾರ್ಕೆ ಕೊನ್ಬಿ ದಿಸುನ್ ಯೆವ್ಕ್ ನಾ, ತಸೆ ಹೊವ್ನ್ ತೆನಿ ರಾಜಾಚ್ಯಾ ಜಗ್ಗೊಳ್ ಇದ್ರಾಕ್ ರಾತಲಿ ಸೆವಕಾ ಹೊಲ್ಯಾನಿ. 20 ತೆಜ್ಯಾ ಮಾನಾ ರಾಜಾನ್ ತೆಂಕಾ ಸಗ್ಳ್ಯಾ ನಮುನ್ಯಾಚ್ಯಾ ಶಿಕ್ಷನಾತ್ನಿ ಪರಿಕ್ಷಾ ಕರುನ್ ಬಗ್ತಾನಾ, ತೆನಿ ತೆಜ್ಯಾ ರಾಜ್ವಡ್ಕಿತ್ ಹೊತ್ತ್ಯಾ ಸಗ್ಳ್ಯಾ ಜೊಯಿಸಾ ಅನಿ ಮೊಡ್ಗಾರಾಂಚ್ಯಾ ಕಿಂತಾಬಿ ಧಾ ಪಟ್ಟ್ ಹುಶಾರ್ ದಿಸ್ಲೆ. 21 ದಾನಿಯೆಲ್ ಕೊರೆಶ್ ರಾಜಾಚ್ಯಾ ರಾಜ್ವಡ್ಕಿಚ್ಯಾ ಪೈಲೆಚ್ಯಾ ವರ್ಸಾ ಪತರ್ ರಾಜಾಚ್ಯಾ ಇದ್ರಾಚೊ ಸೆವಕ್ ಹೊವ್ನ್ ಹೊತ್ತೊ.