1 ಬಾಬಿಲೊನಾಚೊ ರಾಜಾ ಬೆಲ್ತೆಶಚ್ಚರಾಚ್ಯಾ ರಾಜ್ವಟ್ಕಿಚ್ಯಾ ಪೈಲೆಚ್ಯಾ ವರ್ಸಾತ್ ದಾನಿಯೆಲಾಕ್ ಹಾತ್ರಾನಾತ್ ಆಡ್ ಪಡಲ್ಲ್ಯಾ ತನ್ನಾ, ಸಪ್ನಾತ್ ಎಕ್ ದರ್ಶನ್ ದಿಸ್ಲೆ, ತೆನಿ ಲಗ್ಗುನಾ ಉಟುನ್, ತೆ ದರ್ಶನ್ ಲಿವ್ನ್ ಥವ್ಲ್ಯಾನ್. 2 ದಾನಿಯೆಲಾನ್ ತ್ಯಾ ದರ್ಶನಾಚ್ಯಾ ವಿಶಯಾತ್ ಮಿಯಾ ರ್‍ಹಾತ್ತಿ ಆಹಾ, ಚಾರಿ ದಿಕ್ಕಾಂಚ್ಯಾ ಸಮುಂದರಾಕ್ನಾ ವಾರೊ ಮಾರುಕ್ ಲಾಗಲ್ಲೊ, 3 ತನ್ನಾ ಎಕಾಕಿಂತಾ ಎಕ್ ಬುರ್ಶಿ ಹೊತ್ತಿ ಚಾರ್ ಜನಾವರಾ ಮೊಟ್ಟ್ಯಾ ಸಮುಂದರಾಕ್ನಾ ಯೆಲಿ. 4 ಪಯ್ಲೆ ದಿಸಲ್ಲೆ ಜನಾವರ್ ಸಿಂವಾಚ್ಯಾ ಸಾರ್ಕೆ ಹೊತ್ತೆ, ತೆಕಾ ಹದ್ದಾಂಚ್ಯಾ ಸಾರ್ಕೆ ರಕುಟೆ ಹೊತ್ತೆ, ಮಿಯಾ ತ್ಯಾ ಜನಾವರಾಕ್ ಬಗುನ್ಗೆತ್ ರ್‍ಹಾತಾನಾ, ತೆಚೆ ರಕುಟೆ ನಿಕ್ಳುನ್ ಪಡ್ಲೆ, ತೆ ಮಾನ್ಸಾಚ್ಯಾ ಗತಿನ್ ದೊನ್ ಪಾಂಯಾಚ್ಯಾ ವರ್‍ತಿ ಇಬೆರ್‍ಹಾಲೆ, ಅನಿ ತೆಕಾ ಮಾನ್ಸಾಚೊ ಮನ್ ದಿವ್ನ್ ಹೊಲೊ. 5 ಮಾನಾ ಮಿಯಾ ದೊನ್ವೆ ಜನಾವರ್ ಬಗಟ್ಲೊ, ತೆ ಜನಾವರ್ ಆಸ್ವಾಲಾ ಸಾರ್ಕೆ ಹೊತ್ತೆ, ತೆಚೆ ಎಕ್ ಭುಜ್ ವರ್‍ತಿ ಉಕ್ಲುನ್ ಘೆವ್ನ್ ಹೊತ್ತೆ, ಅಪ್ನಾಚ್ಯಾ ತೊಂಡಾತ್ ದಾತಾಂಚ್ಯಾ ಮದ್ದಿ ತಿನ್ ಪಕ್ಡಿತ್ಲಿ ಹಡ್ಡಾ ಚಾವ್ನ್ ಧರಲ್ಯಾನ್, "ಉಟುನ್ ತುಕಾ ಪಾಜೆ ತವ್ಡೆ ಮಾಸ್ ಖಾ" ಮನುನ್ ತೆಕಾ ಸಾಂಗುನ್ ಹೊಲೆ. 6 ಮಾನಾ ಮಿಯಾ ಅನಿ ಎಕ್ ಜನಾವರಾಕ್ ಬಗಟ್ಲೊ, ತೆ ಜನಾವರ್ ವಾಗ್ಟಾ ಸಾರ್ಕೆ ಹೊತ್ತೆ, ತ್ಯಾ ವಾಗ್ಟಾಚ್ಯಾ ಡುಬ್ರಿ ವರ್‍ತಿ ಚಾರ್ ರಕುಟೆ ಹೊತ್ತೆ, ತೆ ರಕುಟೆ ಫಾಕ್ರಾಚೆ ರಕುಟೆ ಸಾರ್ಕೆ ಹೊತ್ತೆ, ಹ್ಯಾ ಜನಾವರಾಕ್ ಚಾರ್ ಟಕ್ಲಿಯಾ ಹೊತ್ತಿ, ತೆಕಾ ರಾಜ್ವಡ್ಕಿ ದಿವ್ನ್ ಹೊಲೊ. 7 ಮಿಯಾ ರ್‍ಹಾತ್ತಿ ಬಗಟಲ್ಲ್ಯಾ ದರ್ಶನಾತ್ ಉಲ್ಲೊ ಎಳ್ ಕಳ್ದಲ್ಲ್ಯಾ ಮಾನಾ ಆಹಾ, ಚಾರ್ವೆಚೆ ಜನಾವರ್ ದಿಸ್ಲೆ ತೆ ಲೈ ಭಯಾನಕ್ ಭ್ಹಿವ್ತಲೆ ಸಾರ್ಕೆ ಅನಿ ಲೈ ಬಳಾಚೆ ಹೊವ್ನ್ ತೆಕಾ ಲೊಂಗ್ಟಾಚಿ ಮೊಟಿ ದಾತಾ ಹೊತ್ತಿ ತೆ ಗಾವಲ್ಲ್ಯಾ ಸಗ್ಳ್ಯಾಕ್ನಿ ಗಿಳುನ್ಗೆತ್ ತುಕ್ಡೆ ತುಕ್ಡೆ ಕರುನ್ಗೆತ್ ಹುರಲ್ಯಾಕ್ನಿ ಪಾಂಯಾತ್ ಘಾಲುನ್ ತುಡ್ವುನ್ಗೆತ್ ಹೊತ್ತೆ, ತೆ ಅದ್ಲ್ಯಾ ಸಗ್ಲ್ಯಾ ಜನಾವರಾಂಚ್ಯಾಕಿಂತಾ ಲೈ ಬುರ್ಸೆ ರಾವ್ನ್ ತೆಕಾ ಧಾ ಶಿಂಗಾ ಹೊತ್ತಿ. 8 ತೆಜ್ಯಾ ವಯ್ನಾ ಅದ್ದಿ ಹೊತ್ತ್ಯಾ ತಿನ್ ಶಿಂಗಾಕ್ನಿ ಬೆರ್ಬಿ ಸೊಡಿ ನಸ್ತಾನಾ, ಉಪ್ಸುನ್ ಹೊಲೆ, ಅಬಕ್, ತ್ಯಾ ಶಿಂಗಾ ವರ್‍ತಿ ಮಾನ್ಸಾಚ್ಯಾ ಸಾರ್ಕೆ ಡೊಳೆ ಅನಿ ತೆಕಾ ಬಡಾಯ್ ಕರ್‍ತಲೆ ತೊಂಡ್ಬಿ ಹೊತ್ತೆ.

9 ಮಿಯಾ ಬಗಿತ್ ರ್‍ಹಾತಾನಾಚ್, ಝಡ್ತಿ ಕರ್‍ತಲ್ಯಾಕ್ನಿ ಬಸುಕ್ ಕುರ್ಚಿಯಾ ಘಾಲುನ್ ಹೊಲೆ ತೆಜ್ಯಾ ವರ್‍ತಿ ಜಾನ್ತೊ ಮಾನುಸ್ ಬಸ್ಲೊ, ತೆಚೆ ಕಪ್ಡೆ ಬರ್ಪಾ ಸಾರ್ಕೆ ಪಾಂಡ್ರೆ ಹೊತ್ತೆ ಅನಿ ತೆಚಿ ಕೆಸಾ ನಿತಳ್ ಪಾಂಡ್ರ್ಯಾ ಬಕ್ರ್ಯಾಚ್ಯಾ ಕೆಸಾಂಚ್ಯಾ ಸಾರ್ಕೆ ಹೊತ್ತಿ ತೆಚಿ ಬಸ್ತಲಿ ಕುರ್ಚಿ ಪೆಟ್ತಲಿ ಆಗ್ ಅನಿ ತೆಚೆ ಚಕ್ರಾ ಝಳ್ತಲಿ ಆಗುಚ್ ಹೊವ್ನ್ ಹೊತ್ತಿ. 10 ಝಡ್ತಿಚ್ಯಾ ಜಾಗ್ಯಾಚ್ಯಾ ಇದ್ರಾಕ್ ಆಗಿಚೊ ಹಂವಾರೊ ಯೆಲೊ, ಲಾಕಾನ್ ಲಾಕ್ ಧುತಾ ತೆಕಾ ಆರಾದನ್ ಕರಿತ್, ಕೊಟಿ ಘಟ್ಲಿ ಲೊಕಾ ತೆಜ್ಯಾ ಇದ್ರಾಕ್ ಇಬೆ ಹೊತ್ತಿ, ಝಡ್ತಿಚಿ ಬಯ್ಟೆಕ್ ಬಸ್ಲಿ, ಅನಿ ಪುಸ್ತಕಾ ಉಗ್ಡುನ್ ಹೊಲಿ. 11 ತನ್ನಾ ಮಿಯಾ ಬಗಿತ್ ರ್‍ಹಾತಾನಾ ಅಬಕ್, ಸಿಂಗಾನ್ ಬಡಾಯ್ ಕರಲ್ಲ್ಯಾ ಸಾಟ್ನಿ ತ್ಯಾ ಸಿಂಗಾಚ್ಯಾ ಜನಾವರಾಕ್ ಜಿವಾನಿ ಮಾರುನ್, ತೆಚೆ ಮ್ಹಡೆ ಪೆಟ್ತಲ್ಯಾ ಆಗಿತ್ ಘಾಲುನ್ ನಾಸ್ ಕರ್ಲ್ಯಾನಿ. 12 ಹುರಲ್ಲ್ಯಾ ಜನಾವರಾಂಚಿ ರಾಜ್ವಟ್ಕಿ ಕಾಡುನ್ಗೆವ್ನ್ ಹೊಲಿ, ಖರೆ ಉಲ್ಲ್ಯಾ ಯೆಳಾ ಸಾಟ್ನಿ, ಅನಿ ಸಮಾ ಎಳ್ ಯೆಯ್ ಪತರ್, ತೆಂಚಿ ಜಿವಾ ಹುರ್ವುನ್ ಹೊಲಿ. 13 ಅಬಕ್, ಮಿಯಾ ರ್‍ಹಾತ್ತಿ ಬಗಟಲ್ಲ್ಯಾ ದರ್ಶನಾತ್, ಮಾನ್ಸಾಚ್ಯಾ ಲೆಕಾ ಸಾರ್ಕೊ ಹೊತ್ತೊ ಮಳ್ಬಾಚ್ಯಾ ಮೊಡಾಂಚ್ಯಾ ವಾಂಗ್ಡಾ ತ್ಯಾ ಜಾಂನ್ತ್ಯಾ ಮಾನ್ಸಾಕ್ಡೆ ಜಗ್ಗೊಳ್ ಕರ್ಲ್ಯಾನ್, ತೆಕಾ ತೆಜ್ಯಾ ಇದ್ರಾಕ್ ನ್ಹೆಲ್ಯಾನಿ. 14 ಸಗ್ಳೆ ಘರಾನೆ, ಕುಳಿಯಾ, ಅನಿ ಭಾಶ್ಯಾಂಚಿ ಲೊಕಾ ತೆಚಿ ಸೆವಾ ಕರುಕ್ ಮನುನ್ ತೆಕಾ ರಾಜ್ವಾಡೊ, ಮಾನ್ ಅನಿ ರಾಜ್ವಡ್ಕಿ ದಿವ್ನ್ ಹೊಲೆ, ತೆಚಿ ರಾಜ್ವಡ್ಕಿ ಆಕ್ರಿ ನಸಲ್ಲಿ ಶಾಶ್ವತಾಚಿ ಅನಿ ತೆಜೊ ರಾಜ್ ಸದಾ ಸರ್ವತಾಕ್ ರ್‍ಹಾತಾ.

15 ಮಿಯಾ ದಾನಿಯೆಲ್ ಮಾಜೊ ಆತ್ಮೊ ತರಾಸಾಕ್ ಪಡ್ಲೊ, ಮಾಜ್ಯಾ ಮನಾತ್ ದಿಸಲ್ಲ್ಯಾ ದರ್ಶನಾನಿ ಮಾಕಾ ಘಾಬ್ರಿಸಾರ್ಕೆ ಕರ್ಲ್ಯಾನಿ. 16 ಮಿಯಾ ಜಗ್ಗೊಳ್ ಇಬೆ ಹೊತ್ತ್ಯಾತ್ಲ್ಯಾ ಎಕ್ಲ್ಯಾಕ್ಡೆ ಜಾವ್ನ್ ಹೆಚೊ ಖರೊ ಅರ್ಥ್ ಕಾಯ್, ಮನುನ್ ಇಚಾರ್‍ತಾನಾ, ತೆನಿ ಮಾಕಾ ತೆಜೊ ಅರ್ಥ್ ಸಾಂಗ್ಲ್ಯಾನ್, 17 "ತಿ ಚಾರ್ ಮೊಟ್ಟಿ ಜನಾವರಾ ಜಗಾತ್ನಾ ಉಟ್ತಲೆ ಚಾರ್ ರಾಜಾ, 18 ಖರೆ ತೆ ರಾಜ್ವಾಡೊ ಸಗ್ಳೆ ಕರುಕ್ ಶಕ್ತ್ ಹೊತ್ತ್ಯಾ ದೆವಾಚ್ಯಾ ಮಾನ್ಸಾಕ್ನಿ ಗಾವ್ತಾ, ತೆನಿಚ್ ತೆ ಸದಾ ಸರ್ವತಾಕ್ ಶಾಸ್ವತಾಕ್ ಅನ್ಬೊಗ್ ಕರ್‍ತಾತ್." 19 ಮಾನಾ ಲೊಂಗ್ಟಾಚಿ ದಾತಾ ಅನಿ ತಾಂಬ್ಯಾಚಿ ನಕ್ಕಾ ರಾವ್ನ್ ಉಲ್ಲ್ಯಾಕ್ನಿ ಗಿಳುನ್ಗೆತ್ ಅನಿ ಉಲ್ಲೆ ತುಕ್ಡೆ ತುಕ್ಡೆ ಕರುನ್, ಹುರಲ್ಲೆ ಪಾಂಯಾನಿ ತುಡ್ವುನ್ಗೆತ್ ಹುರಲ್ಲ್ಯಾ ಜನಾವರಾಕಿಂತಾ ಲೈ ಬುರ್ಸೆ ಅನಿ ಭಯಾನಕ್ ಹೊವ್ನ್ ಹೊತ್ತೆ, 20 ಅನಿ ತೆಜ್ಯಾ ಟಕ್ಲ್ಯಾ ವಯ್ಲ್ಯಾ ಧಾ ಸಿಂಗಾಂಚ್ಯಾ ವಿಶಯಾತ್, ಅನಿ ಹುರಲ್ಲಿ ತಿನ್ ಸಿಂಗಾ ಉಟುನ್ ಯೆವ್ನ್ ತೆಜ್ಯಾ ಇದ್ರಾಕ್ ಪಡ್ಲಿ, ತ್ಯಾ ಸಿಂಗಾಕ್ ಡೊಳೆ ಅನಿ ಎಕ್ ತೊಂಡ್ ಹೊತ್ತೆ, ತೆ ಲೈ ಬಡಾಯಿಚಿ ಸಂಗ್ತಿಯಾ ಬೊಲಿತ್ ಹೊತ್ತೆ, ತೆ ಅನಿ ಹುರಲ್ಲ್ಯಾಂಚ್ಯಾಕಿಂತಾ ಶ್ರೆಸ್ಟ್ ಹೊತ್ತೆ. 21 ಮಿಯಾ ಬಗ್ತಾ ಬಗ್ತಾನಾಚ್, ತೆ ಸಿಂಗ್ ದೆವಾಚ್ಯಾ ಲೊಕಾಂಚ್ಯಾ ವಾಂಗ್ಡಾ ಯುದ್ದ್ ಕರುನ್, ತೆಂಕಾ ಆಕ್ರಮನ್ ಕರುನ್ಗೆಟ್ಲ್ಯಾನ್, 22 ತನ್ನಾ ಸದಾ ಸರ್ವತಾಕ್ ಝಿತ್ತೊ ರಾತಲೊ ಎಕ್ಲೊ ಯೆಲೊ ಅನಿ ಸಗ್ಳೆ ಕರುಕ್ ಶಕ್ತ ಹೊತ್ತ್ಯಾ ದೆವಾಚ್ಯಾ ಲೊಕಾಂಚ್ಯಾ ಸಾಟ್ನಿ ಝಡ್ತಿ ಪರ್ಗಟ್ಲ್ಯಾನ್, ದೆವಾಚ್ಯಾ ಲೊಕಾಕ್ನಿ ರಾಜ್ ಪರ್‍ತುನ್ ಗಾಯ್ ಸಾರ್ಕೆ ಕರ್ಲ್ಯಾನ್. 23 ತನ್ನಾ ತೆನಿ ಮಾಕಾ, ತೆ ಚಾರ್ವೆಚ್ಯಾ ಜನಾವರಾಚ್ಯಾ ವಿಶಯಾತ್ ಸಾಂಗುಚೆ ಹೊಲ್ಯಾರ್, ಜಗಾಚ್ಯಾ ವರ್‍ತಿ ಚಾರ್ವೆಚೊ ರಾಜಾ ಯೆನಾರ್ ಹಾಯ್, ಹೆ ಹುರಲ್ಲ್ಯಾ ರಾಜ್ವಡ್ಯಾಂಚ್ಯಾಕಿಂತಾ ವ್ಯತ್ಯಾಸ್ ಹೊವ್ನ್ ರ್‍ಹಾತಾ, ತೆ ಸಗ್ಳ್ಯಾ ಲೊಕಾಕ್ನಿ ತುಡ್ವುನ್ ತುಕ್ಡೆ ತುಕ್ಡೆ ಕರ್ತಾ. 24 ತ್ಯಾ ಧಾ ಸಿಂಗಾಚೆ ವಿಶಯ್ ಕಾಯ್ ಮಟ್ಲ್ಯಾರ್, ತ್ಯಾ ರಾಜ್ವಾಡ್ಯಾತ್ ಧಾ ರಾಜಾ ಉಟ್ತಾತ್, ತೆಚ್ಯಾ ಮಾನಾ ಅನಿ ಎಕ್ಲೊ ಯೆತಾ, ತೊ ಅದ್ಲ್ಯಾ ರಾಜಾಂಚ್ಯಾ ಕಿಂತಾಬಿ ವ್ಯತ್ಯಾಸ್ ಹೊವ್ನ್, ತಿನ್ ರಾಜಾಕ್ನಿ ಹಾರ್ವುತಾ. 25 ತೊ ಸಗ್ಳೆ ಕರುಕ್ ಶಕ್ತ್ ಹೊತ್ತ್ಯಾ ದೆವಾಚ್ಯಾ ವಿರೊಧ್ ಹೊವ್ನ್ ಬಡಾಯ್ ಕರುನ್ ತೆಜ್ಯಾ ಲೊಕಾಂಕ್ನಿ ತರಾಸ್ ದಿತಾ, ಅನಿ ಎಳ್ ಅನಿ ನೆಮಾಕ್ನಿ ಬದ್ಲುಕ್ ಯೆವಜ್ತಾ; ತಿ ದೆವಾಚಿ ಲೊಕಾ ಎಕ್ ಎಳ್, ಯೆಳಾ ಅನಿ ಅರ್ಧೊ ಎಳ್ ತೆಜ್ಯಾ ಹಾತಿತ್ ರ್‍ಹಾತಾತ್. 26 ಮಾನಾ ಝಡ್ತಿಚಿ ಬಯ್ಟೆಕ್ ಬಸುನ್, ತೆಚಿ ರಾಜ್ವಡ್ಕಿ ಕಾಡುನ್ಗೆವ್ನ್, ಫುರಾ ನಾಸ್ ಕರುನ್ ಹೊತಾ. 27 ತನ್ನಾ ತೆಜೊ ರಾಜ್, ಅನಿ ರಾಜ್ವಾಡೊ ಸಗ್ಳ್ಯಾ ಜಗಾಚ್ಯಾ ರಾಜ್ವಡ್ಯಾಂಚಿ ಮಹಿಮಾ ಸರ್ವೆಸ್ಪರಾಚ್ಯಾ ಲೊಕಾಂಚ್ಯಾ ಹಾತಿತ್ ದಿವ್ನ್ ಹೊತಾ; ತೆಚಿ ರಾಜ್ವಡ್ಕಿ ಶಾಶ್ವತಾಚಿ ಹೊವ್ನ್ ರ್‍ಹಾತಾ, ಸಗ್ಳ್ಯಾ ದೆಶಾಚಿ ಅಧಿಪತಿಯಾ ತೆಕಾ ಖಾಲ್ತಿ ಹೊವ್ನ್ ಸೆವಾ ಕರ್‍ತಾತ್ ಮಟ್ಲ್ಯಾನ್. 28 ತ್ಯಾ ದರ್ಶನಾಚೊ ಅರ್ಥ್ ಸರ್ಲೊ, ಮಿಯಾ ದಾನಿಯೆಲ್ ಮಾಜ್ಯಾ ಯವ್ಜನಿಯಾನಿ ಲೈ ತಳ್ಮಳ್ಲೊ, ಮಾಜೆ ತೊಂಡ್ ಕಾಳೆ ಹೊಲೆ, ಖರೆ ಹೊಲ್ಲಿ ವಿಶಯಾ ಮನಾತ್ ಥವ್ನ್ ಘೆಟ್ಲೊ.