1 ರಾಜಾ ಬೆಲ್ತೆಶಚ್ಚರಾನ್ ಅಪ್ನಾಚ್ಯಾ ರಾಜ್ವಾಡ್ಯಾಚ್ಯಾ ಹಜಾರ್ ಮುಖಂಡಾಕ್ನಿ ಜೆವಾನ್ ಘಾಲುನ್, ತ್ಯಾ ಹಜಾರ್ ಲೊಕಾಂಚ್ಯಾ ಡೊಳ್ಯಾಂಚ್ಯಾ ಇದ್ರಾಕುಚ್ ಅಪ್ನಿಬಿ ವಾಯ್ನ್ ಫಿಲ್ಯಾನ್. 2 ಅನಿ ಅಪ್ನಾಚಿ ಬಾಯ್ಕೊ ಅನಿ ತೆಚಿಚ್ ಹುರಲ್ಲಿ ಬಾಯ್ಕಾ ತ್ಯಾ ಆಯ್ದಾನಾತ್ನಿ ವಾಯ್ನ್ ಫಿವ್ಚೆ ಮನ್ತಲ್ಯಾ ಆಶ್ಯಾ ವಯ್ನಾ ರಾಜಾ ಬೆಲ್ತೆಶಚ್ಚರಾನ್ ಅಪ್ನಿ ವಾಯ್ನ್ ಪಿವ್ನ್ ಘೆತ್ ರ್‍ಹಾತಾನಾಚ್ ಅಪ್ನಾಚೊ ಬಾಬಾ ನೆಬುಕದ್ನೆಜ್ಜರಾನ್ ಜರುಜಲೆಮಾಚ್ಯಾ ಗುಡಿತ್ನಾ ಹಾನಲ್ಲಿ ಸೊನ್ಯಾಚಿ ಅನಿ ಚಾಂದಿಚಿ ಆಯ್ದಾನಾ ಹಾನುಚೆ ಮನುನ್ ಅಪ್ನಾಚ್ಯಾ ಮುಖಂಡಾಕ್ನಿ ಹುಕುಮ್ ದಿಲ್ಯಾನ್. 3 ತೆಜ್ಯಾ ಮಾನಾ ತೆನಿ ಜರುಜಲೆಮಾಚ್ಯಾ ಗುಡಿತ್ನಾ ಹಾನಲ್ಲಿ ಕೊಟೊರೊ ಅನಿ ವಾಟ್ಕಿಯಾ ಹಾನ್ಲ್ಯಾನಿ, ತನ್ನಾ ರಾಜಾ, ಅನಿ ತೆಚಿ ಮುಖಂಡಾ, ತೆಚಿ ಬಾಯ್ಕೊ ಅನಿ, ತೆಚಿಚ್ ಹುರಲ್ಲಿ ಬಾಯ್ಕಾ ಸಗ್ಳ್ಯಾನಿ ತ್ಯಾ ಆಯ್ದಾನಾತ್ನಿ ವಾಯ್ನ್ ಫಿಲ್ಯಾನಿ. 4 ತೆನಿ ವಾಯ್ನ್ ಫಿವ್ನ್ ಸೊನೆ ಚಾಂದಿ ತಾಂಬೆ ಲೊಂಗಾಟ್ ಗುಂಡೆ ಅನಿ ಝಾಡಾನಿ ಕರಲ್ಲ್ಯಾ ದೆವಾಕ್ನಿ ಸ್ತುತಿ ಕರ್ಲ್ಯಾನಿ. 5 ತನ್ನಾ ತ್ಯಾ ಎಳಾರ್ ಮಾನ್ಸಾಚೊ ಹಾತ್ ಭಿತ್ತಿ ವರ್‍ತಿ ಲಿವ್ಕ್ ಲಾಗಲ್ಲೊ ದಿಸ್ಲೊ, ತೆಜ್ಯಾ ಬೊಟಾನಿ ಭಿತ್ತಿ ಲಾವಲ್ಲ್ಯಾ ಚುನ್ನ್ಯಾ ವರ್‍ತಿ ಅಕ್ಷರಾ ಕೆದ್ರುಕ್ ಲಾಗಲ್ಲೆ ಅನಿ ತೊ ಹಾತ್ ದಿವೊ ಥವ್ತಲ್ಯಾ ಖಾಂಬ್ಯಾಚ್ಯಾ ಜಗ್ಗೊಳ್ ರಾಜಾಚ್ಯಾ ಘರಾಚ್ಯಾ ಭಿತ್ತಿ ವರ್‍ತಿ ರಾಜಾಚ್ಯಾ ಡೊಳ್ಯಾಚ್ಯಾ ಇದ್ರಾಕ್ ಲಿವ್ಕ್ ಲಾಗಲ್ಲೆ. 6 ತನ್ನಾ ರಾಜಾ ಘಾಬರ್ಲೊ ಮನಾತ್ ಲೈ ಕಳ್ವಳ್ಲೊ, ತೆಜ್ಯಾ ಕಂಬ್ರೆಚೆ ಹಡ್ಡ್ ಸೈಲ್ ಹೊಲೆ ಅನಿ ತೊ ಭಿಂವ್ನ್ ಥರ್ಥರ್ತಾನಾ ತೆಚಿ ಡೊಗ್ಲಾ ಎಕಾಮೆಕಾಕ್ ಲಾಗುಲಾಗಲ್ಲಿ. 7 ತನ್ನಾ ರಾಜಾನ್ ಮೊಟ್ಯಾನ್ ಬೊಬ್ ಮಾರುನ್, ಮೊಡ್ಗಾರಾ, ಬುದ್ವಂತಾ ಅನಿ ಸಫ್ನಾ ಸಾಂಗ್ತಲ್ಯಾಕ್ನಿ ಬಲ್ವುನ್, ತ್ಯಾ ಬಾಬಿಲೊನಾಚ್ಯಾ ಪಂಡಿತಾಕ್ನಿ ಜೆ ಕೊನ್ ಬರ್ವನ್ಗಿ ವಾಚುನ್ ಹೆಚೊ ಅರ್ಥ್ ಮಾಕಾ ಸಾಂಗ್ಲ್ಯಾರ್, ಮಿಯಾ ತೆಕಾ ಝಾಂಬ್ಳ್ಯಾ ಬನ್ನಾಚೆ ಕಿಮ್ತಿಚೆ ಕಪ್ಡೆ ಕಾಂಬ್ರುನ್ ತೆಚ್ಯಾ ಘಳ್ಯಾತ್ ಸೊನ್ಯಾಚೊ ಹಾರ್ ಘಾಲುನ್ ತೆಕಾ ರಾಜ್ಯಾತ್ಲ್ಯಾ ತಿನ್ ಮುಖಂಡಾತ್ನಿ ಎಕ್ಲೊ ಕರುನ್ ನೆಮ್ತಾ ಮಟ್ಲ್ಯಾನ್. 8 ರಾಜ್ವಟ್ಕಿತ್ಲಿ ಸಗ್ಳಿ ಪಂಡಿತಾ ಯೆವ್ನ್ ಬಗ್ಲ್ಯಾನಿ, ಖರೆ ತೆಂಚ್ಯಾತ್ಲ್ಯಾ ಕೊನಾಚೆನ್ಬಿ ತಿ ಬರ್ವನ್ಗಿ ವಾಚುಕ್ ಹೊಂವ್ದಿತ್ ನಾತರ್ ಅರ್ಥ್ ಸಾಂಗುಕ್ ಹೊವ್ಕ್ ನಾ. 9 ತನ್ನಾ ಬೆಲ್ತೆಶಚ್ಚರಾಕ್ ಮನಾತ್ ಲೈ ಕಳ್ವಳೊ ಹೊಲೊ, ಅನಿ ತೊ ಲೈ ಘಾಬರ್ಲೊ, ಅನಿ ತೆಚಿ ಮುಖಂಡಾಬಿ ಲೈ ಭ್ಹಿಯಾಲಿ. 10 ತನ್ನಾ ರಾಜಾನ್ ಅನಿ ತೆಚ್ಯಾ ಮುಖಂಡಾನಿ ಬೊಲಲ್ಲಿ ಬೊಲ್ನಿಯಾ ರಾನಿಚ್ಯಾ ಕಾನಾತ್ ಆಯ್ಕೊ ಯೆಲಿ, ತನ್ನಾ ತಿನಿ ಜೆವಾನ್ ಕರ್‍ತಲ್ಯಾ ಜಾಗ್ಯಾರ್ ಯೆವ್ನ್, ರಾಜಾ ಸದಾ ಝಿತ್ತೊ ರಾ, ತುಜೊ ಮನ್ ಕಳ್ವುತಲೆ ನಕ್ಕೊ ಅನಿ ತುಜೆ ತೊಂಡ್ ಬಾವಲ್ಲೆ ದಿಸ್ತಲೆ ನಕ್ಕೊ, 11 ನಿತಳ್ ದೆವಾಚ್ಯಾ ಆತ್ಮ್ಯಾನ್ ಭರಲ್ಲೊ ಎಕ್ ಮಾನುಸ್ ತುಜ್ಯಾ ರಾಜ್ಯಾತ್ ಹಾಯ್, ತುಜ್ಯಾ ಬಾಬಾಚ್ಯಾ ಎಳಾರುಚ್ ತೆಚೆಕ್ಡೆ ದೆವಾಚ್ಯಾ ಬುದ್ದಿಕ್ ಸಮಾ ಹೊತಲಿ ಬುದ್ದ್, ಶಾನೆಪಾನ್ ಅನಿ ಬುದ್ದಿಚೊ ಉಜ್ವೊಡ್ ದಿಸುನ್ ಯೆಲೊ, ತುಜೊ ಬಾಬಾ ನೆಬುದ್ನೆಜ್ಜರಾನ್ ತೆಕಾ ಜೊತಿಸಿ, ಮೊಡ್ಗಾರಾ, ಪಂಡಿತಾ ಅನಿ ಸಪ್ನಾ ಬಗ್ತಲ್ಯಾಂಚೊ ಮುಖಂಡ್ ಕರುನ್ ನೆಮಸ್ಲಾ. 12 ಹೊಯ್, ಬೆಲ್ತೆಶಚ್ಚರ್ ಮನ್ತಲೆ ಅನಿ ಎಕ್ ನಾವ್ ರಾಜಾಕ್ನಾ ಘೆಟಲ್ಲ್ಯಾ ದಾನಿಯೆಲಾಕ್ ಹಿ ಮೊಟಿ ಬುದ್ದ್ ಅನಿ ಶಾನೆಪಾನ್ ಅನಿ ಸಪ್ನಾಚೊ ಅರ್ಥ್ ಸಾಂಗ್ತಲೆ ಶಾನೆಪಾನ್, ಉಮಾನ್ ಸೊಡ್ಸುನ್ ಸಾಂಗ್ತಲೆ ಶಾನೆಪಾನ್, ಅಜಾಪಾಚಿ ಬುದ್ದ್ ಅನಿ ಘುಟ್ಟಾಕ್ ಹೊತ್ತಿ ವಿಶಯಾ ಮ್ಹಾಳಾಕ್ ಹಾನುನ್ ಸಾಂಗ್ತಲೆ ಶಾನೆಪಾನ್ ಹೊತ್ತ್ಯಾ ಸಾಟ್ನಿ ತೆಕಾ ರಾಜಾನ್ ತಸೆ ನೆಮಸ್ಲ್ಯಾನ್, ಅತ್ತಾ ತ್ಯಾ ದಾನಿಯೆಲಾಕ್ ಬಲ್ವುಕ್ ಲಾವ್ಲ್ಯಾರ್, ತೊ ತುಕಾ ಬರ್ವನ್ಗಿಚೊ ಅರ್ಥ್ ಸಾಂಗ್ತಾ ಮಟ್ಲಿನ್.

13 ದಾನಿಯೆಲಾಕ್ ರಾಜಾಚ್ಯಾ ಇದ್ರಾಕ್ ಹಾನ್ಲ್ಯಾನಿ, ತನ್ನಾ ರಾಜಾನ್ ದಾನಿಯೆಲಾಕ್; ರಾಜಾನ್ ಮಾಜ್ಯಾ ಬಾಬಾನ್ ಜುದಾ ಪ್ರಾಂತ್ಯಾತ್ನಾ ಧರುನ್ ಹಾನಲ್ಯಾತ್ಲೊ ದಾನಿಯೆಲ್ ಮನ್ತಲೊ ತಿಯಾಚ್ ಕಾಯ್? 14 ಪವಿತ್ರ್ ದೆವಾಂಚೊ ಆತ್ಮೊ ತುಜ್ಯಾ ವಾಂಗ್ಡಾ ರಾವ್ನ್, ತಿಯಾ ಲೈ ಬುದ್ದಿವಂತ್ ಅನಿ ತುಜ್ಯಾಕ್ಡೆ ಶಾನ್ಪಾನಾಚೊ ಉಜ್ವೊಡ್ ಹಾಯ್ ಮನುನ್ ಮಿಯಾ ಆಯ್ಕಲ್ಲೊ. 15 ತನ್ನಾ ಹ್ಯಾ ಭಿತ್ತಿ ವಯ್ಲಿ ಬರ್ವನ್ಗಿ ವಾಚುಕ್ ಅನಿ ತೆಜೊ ಅರ್ಥ್ ಸಾಂಗುಕ್ ಮೊಡ್ಗಾರಾಕ್ನಿ ಅನಿ ಬುದ್ವಂತಾಕ್ನಿ ಮಾಜ್ಯಾ ಇದ್ರಾಕ್ ಬಲ್ವಲ್ಲೊ, ಖರೆ ತೆಂಚೆನ್ ಹೆಚೊ ಅರ್ಥ್ ಸೊಡ್ವುನ್ ಸಾಂಗುಕ್ ಹೊವ್ಕ್ ನಾ. 16 ತಿಯಾ ಘುಟ್ಟಾಚಿ ವಿಶಯಾ ಮ್ಹಾಳಾಕ್ ಹಾನುನ್ ವಿವರನ್ ಕರುನ್ ಸಾಂಗ್ತೆ ಮನುನ್ ಮಿಯಾ ಆಯ್ಕಲ್ಲೊ, ಹಿ ಬರ್ವನ್ಗಿ ವಾಚುನ್ ಹೆಚೊ ಅರ್ಥ್ ಮಾಕಾ ತುಜ್ಯಾಕ್ಡೆ ಸಾಂಗುಕ್ ಹೊಲ್ಯಾರ್, ಮಿಯಾ ತುಕಾ ಝಾಂಬ್ಳ್ಯಾ ಬನ್ನಾಚೆ ಕಿಮ್ತಿಚೆ ಕಪ್ಡೆ ಕಾಂಬ್ರುನ್, ತುಜ್ಯಾ ಗಳ್ಯಾಕ್ ಸೊನ್ಯಾಚೊ ಹಾರ್ ಘಾಲ್ಸುನ್ ತುಕಾ ಮಾಜ್ಯಾ ರಾಜ್ಯಾಚ್ಯಾ ತಿನ್ ಮುಖಂಡಾತ್ನಿ ಎಕ್ಲೊ ಕರುನ್ ನೆಮ್ತಾ ಮಟ್ಲ್ಯಾನ್. 17 ತುಜೆ ದಾನ್ ತೆಚೆಕ್ಡೆ ರಾಂವ್ದಿತ್, ತುಜಿ ಆಯಾರಾ ದುಶ್ರ್ಯಾಂಚೊ ವಾಟೊ ಹೊಂವ್ದಿತ್, ಖರೆ ಹಿ ಬರ್ವನ್ಗಿ ವಾಚುನ್ ಹೆಚೊ ಅರ್ಥ್ ರಾಜಾಕ್ ಸಾಂಗ್ತಾ. 18 ರಾಜಾ, ಸಗ್ಳೆ ಕರುಕ್ ಶಕ್ತ್ ಹೊತ್ತ್ಯಾ ದೆವಾನ್ ತುಜೊ ಬಾಬಾ ರಾಜಾ ನೆಬುಕದ್ನೆಜ್ಜರಾನ್, ರಾಜ್ವಟ್ಕಿಚೆ ಮಾನ್ ಅನಿ ಸನ್ಮಾನ್ ದಿಲ್ಯಾನ್. 19 ತೆಕಾ ಲೈ ಪಿಳ್ಗಿಚಿ ಅನಿ ಭಾಶಾಚಿ ಲೊಕಾ ಭ್ಹಿಯ್ತ್, ಕಶ್ಯಾಕ್ ಮಟ್ಲ್ಯಾರ್, ಮೊಟ್ಟ್ಯಾ ದೆವಾನ್ ತೆಕಾ ಲೈ ಮೊಟೊ ರಾಜಾ ಕರ್ಲ್ಯಾನ್, ನೆಬುಕಡ್ನೆಜ್ಜರಾಕ್ ಕೊನ್ ತರ್ಬಿ ಜಿವ್ ಕಾಡುಚೆ ಮನುನ್ ಚಿಂತ್ಲ್ಯಾರ್ ತೆಕಾ ಜಿವ್ ಕಾಡುಕ್ ಲಾವ್ಲ್ಯಾನಿ, ಅನಿ ಅಪ್ನಾಕ್ ಪಾಜೆ ಹೊಲ್ಲ್ಯಾಕ್ನಿ ಹುರ್ವುನ್ ಘೆಟ್ಲ್ಯಾನ್. ಅಪ್ನಾಕ್ ಮನಾಕ್ ಯೆಲ್ಲ್ಯಾಕ್ನಿ ವರ್‍ತಿ ಹಾನ್ಲ್ಯಾನ್, ಅನಿ ಅಪ್ನಾಚ್ಯಾ ಮನಾಕ್ ಯೆಲ್ಲ್ಯಾ ಸಾರ್ಕೆ ಖಾಲ್ತಿ ಥವ್ಲ್ಯಾನ್. 20 ಖರೆ ನೆಬುಕಡ್ನೆಜ್ಜರ್ ಲೈ ಮಸ್ತಿ ಭರುನ್ ಬಡಾಯ್ ಕರಿತ್ ರ್‍ಹಾತಾನಾ, ತೆಜೊ ಅಧಿಕಾರ್ ಕಾಡುನ್ ಘೆವ್ನ್ ಹೊಲೊ, ಅನಿ ತೆಕಾ ರಾಜಾಚ್ಯಾ ಕುರ್ಚಿ ವೈನಾ ಖಾಲ್ತಿ ಉತ್ರುನ್ ತೆಚೆ ಸಗ್ಳೆ ಮೊಟೆಪಾನ್ ಅನಿ ಮಾನ್ ಕಾಡುನ್ ಘೆವ್ನ್ ಹೊಲೆ. 21 ತೆಕಾ ಮಾನ್ಸಾಂಚ್ಯಾ ಮದ್ನಾ ಕಾಡುನ್ ಟಾಕುನ್ ಹೊಲೆ, ತೆಕಾ ಜನಾವರಾಂಚಿ ಬುದ್ದ್ ಯೆಲಿ, ತೊ ಡಂಗ್ಳಿತ್ಲ್ಯಾ ಗಾಡ್ವಾಂಚ್ಯಾ ವಾಂಗ್ಡಾ ವಸ್ತಿ ರಾಲೊ ಅನಿ ಗೊರಾಂಚ್ಯಾ ಗತಿನ್ ಗವಾತ್ ಚರ್ಲ್ಯಾನ್, ಮಳ್ಬಾತ್ಲ್ಯಾ ಇಬ್ಬನಿನ್ ತೆಕಾ ಭಿಜ್ವುಲಿನ್, ತೆಕಾ ಸಮಾ ಬುದ್ದ್ ಯೆಯ್ ಪತರ್ ತೆಚಿ ಗತ್ ಲೈ ಬುರ್ಶಿ ಹೊಲ್ಲಿ, ತನ್ನಾ ತೆನಿ ಮೊಟೊ ದೆವ್ ಮಾನ್ಸಾಚ್ಯಾ ರಾಜ್ಯಾತ್ ರಾಜ್ವಟ್ಕಿ ಕರ್ತಾ, ಅನಿ ಅಪ್ನಾಚ್ಯಾ ಪಾಜೆ ಹೊಲ್ಲ್ಯಾಕ್ನಿ ನೆಮ್ತಾ ಮನ್ತಲೆ ಕಳ್ವುನ್ ಘೆಟ್ಲ್ಯಾನ್. 22 ಬೆಲ್ತೆಶಚ್ಚರ್, ತುಕಾ ಹೆ ಸಗ್ಳೆ ಗೊತ್ತುಚ್ ಹಾಯ್, ತಿಯಾ ನೆಬುಕಡ್ನೆಜ್ಜರಾಚೊ ಲೆಕ್ ಹೊಲ್ಯಾರ್ಬಿ ತಿಯಾ ಖಾಲ್ತಿ ಹೊವ್ನ್ ಚಲುಚೆ ನ್ಹಯ್. 23 ತಿಯಾ ಸೊರ್ಗಾತ್ಲ್ಯಾ ದೆವಾಕ್ ವಿರೊಧ್ ಹೊವ್ನ್ ಲೈ ಘಮ್ಮೆಂಡಿನ್ ಚಲ್ಲೆ, ತೆಜ್ಯಾ ಗುಡಿತ್ಲಿ ಆಯ್ದಾನಾ ತುಜ್ಯಾ ಇದ್ರಾಕ್ ಹಾನುನ್ ಘೆವ್ನ್ ತಿಯಾ ತುಜ್ಯಾ ರಾಜ್ಯಾಚ್ಯಾ ಮುಖಂಡಾನಿ, ತುಜ್ಯಾ ಬಾಯ್ಕೊನ್ ಅನಿ ತುಜ್ಯಾ ಹುರಲ್ಲ್ಯಾ ಬಾಯ್ಕಾನಿ ಸಗ್ಳ್ಯಾನಿ ಮಿಳುನ್ ತ್ಯಾತುರ್ ವಾಯ್ನಾ ಫಿವ್ನ್ ಬುದ್ದ್ ಡೊಳೆ ಅನಿ ಕಾನ್ ನಸಲ್ಲ್ಯಾ ಸೊನೆ, ಚಾಂದಿ, ತಾಂಬ್ಯಾಚ್ಯಾ, ಲೊಂಗ್ಟಾಚ್ಯಾ ಅನಿ ಗುಂಡ್ಯಾಚ್ಯಾ ಝಾಡಾಚ್ಯಾ ದೆವಾಕ್ನಿ ಸ್ತುತಿ ಕರ್ಲ್ಯಾಸಿ, ಖರೆ ತುಮ್ಚೊ ಜಿವ್ ಕೊನಾಚ್ಯಾ ಹಾತಿತ್ ಹಾಯ್ ಅನಿ ತುಮ್ಚಿ ಗತ್ ಕೊನಾಕ್ ಗೊತ್ತ್ ಹಾಯ್ ತೆಕಾ ಮಾನ್ ದಿವ್ಕ್ ನ್ಯಾಸಿ. 24 ತೆಜ್ಯಾ ವೈನಾ ತೊ ಹಾತ್ ಭಿತ್ತಿಚ್ಯಾ ವರ್‍ತಿ ಲಿವ್ಕ್ ಮನುನ್ ದೆವಾನ್ ಧಾಡುನ್ ದಿಲ್ಯಾನ್. 25 ತ್ಯಾ ಭಿತ್ತಿಚ್ಯಾ ವರ್‍ತಿ ಲಿವಲ್ಲೆ ಗೊಸ್ಟಿಯಾ; ಮೆನೆ, ಮೆನೆ, ತೆಕೆಲ್, ಉಪರ್ಸಿನ್. 26 ಹ್ಯಾ ಗೊಸ್ಟಿಯಾಂಚೊ ಅರ್ಥ್; ಮೆನೆ ಮಟ್ಲ್ಯಾರ್ ದೆವ್ ತುಜ್ಯಾ ರಾಜ್ಯಾಚಿ ದಿಸಾ ಮೆಜ್ತಾ, ತುಜ್ಯಾ ರಾಜ್ಯಾಚಿ ಆಕ್ರಿ ದಾಕ್ವುನಾರ್ ಹಾಯ್. 27 ತೆಕೆಲ್ ಮಟ್ಲ್ಯಾರ್, ತುಕಾ ತಾಕ್ಡಿತ್ ಘಾಲುನ್ ಮೆಜುನ್ ಬಗ್ತಾನಾ ತೆಚೆ ವಜ್ಜನ್ ಕಮ್ಮಿ ಹಾಯ್. 28 ಅನಿ ಉಪರ್ಸಿನ್ ಮಟ್ಲ್ಯಾರ್, ತುಜೊ ರಾಜ್ವಾಡೊ ಕಾಡುನ್ ಘೆವ್ನ್ ಮೆದಿಯಾಕ್ನಿ ಅನಿ ಪಾರಸಿಯಾಕ್ನಿ ದಿವ್ನ್ ಹೊಲಾ ಮಟ್ಲ್ಯಾನ್. 29 ದಾನಿಯೆಲಾಕ್ ಬೆಲ್ತೆಶಚ್ಚರಾಚ್ಯಾ ಹುಕುಮ್ ಸಾರ್ಕೆ ಝಾಂಬ್ಳ್ಯಾ ಬನ್ನಾಚೆ ಕಿಮ್ತಿಚೆ ಕಪ್ಡೆ ಕಾಂಬ್ರುನ್ ತೆಜ್ಯಾ ಗಳ್ಯಾಕ್ ಸೊನ್ಯಾಚೊ ಹಾರ್ ಘಾಲುನ್ ಅನಿ ತೆಕಾ ರಾಜ್ವಾಡ್ಯಾಚ್ಯಾ ತಿನ್ ಮುಖಂಡಾತ್ನಿ ಎಕ್ಲೊ ಕರುನ್ ನೆಮ್ಸುನ್ ಹೊಲೆ. 30 ತ್ಯಾಚ್ ದಿಸಿ ರಾತ್ತಿನ್ ಕಸ್ದಿಯಾಂಚೊ ರಾಜಾ ಬೆಲ್ತೆಶಚ್ಚರಾಕ್ ಜಿವ್ ಕಾಡುನ್ ಹೊಲೆ. 31 ಮಾನಾ ಮೆದಿಯಾಚೊ ದಾರಿಯಾಸ್ ಮನ್ತಲೊ ರಾಜ್ವಟ್ಕಿಕ್ ಯೆಲೊ, ತೊ ಲೈ ಕರುನ್ ಸಾಟಾರ್ ದೊನ್ ವರ್ಸಾಚೊ ಹೊತ್ತೊ.