Atos 12

ಲೈ ತರಾಸ್

1 ತ್ಯಾ ಯೆಳಾರ್ ಹೆರೊದ್‍ರಾಜಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾತ್ಲ್ಯಾ ಥೊಡಾಕ್ನಿ ತರಾಸ್ ದಿವ್ಕ್ ಲಾಗುನ್, 2 ಜುವಾಂವಾಚೊ ಮೊಟೊ ಭಾವ್ ಜಾಕೊಬಾಕ್ ಕೊಯ್ತ್ಯಾನಿ ಜಿಂವ್ ಕಾಡ್ವುಲ್ಯಾನ್. 3 ಜುದೆವಾಂಚ್ಯಾ ಲೊಕಾಕ್ನಿ ಹೆ ಸಗ್ಳೆ ಬರೆ ದಿಸ್ಲಿ ಮನ್ತಲೆ ಹೆರೊದಾನ್ ಕಳ್ವುನ್ ಘೆಟ್ಲ್ಯಾನ್, ತಸೆ ಹೊವ್ನ್ ತೆನಿ ಪೆದ್ರುಕ್ ಭಾಂದುನ್ ಬಂಧಿಖಾನ್ಯಾತ್ ಘಾಲುಕ್ ಲಾವ್ಲ್ಯಾನ್, ತನ್ನಾ ಫುಗ್ ನಸಲ್ಲ್ಯಾ ಭಾಕ್ರಿಯಾಂಚೊ ಸನ್ ಚಲಿತ್ ಹೊತ್ತೊ. 4 ಸೊಳಾ ಸೈನಿಕಾ ಪೆದ್ರುಕ್ ರಾಕ್ವಲಿ ಹೊತ್ತೆ, ಪಾಸ್ಕಾಚೊ ಸನ್ ಸರಲ್ಯಾ ತನ್ನಾ ತೆಕಾ ಲೊಕಾಂಚ್ಯಾ ಇದ್ರಾಕ್ ಹಾನುನ್ ಇಬೆ ಕರುಚೆ ಮನುನ್ ಘೆಟಲ್ಯಾನ್. 5 ಪೆದ್ರು ಬಂದಿಖಾನ್ಯಾತ್ ರಾತಾನಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾತ್ಲಿ ಲೊಕಾ ತೆಚ್ಯಾ ಸಾಟ್ನಿ ಪುರಾ ಮನ್ ದಿವ್ನ್ ಮಾಗ್ನಿ ಕರಿತ್.

ಪೆದ್ರುಕ್ ಬಂದಿಖಾನ್ಯಾತ್ನಾ ಸುಟ್ಕಾ ಕರಲ್ಲೆ

6 ಪೆದ್ರು ದೊನ್ ಸೈನಿಕಾಂಚ್ಯಾ ಮದ್ದಿ ನಿಜಲೊ ಹೊತ್ತೊ, ಅನಿ ತೆಕಾ ದೊನ್ ಸರ್ಪೊಳಿಯಾನಿ ಭಾಂದಲೆ ಹೊತ್ತೆ, ತನ್ನಾ ರಾತ್ ಹೊಲ್ಲಿ ಅನಿ ಲೈ ಲೊಕಾ ಸೈನಿಕಾ ಧಾರಾತ್‍ ಬಿ ರಾಕಿತ್ ಹೊತ್ತಿ, ದುಸ್ರೆಂದಿಸಾ ಪೆದ್ರುಕ್ ಲೊಕಾಂಚ್ಯಾ ಇದ್ರಾಕ್ ಹಾನುಚೆ ಮನುನ್ ಹೆರೊದಾನ್ ಯೆವ್ವುನ್ ಘೆವ್ನ್ ಹೊತ್ತ್ಯಾನ್. 7 ಎಗ್ದಮ್, ಧನಿಯಾಚೊ ದುತ್ ಥೈ ಇಬೆ ರ್‍ಹಾಲೊ, ತ್ಯಾ ಖೊಲಿತ್ ಉಜ್ವೊಡ್ ಹೊಲೊ, ದೆವ್ ದುತಾನ್ ಪೆದ್ರುಕ್ ಆಪ್ಡುನ್ ಉಟ್ವುನ್ "ಲಗ್ಗುನಾ ಉಟ್!" ಮಟ್ಲ್ಯಾನ್, ತನ್ನಾ ತಾಬೊಡ್ತೊಬ್ ತೆಚ್ಯಾ ಹಾತಿಚಿ ಸರ್ಪೊಳಿಯಾ ಸುಟುನ್ ಪಡ್ಲಿ.

8 ದೆವಾಚ್ಯಾ ದುತಾನ್ ಪೆದ್ರುಕ್, "ಕಪ್ಡೆ ನೆಸುನ್ ಘೆ; ಅನಿ ವ್ಹಾನಾಯ್ಯಾ ಘಾಲುನ್ ಘೆ" ಮನುನ್ ಸಾಂಗ್ಲ್ಯಾನ್.

ಪೆದ್ರುನ್ ತಸೆಚ್ ಕರ್‍ಲ್ಯಾನ್, ಮಾನಾದೆವ್ ದುತಾನ್ ತುಜೊ ಝಗೊ ಬಾಂಧುನ್ ಘೆವ್ನ್ ಮಾಜ್ಯಾ ಫಾಟ್ನಾ ಯೆ ಮಟ್ಲ್ಯಾನ್. 9 ದೆವಾಚೊ ದುತ್ ಭಾಯ್ರ್ ಗೆಲೊ ಮಾನಾ ಪೆದ್ರುಬಿ ತೆಚ್ಯಾ ವಾಂಗ್ಡಾ ಗೆಲೊ, ದೆವಾಚೊ ದುತ್ ಅಶೆ ಕರ್‍ತಾ ಮನ್ತಲೆ ಪೆದ್ರುಕ್ ಖರೆಚ್‍ಬಿ ಗೊತ್ತ್ ನತ್ತೆ, ಅಪ್ನಿ ಬಗುಲಾಗಲೆ ಸಗ್ಳ್ಯೆದರ್ಶನ್ ಮನುನ್ ತೆನಿ ಚಿಂತ್ಲ್ಯಾನ್. 10 ದೆವಾಚೊ ದುತ್ ಅನಿ ಪೆದ್ರುನ್ ಅದ್ದಿಚಿ ಅನಿ ದೊನ್ವೆಚಿ ರಾಕ್ವನ್ ಹೊತ್ತೆ ಜಾಗೆ ದಾಟ್ಲ್ಯಾನಿ, ಮಾನಾ ತೆನಿ ಅಪ್ಲ್ಯಾ ಗಾಂವಾಕ್ಡೆ ಜಾತಲ್ಯಾ ಲೊಂಗ್ಟಾಂಚ್ಯಾ ದಾರಾಕ್ಡೆ ಯೆಲೆ, ತೆ ದಾರ್ ಅಪ್ಲ್ಯಾ ಯೆವ್ಡ್ಯಾಕುಚ್ ಅಪ್ನಿ ಉಗಡ್ಲೆ ಪೆದ್ರು ಅನಿ ದೆವಾಚೊ ದುತ್ ತ್ಯಾ ದಾರಾನಿ ಭಾಯ್ರ್ ಯೆವ್ನ್ ಉಲ್ಲೆ ದುರ್ ಗೆಲ್ಲ್ಯಾ ತನ್ನಾ ದೆವ್ ದುತ್ ಪೆದ್ರುಕ್ ಸೊಡುನ್ ಗೆಲೊ.

11 ಹೊಲ್ಲಿ ಸಂಗ್ತಿಯಾ ತನ್ನಾ ಪೆದ್ರುನ್ ಕಳ್ವುನ್ ಘೆವ್ನ್ "ಧನಿಯಾನ್ ದೆವಾಚ್ಯಾ ದುತಾಕ್ ಖರೆಬಿ ಮಾಜ್ಯಾಕ್ಡೆ ಧಾಡುನ್ ದಿಲ್ಯಾನ್ ಮನ್ತಲೆ ಮಾಕಾ ಅತ್ತಾ ಕಳ್ಳೆ, ತೆನಿ ಮಾಕಾ ಹೆರೊದ್ ರಾಜಾಚ್ಯಾ ಹಾತಿತ್ನಾ ಪಾರ್ ಕರ್‍ಲ್ಯಾನ್, ಜುದೆವಾಂಚ್ಯಾ ಲೊಕಾನಿ ಮಾಕಾ ಬುರ್ಶೆ ಹೊತಾ ಮನುನ್ ಚಿಂತಲ್ಯಾನಿ, ಖರೆ ಧನಿಯಾನ್ ಮಾಕಾ ತರಾಸಾತ್ನಾ ರಾಕ್ವನ್ ಕರ್‍ಲ್ಯಾನ್" ಮನುನ್ ಘೆಟ್ಲ್ಯಾನ್.

12 ಮಾನಾ ತೊ ಮರಿಯಾಂಚ್ಯಾ ಘರಾಕ್ ಗೆಲೊ ಮರಿಯಾ ಮನ್ತಲಿ ಜುವಾಂವಾಂಚಿ ಬಾಯ್ ಜುವಾಂವಾಕ್ ಮಾರ್ಕ್ ಮನುನ್‍ಬಿ ಬಲ್ವಿತ್, ಥೈ ಲೈ ಲೊಕಾ ಗೊಳಾ ಹೊವ್ನ್ ಮಾಗ್ನಿ ಕರಿತ್. 13 ಪೆದ್ರುನ್ ತ್ಯಾ ಘರಾಕ್ ಯೆವ್ನ್ ಧಾರ್ ಬಡ್ವುಲ್ಯಾನ್, ರೊದ್ ಮನ್ತಲಿ ಆಳ್ ಕೊನ್‍ ಕಾಯ್ ಮನುನ್ ಬಗುಕ್ ಯೆಲಿ. 14 ರೊದೆನ್ ಪೆದ್ರುಚಿ ಧನ್ ವಳಕ್ಲಿನ್, ಅನಿ ತಿಕಾ ಲೈ ಕುಶಿ ಹೊಲಿ, ದಾರ್ ಕಾಡ್ತಲೆ ಇಸ್ರುನ್ ತಿ ಭುತ್ತುರ್ ಮಾಗ್ನಿ ಕರುಕ್ ಲಾಗಲ್ಲ್ಯಾಂಚ್ಯಾಕ್ಡೆ ಪಳುನ್ ಗೆಲಿ ಅನಿ "ಪೆದ್ರು ಭಾಯ್ರ್ ಇಬೆ ಹಾಯ್!" ಮಟ್ಲಿನ್. 15 ತನ್ನಾ ತ್ಯಾ ದೆವಾಚ್ಯಾ ಲೊಕಾನಿ "ತುಕಾ ಪಿಶೆ ಧರ್ಲಾ!" ಮಟ್ಲ್ಯಾನಿ, ಖರೆ ತಿನೆ ಅಪ್ನಿ ಸಾಂಗುಲಾಗಲೆ ಖರೆಚ್ ಮನುನ್ ಸಾಂಗ್ಲಿನ್, ತಸೆ ಹೊವ್ನ್ ತೆನಿ, ತೊ ಪೆದ್ರುಚೊ ದುತ್ ಹೊವ್ಕ್ ಫಿರೆ ಮನುನ್ ಸಾಂಗ್ಲ್ಯಾನಿ.

16 ಖರೆ ಪೆದ್ರು ದಾರ್ ಬಡ್ವುಂಗೆತುಚ್ ಹೊತ್ತೊ, ತ್ಯಾ ದೆವಾಚ್ಯಾ ಲೊಕಾನಿ ಧಾರ್ ಕಾಡುನ್ ಪೆದ್ರುನ್ ಬಗುನ್ ವಿಸ್ಮಿತ್ ಹೊಲ್ಯಾನಿ. 17 ಪೆದ್ರುನ್ ತೆಂಕಾ ಗಪ್ಪ್ ರ್‍ಹಾಯ್ ಸಾರ್ಕೆ ಸೊನ್ನಾಯ್ ಕರ್‍ಲ್ಯಾನ್, ಅನಿ ಧನಿಯಾನ್ ಅಪ್ನಾಕ್ ಬಂದಿಖಾನ್ಯಾತ್ನಾ ಸೊಡ್ವುನ್ ಹಾನಲೆ ಕಶೆ ಮನ್ತಲೆ ತೆಂಕಾ ಸಾಂಗುನ್, ಜಾಕೊಬಾಕ್ ಅನಿ ಹುರಲ್ಲ್ಯಾ ಭಾವಾಕ್ನಿಬಿ ಹಿ ಸಂಗ್ತಿಯಾ ಕಳ್ವಾ ಮನುನ್ ಸಾಂಗ್ಲ್ಯಾನ್, ಮಾನಾ ಪೆದ್ರು ಥೈತ್ನಾ ದುಸ್ರ್ಯಾಕ್ಡೆ ಗೆಲೊ.

18 ದುಸ್ರ್ಯಾಂದಿಸಿ, ಪೆದ್ರು ಖೈ ಗೆಲೊ ಮನುನ್ ಸೈನಿಕಾತ್ನಿ ಮೊಟೊ ಗೊಂದಲ್ ಹೊಲೊ. 19 ಖೈ ಹುಡಕ್ಲ್ಯಾರ್ಬಿ ಹೆರೊದಾಕ್ಡೆ ಪೆದ್ರುಕ್ ಹುಡ್ಕುನ್ ಕಾಡುಕ್ ಹೊವ್ಕ್ ನಾ, ತಸೆ ಹೊವ್ನ್ ತೆನಿ ರಾಕ್ವಲ್ಯಾಕ್ನಿ ಇಚಾರುನ್ ತೆಂಕಾ ಮರ್ನ್ನಾಚಿ ಶಿಕ್ಷಾ ದಿಲ್ಯಾನ್, ಮಾನಾ ಹೆರೊದಾನ್ ಜುದೆಯಾ ಮನ್ತಲ್ಯಾ ಶಾರಾತ್ನಾ ಸೆಜರೆಯ ಮನ್ತಲ್ಯಾ ಶಾರಾಕ್ ಜಾವ್ನ್ ಥೊಡೆ ದಿಸಾ ಥೈಚ್ ಹೊತ್ತೊ.

ಹೆರೊದಾಚೆ ಮರಾನ್

20 ತಿರ್ ಅನಿ ಸಿದೊನ್ ಮನ್ತಲ್ಯಾ ಶಾರಾಂತ್ಲಾ ಲೊಕಾಂಚೆರ್ ಹೆರೊದಾಕ್ ಲೈ ರಾಗ್ ಯೆಲ್ಲೊ, ತ್ಯಾ ಶಾರಾಂತ್ಲಿ ಲೊಕಾ ಹೆರೊದಾಕ್ ಲೆಕ್ ಭೆಟ್ವುಚೆ ಮನುನ್ ಗೊಳಾ ಹೊವ್ನ್ ಗೆಲಿ, ಅನಿ ಬ್ಲಾಸ್ತಾ ಮನ್ತಲ್ಯಾ ಹೆರೊದಾಚ್ಯಾ ವಯಕ್ತಿಕ್ ಸೆವಕಾಕ್ ಅಪ್ನಾಕ್ಡೆ ಕರುನ್ ಘೆಟ್ಲ್ಯಾನಿ, ತೆನಿ ಅಪ್ನಾಂಚ್ಯಾ ವಾಂಗ್ಡಾ ಹೆರೊದ್‍ರಾಜಾನ್ ಶಾಂತ್ಪಾನಾಚೊ ಕರಾರ್ ಕರುನ್ ಘೆವ್ಚೆ ಮನುನ್ ಸಾಂಗ್ಲ್ಯಾನಿ, ಕಶ್ಯಾಕ್ ಮಟ್ಲ್ಯಾರ್, ತೆಂಚ್ಯಾ ಗಾಂವಾಕ್ನಿ ಹೆರೊದಾಚ್ಯಾ ಗಾಂವಾಕ್ನಾಚ್ ಜೆವ್ನಾಕ್ ಪಾಜೆ ಹೊಲ್ಲೆ ಸಗ್ಳೆ ಯೆಯ್ ನ್ಹಯ್.

21 ತೆಂಕಾ ಭೆಟುಕ್ ಮನುನ್ ಹೆರೊದ್ ರಾಜಾನ್ ಎಕ್‍ ದಿಸ್ ವಳಕ್ ಕರುನ್, ತ್ಯಾ ದಿಸಿ ತೆನಿ ಬರೆ ದಿಸ್ತಲೆ ರಾಜಾಚೆ ಕಪ್ಡೆ ನೆಸುನ್ ಘೆವ್ನ್ ಅಪ್ಲ್ಯಾ ಸಿವಾಸನಾರ್ ಬಸುನ್ ಲೊಕಾಕ್ನಿ ಭಾಶಾನ್ ಕರ್‍ಲ್ಯಾನ್. 22 ತ್ಯಾ ಲೊಕಾನಿ, "ಹಿ ಧನ್ ದೆವಾಚಿಚ್ ಮಾನ್ಸಾಚಿ ನ್ಹಯ್" ಮನುನ್ ಬೊಬ್ ಮಾರ್‍ಲ್ಯಾನಿ. 23 ಹೆರೊದಾನ್ ಹಿ ಹೊಗ್ಳಾಪಾ ಸಗ್ಳಿ ಅಪ್ನಾಚಿಚ್ ಕರುನ್ ಘೆಟ್ಲ್ಯಾನ್, ತೆನಿ ದೆವಾಕ್ ಮಹಿಮಾ ಕರುಕ್ ನಾ ತಸೆ ಹೊವ್ನ್ ತನ್ನಾಚ್ ಧನಿಯಾಚ್ಯಾ ದೆವ್ ದುತಾನ್ ತೆಕಾ ರೊಗ್ ಯೆಯ್ ಸಾರ್ಕೆ ಕರ್‍ಲ್ಯಾನ್, ಅನಿ ತೆಚ್ಯಾ ಅಂಗಾತ್ಲಿ ಭುತ್ತುರ್‍ಲಿ ಭಾಗಾ ಕಿಡ್ಯಾನಿ ಖಾವ್ನ್ ತೊ ಮರುನ್ ಗೆಲೊ.

24 ದೆವಾಚಿ ಬರಿ ಖಬರ್ ಸಗ್ಳ್ಯಾಕ್ಡೆ ಪಗ್ಳುಲಾಗಲಿ ಅನಿ ಲೈ ಲೊಕಾಕ್ನಿ ಗಾವ್ಲಾಗಲಿ,

25 ಬಾರ್ನಾಬಾಸ್ ಅನಿ ಸಾವ್ಲಾ ಜೆರುಜಲೆಮ್ ಮನ್ತಲ್ಯಾ ಗಾಂವಾತ್ ಅಪ್ಲೆ ಕಾಮ್ ಕರುನ್ ಫಾಟಿ ಅಂತಿಯೊಕ್ಯ್ ಶಾರಾಕ್ ಯೆಲ್ಯಾನಿ, ಮಾರ್ಕ್ ಮನ್ತಲ್ಯಾ ಜುವಾಂವಾಕ್ಬಿ ತೆಂಚ್ಯಾ ವಾಂಗ್ಡಾ ಘೆವ್ನ್ ಯೆಲೆ.