ಎಜ್ಕೆಲ್ 26

ತಿರ್ ಶಾರಾಚ್ಯಾ ವಿರೊಧ್ ಪರ್‍ವಾದನ್

1 ಯೆಹೊಯಾಕಿನಾಚ್ಯಾ ಬಂಧಿ ಹೊಲ್ಲ್ಯಾ, ಅಕ್ರಾವ್ಯಾ ವರ್ಸಾಚ್ಯಾ ಎಕ್ ಮಯ್ನ್ಯಾಚ್ಯಾ ಪಯ್ಲೆಚ್ಯಾ ದಿಸಿ, ಸರ್ವೆಸ್ಪರಾನ್ ಮಾಕಾ ಹಿ ಗೊಸ್ಟ್ ದಿಲ್ಯಾನ್. 2 ನರ್ ಮಾನ್ಸಾ, ತಿರ್ ಅನಿ ಜೆರುಜಲೆಮಾಚ್ಯಾ ವಿಶಯಾತ್, ಆಹಾ, ಲೊಕಾಕ್ನಿ ಅಡ್ಕಳ್ ಹೊವ್ನ್ ಇಬೆ ಹೊತ್ತೆ ದಾರ್ ಮೊಡುನ್ ಗೆಲೆ! ಮಾಜೆಕ್ಡೆ ಪರತಲ್ಲೆ ಜೆರುಜಲೆಮ್ ಹಾಳ್ ಹೊಲ್ಲ್ಯಾ ಸಾಟ್ನಿ ಮಿಯಾ ಭರ್ತಾ ಮನುನ್ ಘೆಟಲ್ಲ್ಯಾ ಸಾಟ್ನಿ, 3 ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಅಬಕ್ ತಿರ್ ಶಾರ್, ಮಿಯಾ ತುಕಾ ವಿರೊಧ್ ಹೊಲಾ, ಸಮುಂದರಾಚಿ ಲಾಟಾ ಉಟಲ್ಲ್ಯಾ ಸಾರ್ಕೆ ಮಿಯಾ ಲೈ ಲೊಕಾಕ್ನಿ ತುಜ್ಯಾ ವರ್‍ತಿ ಉಟಿ ಸಾರ್ಕೆ ಕರ್ತಾ. 4 ತೆನಿ ತಿರ್ ಶಾರಾಚಿ ಬಿರಕ್ ಪಡಲ್ಲಿ ಭಿತ್ತಿಯಾ ಪಾಡ್ವುನ್, ತೆಚಿ ಖಿಲ್ಲೊ ಪಾಡ್ವುತಾತ್, ಮಿಯಾ ತೆಚಿ ಮಾಟಿ ಕೆದ್ರುನ್ ಝಾಡುನ್, ಕಾಡುನ್ ತೆಕಾ ಕಾಯ್ಬಿ ನಾ ಕರ್ತಾ. 5 ತೆ ಸಮುಂದರಾಚ್ಯಾ ಮದ್ದಿ ಜಾಳ್ಯಾಕ್ನಿ ಘಾಲ್ತಲೊ ಜಾಗೊ ಹೊವ್ನ್ ರ್‍ಹಾತಾ, ಹೆ ಮಿಯಾಚ್ ಬೊಲ್ಲಾ, ಮನುನ್ ಸರ್ವೆಸ್ಪರ್ ದೆವ್ ಸಾಂಗ್ತಾ, ಲೈ ಲೊಕಾ ಎವ್ನ್ ತುಕಾ ಕಾಯ್ಬಿ ನಾ ಸಾರ್ಕೊ ಕರ್‍ತಾತ್. 6 ಮ್ಹಾಳ್ ಜಾಗ್ಯಾ ವಯ್ಲಿ ತೆಚಿ ಗಾಂವಾ ತಲ್ವಾರಿನ್ ಮರ್ತಾತ್, ತನ್ನಾ ಮಿಯಾಚ್ ಸರ್ವೆಸ್ಪರ್ ದೆವ್ ಮನುನ್ ಸಗ್ಳ್ಯಾಕ್ನಿ ಕಳ್ತಾ. 7 ಸರ್ವೆಸ್ಪರ್ ದೆವ್ ಅಸೆ ಸಾಂಗ್ತಾ, ಅಬಕ್, ರಾಜಾಂಚೊ ರಾಜಾ, ಬಾಬೆಲಾಚೊ ರಾಜಾ ಹೊವ್ನ್ ಹೊತ್ತ್ಯಾ ನೆಬುಕದ್ನೆಚರಾಕ್, ಘೊಡ್ಕೊ, ರಥಾ, ಹಾತ್ತಿ, ಲೊಕಾಂಚೊ ತಾಂಡೊ ಹ್ಯಾ ಸಗ್ಳ್ಯಾನ್ ಭರಲ್ಲೊ ಹೊವ್ನ್, ದಿಸ್ ಉಗವ್ತಲ್ಯಾ ದಿಕ್ಕಾಕ್ನಾ ತೆಕಾ ತಿರ್ ಶಾರಾ ವರ್‍ತಿ ಯೆಯ್ ಸಾರ್ಕೆ ಕರ್ತಾ. 8 ತೊ ಮ್ಹಾಳ್ ಜಾಗ್ಯಾಚ್ಯಾ ತುಜ್ಯಾ ಗಾಂವಾಕ್ನಿ ತಲ್ವರಾನಿ ಮಾರುನ್, ತುಕಾ ವಿರೊಧ್ ಹೊವ್ನ್ ಬದು ಘಾಲುನ್ ದಿಬ್ಬ್ ಘಾಲ್ತಾ, 9 ಗುರಾನಿ ಉಕಲಲ್ಲ್ಯಾಕ್ನಿ ಧಾಡುನ್ ಅಪ್ನಾಚ್ಯಾ ಭಿತ್ತಿ ಫೊಡ್ತಲೆ ಮೊಟ್ಟ್ಯಾ ನಾಕ್ಡಾಚ್ಯಾ ನಾಟಾನಿ, ತುಜ್ಯಾ ಬಿರ್‍ಕಾ ಫುಟಲ್ಲಿ ಭಿತ್ತಿಯಾಕ್ನಿ ಮಾರುನ್, ಅಪ್ನಾಚ್ಯಾ ತಲ್ವರಾನಿ ತುಜೆ ಖಿಲ್ಲೊ ಫೊಡುನ್ ಟಾಕ್ತಾ. 10 ತೆಜ್ಯಾ ಮ್ಹೆಜುಕ್ ಹೊಯ್ನಾ ತವ್ಡ್ಯಾ ಘೊಡ್ಕಿಯಾನಿ ಉಟಲ್ಲಿ ಧುಳ್ ತುಕಾ ಧಾಪ್ತಾ, ಬಿರಕ್ ಯೆಲ್ಲ್ಯಾ ಖಿಲ್ಲೆತ್ನಿತ್ ವಿರೊಧಿ ಗುಸಲ್ಯಾ ಸಾರ್ಕೆ ತೊ ತುಜ್ಯಾ ದಾರಾತ್ನಿ ಗುಸ್ತಾನಾ, ಘೊಡ್ಕಿಯಾ ಪಳ್ತಲೆ, ಬಯ್ಲ್ ಗಾಡಿಯಾ, ರಥಾ ಹೆಂಚ್ಯಾ ಆವಾಜಾಕ್ ತುಜಿ ಭಿತ್ತಿಯಾ ಹಾಲ್ತಾತ್. 11 ತೊ ಅಪ್ನಾಚ್ಯಾ ಘೊಡ್ಕಿಯಾಂಚ್ಯಾ ಕಟ್ಕೆ ತುಜಿ ವಾಟಾ ತುಡ್ವುಕ್ ಲಾವ್ನ್, ತಲ್ವಾರಾನಿ ತುಜ್ಯಾ ಲೊಕಾಕ್ನಿ ಮಾರುನ್, ತುಜೆ ಘಟ್ ಇಬೆ ಹೊತ್ತೆ ಖಾಂಬೆ ಪಾಡ್ವುತಾ. 12 ತೆಚಿ ಸಯ್ನಿಕಾ ತುಜಿ ಆಸ್ತಿ ಲುಟುನ್ ಕಾಡುನ್ಗೆವ್ನ್, ತುಜಿ ಸಾಮಾನಾ ಖಬ್ಜಾ ಕರುನ್ಗೆತ್, ತುಜಿ ಭಿತ್ತಿಯಾ ಪಾಡ್ವುನ್, ತುಜಿ ಸುಂದರ್ ಹೊತ್ತಿ ಘರಾ ಪಾಡ್ವುನ್, ತುಜಿ ಮಾಟಿ, ಗುಂಡೆ, ಝಾಡಾ ಸಗ್ಳೆ ಸಮುಂದರಾಚೊ ವಾಟೊ ಕರ್‍ತಾತ್. 13 ಮಿಯಾ ತುಜ್ಯಾ ಗಿತಾಂಚೊ ಧನ್ ಇಬೆ ಕರ್ತಾ, ತುಜ್ಯಾ ವಿನೆಚಿ ಧನ್ ಆಯ್ಕಿನಾ. 14 ಮಿಯಾ ತುಕಾ ಬೊಳ್ ಗುಂಡಾ ಸಾರ್ಕೆ ಕರ್ತಾ, ತಿಯಾ ಜಾಳ್ಯಾಕ್ನಿ ಹಾತರಲ್ಲೊ ಗುಂಡೊ ಹೊತೆಯ್, ತುಜ್ಯಾ ವರ್‍ತಿ ಅನಿ ಘರ್ ಭಾಂದಿನಾತ್, ಸರ್ವೆಸ್ಪರ್ ಮಿಯಾಚ್ ಬೊಲುಲ್ಲಾ, ಹಿ ರಾಜಾ ಸರ್ವೆಸ್ಪರಾಚೆ ಬೊಲ್ನೆ. 15 ಸರ್ವೆಸ್ಪರ್ ತಿರ್ ಶಾರಾಕ್ ಅಸೊ ಸಾಂಗ್ತಾ, ತುಜ್ಯಾ ಮದ್ದಿ ಖುನ್ ಹೊವ್ನ್ ಘಾವ್ ಹೊಲ್ಲಿ ಲೊಕಾ ನರ್ಳುನ್ಗೆತ್ ರ್‍ಹಾತಾನಾ, ತಿಯಾ ಡಬ್ಬ್ ಪಡ್ತಲ್ಯಾ ನಾದಾಕ್ ಸಮುಂದರಾಚ್ಯಾ ದಂಡೆಕ್ ರಾತಲಿ ಘರಾ ಹಾದರ್ತಾತ್ ನ್ಹಯ್. 16 ತನ್ನಾ ಸಮುಂದರಾಚ್ಯಾ ಭೊತ್ಯಾನಿ ಹೊತ್ತಿ ಸಗ್ಳೆ ರಾಜಾ, ಅಪ್ನಾಚ್ಯಾ ಸಿಂವಾಸನಾಂಚ್ಯಾ ವಯ್ನಾ ಉತ್ರುನ್, ಝಗೆ ಕಾಡುನ್ ಟಾಕುನ್, ಹಾತಿನ್ ಸಿವಲ್ಲೆ ಕಪ್ಡೆ ಕಾಡುನ್ ಟಾಕುನ್, ಥರ್ಥರೊ ಕಾಂಬ್ರುನ್ ಘೆವ್ನ್, ಜಿಮ್ನಿ ವರ್‍ತಿ ಬಸುನ್ ಹರ್ ಎಕ್ ಎಳಾರ್ಬಿ ಭಿಂವ್ನ್, ಥರ್ಥರುನ್ಗೆತ್ ತುಕಾ ಭಿಂವ್ನ್ ರ್‍ಹಾತ್ಯಾತ್. 17 ಹೆನಿ ತುಜ್ಯಾ ವಿಶಯಾತ್, ವಿಪ್ಳಾಪ್ ದಾಕ್ವುನ್, ಢೊನ್ ಚಾಲ್ವುತಲ್ಯಾಂಚ್ಯಾ ಘರಾ, ನಾವ್ ಘೆಟಲ್ಯಾ ಗಾಂವಾ, ಸಮುಂದರಾಕ್ನಾ ಬಳ್ ಘೆಟಲ್ಲ್ಯಾ ಶಾರಾ, ತಿಯಾ ಲೈ ಹಾಳ್ ಹೊಲೆಯ್, ಸಮುಂದರಾತ್ ಫಿರ್ತಲಿ ಲೊಕಾ ಭಿಂಯಾನ್ ಭರಲ್ಲಿ ಹೊತ್ತ್ಯಾ ಸಾಟ್ನಿ, ತುಜಿ ಲೊಕಾ ಲೈ ಹಾಳ್ ಹೊಲಿ. 18 ಹ್ಯಾ ತುಜ್ಯಾ ಹಾಳ್ ಹೊತಲ್ಯಾ ದಿಸಾತ್, ಸಮುಂದರಾಚಿ ದಂಡ್ ಹಾಲ್ತಾ, ತಿಯಾ ನಾ ಹೊವ್ನ್ ಸಮುಂದರಾಚ್ಯಾ ದಂಡೆ ವಯ್ಲಿ ಗಾಂವಾ ಕಡ್ಕಡ್ತಾತ್, ಮನ್ತಲಿ ವಿಪ್ಳಾಪಾಚಿ ಗಿತ್ ಆಯಿಕ್ತಾ. 19 ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಮಿಯಾ ತುಕಾ ಹಾಳ್ ಗಾಂವ್ ಕರುನ್ ಮಾನ್ಸಾ ನತ್ತ್ಯಾ ಶಾರಾಂಚ್ಯಾ ಗತಿಕ್ ಹಾನುನ್, ತಿಯಾ ಪಾನಿಯಾತ್ನಿ ಬುಡುನ್ ಜಾಯ್ ಸಾರ್ಕೆ ತುಜ್ಯಾ ವರ್‍ತಿ ಮೊಟೆ ಸಮುಂದರ್ ಯೆಲ್ಲ್ಯಾ ತನ್ನಾ, 20 ಜುನ್ನ್ಯಾ ಕಾಳಾತ್ ಹಾಳ್ ಹೊಲ್ಲ್ಯಾ ಶಾರಾಂಚ್ಯಾ ಸಾರ್ಕೆ ತುಕಾ ಲೈ ಪಾತಾಳಾಕ್ ಡಕ್ಳುನ್ ಉತರಲ್ಲ್ಯಾ ಅದ್ಲ್ಯಾ ಯೆಳಾಚ್ಯಾಂಚ್ಯಾ ವಾಂಗ್ಡಾ ವಸ್ತಿ ರ್‍ಹಾತಾ, ಹೊಯ್ ತಿಯಾ ತುಜಿ ಮಹಿಮಾ ಜಿವಾಚ್ಯಾ ಲೊಕಾತ್ ಇಬೆ ಕರಿನಸ್ತಾನಾ, ಲೊಕಾಚ್ ನಾತ್ ಸಾರ್ಕೆ ತುಕಾ ಪಾತಾಳಾಕ್ ಉತರಲ್ಲ್ಯಾಂಚ್ಯಾ ವಾಂಗ್ಡಾ ಮಿಳ್ವುತಾ. 21 ತುಕಾ ಲೈ ನಾಶ್ ಕರ್ತಾ, ತಿಯಾ ನಾ ಹೊತೆಯ್, ಕವ್ಡೆ ಹುಡಕ್ಲ್ಯಾರ್ಬಿ ತಿಯಾ ಕನ್ನಾಬಿ ಗಾವಿ ನ್ಹಯ್, ಹೆ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್.