1 ಸರ್ವೆಸ್ಪರಾನ್ ಮಾಜ್ಯಾ ವಾಂಗ್ಡಾ ಬೊಲ್ಲ್ಯಾನ್. 2 ನರ್ ಮಾನ್ಸಾ, ತಿಯಾ ಸೆಯಿರ್ ಮಡ್ಡಿಕ್ಡೆ ಪರ್‍ತುನ್ ಇಬೆ ರ್‍ಹಾವ್ನ್, ತೆಕಾ ಹಿ ದೆವಾಚಿ ಖಬರ್ ಸಾಂಗ್, 3 ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಸೆಯಿರ್ ಮಡ್ಡಿ, ಅಬಕ್ ಮಿಯಾ ತುಕಾ ವಿರೊದ್ ಹೊವ್ನ್ ಹಾಯ್, ಮಿಯಾ ತುಜ್ಯಾ ಗಾಂವಾಂಚ್ಯಾ ವರ್‍ತಿ ಹಾತ್ ಉಕ್ಲುನ್ ನಾಶ್ ಕರ್ತಾ. 4 ತುಜಿ ಶಾರಾ ನಾಶ್ ಹೊತಾತ್, ತಿಯಾ ಡಂಗಳ್ ಹೊತೆಯ್, ತನ್ನಾ ಮಿಯಾಚ್ ಸರ್ವೆಸ್ಪರ್ ಮನುನ್ ಕಳ್ವುನ್ಗೆತೆಯ್. 5 ತಿಯಾ ಇಜ್ರಾಯೆಲಾಂಚ್ಯಾ ವರ್‍ತಿ ಲೈ ಯೆಳಾಚ್ಯಾ ಸಗೊಳ್ ರಾಗ್ ಥವ್ನ್, ತೆಂಚ್ಯಾ ಚುಕೆಂಚ್ಯಾ ಆಕ್ರಿಚ್ಯಾ ಎಳಾರ್ ಸಂಕಟ್ ಯೆಲ್ಲ್ಯಾ ತನ್ನಾ, ತೆಂಕಾ ತಲ್ವಾರಾಚ್ಯಾ ತೊಂಡಾಕ್ ಗುರಿ ಕರ್ತಾ. 6 ತೆಚ್ಯಾ ವಯ್ನಾ ಮಾಜ್ಯಾ ಜಿವಾಚ್ಯಾ ವರ್‍ತಿ ಆನ್ ಘಾಲುನ್ ಸಾಂಗ್ತಾ, ಮಿಯಾ ತುಕಾ ರಗ್ತಾನ್ ಭರಿಸಾರ್ಕೆ ಕರ್ತಾ, ತಿಯಾ ರಗಾತ್ ಗಳ್ವುಕ್ ಫಾಟಿ ಸರ್ಕಿ ನಸಲ್ಲ್ಯಾ ಸಾಟ್ನಿ, ತುಕಾ ರಗ್ತಾಚೊ ಹಂವಾರೊಚ್ ತುಕಾ ಫಾಟ್ ಲಾಗ್ತಾ. ಹೆ ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್. 7 ಸೆಯಿರ್ ಮಡ್ಡಿ, ಮಿಯಾ ತುಜ್ಯಾ ಗಾಂವಾಕ್ನಿ ಹಾಳ್ ಪಾಳ್ ಕರುನ್, ತ್ಯಾತುರ್ ಜಾತ ಯೆತಲ್ಯಾಕ್ನಿ ನಾಶ್ ಕರ್ತಾ. 8 ತುಜ್ಯಾ ಮಡ್ಡಿಯಾಕ್ನಿ ತುಜ್ಯಾ ಲೊಕಾಂಚ್ಯಾ ಮ್ಹಡ್ಯಾನಿ ಭರಿಸಾರ್ಕೆ ಕರ್ತಾ. ತಲ್ವಾರಾನಿ ಮ್ಹರಲ್ಲಿ ಮ್ಹಡಿ, ತುಜ್ಯಾ ಮಡ್ಡಿಯಾತ್ನಿ, ಖೊಲಾತ್ನಿ ಅನಿ ಕೊಡ್ಲಾತ್ನಿ ಪಡುನ್ ಜಾತಾತ್. 9 ಮಿಯಾ ತುಕಾ ಕನ್ನಾಬಿ ಸರಿ ನಸಲ್ಲ್ಯಾ ನಾಶಾಕ್ ಗುರಿ ಕರ್ತಾ, ತುಜಿ ಶಾರಾ ಲೊಕಾ ನತ್ತಿ ಹೊತಾತ್, ತನ್ನಾ ಮಿಯಾಚ್ ಸರ್ವೆಸ್ಪರ್ ಮನುನ್ ತುಮ್ಚ್ಯಾ ಲೊಕಾಕ್ನಿ ಕಳ್ತಾ. 10 ತಿಯಾ ಅನಿ ಹಿ ತುಜಿ ಲೊಕಾ ಅನಿ ದೆಶಾ ಮಾಜ್ಯಾ ತಾಬೆತ್ ಹೊತಾತ್, ಅಮಿ ತೆ ಅನ್ಬೊಗ್ ಕರ್ತಾಂವ್ ಮನುನ್ಗೆವ್ನ್, ಥೈ ಮಾಜೆ ಹಾಜಿರ್ಪಾನಾಕ್ ಧ್ಯಾನ್ ದಿಯ್ನಸ್ತಾನಾ ಹೊತ್ತೆ ಹಾಯ್. 11 ಮಾಜ್ಯಾ ಜಿವಾಚ್ಯಾ ವರ್‍ತಿ ಆನ್ ಘಾಲುನ್ ಸಾಂಗ್ತಾ, ತಿಯಾ ಮಾಜ್ಯಾ ಲೊಕಾಕ್ನಿ ದ್ವೆಶ್ ಕರುನ್ ತೆಂಚ್ಯಾ ವರ್‍ತಿ ಥವಲ್ಲ್ಯಾ ರಾಗಾಕ್ ಅನಿ ಕುಸ್ಡೆ ಪಾನಾಚ್ಯಾ ವಯ್ನಾ ತುಕಾ ಶಿಕ್ಷ್ಯಾ ದಿತಾನಾ ತೆಂಕಾ ದಿಸ್ತಾ, ಹೆ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್. 12 ಮಿಯಾಚ್ ಸರ್ವೆಸ್ಪರ್ ಮನುನ್ ಕಳ್ವುನ್ ಘೆಟಲ್ಲ್ಯಾ ತನ್ನಾ, ತಿಯಾ ಇಜ್ರಾಯೆಲಾಚ್ಯಾ ಮಡ್ಡಿಯಾಕ್ನಿ ಬಗುನ್, ಹಾಳ್ ಹೊಲ್ಲಿ ಅಮ್ಚ್ಯಾ ವಾಟ್ಯಾಕ್ ಹೊಲಿ, ಮನುನ್ ಚುಕ್ ವಾವಲ್ಲೆ, ಸರ್ವೆಸ್ಪರ್ ಹೊಲ್ಲ್ಯಾ ಮಾಜ್ಯಾ ಕಾನಾಕ್ ಆಯ್ಕೊ ಯೆಲಾತ್, ಮನ್ತಲೆ ತುಕಾ ಕಳ್ತಾ. 13 ತುಜ್ಯಾ ಲೊಕಾನಿ ಮೊಟೆ ತೊಂಡ್ ಕರುನ್ ಮಾಜ್ಯಾ ವರ್‍ತಿ ಬೊಲಲ್ಲಿ ಫಾಯ್ದ್ಯಾಕ್ ನಸಲ್ಲಿ ಲೈ ಗೊಸ್ಟಿಯಾ ಆಯ್ಕಲಾ. 14 ಸರ್ವೆಸ್ಪರ್ ಅಸೊ ಮನ್ತಾ, ಮಿಯಾ ತುಕಾ ಹಾಳ್ ಕರುನ್ ಸಗ್ಳ್ಯಾ ಜಗ್ ಖುಶಿ ಕರ್ತಾ. 15 ಇಜ್ರಾಯೆಲಾಂಚ್ಯಾ ಬದಿಕ್ ನಾಶ್ ಹೊಲ್ಲ್ಯಾ ತನ್ನಾ ತಿಯಾ ಖುಶಿ ಹೊಲ್ಲ್ಯಾ ಸಾರ್ಕೆ ತುಜ್ಯಾ ನಾಶಾಚ್ಯಾ ಎಳಾರ್ ಸಗ್ಳಿ ಲೊಕಾ ಖುಶಿ ಹೊಯ್ ಸಾರ್ಕೆ ಕರ್ತಾ, ಸೆಯಿರ್ ಮಡ್ಡಿಯಾನೊ, ತಿಯಾ ಹಾಳ್ ಹೊತೆಯ್, ಹೊಯ್, ಫುರಾ ಎದೊಮ್ ಹಾಳ್ ಹೊತಾ, ತನ್ನಾ ಮಿಯಾಚ್ ಸರ್ವೆಸ್ಪರ್ ಮನುನ್ ಕಳ್ತಾ.