1 ಮಾಕಾ ಸರ್ವೆಸ್ಪರಾನ್ ಅನಿ ಎಗ್ದಾ ಬೊಲ್ಲ್ಯಾನ್, 2 ನರ್ ಮಾನ್ಸಾ, ತಿಯಾ ತಿರ್ ಶಾರಾಚ್ಯಾ ರಾಜಾಕ್ ಅಸೆ ಸಾಂಗ್, ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ತಿಯಾ ಘರುಕಿಚ್ಯಾ ಮನಾಚೊ ಹೊವ್ನ್, ಅಹಾ, ಮಿಯಾಚ್ ದೆವ್, ಸಮುಂದರಾಚ್ಯಾ ಮದ್ದಿ ದೆವಾಚೆ ಸಿಂವಾಸನುಚ್ ಚಡ್ಲಾ ಮನುನ್ ಘೆಟ್ಲೆಯ್ ತವ್ಡೆಚ್, ತಿಯಾ ತುಜ್ಯಾ ಮನಾಕ್ ದೆವಾಚ್ಯಾ ಮನಾ ತವ್ಡೆ ಲೈ ಪಾನ್ ಕರುನ್ ಘೆಟಲ್ಲೆ ಕಶ್ಯಾಕ್? ತಿಯಾ ಕನ್ನಾಬಿ ದೆವ್ ನ್ಹಯ್, ತಿಯಾ ಮಾನುಸುಚ್. 3 ತಿಯಾ ದಾನಿಯೆಲಾಕಿಂತಾಬಿ ಬುದ್ವಂತ್ ಕಾಯ್? ತುಕಾ ದಿಸಿ ನಸ್ತಾನಾ ಹೊತ್ತೊ ಘುಟ್ಟ್ ಖಲೆಬಿ ನಿಪಿನಾ. 4 ತುಜ್ಯಾ ಬುದ್ದಿನ್ ಅನಿ ಶಾನ್ಪಾನ್ ತಿಯಾ ಆಸ್ತಿ ಸಂಪಾಳ್ಸುನ್, ತುಜ್ಯಾ ಗೊಳಾಕರುನ್ ಥವ್ತಲ್ಯಾ ಖೊಲಿತ್ ಚಾಂದಿ ಅನಿ ಸೊನೆ ಭರುನ್ ಘೆಟ್ಲೆಯ್. 5 ತಿಯಾ ತುಜ್ಯಾ ಲೈ ಬುದ್ದಿನ್ ಅನಿ ಯಾಪಾರಾನ್ ಬದಿಕ್ ಲೈ ಕರುನ್ಗೆವ್ನ್ ರ್‍ಹಾತಾನಾ, ತುಜೊ ಮನ್ ಆಸ್ತಿಚ್ಯಾ ವಯ್ನಾ ಘರುಕಿನ್ ಫುಗ್ಲೆಯ್. 6 ಅಸೆ ರ್‍ಹಾತಾನಾ ಸರ್ವೆಸ್ಪರ್ ದೆವ್ ಅಸೆ ಮನ್ತಾ, ತಿಯಾ ತುಕಾ ದೆವಾಕ್ ಸರಾಸರಿ ಕರುನ್ ಘೆಟೈ. 7 ಮಿಯಾ ಲೈ ಬುರ್ಶಿ ಲೊಕಾ ಕ್ರುರ್ ದಯಾ ನತ್ತ್ಯಾ ಲೊಕಾಂಚ್ಯಾ ವರ್‍ತಿ ತುಜ್ಯಾ ಪಡಿ ಸಾರ್ಕೆ ಕರ್ತಾ, ತೆನಿ ತುಜ್ಯಾ ಬುದ್ದಿಚ್ಯಾ ಘರುಕಿ ವರ್‍ತಿ ತಲ್ವಾರ್ ಬೊಚುನ್ ತುಜಿ ಶೊಬಾ ಬುರ್ಸೆ ಕರ್‍ತಾತ್. 8 ತುಕಾ ಪಾತಾಳಾಕ್ ಢಕ್ಲುನ್ ಘಾಲ್ತಾತ್, ಸಮುಂದರಾಚ್ಯಾ ಮದ್ದಿ ತುಜ್ಯಾಕ್ನಾ ತೊಡಲ್ಯಾಂಚಿ ಗತ್ ತುಕಾ ಬಿ ಯೆತಾ. 9 ತಿಯಾ ತುಕಾ ಜಿವ್ ಕಾಡ್ತಲ್ಯಾಚ್ಯಾ ಇದ್ರಾಕ್ ಮಿಯಾ ದೆವ್ ಮನುನ್ ಸಾಂಗ್ತೆಯ್ ಕಾಯ್? ಜಿವ್ ಕಾಡ್ತಲ್ಯಾಚ್ಯಾ ಇದ್ರಾಕ್ ತಿಯಾ ಕನ್ನಾಬಿ ದೆವ್ ನ್ಹಯ್, ತಿಯಾ ಖಾಲಿ ನರ್ ಮಾನುಸುಚ್! 10 ತಿಯಾ ದುಶ್ರ್ಯಾಂಚ್ಯಾ ಹಾತಿತ್ನಾ ಸುನ್ನತ್ ನಸಲ್ಲ್ಯಾಂಚ್ಯಾ ಮರ್ನಾಕ್ ಗುರಿ ಹೊತೆಯ್, ಮಿಯಾಚ್ ಬೊಲಲ್ಲೆ, ಹೆ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್.

11 ಮಾಕಾ ಸರ್ವೆಸ್ಪರಾನ್ ಅನಿ ಎಗ್ದಾ ಬೊಲ್ಲ್ಯಾನ್, 12 ನರ್ ಮಾನ್ಸಾ, ತಿಯಾ ತಿರ್ ಶಾರಾಚ್ಯಾ ರಾಜ್ಯಾಚ್ಯಾ ವಿಶಯಾತ್ ದುಕ್ಕಾಚಿ ಗಿತ್ ಸಾಂಗ್, ತೆಕಾ ಅಸೆ ಸಾಂಗ್, ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ತಿಯಾ ಸಗ್ಳ್ಯಾ ಲಕ್ಷನಾನಿ ಭರುನ್ ಹೊತ್ತೊ, ಸಗ್ಳ್ಯಾ ಬುದ್ದಿನ್ ಭರಲ್ಲೊ, ಸಗ್ಳ್ಯಾ ನಮುನಿ ಸುಂದರ್ ಪಾನಾಚೊ. 13 ದೆವಾಚೊ ಮ್ಹಳೊ ಎದೆನಾತ್ ತಿಯಾ ಹಾಸ್, ಮಾನಿಕ್ಯ್, ಪುಶ್ಪರಾಗ್, ಪಚ್ಚೆ, ಪಿತರತ್ನ, ಬೆರುಲ್ಲಾ, ವೈಡುರ್ಯ್, ನಿಳೊ ಕೆಂಪರಲು, ಅನಿ ಸ್ಪಟಿಕ್ ಹ್ಯಾ ನ್ಹವ್ ನಮುನ್ಯಾಚ್ಯಾ ರತ್ನಾನಿ ಭರುನ್ ಹಾಸ್, ತುಜ್ಯಾಕ್ಲ್ಯಾ ಹ್ಯಾ ರತ್ನಾಂಚೊ ಘುಡ್ ಅನಿ ಘರಾ, ಸೊನ್ಯಾನ್ ಕರಲ್ಲಿ ಹೊತ್ತಿ, ತುಜ್ಯಾ ರಚ್ನ್ಯಾಚ್ಯಾ ದಿಸಾತ್ ತಯಾರ್ ಹೊಲೆ. 14 ತಿಯಾ ರಕುಟೆ ಸೊಡುನ್ ಸಾವ್ಳಿ ದಿತಲಿ ಕೆರುಬಿಯಾ ಹೊಲೈ, ಮಿಯಾ ತುಕಾ ದೆವಾಚ್ಯಾ ನಿತಳ್ ಜಾಗ್ಯಾ ವರ್‍ತಿ ಇಬೆ ಕರ್ಲಾ, ತಿಯಾ ಖೆಂಡಾಂಚ್ಯಾ ಪಾವ್ಸಾತ್ ಚಲುನ್ಗೆತ್ ಹಾಸ್. 15 ತುಜ್ಯಾ ರಚ್ನ್ಯಾಚ್ಯಾ ದಿಸಾಕ್ನಾ ತುಜ್ಯಾಕ್ಡೆ ಚುಕ್ ದಿಸಿ ಪತರ್ ತುಜಿ ಚಾಲ್ನುಕ್ ಚುಕ್ ನಸಲ್ಲಿಚ್ ಹೊವ್ನ್ ದಿಸಿ. 16 ತುಜ್ಯಾ ಲೆಕ್ಕಾಕ್ ನಸಲ್ಲ್ಯಾ ಯಾಪಾರಾ ವಯ್ನಾ, ತುಜ್ಯಾಕ್ಡೆ ಬಲತ್ಕಾರ್ ಭರುನ್ ತಿಯಾ ಪಾಪಿ ಹೊಲೈ, ತಸೆ ಹೊವ್ನ್, ಮಿಯಾ ತುಕಾ ದೆವಾಚ್ಯಾ ಮಡ್ಡಿಕ್ನಾ ಬುರ್ಸೊ ಮನುನ್ ಡಕ್ಲುನ್ ದಿಲೊ, ಹೊಯ್, ರಾಕ್ವನ್ ದಿತಲ್ಯಾ ಕೆರುಬಿ, ಖೆಂಡಾಂಚ್ಯಾ ಪಾವ್ಸಾಚ್ಯಾ ಮದ್ಲ್ಯಾ ತುಜ್ಯಾ ಜಾಗ್ಯಾ ವಯ್ನಾ, ಮಿಯಾ ತುಕಾ ಕಾಡುನ್ ತುಕಾ ಜಾಳ್ವುನ್ ಟಾಕ್ತಾ. 17 ತಿಯಾ ತುಜ್ಯಾ ಸುಂದರ್ ಪಾನಾಚ್ಯಾ ವಯ್ನಾ, ಘರುಕಿಚ್ಯಾ ಫುಗಲ್ಯಾ ಮನಾನ್ ತುಜ್ಯಾ ಫಿರಾಟ್, ತುಜಿ ಬುದ್ದ್ ಹಾಳ್ ಕರುನ್ ಘೆಟೈ, ಹೆಜ್ಯಾ ವಯ್ನಾ ಮಿಯಾ ತುಕಾ, ಜಿಮ್ನಿಕ್ ಡಕ್ಲುನ್ ತಿಯಾ ರಾಜಾಕ್ನಿ ದಿಸಿ ಸಾರ್ಕೆ ತೆಂಚ್ಯಾ ಡೊಳ್ಯಾಂಚ್ಯಾ ಇದ್ರಾಕ್ ಘಾಟ್ಲೊ. 18 ತುಜ್ಯಾ ಲೈ ಹೊಲ್ಲ್ಯಾ ಅಪ್ರಾದಾಂಚ್ಯಾ ವಯ್ನಾ ಅನಿ ಅನ್ಯಾಯಾಚ್ಯಾ ಯಾಪಾರಾನ್ ತುಜ್ಯಾಕ್ಲಿ ಪವಿತ್ರ್ ಘರಾ ಬುರ್ಸೆ ಕರ್‍ಲೆ, ತಸೆಹೊವ್ನ್ ಮಿಯಾ ತುಜ್ಯಾಕ್ನಾ ಆಗ್ ಯೆಯ್ ಸಾರ್ಕೆ ಕರ್ಲೊ. ತಿನೆ ತುಕಾ ಗಿಳ್ಳಿನ್, ಬಗ್ತಲ್ಯಾಂಚ್ಯಾ ಡೊಳ್ಯಾಂಚ್ಯಾ ಇದ್ರಾಕ್ ಮಿಯಾ ತುಕಾ ರಕ್ಕಾ ಕರ್ಲೊ. 19 ಲೊಕಾತ್ನಿ ತುಜೆ ಗೊತ್ತ್ ಹೊತ್ತಿ ಸಗ್ಳಿ ಲೊಕಾ ತುಜಿ ಗತ್ ಬಗುನ್ ಭಿಂವ್ತಾತ್, ತಿಯಾ ಸಗ್ಳೊ ನಾಶ್ ಹೊವ್ನ್ ಅನಿ ಕನ್ನಾಬಿ ದಿಸಿನಾ ಸಾರ್ಕೊ ಹೊತೆಯ್.

20 ಸರ್ವೆಸ್ಪರಾನ್ ಹಿ ಗೊಸ್ಟ್ ಮಾಕಾ ದಿಲಾ, 21 ನರ್ ಮಾನ್ಸಾ, ತಿಯಾ ಸಿದೊನಾಕ್ಡೆ ತೊಂಡ್ ಕರುನ್, ತೆಜ್ಯಾ ವಿಶಯಾತ್ ಅಸೆ ಬೊಲ್. 22 ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಅಹಾ, ಸಿದೊನಾ, ಮಿಯಾ ತುಕಾ ವಿರೊದ್ ಹೊವ್ನ್ ತುಜ್ಯಾ ಮದ್ದಿ ನಾವ್ ಘೆತಾ, ಮಿಯಾ ಹ್ಯಾ ಶಾರಾಕ್ ನ್ಯಾಯ್ ದಿವ್ನ್, ಮಾಜಿ ಮಾನ್ ರಾಕುನ್ ಘೆಟ್ಲ್ಯಾ ಮಾನಾ ಮಿಯಾಚ್ ಸರ್ವೆಸ್ಪರ್ ಮನುನ್ ಸಗ್ಳ್ಯಾಕ್ನಿ ಗೊತ್ತ್ ಹೊತಾ. 23 ಮಿಯಾ ತ್ಯಾತುರ್ ದುಕ್ನೆ ಅನಿ ತೆಜ್ಯಾ ಚವ್ಕಾತ್ನಿ ಮರಾನ್ ಯೆಯ್ ಸಾರ್ಕೆ ಕರ್ತಾ, ತೆಜ್ಯಾ ಭೊತ್ಯಾನಿ ತಲ್ವಾರ್ ಝಳ್ಕುನ್ಗೆತ್ ರ್‍ಹಾತಾನಾ, ತೆಜ್ಯಾ ಮದ್ದಿ ಲೊಕಾ ಮರುನ್ ಪಡ್ತಾತ್, ತನ್ನಾ ಮಿಯಾಚ್ ಸರ್ವೆಸ್ಪರ್ ಮನುನ್ ತೆಂಕಾ ಕಳ್ತಾ. 24 ಇಜ್ರಾಯೆಲ್ ಲೊಕಾಕ್ನಿ ಟೊಪ್ತಲೊ ಕಾಟೊ ಹೆಜ್ಯಾನ್ ಫಿಡೆ ರ್‍ಹಾಯ್ನಾ, ಚಾಳ್ವುತಲಿ ಆಜುಭಾಜುಚಿ ಲೊಕಾ ಮನ್ತಲೊ ಸಂಕಟ್ಬಿ ಅನಿ ರ್‍ಹಾಯ್ನಾ, ಮಿಯಾಚ್ ಸರ್ವೆಸ್ಪರ್ ದೆವ್ ಮನುನ್ ತುಮ್ಕಾ ಕಳ್ತಾ.

25 ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಲೊಕಾತ್ನಿ ಪಗ್ಳುನ್ ಗೆಲ್ಲ್ಯಾ ಇಜ್ರಾಯೆಲ್ ಪಿಳ್ಗಿಚ್ಯಾಕ್ನಿ ಮಿಯಾ ಗೊಳಾ ಕರುನ್, ಸಗ್ಳ್ಯಾ ಲೊಕಾಂಚ್ಯಾ ಡೊಳ್ಯಾಚ್ಯಾ ಇದ್ರಾಕ್ ಮಾಜಿ ಮಾನ್ ರಾಕುನ್ ಘೆಟ್ಲ್ಯಾಮಾನಾ, ತಿ ಇಜ್ರಾಯೆಲ್ ಪಿಳ್ಗಿಚಿ ಲೊಕಾ, ಅನಿ ಮಾಜೊ ಸೆವಕ್ ಜಾಕೊಬಾಕ್, ಮಿಯಾ ದಿಲ್ಲ್ಯಾ ಅಪ್ನಾಚ್ಯಾ ಸ್ವತ್ಯಾಚ್ಯಾ ದೆಸಾತ್, ವಸ್ತಿ ರ್‍ಹಾತ್ಯಾತ್. 26 ಥೈ ಭಿಂಯ್ಯೆ ನಸ್ತಾನಾ ರ್‍ಹಾತ್ಯಾಸಿ, ಘರಾ ಭಾಂದುನ್ಗೆವ್ನ್, ಮ್ಹಳೆ ಕರುನ್ಗೆವ್ನ್ ಸುಖಾನ್ ವಸ್ತಿ ರ್‍ಹಾತ್ಯಾತ್. ತೆಂಕಾ ತರಾಸ್ ದಿತಲ್ಯಾ ಆಜುಭಾಜುಚ್ಯಾಕ್ನಿ, ಮಿಯಾ ಶಿಕ್ಷ್ಯಾ ದಿಲ್ಯಾ ಮಾನಾ, ಮಿಯಾಚ್ ತೆಂಚೊ ಸರ್ವೆಸ್ಪರ್ ದೆವ್ ಮನುನ್ ತೆಂಕಾ ಕಳ್ತಾ.