1 ನವ್ಯಾ ವರ್ಸಾಚ್ಯಾ, ಧಾವ್ಯಾ ಮಯ್ನ್ಯಾಚ್ಯಾ, ಧಾವ್ಯಾ ದಿಸಿ, ಸರ್ವೆಸ್ಪರ್ ದೆವಾನ್ ಮಾಕಾ ಅಸೆ ಸಾಂಗ್ಲ್ಯಾನ್. 2 ನರ್ ಮಾನ್ಸಾ, ಹ್ಯಾ ದಿಸಾಚ್ಯಾ, ಹ್ಯಾಚ್ ದಿಸಾಚೆ ನಾವ್ ಲಿವ್ನ್ ಘೆ, ಹ್ಯಾ ದಿಸಿಚ್ ಬಾಬಿಲೊನಾಚೊ ರಾಜಾ ಜೆರುಜಲೆಮಾಕ್ ಖಬ್ಜಾ ಕರ್ಲಾ. 3 ಹ್ಯಾ ದುಸ್ಟ್ ಪಿಳ್ಗಿಚ್ಯಾಕ್ನಿ ಕಾನಿ ಸಾರ್ಕೆ ಕರುನ್ ಅಸಿ ಸಾಂಗ್, ಸರ್ವೆಸ್ಪರ್ ದೆವ್ ಅಸಿ ಸಾಂಗ್ತಾ, ಟೊಪ್ ಚುಲಿಚ್ಯಾ ವರ್‍ತಿ ಥವ್, ತ್ಯಾತುರ್ ಪಾನಿ ವತ್; 4 ಮಾಸಾಚೆ ತುಕ್ಡೆ ಜಾಂಗ್ ಅನಿ ಖಾಂಜೊ ಹೆ ಸಗ್ಳಿ ಬರೆ ತುಕ್ಡೆ ತ್ಯಾತುರ್ ವಾಂಗ್ಡಾಚ್ ಘಾಲ್, ಅನಿ ಬರಿ ಹೊತ್ತಿ ಹಡ್ಡಾ ತ್ಯಾತುರ್ ಭರ್. 5 ಹಿಂಡಾತ್ಲೆ ಬರೆ ಹೊತ್ತೆ ಕಾಡುನ್ ಘೆ, ಟೊಪಾಚ್ಯಾ ಥಳಾತ್ ಹಡ್ಡಾ ಗೊಳಾ ಕರುನ್, ಬರೆ ಕರುನ್ ಸಿಜ್ವುನ್, ಹಡ್ಡಾ ತ್ಯಾತುರ್ ಉಕಡ್. 6 ಸರ್ವೆಸ್ಪರ್ ದೆವ್ ಅಶೆ ಮನ್ತಾ, ಖುನಿ ಕಾರಾನಿ ಭರಲ್ಲ್ಯಾ ಶಾರಾ, ತುಕಾ ದಿಕ್ಕಾರ್! ತ್ಯಾ ಟೊಪಾಚೊ ಜಂಗ್ ಸೊಡುನ್ ಜಾಯ್ ನಸ್ತಾನಾ ತ್ಯಾತುರುಚ್ ರಾಫ್ ಹಾಯ್ ನ್ಹಯ್, ಮಾಸಾಚೆ ತುಕ್ಡೆ ಎಚುನ್, ಗಾಂವ್ ಗಾವಲ್ಲೆ ಕಾಡುನ್ ಸೊಡ್. 7 ಜೆರುಜಲೆಮಾಚ್ಯಾ ಶಾರಾಚೆ ಗಳಲ್ಲೆ ರಗಾತ್ ತ್ಯಾತುರುಚ್ ಇಬೆ ಹಾಯ್ ನ್ಹಯ್, ಧುಳ್ ಲಾಗ್ತಾ ಮನುನ್ ತ್ಯಾ ಶಾರಾಚಿ ಲೊಕಾ ತೆ ಜಿಮ್ನಿಚ್ಯಾ ವರ್‍ತಿ ಟಾಕಿ ನಸ್ತಾನಾ, ತೆಕಾ ಮೊಟ್ಟ್ಯಾ ಗುಂಡ್ಯಾಚ್ಯಾ ವರ್‍ತಿ ಇಬೆ ಕರ್‍ತಾತ್. 8 ತ್ಯಾ ರಕ್ತಾಚ್ಯಾ ರಾಗಾನ್ ಶೆಡಾಕ್ ಶೆಡ್ ಕಾಡುನ್ ಘೆವ್ಚೆ ಮನುನ್, ತೆ ಮಿಯಾ ಆಟುಕ್ ದಿ ನಸ್ತಾನಾ ಮೊಟ್ಟ್ಯಾ ಗುಂಡ್ಯಾಚ್ಯಾ ತುದಿರ್ ವರ್‍ತಿ ಇಬೆ ಕರ್ಲಾ. 9 ಅಶೆ ರ್‍ಹಾತಾನಾ ಸರ್ವೆಸ್ಪರ್ ದೆವ್ ಅಸೆ ಮನ್ತಾ, ಹ್ಯಾ ಖುನ್ ಕಾರಾನಿ ಭರಲ್ಯಾ ಶಾರಾ, ತಿಕಾ ದಿಕ್ಕಾರ್! ಮಿಯಾಚ್ ಆಗ್ ಗುಂಪೊ ಕರುನ್ ಲಾವ್ತಾ. 10 ಲೈ ಆಗ್ ಹೊಂವ್ದಿತ್ ಜಾಸ್ತಿ ನಾಕ್ಡಾ ಘಾಲ್, ಮಾಸ್ ಸಿಜುಂದಿ ಕಡೆ ಹದಾ ರ್‍ಹಾಂವ್ದಿತ್, ಹಡ್ಡಾ ಸಿಜುಂದಿತ್. 11 ಮಾನಾ ಹಂಡೊ ತಾಪುನ್, ತಾಂಬ್ಯಾಚ್ಯಾ ಸಾರ್ಕೆ ತಾಂಬ್ಡೆ ಹೊವ್ನ್ ಭುತ್ತುರ್ಲೆ ಬುರ್ಸೆ ಕರ್ಗುನ್ ಜಂಗ್ ನಾ ಹೊವ್ನ್ ಜಾತಾ, ತೆಕಾ ಖಾಲಿ ಕರುನ್ ಖೆಂಡಾಚ್ಯಾ ವರ್‍ತಿ ಥವ್. 12 ತೆ ಮಾಕಾ ಉಲ್ಲೆಚ್ ತರಾಸ್ ಅನಿ ಫಿರೆ ಹೊಯ್ ಹೊಲಾ, ಹೊಲಾರ್ಬಿ ತೆಕಾ ಲಾಗಲ್ಲಿ ಜಂಗ್ಬಿ ಜಾವ್ಕ್ ನಾ ಆಗ್ಬಿ ಇಜುಕ್ನಾ. 13 ತಸೆಚ್ ತುಜಿ ಬುರ್ಶಿಕಾಮಾ ಕಂಟಾಳಲ್ಲ್ಯಾ ವಯ್ನಾ ಮಿಯಾ ತುಕಾ ಕವ್ಡೆಬಿ ನಿತಳ್ ಕರ್ಲ್ಯಾರ್ಬಿ ತಿಯಾ ನಿತಳ್ ಹೊಯ್ ನಸಲ್ಲ್ಯಾ ವಯ್ನಾ, ಮಿಯಾ ಮಾಜೊ ರಾಗ್ ತುಜಾರ್ ಘಾಲುನ್ ಶಾಂತ್ ಹೊಯ್ ಸಗೊಳ್ ತಿಯಾ ತುಜೆ ಬುರ್ಸೆ ಕಾಡುನ್ ಘೆಯ್ ನಸ್ತಾನಾ ಶುದ್ದ್ ಹೊಯ್ ನಸ್ತಾನಾ ಹಾಸ್. 14 ಸರ್ವೆಸ್ಪರ್ ಹೊಲ್ಲೊ ಮಿಯಾ ಹೆ ಸಾಂಗ್ಲಾ; ಹೆ ಚಲುನುಚ್ ಚಲ್ತಾ, ಮಿಯಾ ಪುರಾ ಕರ್ತಾ; ಪಾಟಿ ಘೆಯ್ನಾ, ಮಾಪಿ ಕರಿನಾ, ದಯಾ ದಾಕ್ವಿನಾ, ತುಜಿ ಬುರ್ಶಿ ವಾಟಾ ಬುರ್ಸ್ಯಾ ಕಾಮಾಂಚ್ಯಾ ವಯ್ನಾ ಸಮಾ ಹೊವ್ನ್ ತುಕಾ ನ್ಯಾಯ್ ಹೊತಾ, ಹೆ ಸರ್ವೆಸ್ಪರ್ ದೆವಾಚಿ ಗೊಸ್ಟ್.

15 ಸರ್ವೆಸ್ಪರಾನ್ ಮಾಕಾ ಅನಿ ಎಕ್ ಗೊಸ್ಟ್ ಸಾಂಗ್ಲ್ಯಾನ್, 16 "ನರ್ ಮಾನ್ಸಾ, ಅಬಕ್ ಎಕುಚ್ ಮಾರಾಕ್ ಮಿಯಾ ತುಕಾ ಡೊಳ್ಯಾಚಿ ಖುಸಿ ಹೊವ್ನ್ ಹೊತ್ತಿಕ್ ತುಜೆಕ್ನಾ ಕಾಡುನ್ ಘೆವ್ನ್ ಜಾತಾ, ಹೊಲ್ಯಾರ್ಬಿ ತಿಯಾ ಗೊಳಾಟ್ ಕರುನುಕ್ಕೊ, ರಡುನಕ್ಕೊ, ದುಕ್ಕ್ ಗಾಲುನಕ್ಕೊ, ಅವಾಜ್ ಕರ್ ನಸ್ತಾನಾ ಮಾಗ್. 17 ದುರ್ ಹೊವ್ನ್ ಹೊಲ್ಲೊ ದುಕ್ಕ್ ದಾಕ್ವುನಕ್ಕೊ, ಟಿವಾಲೊ ಲಪ್ಟುನ್ ಘೆವ್ನ್, ಹೊನಯಾ ಘಾಲುನ್ ಘೆವ್ನ್ ರಾ, ತೊಂಡ್ ಕಪ್ಡ್ಯಾನಿ ಧಾಪುನ್ ಘೆವ್ ನಕ್ಕೊ, ಕೊನ್ ತರಿ ಮರಲ್ಯಾ ತನ್ನಾ ಘಾಲ್ತಲೆ ಜೆವಾನ್ ಕರುನಕ್ಕೊ". 18 ಅಸಿ ಹುಕುಮ್ ಹೊತಾನಾ, ಮಿಯಾ ನಸ್ಕಾತ್ ಲೊಕಾಕ್ನಿ ಪ್ರವಾದನ್ ಕರ್ಲೊ; ತಿನ್ಸಾನಾಕ್ ಮಾಜಿ ಬಾಯ್ಕೊ ಮರುನ್ ಗೆಲಿ; ದುಸ್ರೆನ್ ದಿಸಿ ಸಕ್ಕಾಳಿ ಮಾಕಾ ಹುಕುಮ್ ಹೊಯ್ನಾ ಸಾರ್ಕೆ ಮಾನುನ್ ಚಲ್ಲೊ. 19 ತನ್ನಾ ಲೊಕಾ, "ತಿಯಾ ಅಸೆ ಕರ್‍ತಲ್ಯಾ ವಯ್ನಾ ಅಮಿ ಕಾಯ್ ಅರ್ಥ್ ಕರುನ್ ಘೆವ್ಚೆ? ಕಳ್ವುಚೆ ನ್ಹಯ್"? ಮನುನ್ ಇಚಾರ್‍ತಾನಾ, 20 ಮಿಯಾ ತೆಂಕಾ ಅಸೆ ಸಾಂಗ್ಲೊ; "ಸರ್ವೆಸ್ಪರಾನ್ ಹೆ ಬೊಲ್ನೆ ಮಾಕಾ ದಿಲ್ಯಾನ್, 21 ಇಜ್ರಾಯೆಲ್ ಪಿಳ್ಗಿಚ್ಯಾಕ್ ಅಸಿ ಸಾಂಗ್, ಅಬಕ್ ತುಕಾ ಮುಕ್ಯ್ ಬಳ್, ಡೊಳ್ಯಾಚಿ ಖುಸಿ ಅನಿ ಪ್ರೆಮಾಚೊ ಜಿವ್ ಹೊಲ್ಲ್ಯಾ ಮಾಜೊ ಪವಿತ್ರ್ ಗುಡಿಕ್ ಮಿಯಾ ಅಪವಿತ್ರ್ ಕರ್ತಾ; ತುಮಿ ಸೊಡುನ್ ಯೆಲ್ಲ್ಯಾ ತುಮ್ಚಿ ಝಿಲ್ಗೆ ಚೆಡ್ವಾ ತಲ್ವಾರಾಕ್ ಗಾವ್ತಾತ್", ಮನ್ತಲೆ ಸರ್ವೆಸ್ಪರ್ ದೆವಾನ್ ಸಾಂಗ್ತಾ. 22 ತನ್ನಾ ಮಿಯಾ ಕರಲ್ಲ್ಯಾ ಸಾರ್ಕೆ ತುಮಿ ಕರ್ತ್ಯಾಶಿ, ಮಟ್ಲ್ಯಾರ್ ಕಪ್ಡ್ಯಾನಿ ತೊಂಡ್ ಧಾಪುನ್ ಘೆಯ್ ನಸ್ತಾನಾ, 23 ದುಕ್ಕೆತ್ ರ್‍ಹಾತಾನಾ ದುಸ್ರ್ಯಾನಿ ಹಾನುನ್ ದಿಲ್ಲೆ ಜಜೆವಾನ್ ಖಾಯ್ ನಸ್ತಾನಾ, ಪಾವ್ಡ್ ಲಪ್ಟುನ್ ಘೆಯ್ ನಸ್ತಾನಾ, ಹೊನಯಾ ಘಾಲುನ್ ಘೆಯ್ ನಸ್ತಾನಾ, ರ್‍ಹಾತ್ಯಾಸಿ; ತುಮಿ ಗೊಳಾಟ್ ಕರಿನ್ಯಾಸಿ, ರಡಿನ್ಯಾಸಿ, ಹೊಲ್ಯಾರ್ ತುಮ್ಚ್ಯಾ ಬುರ್ಸ್ಯಾ ಕಾಮಾ ವಯ್ನಾ ಕಾಯ್ ನಸಲ್ಲ್ಯಾ ಸಾರ್ಕೆ ಜಾತ್ಯಾಸಿ. ಎಕ್ಲ್ಯಾಚ್ಯಾ ವರ್‍ತಿ ಎಕ್ಲೊ ನರಳ್ತ್ಯಾಸಿ, 24 ಹ್ಯಾ ವಿಶಯಾತ್ ಎಜ್ಕೆಲಾನ್ ಮಾಕಾ ಫಿಡೆ ಹೊತಲೊ ವಳಕ್ ಹೊವ್ನ್ ಹಾಯ್. ತೆನಿ ಕರಲ್ಯಾ ಸಾರ್ಕೆ ಸಗ್ಳೆಬಿ ಕರಾ, ಹೆ ಘಡ್ತಾನಾ ಮಿಯಾಚ್ ಸರ್ವೆಸ್ಪರ್ ದೆವ್ ಮನುನ್ ತುಮ್ಕಾ ಕಳ್ತಾ. 25 "ನರ್ ಮಾನ್ಸಾ, ತೆಂಕಾ ತಾಕ್ತಿಚೊ ಆಧಾರ್ ಡೊಳ್ಯಾಚ್ಯಾ ಖುಸಿ ಹೊಲ್ಲ್ಯಾ ತೆಂಚ್ಯಾ ಗುಡಿಕ್ ತೆನಿ ಆಶ್ಯಾ ಕರ್‍ತಲೆ ತೆಂಚಿ ಝಿಲ್ಗೆ ಅನಿ ಚೆಡ್ವಾ ತೆಂಚ್ಯಾ ಬಳೆತ್ನಾ ಕಾಡುನ್ ಟಾಕ್ತಲ್ಯಾ ದಿಸಾ ದಿಸಿ, 26 ತ್ಯಾ ದಿಸಾತ್ ಚುಕ್ವುನ್ ಘೆಟಲ್ಲೊ ತುಜೆಕ್ಡೆ ಯೆತಲೊ, ಅನಿ ಘಡಲ್ಲ್ಯಾ ಘಟ್ನಾಂಚಿ ಖಬರ್ ತುಜ್ಯಾ ಕಾನಾತ್ ಪಡ್ತಾ. 27 ತ್ಯಾ ದಿಸಾತ್ ಚುಕ್ವುನ್ ಘೆಟಲ್ಯಾಕ್ ಸಾಟ್ನಿ ತುಜೆ ತೊಂಡ್ ಉಗಡ್ತೆ, ತಿಯಾ ಅನಿ ಮುಕ್ಕೊ ರಾಯ್ನಸ್ತಾನಾ ಬೊಲ್ತೆ, ಅನಿ ತೆಂಕಾ ವಳಕ್ ಹೊವ್ನ್ ರಾತಯ್, ತನ್ನಾ ಮಿಯಾಚ್ ಸರ್ವೆಸ್ಪರ್ ಮನುನ್ ಕಳ್ತಾ".