1 ಜೆಹೊವಾಜಾಕಿಮ್ ಬಂದಿ ಹೊಲ್ಲ್ಯಾ ಬಾರಾವ್ಯಾ ವರ್ಸಾಚ್ಯಾ ಬಾರಾವ್ಯಾ ಮ್ಹೈನ್ಯಾಚ್ಯಾ ಪಯ್ಲೆಚ್ಯಾ ದಿಸಾತ್ ಸರ್ವೆಸ್ಪರಾನ್ ಮಾಜ್ಯಾ ವಾಂಗ್ಡಾ ಬೊಲ್ಲ್ಯಾನ್. 2 ನರ್ ಮಾನ್ಸಾ, ತಿಯಾ ಇಜಿಪ್ತಾಚೊ ರಾಜಾ ಫರೊವಾಚ್ಯಾ ವಿಶಯಾತ್ ದುಕ್ಕಾಚಿ ಗಿತ್ ಸಾಂಗುನ್, ತೆಕಾ ಅಸೆ ಸಾಂಗ್, ತಿಯಾ ಲೊಕಾತ್ನಿ ದಾಂಡ್ಗೊ ಸಿಂವ್ ಸಾರ್ಕೊ ಬಲ್ವಾನ್ ಮನ್ವುನ್ ಘೆತಯ್, ಅಬಕ್ ಮೊಟ್ಟ್ಯಾ ನ್ಹಯಿತ್ಲೊ ಮೊಟೊ ಸಾಂಪ್ ಹೊಲೆಯ್, ತಿಯಾ ಹೊತ್ತಿ ನ್ಹಯಾ ವಾಟೆ ಕರುನ್ಗೆವ್ನ್ ಎವ್ನ್, ತುಜ್ಯಾ ಪಾಂಯಾನಿ ಪಾನಿಯಾಕ್ ಕಾಲ್ವುನ್, ದೆಶಾಂಚಿ ನ್ಹಯಾ ತುಡ್ವುನ್ ಮಾಟಿನ್ ಧಾಪ್ಲೊ. 3 ಸರ್ವೆಸ್ಪರ್ ಅಸೊ ಮನ್ತಾ, ತಾಂಡೊ ಹೊವ್ನ್ ಗೊಳಾ ಹೊವ್ನ್ ಲೈ ಲೊಕಾಂಚ್ಯಾ ಹಾತಿತ್ನಾ, ಮಿಯಾ ಮಾಜೆ ಬಲಿ ತುಜ್ಯಾ ವರ್‍ತಿ ಟಾಕ್ತಾ, ತೆನಿ ತುಕಾ ಬಲಿ ವರ್‍ತಿ ವಡುನ್ಗೆತಾತ್. 4 ಮಿಯಾ ತುಕಾ ಜಿಮ್ನಿ ವರ್‍ತಿ ಘಾಲ್ತಾ, ತುಕಾ ಮ್ಹಾಳ್ ಜಾಗ್ಯಾವರ್‍ತಿ ಟಾಕುನ್ ಸಗ್ಳಿ ಮಳ್ಬಾತ್ಲಿ ಫಾಂಕ್ರಾ ತುಜ್ಯಾ ವರ್‍ತಿ ಪಡಿ ಸಾರ್ಕೆ ಕರ್ತಾ, ಅನಿ ಸಗ್ಳ್ಯಾ ಜಿಮ್ನಿ ವಯ್ಲ್ಯಾ ಜನಾವರಾಕ್ನಿ ತುಜ್ಯಾ ವಯ್ನಾ ಪೊಟ್ ಭರುನ್ ಘೆಯ್ ಸಾರ್ಕೆ ಕರ್ತಾ. 5 ತುಜೆ ಮಾಂಸ್ ಮಡ್ಡಿಯಾಂಚ್ಯಾ ವರ್‍ತಿ ಟಾಕುನ್, ಕೊಳ್ಳಾಕ್ನಿ ತುಜ್ಯಾ ಮ್ಹಡ್ಯಾಚ್ಯಾ ತುಕ್ಡ್ಯಾನಿ ಭರುನ್, 6 ತುಜ್ಯಾ ರಗ್ತಾಚ್ಯಾ ಹೊಂವಾರ್ಯ್ಯಾನ್ ಸಗ್ಳ್ಯಾ ದೆಸಾಕ್ ಮಡ್ಡಿಯಾಂಚ್ಯಾ ಪತರ್ ಭಿಜ್ವುತಾ, ತುಜೆನ್ ನ್ಹಯ್ಯಾ ಭರ್ತಾತ್.

7 ಫಾರೊವಾ ಮಿಯಾ ತುಜ್ಯಾ ಉಜ್ವೊಡಾಕ್ ಇಜ್ವುತಾನಾ, ಮಳ್ಬಾಕ್ ಧಾಪುನ್, ಥೈ ಹೊತ್ತ್ಯಾ ಚುಕ್ಕಿಯಾಕ್ನಿ ಮಬ್ಬ್ ಕರುನ್, ದಿಸಾಕ್ ಮೊಡಾನಿ ಧಾಪ್ತಾ, ಚಂದಾಮ್ ಬಿ ಉಜ್ವೊಡ್ ದಿಯ್ನಾ. 8 ತುಜ್ಯಾ ವರ್‍ತಿ ಮಳ್ಬಾತ್ ಹೊಳಾವ್ತಲ್ಯಾ ಸಗ್ಳ್ಯಾ ಉಜ್ವೊಡಾಕ್ನಿ ಮಿಯಾ ಮಬ್ಬ್ ಕರುನ್, ತುಜ್ಯಾ ದೆಸಾತ್ ಕಾಳೊಕ್ ಕರ್ತಾ, ಹಿ ರಾಜಾ ಸರ್ವೆಸ್ಪರಾಚೆ ಬೊಲ್ನೆ. 9 ಮಿಯಾ ತುಜ್ಯಾ ನಾಶಾಚಿ ಖಬರ್ ಲೊಕಾತ್ನಿ ತುಕಾ ಕಳಿನಸಲ್ಲ್ಯಾ ದೆಸಾಕ್ನಿಬಿ ಪಾವ್ಸುತಾನಾ, ತೆ ಲೈ ಲೊಕಾಂಚಿ ಮನಾ ಕಳ್ವಳ್ತಾ. 10 ಹೊಯ್ ತುಜ್ಯಾ ಗತಿಕ್ ಬಗುನ್ ಲೈ ಲೊಕಾ ಭಿಂಯ್ ಸಾರ್ಕೆ ಕರ್ತಾ, ಮಿಯಾ ಮಾಜೊ ತಲ್ವಾರ್ ತೆಂಚ್ಯಾ ರಾಜಾಚ್ಯಾ ಡೊಳ್ಯಾಚ್ಯಾ ಇದ್ರಾಕ್ ಇಂಜಳ್ತಾನಾ, ತೆನಿ ತುಜಿ ಬುರ್ಶಿ ಗತ್ ಬಗುನ್, ಲೈ ಭಿಂವ್ತಾತ್, ತುಜ್ಯಾ ಹಾರ್ತಲ್ಯಾ ದಿಸಾತ್ನಿ ಹರ್ ಎಕ್ಲೊಬಿ ಅಪ್ನಾ ಅಪ್ನಾಚ್ಯಾ ಜಿವಾಚ್ಯಾ ಭಿಂಯಾಕ್ ಗಡ್ ಗಡ್ ಥರ್ಥರ್ತಾ.

11 ಸರ್ವೆಸ್ಪರ್ ಅಸೊ ಮನ್ತಾ, ಬಾಬೆಲಾಚ್ಯಾ ರಾಜಾಚೊ ತಲ್ವಾರ್ ತುಕಾ ವಿರೊದ್ ಹೊವ್ನ್ ವರ್‍ತಿ ಪಡ್ತಾ. 12 ಮಿಯಾ ತುಜ್ಯಾ ಲೈ ಲೊಕಾಕ್ನಿ, ಲೈ ಭಯಂಕರ್ ಲೊಕ್ ಹೊವ್ನ್ ಹೊತ್ತ್ಯಾ ತಾಕ್ತಿಚ್ಯಾ ಮಾನ್ಸಾಂಚ್ಯಾ ಹಾತಿತ್ ತಲ್ವಾರಾನಿ ಮಾರುಕ್ ಲಾವ್ತಾ, ಇಜಿಪ್ತಾಕ್ ಘಮೆಂಡಿ ಹಾನ್ತಲೆ ಸಗ್ಳೆ ತೆನಿ ಲುಟ್ ಕರುನ್ ಘೆವ್ನ್ ಜಾತಾತ್, ತೆಚಿ ಲೊಕಾ ಕನ್ನಾಬಿ ನಾಶ್ ಹೊವ್ನ್ ಜಾತಾತ್. 13 ಲೈ ಹೊವಾರೊ ಯೆತಲ್ಯಾ ಜಾಗ್ಯಾಚ್ಯಾ ದಂಡೆಕ್ ಹೊತ್ತ್ಯಾ ಸಗ್ಳ್ಯಾ ಜನಾವರಾಕ್ನಿ ನಾಶ್ ಕರ್ತಾ, ತ್ಯಾ ಪಾನಿಯಾಕ್ ಕಾಲ್ವುಕ್ ಖಲೊ ಮಾನುಸ್ಬಿ ಥೈ ಪಾಂಯ್ ಥೈ ನಾ, ಖಲ್ಯಾ ಜನಾವರಾಚಿ ಗೆಳಾಚ್ಬಿ ಥೈ ಲಾಗಿನಾತ್. 14 ತನ್ನಾ ತೆ ಪಾನಿ ಪಾತೊಳ್ ಅನಿ ಹೊಂವಾರೆ ತೆಲಾ ಸಾರ್ಕೆ ಯೆಯ್ ಸಾರ್ಕೆ ಕರ್ತಾ, ಮನ್ತಲಿ ಹಿ ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್. 15 ಮಿಯಾ ಇಜಿಪ್ತಾತ್ ಭರಲ್ಲೆ ಸಗ್ಳೆ ಸಾವ್ಕಾರ್ಕಿ ಪಾನ್ ಹಾಳ್ ಕರುನ್, ಥೈ ವಸ್ತಿ ಹೊತ್ತ್ಯಾ ಸಗ್ಳ್ಯಾಕ್ನಿ ನಾಶ್ ಕರಲ್ಲ್ಯಾ ತನ್ನಾ, ಮಿಯಾಚ್ ಸರ್ವೆಸ್ಪರ್ ಮನುನ್ ಸಗ್ಳ್ಯಾಕ್ನಿ ಕಳ್ತಾ. 16 ಉದ್ದೆಸ್ ಕಾರಾನಿ ಹಿ ಆಳಾಪಾಚಿ ಗಿತ್ ಗಾವುಚೆ, ಲೊಕಾಂಚಿ ದಾಂಡ್ಗಿ ಚೆಡ್ವಾ ಅಸೆ ಅಳಾಪ್ ಕರುಂದಿತ್, ಇಜಿಪ್ತಾ ಸಾಟ್ನಿ ಅನಿ ಥೈ ಹೊತ್ತ್ಯಾ ಲೈ ಲೊಕಾಂಚ್ಯಾ ಸಾಟ್ನಿ ಅಳಾಪ್ ಕರುನ್ ಹಿ ಗಿತ್ ಗಾವುಂದಿತ್, ಮನ್ತಲಿ ಹೆ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್.

17 ಜೆಹೊವಾಜಾಕಿಮ್ ಬಂಧಿ ಹೊಲ್ಲ್ಯಾ ಬಾರಾವ್ಯಾ ವರ್ಸಾಚ್ಯಾ ಬಾರಾವ್ಯಾ ಮ್ಹಯ್ನ್ಯಾಚ್ಯಾ ಪಂದ್ರಾವ್ಯಾ ದಿಸಾತ್ ಸರ್ವೆಸ್ಪರಾನ್ ಮಾಜ್ಯಾ ವಾಂಗ್ಡಾ ಬೊಲ್ಲ್ಯಾನ್. 18 ನರ್ ಮಾನ್ಸಾ, ತಿಯಾ ಇಜಿಪ್ತಾಚ್ಯಾ ಮ್ಹೆಜುಕ್ ಹೊಯ್ನಸಲ್ಲ್ಯಾ ತವ್ಡ್ಯಾ ಸಯ್ನಿಕಾಂಚ್ಯಾ ವಾಂಗ್ಡಾ ಅಳಾಪ್ ಕರುನ್ ಲೈ ಬಲಿಸ್ಟ್ ಲೊಕಾಕ್ನಿ ಗಿರ್‍ಯಾಂಚ್ಯಾ ವಾಂಗ್ಡಾ ಖೊಲಾತ್ಲ್ಯಾ ಜಗಾಕ್ ಡಕ್ಳುನ್ ಟಾಕ್. 19 ಅನಿ ತೆಂಕಾ ತಿಯಾ ಸುಂದರ್ಪಾನಾತ್ ಕೊನಾಕಿಂತಾ ಕಮ್ಮಿ ಹಾಸ್? ತಿಯಾ ಮರ್ನಾಚ್ಯಾ ಜಗಾಕ್, ದೆವಾಕ್ ವಳ್ಕಿ ನಸಲ್ಲ್ಯಾಂಚ್ಯಾ ವಾಂಗ್ಡಾ ಖಾಲ್ತಿ ಉತ್ರುನ್ ಜಾ. 20 ಆಹಾ, ತಲ್ವಾರಾನ್ ಮಾರಾನ್ ಹೊಲ್ಲ್ಯಾಂಚ್ಯಾ ಮದ್ದಿ ಪಡ್ತಾತ್, ತೆನಿ ತಲ್ವಾರಾಚೊ ವಾಟೊ ಹೊವ್ನ್ ಹಾತ್, ನಾಶಾಚ್ಯಾ ಜಗಾಚ್ಯಾ ಲೊಕಾನೊ, ಇಜಿಪ್ತಾಕ್ ಅನಿ ತೆಚ್ಯಾ ಲೈ ಲೊಕಾಕ್ನಿ ವಡುನ್ ಘೆವಾ. 21 ಖೊಲಾತ್ಲ್ಯಾ ಜಗಾತ್ಲಿ ಬಲಿಶ್ಟ್ ಕಾರಾ ತೆಂಕಾ ಅನಿ ತೆಂಚ್ಯಾ ಮಜತ್ ಕಾರಾಕ್ನಿ ಬಗುನ್, ಅಬಕ್ ಹಿ ಸುನ್ನತ್ ನಸಲ್ಲಿ ಅನಿ ತಲ್ವಾರಾನ್ ಬಲಿ ಹೊಲ್ಲಿ ಲೊಕಾ ಖಾಲ್ತಿ ಉತ್ರುನ್ ಎವ್ನ್ ಹಿತ್ತೆ ಪಾವ್ಲಿ ಮಟ್ಲ್ಯಾನಿ. 22 ಅಸ್ಸಿರಿಯಾಚಿ ಲೊಕಾ ಕನ್ನಾಬಿ ಥೈ ರ್‍ಹಾತ್ಯಾತ್, ಅನಿ ತಲ್ವಾರಾನ್ ಮರಾನ್ ಹೊಲ್ಲ್ಯಾ ತೆಂಚ್ಯಾ ಸೈನಿಕಾಂಚ್ಯಾ ಸಮಾಧಿಯಾ ತೆಂಚ್ಯಾ ಭೊತ್ಯಾನ್ ರ್‍ಹಾತ್ಯಾತ್. 23 ತೆಂಚಿ ಸಮಾಧಿಯಾ ಖೊಲಾತ್ಲ್ಯಾ ಜಗಾಚ್ಯಾ ಮರ್ನಾಚ್ಯಾ ಜಾಗ್ಯಾ ವರ್‍ತಿ ಪಗ್ಳುನ್ ಹಾತ್, ಝಿತ್ತೆ ರ್‍ಹಾತಾನಾ ತಲ್ವಾರಾಕ್ ಗಾವ್ನ್ ಲೈ ತರಾಸಾಚೆ ಮರಾನ್ ಹೊಲ್ಲಿ ಅಸ್ಸಿರಿಯಾಚಿ ಸೈನಿಕಾ ತೆಜ್ಯಾ ಭೊತ್ಯಾನ್ ಹಾತ್. 24 ಎಲಾಮ್ ಬಿ ಥೈ ಹಾಯ್, ಝಿತ್ತೆ ರ್‍ಹಾತಾನಾ ತಲ್ವಾರಾಕ್ ಗಾವ್ನ್ ಲೈ ಕಠಿನ್ ಮರ್ನಾಕ್ ಗುರಿಹೊಲ್ಲಿ ಸುನ್ನತ್ ನಸಲ್ಲ್ಯಾ ಸೈನಿಕಾಂಚಿ ಸಮಾಧಿಯಾ ತೆಜ್ಯಾ ಭೊತ್ಯಾನ್ ಹಾತ್, ಹೆನಿ ಸಗ್ಳೆ ಖೊಲಾಚ್ಯಾ ಜಗಾತ್ ಉತ್ರುನ್ ಗಿರ್‍ಯಾಂಚ್ಯಾ ಮದ್ದಿ ಅವ್ಮಾನಾಕ್ ಗುರಿ ಹೊಲಾತ್. 25 ತೆಜ್ಯಾ ಸಾಟ್ನಿ ಸಗ್ಳ್ಯಾ ಮರಲ್ಲ್ಯಾ ಲೊಕಾಂಚ್ಯಾ ಮದ್ದಿ ನಿಜುಕ್ ಜಾಗೊ ತಯಾರ್ ಕರಲ್ಲೊ ಹಾಯ್, ತೆಜ್ಯಾ ಭೊತ್ಯಾನ್ ತ್ಯಾ ಲೊಕಾಂಚಿ ಸಮಾಧಿಯಾ ಹಾತ್, ತೆನಿ ಸಗ್ಳೆ ಸುನ್ನತ್ ನಸಲ್ಲೆ ಅನಿ ತಲ್ವಾರಾನ್ ಮರಲ್ಲೆ, ತೆಂಚ್ಯಾ ಜಿವ್ಮಾನಾತ್ ಲೈ ಕ್ರುರ್ ಅನಿ ಖೊಲ್ಲ್ಯಾ ಜಗಾಕ್ ಹೊವ್ನ್ ಹಾತ್, ತೆಂಚ್ಯಾ ಮದ್ದಿ ಎಲಾಮಿಕ್ ಜಾಗೊ ತಯಾರ್ ಕರಲ್ಲೊ ಹಾಯ್. 26 ಮೆಶೆಕ್, ತುಬುಲ್ಬಿ ಅನಿ ತೆಂಚಿ ಸಗ್ಳಿ ಲೊಕಾ ಥೈ ರ್‍ಹಾತ್ಯಾತ್, ತ್ಯಾ ಲೊಕಾಂಚ್ಯಾ ಸಮಾಧಿಯಾ ತೆಂಕಾ ಭೊತ್ಯಾನ್ ಹಾತ್, ತೆನಿ ಸಗ್ಳೆ ಸುನ್ನತ್ ನಸಲ್ಲೆ ಅನಿ ತಲ್ವಾರಾನ್ ಮರಲ್ಲೆ, ಝಿತ್ತ್ಯಾ ಜಗಾತ್ ಲೈ ತರಾಸಾಚೆ ಹೊವ್ನ್ ಹೊತ್ತೆ. 27 ಅದ್ಲ್ಯಾ ಎಳಾರ್ ಸುನ್ನತ್ ನಸಲ್ಲಿ ಬಲಿಶ್ಟ್ ಲೊಕಾ, ಲೈ ಕಟಿನ್ ಹೊವ್ನ್ ರ್‍ಹಾವ್ನ್, ಮರುನ್, ತೆಂಚ್ಯಾ ಹಾತಿಯಾರಾಂಚ್ಯಾ ವಾಂಗ್ಡಾಚ್ ಪಾತಾಳಾಕ್ ಪಡುನ್, ತಲ್ವಾರಾ ಉಸ್ಸೆ ಕರುನ್ಗೆವ್ನ್, ಅಪ್ನಾಚ್ಯಾ ಹಡ್ಡಾಂಚ್ಯಾ ವರ್‍ತಿ ಅಪ್ನಾಚೆ ಬುರ್ಸ್ಯಾ ಕಾಮಾಂಚೆ ವಜನ್ ಉಕ್ಲುನ್ಗೆವ್ನ್ ಹೊತ್ತ್ಯಾ ಸಗ್ಳ್ಯಾಂಚ್ಯಾ ವಾಂಗ್ಡಾ ಮೆಶಿಕಿಚೆ ಅನಿ ತುಬುಲಾಚೆಬಿ ವಟ್ಕುನ್ ರ್‍ಹಾತ್ಯಾತ್.

28 ಫಾರೊವ್ ರಾಜಾ ತಿಯಾ ಸುನ್ನತ್ ನಸಲ್ಲ್ಯಾಂಚ್ಯಾ ಮದ್ದಿ ನಾಶ್ ಹೊವ್ನ್, ತಲ್ವಾರಾನ್ ಮಾರಲ್ಲ್ಯಾಂಚ್ಯಾ ಮದ್ದಿ ಪಡುನ್ ರಾತಯ್. 29 ಥೈ ಎದೊಮ್ ಅನಿ ರಾಜಾ ಅನಿ ಸಗ್ಳಿ ಮುಂಖಡಾ, ತೆನಿ ಸಗ್ಳೆ ಬಲ್ವಾನ್ ರಾಜಾ, ತಲ್ವಾರಾನ್ ಮರಲ್ಲ್ಯಾಂಚ್ಯಾ ವಾಂಗ್ಡಾ ಥೈ ಪಡುನ್ ಹಾತ್. 30 ಉತ್ತರ್ ದೆಶಾಚೆ ಸಗ್ಳೆ ರಾಜಾ, ಸಗ್ಳಿ ಚಿದೊನಾಚಿ ಲೊಕಾ, ಮರ್ನಾಕ್ ಗುರಿ ಹೊಲ್ಲ್ಯಾಂಚ್ಯಾ ವಾಂಗ್ಡಾ ಥೈ ಹಾತ್, ಅಪ್ನಾಚ್ಯಾ ಲೈ ಕಠಿನ್ ಹೊತ್ತ್ಯಾ ಕಸ್ರತಿಕ್ ಮರ್ಯಾದ್ ಹೊವ್ನ್, ತಲ್ವಾರಾನ್ ಮರಲ್ಯಾಂಚ್ಯಾ ಮದ್ದಿ ಸುನ್ನತ್ ನಸಲ್ಲೆ ಹೊವ್ನ್, ಪಡುನ್ ಖೊಲ್ಯಾ ಜಾಗ್ಯಾರ್ ಮದ್ದಿ ಅವ್ಮಾನ್ ಕರುನ್ಗೆವ್ಲಾತ್.

31 ಫಾರೊವ್ ಹೆಂಕಾ ಸಗ್ಳ್ಯಾಕ್ನಿ ಬಗುನ್ ಅಪ್ನಾಚ್ಯಾ ಸಗ್ಳ್ಯಾ ಲೊಕಾಂಚ್ಯಾ ವಿಶಯಾತ್ ಸಮಾಧಾನ್ ಹೊತಾ, ಹೊಯ್ ತಲ್ವಾರಾಕ್ ಗಾವ್ನ್ ಮರಲ್ಲೊ ಫಾರೊವ್ ಅನಿ ತೆಚಿ ಸಗ್ಳಿ ಸಯ್ನಿಕಾ ಹೆ ಬಗುನ್ ಸಮಾಧಾನ್ ಹೊತಾತ್, ಹಿ ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್. 32 ಅಬಕ್ ಸಗ್ಳ್ಯಾ ಝಿತ್ತೆ ಹೊತ್ತ್ಯಾ ಲೊಕಾತ್ನಿ ಮಿಯಾ ಮಾಜೆ ಭಿಂಯ್ಯೆ ಹೊಯ್ ಸಾರ್ಕೆ ಕರ್ಲಾ, ಫಾರೊವ್ ಅನಿ ತೆಚಿ ಸಗ್ಳಿ ಲೊಕಾ ಅನಿ ಸುನ್ನತ್ ನಸಲ್ಯಾಂಚ್ಯಾ ತಲ್ವಾರಾಚ್ಯಾ ಮರ್ನಾಕ್ ಗುರಿ ಹೊಲ್ಲ್ಯಾಂಚ್ಯಾ ಮದ್ದಿ ವಟ್ಕುನ್ ಹಾತ್, ಮನ್ತಲಿ ಹಿ ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್.