ಎಜ್ಕೆಲ್ 4

ಎಜ್ಕೆಲಾನ್ ಜರುಜಲೆಮಾಕ್ ಅಪ್ನಾಚ್ಯಾ ತಾಬೆತ್ ಕರುನ್ ಘೆಟಲ್ಲ್ಯಾ ಸಾರ್ಕೆ ಕರ್ತಾ

1 ತೆ ತವ್ಡೆಚ್ ನ್ಹಯ್ ನರ್ ಮಾನ್ಸಾ, ತಿಯಾ ಎಕ್ ಇಟಂಗಿ ಘೆವ್ನ್ ತುಜ್ಯಾ ಇದ್ರಾಕ್ ಥವ್ನ್ ಘೆ, ಅನಿ ತೆಜ್ಯಾ ವರ್‍ತಿ ಜರುಜಲೆಮಾಚ್ಯಾ ಶಾರಾಚೊ ನಕಾಸೊ ಬಿಡಸ್, 2 ಅನಿ ತೆಚ್ಯಾ ಭೊತ್ಯಾನಿ ಬದು ಘಾಲುನ್ ವಡ್ಕಾ ಭಾಂಧುನ್, ಪಾಳೆ ಭಾಂದುನ್ ಕಾರ್ತತಲೆ ಮಿಶಿನ್ ಇಬೆ ಕರ್, 3 ಮಾನಾ ಲೊಂಕ್ಟಾಚೆ ಎಕ್ ತಗಾಡ್ ಘೆವ್ನ್, ತುಜ್ಯಾ ಅನಿ ತ್ಯಾ ಶಾರಾಚ್ಯಾ ಮದ್ದಿ ಇಬೆ ಕರುನ್ ತ್ಯಾ ಶಾರಾಕ್ಡೆ ತೊಂಡ್ ಕರುನ್ ಇಬೆ ರಾ; ತೆ ಆಕ್ರಮನ್ ಕರುನ್ ಹೊತಾ, ಅನಿ ತಿಯಾ ತೆಕಾ ಆಕ್ರಮನ್ ಕರಲ್ಯಾ ಸಾರ್ಕೆ ಹೊತಾ. ಹೆ ಇಜ್ರಾಯೆಲ್ ಪಿಳ್ಗಿಚ್ಯಾಕ್ನಿ ವಳಕ್ ಹೊವ್ನ್ ರ್‍ಹಾತಾ.

4 ಅಸಿರ್‍ಹಾತಾನಾ ತಿಯಾ ತುಜ್ಯಾ ಧಾವ್ಯಾ ಭಾಜುಕ್ ನಿಜುನ್ ಘೆ, ಕಶ್ಯಾಕ್ ಮಟ್ಲ್ಯಾರ್, ಇಜ್ರಾಯೆಲ್ ಪಿಳ್ಗಿಚ್ಯಾ ಲೊಕಾನಿ ಪಾಪಾಚೆ ವಜ್ಜೆ ತೆಚ್ಯಾ ವರ್‍ತಿ ಥವ್ಚೆ; ಅನಿ ತಿಯಾ ಕವ್ಡ್ಯಾ ದಿಸಾ ಸಗೊಳ್ ಅಸಿ ನಿಜುನ್ ರಾತಯ್ ಬಗ್ ತವ್ಡ್ಯಾ ದಿಸಾ ಸಗೊಳ್ ತೆಂಚಿ ಪಾಪಾಚೆ ವಜ್ಜೆ ವಾವುನ್ಗೆವ್ನ್ ರ್‍ಹಾವ್ಚೆ. 5 ಕಶ್ಯಾಕ್ ಮಟ್ಲ್ಯಾರ್, ಅನಿ ತೆನಿ ಕವ್ಡ್ಯಾ ವರ್ಸಾ ಸಗೊಳ್ ತೆಂಚೊ ಪಾಪಾಚೆ ವಜ್ಜೆ ರ್‍ಹಾತಾ, ತವ್ಡಿ ದಿಸಾ ಮಟ್ಲ್ಯಾರ್, ತಿಸಾರ್ ನಂವದ್ ದಿಸಾ ಸಗೊಳ್ ತಿಯಾ ನಿಜುನುಚ್ ರ್‍ಹಾವ್ಚೆ ಮನುನ್ ತುಕಾ ವಳಕ್ ಕರ್ಲಾ; ತವ್ಡ್ಯಾ ದಿಸಾ ಸಗೊಳ್ ತಿಯಾ ಇಜ್ರಾಯೆಲ್ ಪಿಳ್ಗಿಯಾಂಚೊ ಪಾಪಾಚೆ ವಜ್ಜೆ ವಾವುನ್ಗೆವ್ನ್ ರ್‍ಹಾವ್ಚೆ. 6 ತವ್ಡಿ ದಿಸಾ ಸರಲ್ಲ್ಯಾ ಮಾನಾ ಉಜ್ವ್ಯಾ ಭಾಜುನ್ ನಿಜುನ್ ಘೆವ್ನ್ ಜುದೆವಾಂಚ್ಯಾ ಪಿಳ್ಗಿಚೊ ಪಾಪಾಚೆ ವಜ್ಜೆ ವಾವುನ್ ಘೆವ್ಚೆ; ವರ್ಸಾಕ್ ಎಕ್ ದಿಸ್ ಮಟ್ಲ್ಯಾರ್, ಚಾಳಿಸ್ ದಿಸಾ ತೆಂಚೊ ಪಾಪಾಚೆ ವಜ್ಜೆ ವಾವ್ಚೆ ಮನುನ್ ತುಕಾ ವಳಕ್ ಕರ್ತಾ.

7 ಅನಿ ತುಜ್ಯಾ ಭುಜೆಕ್ ಕಾಂಬ್ರಾನ್ ನಸ್ತಾನಾ, ಆಕ್ರಮನ್ ಕರಲ್ಲ್ಯಾ ಜರುಜಲೆಮಾಚ್ಯಾ ಕಡೆ ತೊಂಡ್ ಪರ್‍ತುನ್ ಘೆವ್ನ್ ಶಾರಾಚ್ಯಾ ವಿರೊಧ್ ಪ್ರವಾದ್ ಕರ್. 8 ಅಬಕ್, ತುಜಿ ಆಕ್ರಮನಾಚಿ ದಿಸಾ ಸರಿ ಸಗೊಳ್ ತಿಯಾ ಉಜ್ವ್ಯಾ ಭಾಜುಕ್ ಧಾವ್ಯಾ ಭಾಜುಕ್ ಪರ್ತಿನಾ ಸಾರ್ಕೆ ತುಕಾ ಭಾಂದ್ತಾ.

9 ತಿಯಾ ಘಂವ್, ಜವ್, ಅವರೆ, ಅಲಸಾಂದೆ, ತಿಳ್, ಹಾರ್ಬೊರೆ, ಹೆ ಸಗ್ಳೆ ಘೆವ್ನ್ ಎಕುಚ್ ಆಯ್ದಾನಾತ್ ಘಾಲುನ್ ಮಿಳ್ವುನ್ ತೆಚೆನಿ ಬಾರಿಕ್ಲಿ ಕರುನ್ ಘೆ; ಅನಿ ಭಾಜುಕ್ ನಿಜಲ್ಯಾ ಯೆವ್ಡೆನ್ ದಿಸಾ, ಮಟ್ಲ್ಯಾರ್ ತಿನ್ಸೆ ನಂವದ್ ದಿಸಾ ಸಗೊಳ್ ತೆ ಖಾ. 10 ಅನಿ ತಿಯಾ ಖಾತಲೊ ಖಾನೊ ದಿಸಾಕ್ ಮನುನ್ ದೊನ್ಸೆ ತಿಸ್ ಗ್ರಾಮ್ ವಜನಾ ಯೆವ್ಡೆ ಖಾ; ತಸಿ ಕರುನ್ ತನ್ನಾ ಉಲ್ಲೆ ಉಲ್ಲೆ ಖಾವ್ಚೆ, 11 ಅನಿ ಪಾನಿಬಿ ದಿಸಾಕ್ ಎಕ್ ತಾಂಬ್ಯಾ ಭರ್ ತನ್ನಾ ಉಲ್ಲೆ ಉಲ್ಲೆ ಫಿವ್ಚೆ. 12 ಅನಿ ತಿಯಾ ನಾಕ್ಡಾಂಚ್ಯಾ ಬದ್ಲಾಕ್ ಮಾನ್ಸಾಚೊ ಶೆನ್ ವಾಪ್ರುನ್ ಲೊಕಾಂಚ್ಯಾ ಇದ್ರಾಕುಚ್ ತ್ಯಾ ಪಿಟ್ಟಾನ್ ಬಾರಿಕ್ಲಿ ಕರುನ್ ಜವಾಚ್ಯಾ ಬಾರಿಕ್ಲಿಯಾಂಚ್ಯಾ ಸಾರ್ಕೆ ಖಾ. 13 ಸರ್ವೆಸ್ಪರಾಚೆ ಬೊಲ್ನೆ ಇಜ್ರಾಯೆಲ್ ಪಿಳ್ಗಿಚಿ ಲೊಕಾಬಿ ಮಾಜ್ಯಾಕ್ನಾ ದುಸ್ರ್ಯಾ ದೆಸಾಕ್ ಪಳ್ವುನ್ ಘಾಲುನ್ ತ್ಯಾ ದೆಶಾಚ್ಯಾ ಲೊಕಾಂಚ್ಯಾ ಮದ್ದಿ ವಸ್ತಿ ರ್‍ಹಾವ್ನ್ ಘೆವ್ನ್ ತೆಂಚೊ ಖಾನೊ ಬುರ್ಸೆ ಕರುನ್ ಖಾತಾತ್; ಹೆ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್.

14 ತನ್ನಾ ಮಿಯಾ, "ಸರ್ವೆಸ್ಪರ್ ದೆವಾ ನಕ್ಕೊ, ಮಿಯಾ ಬುರ್ಸೆ ಕಾಯ್ ಅಪಡಲ್ಲೊ ನ್ಹಯ್. ಮಿಯಾ ಬಾರಿಕ್ ರ್‍ಹಾತಾನಾಚ್ಯಾನ್ ಆಜ್ ಪತರ್ ಮರಲ್ಯಾ ಜಾನಾವರಾಂಚೆ ಮಾಂಸ್ ಹೊಂವ್ದಿತ್, ಡಂಗ್ಳಿತ್ಲ್ಯಾ ಜನಾವರಾನ್ ಸಾವ್ಜಾನ್ ಮಾರಲ್ಲೆ ಮಾಂಸ್ ಖಲ್ಲೊ ನ್ಹಯ್; ಅನಿ ಖಲೊಬಿ ಬುರ್ಸೊ ಖಾನೊ ತೊಂಡಾತ್ ಘಾಟಲ್ಲೊ ನಾ", ಮನುನ್ ಸಾಂಗ್ತಾನಾ, 15 ತೆನಿ ಮಾಕಾ ಬಗ್, ಮಾನ್ಸಾಚ್ಯಾ ಶೆನಾಚ್ಯಾ ಬದ್ಲಾಕ್ ಗೊರಾಂಚೆ ಶೆನ್ ತುಕಾ ದಿಲಾ, ತೆ ವಾಪ್ರುನ್ ಘೆವ್ನ್ ತಿಯಾ ಬಾರಿಕ್ಲಿ ಬಾಜುನ್ ಘೆ, ಮನುನ್ ಜವಾಬ್ ದಿಲ್ಯಾನ್. 16 ತವ್ಡೆಚ್ ನ್ಹಯ್ ತೆನಿ ಮಾಕಾ, ನರ್ ಮಾನ್ಸಾ, ಮಿಯಾ ಜರುಜಲೆಮಾಕ್ ಯೆತಲೆ ಜೆವಾನ್ ಖಾನೊ ಬಂದ್ ಕರ್ತಾ, ಸಗ್ಳಿ ಲೊಕಾ ವಜನಾಚ್ಯಾ ಪ್ರಕಾರ್ ಭಿಂವ್ನ್ ಘೆವ್ನ್ ಖಾತಾತ್, ಪಾನಿಬಿ ಮಾಪಾಚ್ಯಾ ಪರ್ಕಾರ್ ಘಾಬ್ರುನ್ ಫಿತಾತ್. 17 ಅನಿ ತೆಂಚ್ಯಾತ್ ಹರ್ ಎಕ್ಲೊಬಿ ಖಾನ್ಯಾ ಫಿನ್ಯಾಕ್ನಾ ಕಮ್ಮಿ ಎವ್ನ್ ಜಿರುನ್ ಅಪ್ನಾಚ್ಯಾ ಪಾಪಾತ್ ನಾಶ್ ಹೊವ್ನ್ ಜಾತಾತ್.