ಎಜ್ಕೆಲ್ 33

ದೆವಾನ್ ಎಜ್ಕೆಲಾಕ್ ಬಗುನ್ ಘೆತಲೊ

1 ಸರ್ವೆಸ್ಪರಾನ್ ಮಾಜ್ಯಾ ವಾಂಗ್ಡಾ ಬೊಲ್ಲ್ಯಾನ್, 2 "ನರ್ ಮಾನ್ಸಾ, ತುಜ್ಯಾ ಲೊಕಾಕ್ನಿ ಆಯ್ಕಿ ಸಾರ್ಕೆ ತೆಂಕಾ ಅಸೆ ಸಾಂಗ್, ಮಿಯಾ ದೆಶ್ಯಾಚ್ಯಾ ವರ್‍ತಿ ತಲ್ವಾರ್ ಪಡ್ತಾನಾ, ತ್ಯಾ ದೆಶ್ಯಾಚೆ ಅಪ್ನಾಕ್ಡೆ ಎಚುನ್ ಎಗ್ಳುನ್ ಥವಲ್ಲ್ಯಾ ರಾಕ್ವಲ್ಯಾನ್. 3 ದೆಶಾಚ್ಯಾ ವರ್‍ತಿ ಪಡ್ತಲ್ಯಾ ತಲ್ವಾರಾಕ್ ಬಗುನ್, ಸಿಂಗಾ ಸಾರ್ಕೊ ಭೊಂಗೊ ವಾಜ್ವುನ್ ಅಪ್ನಾಚ್ಯಾ ಸ್ವತ್ಯಾಚ್ಯಾ ಲೊಕಾಕ್ನಿ ಹುಶ್ಯಾರ್ಕಿ ದಿಲ್ಯಾರ್ಬಿ, 4 ಸಿಂಗಾ ಸಾರ್ಕೊ ಭೊಂಗ್ಯಾಚಿ ಧನ್ ಆಯ್ಕಲ್ಲೊ ಕೊನ್ಬಿ ಹುಶ್ಯಾರ್ ಹೊಯ್ ನಸ್ತಾನಾ ಪಡ್ತಲ್ಯಾ ಕೊಯ್ತ್ಯಾಕ್ ಗಾವ್ನ್ ನಾಶ್ ಹೊಲ್ಯಾರ್, ಅಪ್ನಾಚ್ಯಾ ಮರ್ನಾಕ್ ಅಪ್ನಿಚ್ ಕಾರನ್ ಹೊತಾ. 5 ಕಶ್ಯಾಕ್ ಮಟ್ಲ್ಯಾರ್, ತೊ ಸಿಂಗಾಚ್ಯಾ ಸಾರ್ಕೊ ಹೊತ್ತೊ ಪಂವ್ಯಾಚೊ ಆವಾಜ್ ಆಯ್ಕುನ್ಬಿ ಹುಶ್ಯಾರ್ ಹೊವ್ಕ್ ನಾ, ಅಪ್ನಾಚ್ಯಾ ಮರ್ನಾಕ್ ಅಪ್ನಿಚ್ ಕಾರನ್, ಹುಶ್ಯಾರ್ ಹೊಲ್ಲೊ ರಾಲ್ಯಾರ್ ಅಪ್ನಾಚೊ ಜಿವ್ ಹುರ್ವುನ್ ಘೆಯ್ ಹೊತ್ತೊ. 6 ಖರೆ ರಾಕ್ವಲಿಕಾರಾನ್, ಪಡುಲಾಗಲ್ಲೊ ಕೊಯ್ತೊ ಬಗುನ್ಬಿ ಪಂವ್ವೊ ವಾಜ್ವಿ ನಸ್ತಾನಾ, ಸ್ವತ್ಯಾಚ್ಯಾ ಲೊಕಾಕ್ನಿ ಹುಶ್ಯಾರ್ಕಿ ದಿಯ್ನಸ್ತಾನಾ ರ್‍ಹಾತಾನಾ, ತಲ್ವಾರ್ ಪಡುನ್ ತ್ಯಾ ಲೊಕಾತ್ನಿ ಕೊನಾಕ್ ತರಿಬಿ ನಾಶ್ ಕರ್ಲ್ಯಾರ್, ಅಪ್ನಾಚ್ಯಾ ಬುರ್ಸ್ಯಾಪಾನಾನ್ ಮಾನ್ಸಾಚ್ಯಾ ಮರ್ನಾಕ್ ಗುರಿ ಹೊಲ್ಲ್ಯಾ ರಾಕ್ವಲ್ಯಾಕ್ ಸೆಡ್ ಕಾಡುನ್ ಘೆತಾ".

7 ನರ್ ಮಾನ್ಸಾ, ಮಿಯಾ ತುಕಾ ಇಜ್ರಾಯೆಲಾಕ್ನಿ ರಾಕ್ವಲಿ ಕರುನ್ ನೆಮ್ಲಾ, ತಸೆ ಹೊವ್ನ್, ತಿಯಾ ಮಾಜೊ ಖಬ್ರಿಕಾರ್, ಮಾಜ್ಯಾ ತೊಂಡಾತ್ನಾ ಯೆತಲ್ಯಾ ಗೊಸ್ಟಿಯಾ ಆಯ್ಕುನ್, ತೆಂಕಾ ಜಾಗ್ವು. 8 ಮಿಯಾ ಬುರ್ಸ್ಯಾ ಮಾನ್ಸಾಕ್, ಬುರ್ಸ್ಯಾ ಮಾನ್ಸಾ, ತಿಯಾ ಖರೆಚ್ ಮರ್ತೆಯ್, ಮನುನ್ ಬೊಲ್ತಾನಾ, ತಿಯಾ ತ್ಯಾ ಬುರ್ಸ್ಯಾ ಮಾನ್ಸಾಕ್ ಮರುನುಚ್ ಮರ್ತೆಯ್ ಮನುನ್ ಸಾಂಗ್ತಾನಾ, ತಿಯಾ ತ್ಯಾ ಬುರ್ಸ್ಯಾ ಮಾನ್ಸಾಕ್ ಅಪ್ನಾಚ್ಯಾ ಬುರ್ಸ್ಯಾ ವಾಟೆಕ್ನಾ ಚುಕ್ವುಕ್ ತೆಕಾ ಹುಶ್ಯಾರ್ಕಿ ದಿಯ್ನಸ್ತಾನಾ ಗೆಲ್ಯಾರ್, ತೊ ಅಪ್ನಾಚ್ಯಾ ಚುಕೆ ವಯ್ನಾಚ್ ಮರ್ತಲೆ ಹೊತಾ, ತೆಜ್ಯಾ ಮರ್ನಾಕ್ ಕಾರನ್ ಹೊಲ್ಲ್ಯಾ ತುಕಾ ಮಿಯಾ ಶೆಡ್ ಕಾಡುನ್ ಘೆತಾ. 9 ಖರೆ ತಿಯಾ ಬುರ್ಸ್ಯಾಕ್ ಬುರ್ಸ್ಯಾ ವಾಟೆಕ್ನಾ ಚುಕ್ವುತಾನಾ ತೆಕಾ ಹುಶ್ಯಾರ್ಕಿ ದಿಲ್ಯಾರ್ಬಿ ತೊ ತೆ ಸೊಡಿನಸ್ತಾನಾ ರಾಲ್ಯಾರ್ ಅಪ್ನಾಚ್ಯಾ ಚುಕೆತುಚ್ ಮರ್ತಾ, ತಿಯಾ ತರ್ ತುಜೊ ಜಿವ್ ಹುರ್ವುನ್ ಘೆಟ್ಲೆಯ್.

ವಯಕ್ತಿಕ್ ಜವಾಬ್ದಾರಿ

10 ನರ್ ಮಾನ್ಸಾ, ಇಜ್ರಾಯೆಲ್ ಪಿಳ್ಗಿಚ್ಯಾಕ್ನಿ ಅಸೆ ಸಾಂಗ್, ಅಯ್ಯೊ ಅಮ್ಚ್ಯಾ ಚುಕೆಂಚೊ ಅನಿ ಪಾಪಾಂಚೊ ವಜನ್ ಅಮ್ಚ್ಯಾ ವರ್‍ತಿ ಪಡ್ಲಾ, ತೆಂಚ್ಯಾ ವಯ್ನಾ ಅಮಿ ಕರ್ಗುನ್ ಗೆಲ್ಯಾಂವ್, ಅಮಿ ಅಸೆಚ್ ರ್‍ಹಾತಾಂವ್ ಮನುನ್ ಘೆತ್ಯಾಸಿ ನ್ಹಯ್. 11 ಮಾಜ್ಯಾ ಜಿವಾವರ್‍ತಿ ಆನ್, ಬುರ್ಸ್ಯಾಚ್ಯಾ ಮರ್ನಾತ್ ಮಾಕಾ ಉಲ್ಲೆಬಿ ಖುಶಿನಾ, ತೊ ಅಪ್ನಾಚಿ ಬುರ್ಶಿ ವಾಟ್ ಸೊಡುನ್ ಸೊಡುಂದಿ, ಇಜ್ರಾಯೆಲ್ ಪಿಳ್ಗಿಚ್ಯಾನೊ, ತುಮಿ ಕಶ್ಯಾಕ್ ಮರುಚೆ? ಹೆ ಸರ್ವೆಸ್ಪರ್ ದೆವಾಚೆ ಬೊಲ್ನೆ. 12 ನರ್ ಮಾನ್ಸಾ, ಲೊಕಾಕ್ನಿ ಅಸೆ ಸಾಂಗ್, ಬರ್ಯಾ ಮಾನ್ಸಾನ್ ಚುಕ್ ಕರ್ಲ್ಯಾರ್ ತೆಚೆ ಬರೆ ಕಾಮ್ ತೆಕಾ ಉದ್ದಾರ್ ಕರಿನಾ, ಬುರ್ಸ್ಯಾ ಮಾನ್ಸಾನ್ ಅಪ್ನಾಚೆ ಬುರ್ಸೆ ಕಾಮ್ ಸೊಡಲ್ಯಾ ತನ್ನಾ ತೆಜ್ಯಾ ಪಾಪಾಚೆನ್ ತೆಕಾ ಪಾಡ್ವುಕ್ ಹೊಯ್ನಾ, ಬರ್ಯಾ ಮಾನ್ಸಾನ್ ಪಾಪ್ ಕರಲ್ಲ್ಯಾ ತನ್ನಾ ತೆಚಿ ಬರೆಪಾನ್ ತೆಕಾ ಹುರ್ವಿನಾತ್. 13 ಮಿಯಾ ಬರ್ಯ್ಯಾ ಮಾನ್ಸಾಕ್ ತಿಯಾ ಬರ್ಯಾನ್ ಬಾಳ್ವಿ ಕರ್‍ತೆ ಮನ್ತಾನಾ, ತೆನಿ ಅಪ್ನಾಚ್ಯಾ ಬರ್ಯಾ ಕಾಮಾಂಚ್ಯಾ ವರ್‍ತಿ ಭರೊಸೊ ಥವ್ನ್, ಪಾಪ್ ಕರ್ಲ್ಯಾರ್, ತೆನಿ ಕರಲ್ಲೆ ಎಕ್ ಬರೆ ಕಾಮ್ಬಿ ತೆಜ್ಯಾ ಮೆಜ್ನಿಕ್ ಮಿಳ್ವುನ್ ಹೊಯ್ನಾ, ತೆನಿ ಕರಲ್ಲ್ಯಾ ಪಾಪಾ ವಯ್ನಾಚ್ ತೊ ಮರ್ತಾ. 14 ಮಿಯಾ ಬುರ್ಸ್ಯಾ ಮಾನ್ಸಾಕ್, ತಿಯಾ ಮರುನುಚ್ ಜಾತಯ್ ಮನುನ್ ಸಾಂಗ್ತಾನಾ, ತೆನಿ ಅಪ್ನಾಚಿ ಪಾಪಾಚಿ ಕಾಮಾ ಸೊಡುನ್ ಬರಿ ಕಾಮಾ ಕರಿತ್ ರ್‍ಹಾತಾ. 15 ತಸೆ ಮಟ್ಲ್ಯಾರ್, ಬುರ್ಸ್ಯಾ ಮಾನ್ಸಾನ್ ಲೊಕಾಂಚ್ಯಾಕ್ನಾ ಪಯ್ಸೆ ಕಾಡುನ್ ಘೆಯ್ ನಸ್ತಾನಾ, ಪರ್‍ತುನ್ ದಿವ್ನ್, ಜಿವಾಕ್ ಬರೆ ಹೊತಲಿ ಕಾಮಾ ಕರುನ್, ಸಗ್ಳ್ಯಾ ಬುರ್ಸ್ಯಾ ಕಾಮಾಕ್ನಿ ಧುರ್ ಹೊವ್ನ್ ರ್‍ಹಾತಾನಾ, ತೊ ಮರಿ ನಸ್ತಾನಾ ಖರೆಚ್ ಬಾಳ್ವಿ ಕರ್ತಾ. 16 ತೆನಿ ಕರಲ್ಲಿ ಖಲಿ ಚುಕ್ ಬಿ ತೆಜ್ಯಾ ಮೆಜ್ನಿತ್ ಮಿಳ್ವುನ್ ಹೊಯ್ನಾ; ತೊ ಬರಿ ಕಾಮಾ ಕರುಕ್ ಲಾಗಲ್ಲ್ಯಾ ಸಾಟ್ನಿ ಖರೆಚ್ ಬಾಳ್ವಿ ಕರ್ತಾ.

17 "ಖರೆ ತುಜಿ ಲೊಕಾ ಸರ್ವೆಸ್ಪರ್ ದೆವಾಚಿ ವಾಟ್ ಸಮಾ ನಾ ಮನುನ್ ಸಾಂಗುಲ್ಲಾತ್, ತೆಂಚಿ ವಾಟಾಚ್ ಸಮಾ ನಾತ್. 18 ಬರ್ಯಾ ಮಾನ್ಸಾನ್ ಅಪ್ನಾಚೆ ಬರೆ ಪಾನ್ ಸೊಡುನ್ ಬುರ್ಸೆಕಾಮ್ ಕರ್ಲ್ಯಾರ್, ತ್ಯಾ ಬುರ್ಸ್ಯಾ ಕಾಮಾ ವಯ್ನಾಚ್ ಮರ್ತಾ. 19 ಬುರ್ಸೊ ಮಾನುಸ್ ಬುರ್ಸೆ ಕಾಮ್ ಸೊಡುನ್ ಬರಿ ಕಾಮಾ ಕರಲ್ಲೊ ಹೊಲ್ಯಾರ್, ತೆಜ್ಯಾ ವಯ್ನಾ, ಹುರ್ತಾ. 20 ಖರೆ ಸರ್ವೆಸ್ಪರಾಚೆ ವಾಟ್ ಸಮಾ ನ್ಹಯ್ ಮನುನ್ ಸಾಂಗ್ತ್ಯಾಶಿ, ಇಜ್ರಾಯೆಲಾಂಚ್ಯಾ ಪಿಳ್ಗಿಚ್ಯಾನೊ, ತುಮ್ಚ್ಯಾ ಹರ್ ಎಕ್ಲ್ಯಾಚ್ಯಾ ಚಾಲ್ನುಕಿಕ್ ಸಮಾ ಮಿಯಾ ತುಮ್ಕಾ ಪ್ರತಿ ಫಳ್ ದಿತಾ".

ಜರುಜಲೆಮ್ ಪಡ್ತಲಿ ಖಬರ್

21 ಅಮಿ ಬಂಧಿ ಹೊಲ್ಲ್ಯಾ ಬಾರಾವ್ಯಾ ವರ್ಸಾಚ್ಯಾ ಧಾವ್ಯಾ ಮ್ಹೆನ್ಯಾಚ್ಯಾ ಪಾಂಚ್ವೆಚ್ಯಾ ದಿಸಾತ್, ಜರುಜಲೆಮಾಕ್ನಾ ಚುಕ್ವುನ್ ಯೆಲ್ಲ್ಯಾತ್ಲ್ಯಾ ಎಕ್ಲ್ಯಾನ್, ಮಾಜೆಕ್ಡೆ ಎವ್ನ್, ಶಾರ್ ವಿರೊಧಿಯಾಂಚ್ಯಾ ಹಾತಿತ್ ಗಾವ್ಲೆ ಮನುನ್ ಸಾಂಗ್ಲ್ಯಾನ್. 22 ತೊ ಯೆತಲ್ಯಾ ಅದ್ಲ್ಯಾ ಸಾಂಚೆಕ್ಡೆ ಮಿಯಾ ಸರ್ವೆಸ್ಪರಾಚ್ಯಾ ಹಾತಿನ್ ಲೈ ಮಾಗ್ನಿ ಕರಿತ್ ರ್‍ಹಾತಾನಾ, ಸರ್ವೆಸ್ಪರಾನ್ ತೆ ಪಳಾಪ್ ಹೊಲೆ ಅನಿ ತೊ ಸಕ್ಕಾಳಿ ಯೆತಾ ಮನುನ್ ಮಾಜ್ಯಾ ತೊಂಡಾನ್ ಸಾಂಗುಕ್ ಲಾವ್ಲ್ಯಾನ್, ಹೊಯ್ ಮಾಜೆ ತೊಂಡ್ ಬೊಲುಕ್ಲಾಗ್ಲೊ ಅನಿ ಮಾಜೆ ಮುಕ್ಕೆ ಪಾನ್ ಗೆಲೆ.

ಲೊಕಾಂಚಿ ಚುಕಾ

23 ತನ್ನಾ ಸರ್ವೆಸ್ಪರಾನ್ ಮಾಜ್ಯಾ ವಾಂಗ್ಡಾ ಬೊಲ್ಲ್ಯಾನ್. 24 ನರ್ ಮಾನ್ಸಾ, ಇಜ್ರಾಯೆಲ್ ದೆಶಾಚ್ಯಾ ಹಾಳ್ ಜಾಗ್ಯಾ ವಯ್ಲಿ ವಸ್ತಿ ರಾತಲಿ ಲೊಕಾ ಅಬ್ರಾಮ್ ಎಕ್ಲೊ ರಾಲ್ಯಾರ್ಬಿ ಹ್ಯೊ ದೆಶ್ ತೆಕಾ ವಾಟ್ಯಾಕ್ ಗಾವ್ಲೊ ನ್ಹಯ್, ತೆ ಅಮ್ಚ್ಯಾ ಲೊಕಾಕ್ನಿ ವಾಟ್ಯಾಕ್ ಗಾವಲ್ಲೆ ಕಾಯ್ ಮೊಟೆ ನ್ಹಯ್ ಮನುನ್ಗೆತ್ ಹಾತ್. 25 ತಸೆ ಹೊವ್ನ್ ತಿಯಾ ತೆಂಕಾ ಅಸೆ ಸಾಂಗ್, ಸರ್ವೆಸ್ಪರ್ ದೆವ್ ಅಸೊ ಸಾಂಗ್ತಾ, ರಗ್ತಾಚೆ ಮಾಂಸ್ ಖಾತಲೆ ಅನಿ, ಮುರ್ತಿ ಫುಜ್ಯಾ ಕರ್‍ತಲೆ ಅನಿ ಜಿವ್ ಕಾಡ್ನಾರೆ, ತುಮ್ಚ್ಯಾ ಸಾರ್ಕೆ ಕಸೆ ದೆಶ್ ಅನ್ಬೊಗ್ಸುಕ್ ಹೊತಾ? 26 ತುಮಿ ತಲ್ವಾರಾತ್ನಿ ರ್‍ಹಾವ್ನ್, ಅನಿ ಬುರ್ಶಿ ಕಾಮಾ ಕರ್‍ತಲೆ, ತುಮ್ಚ್ಯಾತ್ಲೊ ಹರ್ ಎಕ್ಲೊ ಅಪ್ನಾಚ್ಯಾ ಸೆಜಾರಾಚ್ಯಾ ಬಾಯ್ಕೊಕ್ ಹಾಳ್ ಕರ್ತಾ, ತುಮ್ಚ್ಯಾ ಅಸ್ಲೊ ಕಸೆ ದೆಶ್ ಅನ್ಬೊಗ್ಸುಕ್ ಹೊತಾ? 27 ಅನಿ ತೆಂಕಾ ಅಸೆ ಸಾಂಗ್, ಸರ್ವೆಸ್ಪರ್ ಅಸೊ ಸಾಂಗ್ತಾ, ಮಾಜ್ಯಾ ಜಿವಾ ವರ್‍ತಿ ಆನ್ ಘಾಲುನ್ ಸಾಂಗ್ತಾ, ಹಾಳ್ ಗಾಂವಾತ್ ಹೊತ್ತ್ಯಾಕ್ನಿ ಕೊಯ್ತೊ ಮಾರ್ತಾ, ಮಾಳ್ ಜಾಗ್ಯಾ ವರ್‍ತಿ ಹೊತ್ತ್ಯಾಕ್ನಿ ಮಿಯಾ ಕ್ರುರ್ ಜನಾವರಾಂಚ್ಯಾ ತೊಂಡಾಕ್ ಗಾಯ್ ಸಾರ್ಕೆ ಕರ್ತಾ, ಡೊಂಬಾತ್ನಿ ಅನಿ ಖಿಲ್ಲೊತ್ನಿ ಹೊತ್ತ್ಯಾಕ್ನಿ ದುಕ್ನೆ ಜಿವ್ ಕಾಡ್ತಾ. 28 ಮಿಯಾ ದೆಸಾಕ್ ಹಾಳ್ ಪಾಳ್ ಕರ್ತಾ, ತೆಜ್ಯಾ ತಾಕ್ತಿಚಿ ಘಮಂಡ್ ಉತ್ರುನ್ ಜಾತಾ, ಇಜ್ರಾಯೆಲಾಚೆ ಪಾನಿಯಾಚೆ ಜಾಗೆ ಹಾಳ್ ಪಡ್ತಾತ್, ಥೈ ಕೊನ್ಬಿ ದಾಟುನ್ ಜಾಯ್ನಾತ್. 29 ತೆನಿ ಅಪ್ನಿ ಕರಲ್ಲ್ಯಾ ಲೈ ಬುರ್ಸ್ಯಾ ಕಾಮಾಂಚ್ಯಾ ವಯ್ನಾ ಮಿಯಾ ದೆಶ್ ಹಾಳ್ ಪಾಡ್ ಕರಲ್ಲ್ಯಾ ತನ್ನಾ, ಮಿಯಾಚ್ ಸರ್ವೆಸ್ಪರ್ ಮನುನ್ ತೆಂಕಾ ಕಳ್ತಾ.

ಪ್ರವಾದ್ಯಾಚ್ಯಾ ಖಬ್ರಿಚೆ ಫಳ್

30 ನರ್ ಮಾನ್ಸಾ, ತುಜಿ ಲೊಕಾ ಭಿತ್ತಿಯಾಂಚ್ಯಾ ಸಾವ್ಳಿತ್ ಘರಾಚ್ಯಾ ಹುಂಬ್ಡ್ಯಾತ್ನಿ ತುಜಿಚ್ ವಿಶಯಾತ್ ಸಾಂಗುನ್, ಅಪ್ನಾ ಅಪ್ನಾತ್ನಿಚ್ ಎಕಾಮೆಕಾಕ್, ಸರ್ವೆಸ್ಪರಾಚ್ಯಾ ತೊಂಡಾತ್ನಾ ಯೆಲ್ಲಿ ಗೊಸ್ಟಿಯಾ ಕಾಯ್ ಮನುನ್ ಆಯ್ಕುವಾ ಮನುನ್ ಬೊಲುನ್ಗೆತಾತ್. 31 ಪರಸ್ನೆ ಇಚಾರುಕ್ ಯೆತಲ್ಯಾ ಲೊಕಾಂಚ್ಯಾ ಸಾರ್ಕೆ ತೆನಿ ತುಜ್ಯಾಕ್ಡೆ ಎವ್ನ್, ಮಾಜಿ ಭಕ್ತಾ ಹೊವ್ನ್ ತುಜ್ಯಾ ಇದ್ರಾಕ್ ಬಸುನ್ ತುಜಿ ಬೊಲ್ನೆ ಆಯ್ಕ್ತಾತ್, ಖರೆ ತೆ ಕಾಮ್ ಕರಿನಾತ್, ತೊಂಡಾತ್ನಾ ಲೈ ಪ್ರೆಮ್ ದಾಕ್ವುತಾತ್, ತೆಂಚೊ ಮನ್ ಅಪ್ನಿ ಚೊರುನ್ ಘೆಟಲ್ಲ್ಯಾಚ್ಯಾ ವರ್‍ತಿ ಜಾತಾ. 32 ಅಬಕ್ ತುಜಿ ಗೊಸ್ಟ್ ತೆಂಚ್ಯಾ ಮನಾತ್ ಎಕ್ ಗಿತ್ ಕಾರ್, ವಾಜ್ಪಾ ಶಾನೆ ಪಾನಾನ್ ವಾಜ್ವುನ್, ಲೈ ಬರ್ಯಾ ಧನಾನ್ ಸಾಂಗ್ತಲ್ಯಾ ಪ್ರೆಮಾಚ್ಯಾ ಗಿತಿಚ್ಯಾ ಸಾರ್ಕೆ, ತುಜಿ ಗೊಸ್ಟಿಯಾ ಆಯ್ಕ್ತಾತ್, ಖರೆ ಮಾನುನ್ ಚಲಿನ್ಯಾತ್. 33 ತಿಯಾ ಫಿಡೆಚ್ ಕಳ್ವಲ್ಲೆ ಹೊಲ್ಲ್ಯಾ ತನ್ನಾ, ಅಹಾ ಘಡ್ಲೆ, ಅಪ್ನಾಚ್ಯಾ ಮದ್ದಿ ಹೊತ್ತೊ ಪರ್ವಾದಿಚ್ ಮನುನ್ ತೆಂಕಾ ಕಳ್ಳೆ.