ಎಜ್ಕೆಲ್ 14

ದೆವಾನ್ ಮುರ್ತಿ ಆರಾದನ್ ಖಂಡನ್ ಕರಲ್ಲೆ

1 ತನ್ನಾ ಇಜ್ರಾಯೆಲಾಚಿ ಥೊಡಿ ಜಾಂನ್ತಿ ಲೊಕಾ ಮಾಜೆಕ್ಡೆ ಬಸ್ಲಿ, 2 ತನ್ನಾ ಸರ್ವೆಸ್ಪರಾನ್ ಮಾಜೆಕ್ಡೆ ಬೊಲ್ಲ್ಯಾನ್, 3 ನರ್ ಮಾನ್ಸಾ ಹಿ ಲೊಕಾ ಮುರ್ತಿಯಾಕ್ನಿ ಅಪ್ನಾಚ್ಯಾ ಮನಾತ್ ಥವ್ನ್ ಘೆವ್ನ್, ಅಸ್ಲ್ಯಾಕ್ನಿ ಮಿಯಾ ಖರೆ ಹೊತ್ತೆ ಸಾಂಗಿ ನಸಲ್ಲೆ ದಿತಲೆ ಸಮಾ ಕಾಯ್? ಕನ್ನಾಬಿ ನಾ. 4 ತಸೆ ಹೊವ್ನ್ ತಿಯಾ ತೆಂಕಾ ಬೊಲುನ್ ಸಾಂಗ್, ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಇಜ್ರಾಯೆಲಾಚ್ಯಾ ಪಿಳ್ಗಿಚ್ಯಾತ್ನಿ ಜೆ ಕೊನ್ ಮುರ್ತಿಯಾಕ್ನಿ ಅಪ್ನಾಚ್ಯಾ ಮನಾತ್ ಜಾಗೊ ದಿವ್ನ್ ಚುಕ್ ಕರುಂಗೆತ್ ಹಾತ್ ಆನಿ ಪ್ರವಾದಿಯಾಕ್ನಿ ಪರಸ್ನೆ ಇಚಾರುಕ್ ಯೆಲ್ಯಾರ್, ಪಾತಾಳಾಕ್ ಮಟ್ಲ್ಯಾರ್ ತೆಂಚ್ಯಾ ಮೆಜ್ನಿಕ್ ಯೆಯ್ ನಸಲ್ಲ್ಯಾ ಮುರ್ತಿಯಾಕ್ನಿ ಸಮಾ ಹೊವ್ನ್ ಜವಾಬ್ ದಿತಾ. 5 ಇಜ್ರಾಯೆಲಾಚೆ ಪಿಳ್ಗಿಯಾಕ್ನಿ ತೆಂಚ್ಯಾ ಮುರ್ತಿಯಾಂಚ್ಯಾ ವಯ್ನಾ ಮಾಕಾ ಸೊಡುನ್ ಸೊಡಲ್ಲೆ ರಾಲ್ಯಾರ್ ಮಿಯಾ ತೆಂಕಾ ಸಗ್ಳೆ ತೆಂಚ್ಯಾ ಆಶಾ ಪಾಶಾತ್ನಿ ಗಾಯ್ ಸಾರ್ಕೆ ಕರ್ತಾ. 6 ತಸೆ ಹೊವ್ನ್ ತಿಯಾ ಇಜ್ರಾಯೆಲ್ ಕಾರಾಕ್ನಿ ಸರ್ವೆಸ್ಪರ್ ಅಶೆ ಮನ್ತಾ, ತುಮಿ ತುಮ್ಚ್ಯಾ ಮುರ್ತಿಯಾಕ್ನಿ ಸೊಡುನ್ ಫಾಟ್ ಕರಾ. 7 ಕಶ್ಯಾಕ್ ಮಟ್ಲ್ಯಾರ್, ಇಜ್ರಾಯೆಲ್ ಕುಳಿಚೆ ಅನಿ ಇಜ್ರಾಯೆಲಾತ್ ರ್‍ಹಾತಲ್ಯಾ ದುಸ್ರ್ಯಾ ದೆಶಾಚ್ಯಾನಿ ಮಾಜೆಕ್ನಾ ಧುರ್ ಹೊವ್ನ್ ಅಪ್ನಾಚ್ಯಾ ಮನಾತ್ ಮುರ್ತಿಯಾಕ್ನಿ ಜಾಗೊ ದಿವ್ನ್, ಪರ್‍ವಾದ್ಯಾಕ್ಡೆ ಗೆಲ್ಲೆ ತನ್ನಾ ತೆಂಕಾ ವಯ್ನಾ ದೆವಾಚೆ ಉತ್ತರ್ ಆಯ್ಕಲ್ಯಾರ್ ತೆಕಾ ಸರ್ವೆಸ್ಪರ್ ಹೊಲ್ಲೊ ಮಿಯಾಚ್ ಜವಾಬ್ ದಿತಾ. 8 ತೆಚ್ಯಾ ವರ್‍ತಿ ಲೈ ರಾಗ್ ಯೆವ್ನ್ ತೆಕಾ ಹುರ್ಶಾಕಿಚಿ ವಳಕ್ ಕರುನ್ ಭಾಂದಲ್ಲಿ ಸಾಂಗ್ನಿಯಾ ವಸ್ತಾ ಕರುನ್ ಮಾಜ್ಯಾ ಲೊಕಾನಿತ್ನಾ ಕಾಡುನ್ ಟಾಕ್ತಾ, ಅಸೆ ಮಿಯಾಚ್ ಸರ್ವೆಸ್ಪರ್ ಮನುನ್ ಕಳ್ತಾ. 9 ಎಕ್ಲೊ ಪ್ರವಾದಿ ಮಳ್ಳ್ ಹೊವ್ನ್ ದೆವಾಚಿ ಗೊಸ್ಟಿಯಾ ಸಾಂಗ್ಲ್ಯಾರ್, ತ್ಯಾ ಪರ್‍ವಾದ್ಯಾಕ್ ಮಳ್ಳ್ ಕರಲ್ಲೊ ಸರ್ವೆಸ್ಪರ್ ದೆವ್ ಮಿಯಾಚ್. ಮಿಯಾ ತೆಚ್ಯಾ ವರ್‍ತಿ ಹಾತ್ ಉಕ್ಲುನ್ ಇಜ್ರಾಯೆಲಾಂಚ್ಯಾ ಮಾಜ್ಯಾ ಲೊಕಾಂಚ್ಯಾಕ್ನಾ ಕಾಡುನ್ ಟಾಕುನ್ ತೆಕಾ ನಾಶ್ ಕರ್ತಾ. 10 ಪರ್ವಾದಿಚಿ ಚುಕ್ ಕವ್ಡಿಕಿ, ತೆಕಾ ಪರಶ್ನೆ ಇಚಾರ್ತಲ್ಯಾಚಿ ಚುಕ್ ತವ್ಡಿಚ್, ದೊಗಾಬಿ ತೆಂಚಿ ಶಿಶ್ಯಾ ಸೊಸ್ತಾತ್. 11 ಅಸೆ ಹೊಲ್ಯಾರ್ ಇಜ್ರಾಯೆಲಾಚಿ ಲೊಕಾ ಮಾಕಾ ಸೊಡಿನಾತ್, ಅಪ್ನಾಚ್ಯಾ ಮ್ಹೆಜುಕ್ ಹೊಯ್ ನಸಲ್ಲ್ಯಾ ಚುಕೆಂಚ್ಯಾ ವಯ್ನಾ ಅಪಡ್ಸಿಪಡ್ ಕರುನ್ ಘೆಯ್ನಾತ್. ತೆನಿ ಮಾಜಿ ಲೊಕಾ ಹೊವ್ನ್ ರ್‍ಹಾತ್ಯಾತ್, ಮಿಯಾ ತೆಂಕಾ ದೆವ್ ಹೊವ್ನ್ ರ್‍ಹಾತಾ, ಮನುನ್ ಸರ್ವೆಸ್ಪರಾಚಿ ದೆವಾಚಿ ಗೊಸ್ಟ್.

ನೊಹೆ, ದಾನಿಯೆಲ್ ಅನಿ ಜೊಬ್

12 ಅನಿ ಸರ್ವೆಸ್ಪರಾನ್ ದೆವಾನ್ ಮಾಕಾ ಹಿ ಗೊಸ್ಟ್ ದಿಲ್ಯಾನ್. 13 ನರ್ ಮಾನ್ಸಾ, ಎಕ್ ಗಾಂವ್ ಚುಕ್ ಕರುನ್ ಮಾಕಾ ವಿರೊಧ್ ಪಾಪ್ ಕರಲ್ಯಾ ದೆಶಾಚ್ಯಾ ವರ್‍ತಿ ಮಾಜೊ ಹಾತ್ ಉಕ್ಲುನ್, ತೆಂಕಾ ಗಾವ್ತಲೆ ಖಾನ್ ಬಂದ್ ಕರ್ತಾ, ಲೊಕಾಕ್ನಿ ಜನಾವರಾಕ್ನಿ ನಾಶ್ ಕರುನ್ ಟಾಕ್ತಾ. 14 ನೊಯೆ, ದಾನಿಯೆಲ್ ಅನಿ ಜೊಬ್ ಮನ್ತಲಿ ತಿನ್ ಘವ್ಮಾನ್ಸಾ ತ್ಯಾ ದೆಸಾತ್ ರಾವ್ನಬಿ ಅಪ್ನಾಚ್ಯಾ ಬರ್ಯಾ ಕಾಮಾ ವಯ್ನಾ ಸ್ವತಾಚಿ ಜಿವಾ ಎಕುಚ್ ಹುರ್ವುನ್ ಘೆಯ್ತ್, ಹಿ ಸರ್ವೆಸ್ಪರ್ ದೆವಾಚಿ ಗೊಸ್ಟ್. 15 ಮಾಜ್ಯಾ ಹುಕುಮಾಚ್ಯಾ ಸಾರ್ಕೆ ದುಸ್ಟ್ ಜನಾವರಾ ದೆಸಾತ್ ಫಿರುನ್ಗೆತ್ ತೆ ಲುಕ್ಷಾನ್ ಕರಿತ್ ಕೊನ್ಬಿ ದಾಟುನ್ ಜಾಯ್ನಾ ಸಾರ್ಕೆ ಭಿಂವ್ಸುನ್ಗೆತ್ ಹೊಲ್ಯಾರ್, 16 ಹಿ ತಿನಿ ಘವ್ಮಾನ್ಸಾ ತ್ಯಾ ದೆಸಾತ್ ರಾಲ್ಯಾರ್ಬಿ ಮಾಜ್ಯಾ ಜಿವಾವರ್‍ತಿ ಆನ್ ತೆನಿ ಯೆವ್ಡೆಚ್ ಹುರ್ವುನ್ ಘೆವ್ನ್ ರಾಲ್ಯಾರ್, ಲೆಕಾಕ್ನಿ ಹೊಂವ್ದಿತ್ ನಾತರ್ ಲೆಕಿಯಾಕ್ನಿ ಹೊಂವ್ದಿತ್ ಹುರ್ವುನ್ ಘೆವ್ಕ್ ಹೊಯ್ ಹೊತ್ತೆ, ದೆಶ್ ಹಾಳ್ ಹೊವ್ನ್ ಜಾತಾ, ಹಿ ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್. 17 ನಾತರ್ ತಲ್ವಾರುಚ್ ದೆಸಾತ್ ಗುಸುನ್ ಪಾರ್ ಹೊವ್ನ್ ಜಾತಾ ಮನುನ್ ಹುಕುಮ್ ದಿವ್ನ್, ಮಿಯಾ ತೆಕಾ ದೆಸಾಕ್ ತೆ ಹಾನುನ್ ಮಿಯಾ ಮಾನ್ಸಾ ಅನಿ ಜನಾವರಾ ನಾಸ್ ಕರುನ್ ಹೊಲ್ಯಾರ್ಬಿ, 18 ಹಿ ತಿನಿ ಘವ್ಮಾನ್ಸಾಬಿ ದೆಸಾತ್ ರಾಲ್ಯಾರ್ಬಿ, ಮಾಜ್ಯಾ ಜಿವಾ ವರ್‍ತಿ ಆನ್ ಘಾಲುನ್ ಸಾಂಗ್ತಾ, ಅಪ್ನಿ ಹುರುನ್ ರಾಯ್ ಹೊತ್ತೆ ತೆಂಚ್ಯಾ ಲೆಕಾಕ್ನಿ ಹೊಂವ್ದಿತ್ ಲೆಕಿಯಾಕ್ನಿ ಹೊಂವ್ದಿತ್ ಹುರ್ವಿ ನತ್ತ್ಯಾನಿ, ಹಿ ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್. 19 ಮಿಯಾ ತ್ಯಾ ದೆಶಾಚ್ಯಾ ವರ್‍ತಿ ಮಾಜೊ ರಾಗ್ ವೊತುನ್, ರಗಾತ್ ಗಳ್ವುನ್, ಫಿಡಾ ಧಾಡುನ್, ಮಾನ್ಸಾ ಅನಿ ಜನಾವರಾಕ್ನಿ ನಾಶ್ ಕರಲ್ಲ್ಯಾ ಎಳಾರ್, 20 ನೊಯೆ, ದಾನಿಯೆಲ್ ಅನಿ ಜೊಬ್ ಹೆನಿ ಥೈ ರಾಲ್ಯಾರ್ಬಿ ಮಾಜ್ಯಾ ಜಿವಾಚೆ ಆನ್ ಘಾಲುನ್ ಸಾಂಗ್ತಾ, ಅಪ್ನಾಚ್ಯಾ ಬರ್ಯಾ ಕಾಮಾಂಚ್ಯಾ ವಯ್ನಾ ಅಪ್ನಾಚಿ ಜಿವಾ ಹುರ್ವುನ್ ಘೆಯ್ ಹೊತ್ತ್ಯಾನಿ ಖರೆ ಅಪ್ನಾಚ್ಯಾ ಲೆಕಾಕ್ನಿ ಹೊಂವ್ದಿತ್ ಲೆಕಿಯಾಕ್ನಿ ಹೊಂವ್ದಿತ್ ಹುರ್ವುನ್ ಘೆಯ್ ನಸಿ ಹೊತ್ತ್ಯಾನಿ, ಹಿ ಸರ್ವೆಸ್ಪರ್ ದೆವಾಚಿ ಗೊಸ್ಟ್.

21 ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಮಿಯಾ ತಲ್ವಾರ್, ಬರ್‍ಗಾಲ್, ಕ್ರುರ್ ಜನಾವರ್ ಅನಿ ಚಾರ್ ಫಿಡಾ ಮನ್ತಲಿ ಜರುಜಲೆಮಾಚ್ಯಾ ವರ್‍ತಿ ವಾಂಗ್ಡಾಚ್ ಹಾನುನ್ ಮಾನ್ಸಾ ಅನಿ ಜನಾವರಾಕ್ನಿ ನಾಶ್ ಕರ್ತಾನಾ ಸಾಂಗ್ತಲೆ ಕಾಯ್! 22 ಹೊಲ್ಯಾರ್ ಲೆಕಾ ಅನಿ ಲೆಕಿಯಾ ಉಲ್ಲಿ ಲೊಕಾ ಕಸಿಬಿ ಚುಕ್ವುನ್ಗೆವ್ನ್ ಹುರ್ವುನ್ ಥೈತ್ನಾ ತೆಂಕಾ ನ್ಹೆವ್ನ್ ಹೊತಾ, ಆಹಾ, ತೆನಿ ತುಮ್ಚ್ಯಾಕ್ಡೆ ಮಿಳಲ್ಲ್ಯಾ ತನ್ನಾ, ತುಮಿ ತೆಂಚಿ ಬುರ್ಶಿ ವಾಟಾ ಅನಿ ಬುರ್ಶಿ ಕಾಮಾ ಬಗುನ್, ಮಿಯಾ ಜರುಜಲೆಮಾ ವರ್‍ತಿ ಹಾನಲ್ಲ್ಯಾ ತರಾಸಾಚ್ಯಾ ವಿಶಯಾತ್ ಅನಿ ತೆಕಾ ಯೆಯ್ ಸಾರ್ಕೆ ಕರಲ್ಲ್ಯಾ ತರಾಸಾಚ್ಯಾ ವಿಶಯಾತ್ ತುಮ್ಕಾ ಸಮಾಧಾನ್ ಹೊತಾ. 23 ತುಮಿ ತೆಂಚಿ ಬುರ್ಶಿ ವಾಟಾ ಅನಿ ಬುರ್ಶಿ ಕಾಮಾ ಬಗ್ತಾನಾ, ತೆಂಚ್ಯಾಕ್ನಾಚ್ ತುಮ್ಕಾ ಸಮಾಧಾನ್ ಹೊತಾ, ಮಿಯಾ ಜರುಜಲೆಮಾಕ್ ಕರಲ್ಲೆ ಸಗ್ಳೆ ಫುಕೊಟ್ ಕರುಕ್ನಾ ಮನುನ್ ತುಮ್ಕಾ ಕಳುನ್ ಯೆತಾ, ಹಿ ಸರ್ವೆಸ್ಪರ್ ದೆವಾಚಿ ಗೊಸ್ಟ್.