1 ಯೆಹೊಯಾಕಿಮ್ ಬಂಧಿ ಹೊವ್ನ್ ಧಾ ವರ್ಸಾಚ್ಯಾ ಧಾವ್ಯಾ ಮ್ಹೈನ್ಯಾಚ್ಯಾ ಬಾರಾವ್ಯಾ ದಿಸಾತ್, ಸರ್ವೆಸ್ಪರಾನ್ ಮಾಜ್ಯಾ ವಾಂಗ್ಡಾ ಬೊಲ್ಲ್ಯಾನ್, 2 ನರ್ ಮಾನ್ಸಾ, ತಿಯಾ ಇಜಿಪ್ತಾಚೊ ರಾಜಾ ಹೊಲ್ಲ್ಯಾ ತೊಂಡ್ ಕರುನ್ ತೆಜ್ಯಾ ವಿಶಯಾತ್ಬಿ ಇಜಿಪ್ತ್ ಕಾರಾಂಚ್ಯಾ ವಿಶಯಾತ್ ಅಸೆ ಸಾಂಗ್, 3 ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಇಜಿಪ್ತಾಚೊ ರಾಜಾ ಫಾರೊವಾ, ತುಜಿ ನ್ಹಯ್ ಫಾಟ್ಯಾಂಚ್ಯಾ ಮದ್ದಿ ಮಾಗುನ್ ಘೆವ್ನ್ , ಹಿ ನ್ಹಯ್ ಮಾಜಿಚ್, ಮಾಜ್ಯಾ ಸಾಟ್ನಿಚ್ ಕರುನ್ಗೆಟಲ್ಲಿ ಮನ್ತಲೊ ಮೊಟೊ ಸಾಪ್, ಅಬಕ್ ಮಿಯಾ ತುಕಾ ವಿರೊಧ್ ಹೊವ್ನ್ ಹಾಯ್. 4 ಮಿಯಾ ತುಜ್ಯಾ ದಾವ್ಡಿಯಾಕ್ನಿ ಬಲಿ ಘಾಲುನ್, ತುಜ್ಯಾ ನ್ಹಯ್ಲ್ ನ್ಹೈಯಿಚಿ ಮಾಸೊಳಿಯಾ ತುಜ್ಯಾ ಡುಬ್ರಿಚ್ಯಾ ಕವ್ಚಿಯಾಕ್ನಿ ಲಾಗುನ್ ರಾಯ್ ಸಾರ್ಕೆ ಕರುನ್ ಲಾಗುನ್ ಹೊತ್ತ್ಯಾ ಮಾಸೊಳಿಯಾಂಚ್ಯಾ ವಾಂಗ್ಡಾ ತುಕಾ ತುಜ್ಯಾ ನ್ಹಯಿತ್ನಾ ಭಾಯ್ರ್ ವೊಡುನ್, 5 ತುಕಾ ಅನಿ ತುಜ್ಯಾ ನ್ಹೈಯಿತ್ಲ್ಯಾ ಸಗ್ಳ್ಯಾ ಮಾಸೊಳಿಯಾಕ್ನಿ ಡಂಗ್ಳಿಚೊ ವಾಟೊ ಕರ್ತಾ, ತಿಯಾ ಮ್ಹಾಳ್ ಜಾಗ್ಯಾ ವರ್‍ತಿ ಪಡುನ್ ರ್‍ಹಾತೆಯ್, ತುಕಾ ಕೊನ್ಬಿ ಉಕ್ಲಿನಾತ್, ಮಾಟಿ ಕರಿನಾತ್, ಮಿಯಾ ತುಕಾ ಜಿಮ್ನಿ ವಯ್ಲ್ಯಾ ಜನಾವರಾಕ್ನಿ ಅನಿ ಮಳ್ಬಾತ್ಲ್ಯಾ ಫಾಂಕ್ರಾಕ್ನಿ ಜೆವಾನ್ ಕರ್ಲಾ. 6 ತನ್ನಾ ಇಜಿಪ್ತಾಚಿ ಸಗ್ಳಿ ಲೊಕಾ ಇಜ್ರಾಯೆಲ್ ಪಿಳ್ಗಿಚ್ಯಾಕ್ನಿ ಅಮಿ ಘಟ್ ನಸಲ್ಲೊ ದಾಂಡ್ಯಾಚಿ ಖಾಟಿ ಹೊಲ್ಯಾಂವ್, ಮನುನ್ ಮರ್ಯಾದ್ ಕರುನ್ಗೆವ್ನ್, ಮಿಯಾಚ್ ಸರ್ವೆಸ್ಪರ್ ಮನುನ್ ಖರೆಚ್ ಘಟ್ ಕರುನ್ ಘೆತಾತ್. 7 ಇಜಿಪ್ತ್ ತುಜ್ಯಾ ವರ್‍ತಿ ಇಜ್ರಾಯೆಲ್ ಲೊಕಾನಿ ಹಾತ್ ಥವ್ತಾನಾ, ತಿಯಾ ತೆಂಚ್ಯಾ ಸಗ್ಳ್ಯಾಂಚ್ಯಾ ಭುಜೆಕ್ ಟೊಪ್ಲೆಯ್, ಲಾವ್ನ್ ಇಬೆ ರಾವ್ಕ್ ತೆಂಚ್ಯಾ ಸಗ್ಳ್ಯಾಂಚ್ಯಾ ಕಂಬ್ರೆಕ್ ತಿಯಾ ಥರ್ಥರೊ ಯೆಯ್ ಸಾರ್ಕೆ ಕರ್‍ಲೆ. 8 ಅಸೆ ರ್‍ಹಾತಾನಾ ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಆಹಾ, ಮಿಯಾ ತುಜ್ಯಾ ವರ್‍ತಿ ತಲ್ವಾರ್ ಯೆಯ್ ಸಾರ್ಕೆ ಕರುನ್ ತುಜ್ಯಾಕ್ನಾ ಲೊಕಾಕ್ನಿ ಅನಿ ಜನಾವರಾಕ್ನಿ ನಾ ಸಾರ್ಕೆ ಕರ್ತಾ. 9 ಫಾರೊವಾನ್ ಹಿ ನ್ಹಯ್ ಮಾಜಿಚ್, ಮಿಯಾಚ್ ಕರುನ್ಗೆಟಲ್ಲಿ ಮಟಲ್ಯಾ ಸಾಟ್ನಿ, ಇಜಿಪ್ತ್ ಹಾಳ್ ಪಾಳ್ ಹೊತಾ, ತನ್ನಾ ಮಿಯಾಚ್ ಸರ್ವೆಸ್ಪರ್ ಮನ್ತಲೆ ತೆಂಕಾ ಕಳ್ತಾ. 10 ಅಬಕ್, ಮಿಯಾ ತುಕಾ ಅನಿ ತುಜ್ಯಾ ನ್ಹೈಯಿಕ್ ವಿರೊದ್ ಹೊವ್ನ್ ಇಜಿಪ್ತ್ ದೆಶ್ ಮಿಗ್ದೊಲಿಕ್ನಾ ಸೆವೆನೆಚ್ಯಾ ಪತರ್, ಕುಶ್ಯಾಚ್ಯಾ ಹದ್ದಾಚ್ಯಾ ಪತರ್ಬಿ ಲೈ ಹಾಳ್ ಕರ್ತಾ. 11 ಥೈ ಖಲೊ ಮಾನುಸ್ಬಿ ಪಾಂಯ್ ಥವ್ನ್ ದಾಟುನ್ ಜಾಯ್ನಾ, ಖಲೆ ಜನಾವರ್ಬಿ ತುಡ್ವುನ್ ದಾಟುನ್ ಜಾಯ್ನಾ, ಚಾಳಿಸ್ ವರಿಸ್ ಪತರ್ ಥೈ ಮಾನ್ಸಾ ನಾ ಹೊತಾತ್. 12 ಹಾಳ್ ಪಡಲ್ಲ್ಯಾ ದೆಸಾತ್ ಇಜಿಪ್ತ್ ದೆಸಾಕ್ ಹಾಳ್ ಪಾಡ್ವುತಾ, ಹಾಳ್ ಪಡಲ್ಲ್ಯಾ ಶಾರ್‍ಹಾತ್ನಿ ತೆಚಿ ಶಾರಾ ಹಾಳ್ ಪಾಡ್ವುತಾ, ಚಾಳಿಸ್ ವರಿಸ್ ತಸೆಚ್ ರ್‍ಹಾತಾ, ಮಿಯಾ ಇಜಿಪ್ತಾಚ್ಯಾ ಲೊಕಾಕ್ನಿ ದೆಸಾಕ್ನಿ ಪಳ್ಸುನ್ ಪಗ್ಳುನ್ ಘಾಲ್ತಾ. 13 ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಮಿಯಾ ಚಾಳಿಸ್ ವರ್ಸಾಂಚ್ಯಾ ಮಾನಾ, ಮಿಯಾ ಇಜಿಪ್ತಾಚ್ಯಾ ಲೊಕಾಕ್ನಿ ತೆನಿ ಪಗ್ಳುನ್ ಗೆಲ್ಲ್ಯಾ ಲೊಕಾಂತ್ನಾ, ತೆಂಕಾ ಗೊಳಾ ಕರುನ್ ಇಜಿಪ್ತಾಚೆ ಬುರ್ಸೆ ಪಾನ್ ಚುಕ್ವುನ್, 14 ತೆಂಚಿ ಉಪಾಜಲ್ಲಿ ಜಿಮಿನ್ ಪತ್ರೊಸ್ ದೆಸಾಕ್ ಪರ್‍ತುನ್ ಯೆಯ್ ಸಾರ್ಕೆ ಕರ್ತಾ, ತೆನಿ ಕಿಳ್ ಮಟ್ಟಾಚೊ ರಾಜ್ಯ್ ಹೊತಾತ್. 15 ತೊ ರಾಜ್ಯ್ ಸಗ್ಳ್ಯಾ ರಾಜ್ಯಾತ್ನಿ ಲೈ ಕಮ್ಮಿಚೊ ರಾಜ್ಯ್ ಹೊತಾತ್, ಹುರಲ್ಲ್ಯಾ ಲೊಕಾತ್ನಿ ಅಪ್ನಿ ಮೊಟೊ ಮನುನ್ ತೆ ಪರ್‍ತುನ್ ಟಕ್ಲೆ ಉಕ್ಲಿನಾ, ತೆ ಲೊಕಾಂಚ್ಯಾ ವರ್‍ತಿ ಅನಿ ಪರ್‍ತುನ್ ರಾಜ್ವಡ್ಕಿ ಕರಿನಾ ಸಾರ್ಕೆ ಮಿಯಾ ತೆಕಾ ಲೈ ಕಮ್ಮಿಚ್ಯಾ ಗತಿಕ್ ಹಾನ್ತಾ. 16 ಅತ್ತಾ ಪರ್‍ತುನ್ ಇಜಿಪ್ತ್ ಇಜ್ರಾಯೆಲ್ ಪಿಳ್ಗಿಚೆ ಭರೊಸೊ ಹೊವ್ನ್ ರ್‍ಹಾಯ್ನಾ, ಅನಿ ತೆಜ್ಯಾಕ್ಡೆ ಡೊಳೆ ಕಾಡುನ್ ಬಗ್ತಲೆ ದೆವಾಕ್ ದುಶನ್ ಕರ್ತಲಿ ಯಾದ್, ಇಜ್ರಾಯೆಲಾತ್ನಿ ಇಜಿಪ್ತಾಕ್ನಾ ಅನಿ ಪರ್‍ತುನ್ ಯೆಯ್ನಾ, ಮಿಯಾಚ್ ಸರ್ವೆಸ್ಪರ್ ಮನುನ್ ತೆಂಕಾ ಕಳ್ತಾ.

17 ಯೆಹೊವಾಜಾಕಿಮ್ ಬಂಧಿಹೊಲ್ಲ್ಯಾ ಇಸಾರ್ ಸಾತ್ವೆಚ್ಯಾ ವರ್ಸಾತ್ ಪಯ್ಲೆಚ್ಯಾ ಮ್ಹೈನ್ಯಾಚ್ಯಾ ಪಯ್ಲೆಚ್ಯಾ ದಿಸಾತ್, ಸರ್ವೆಸ್ಪರಾನ್ ಮಾಕಾ ಅಸೆ ಬೊಲ್ಯಾನ್. 18 ನರ್ ಮಾನ್ಸಾ, ಬಾಬೆಲೊನಾಚ್ಯಾ ರಾಜಾ ನೆಬುಕದ್ನೆಚರ್ ತಿರ್ ಶಾರಾ ವರ್‍ತಿ ಝಗ್ಡೊ ಕರುನ್ ಅಪ್ನಾಚ್ಯಾ ಸಯ್ನಿಕಾಂಚ್ಯಾಕ್ನಾ ಲೈ ತರಾಸಾಚಿ ಕಾಮಾ ಕರಸ್ಲ್ಯಾನ್, ಹರ್ ಎಕ್ಲ್ಯಾಚೆ ಟಕ್ಲೆ ಬೊಳ್ ಹೊಲಾ, ಹರ್ ಎಕ್ಲ್ಯಾಚಿ ಖಾಂದೊ ಧರುನ್ಗೆಟ್ಲೆ ಸಾರ್ಕೆ ಹೊಲಾ, ಖರೆ ತೆನಿ ತ್ಯಾ ಝಗ್ಡ್ಯಾತ್ ಕರಲ್ಲ್ಯಾ ತರಾಸಾಕ್ ತೆಕಾ ಹೊಂವ್ದಿತ್ ತೆಜ್ಯಾ ಸಯ್ನಿಕಾಕ್ನಿ ಹೊಂವ್ದಿತ್ ಕಾಯ್ಬಿ ಪ್ರತಿ ಫಳ್ ಗಾವ್ಕ್ ನಾ. 19 ಅಸೆ ರ್‍ಹಾತಾನಾ ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ಅಬಕ್ ಮಿಯಾ ಬಾಬೆಲಾಚೊ ರಾಜಾ ನೆಬುಕದ್ನೆಚರಾಕ್ ಇಜಿಪ್ತ್ ದೆಶ್ ದಿತಾ, ತೊ ತ್ಯಾತುರ್ಲಿ ಲೊಕಾ ಅನಿ ಆಸ್ತಿ ನ್ಹೆವ್ನ್, ತ್ಯಾ ದೆಶ್ಯಾಕ್ ಲುಟುನ್ ನಾಶ್ ಕರ್ತಾ, ತೊಚ್ ತೆಜ್ಯಾ ಸಯ್ನಿಕಾಂಚೊ ಪ್ರತಿ ಫಳ್ ಹೊವ್ನ್ ಹಾಯ್. 20 ತೆನಿ ಸಯ್ನಿಕಾಕ್ನಿ ಘೆವ್ನ್ ಮಾಜ್ಯಾ ಸಾಟ್ನಿ ಸೆವಾ ಕರಲ್ಲ್ಯಾ ಸಾಟ್ನಿ, ತೆನಿ ಕರಲ್ಲ್ಯಾ ಕಾಮಾಕ್ ಪ್ರತಿ ಫಳ್ ಹೊವ್ನ್ ಮಿಯಾ ಇಜಿಪ್ತ್ ದೆಶ್ ತೆಕಾ ದಿಲಾ, ಹಿ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್. 21 ತ್ಯಾ ದಿಸಾತ್ ಮಿಯಾ ಇಜ್ರಾಯೆಲ್ ಪಿಳ್ಗಿಚ್ಯಾಕ್ನಿ ಭೊಂಗೊ ವಾಜ್ವುನ್, ತ್ಯಾ ಪಿಳ್ಗಿಚ್ಯಾಂಚ್ಯಾ ಮದ್ದಿ ತುಜೆ ತೊಂಡ್ ಉಗ್ಡಿ ಸಾರ್ಕೆ ಕರ್ತಾ, ಮಿಯಾಚ್ ಸರ್ವೆಸ್ಪರ್ ಮನುನ್ ತುಕಾ ಖರೆಚ್ ಕಳ್ತಾ.