1 ಸರ್ವೆಸ್ಪರಾನ್ ಹಿ ಗೊಸ್ಟ್ ಮಾಕಾ ದಿಲ್ಯಾನ್, 2 ನರ್ ಮಾನ್ಸಾ, ದೆವ್ ಬಾಬಾನ್ ಇಜ್ರಾಯೆಲ್ ದೆಸಾಕ್ ಅಸಿ ಸಾಂಗ್ಲ್ಯಾನ್, ಆಕ್ರಿಚೊ ಎಳ್ ಯೆಲಾ; ಚಾರ್ ದಿಕ್ಕಾಕ್ನಿ ಆಕ್ರಿ ಯೆತಾ. 3 ಅತ್ತ್ಯಾಚ್ ಆಕ್ರಿಚೊ ಎಳ್ ಯೆಲಾ, ಅನಿ ತಿಯಾ ಮಾಜೊ ರಾಗ್ ತುಜ್ಯಾ ವರ್‍ತಿ ಎವ್ನ್, ತುಜ್ಯಾ ಚಾಲ್ನುಕಿಚ್ಯಾ ಸಾರ್ಕೆ ನ್ಯಾಯ್ ಕರ್ತಾ, ತುಜ್ಯಾ ಸಗ್ಳ್ಯಾ ಬುರ್ಸ್ಯಾ ಕಾಮಾಚ್ಯಾ ವಯ್ನಾ ತುಕಾ ಶಿಕ್ಷ್ಯಾ ದಿತಾ. 4 ಅನಿ ಮಾಜೆ ಡೊಳೆ ತುಕಾ ಬಗಿನಾತ್, ಉಲ್ಲೆಬಿ ಉಸ್ಕೊ ಕರಿನಾ, ತುಕಾ ಬುರ್ಸ್ಯಾ ವಾಟೆಚೊ ಫಳ್ ಖಾವಸ್ತಾ, ಅನಿ ತುಜಿ ಬುರ್ಶಿಕಾಮಾ ತುಜ್ಯಾ ಇದ್ರಾಕ್ ಯೆತಾತ್, ತನ್ನಾ ಸರ್ವೆಸ್ಪರ್ ಮಿಯಾಚ್ ಮನುನ್ ತುಕಾ ಕಳ್ತಾ.

5 ಸರ್ವೆಸ್ಪರ್ ದೆವ್ ಅಸೊ ಸಾಂಗ್ತಾ; ತರಾಸ್! ಕನ್ನಾಬಿ ಬಗಿನಸಲ್ಲೊ ತರಾಸ್ ಯೆತಲೊ! 6 ಅಂತ್ ಯೆಲೊ, ಅಂತ್ ಎವ್ನ್ ಪಾವ್ಲೊ, ತಿಯಾ ಸರುನ್ ಗೆಲೈ, 7 ದೆಶಾಚ್ಯಾ ವಸ್ತಿರಾತಲ್ಯಾನೊ ತುಮ್ಚಿ ಗತ್ ಸರ್ಲಿ, ದಿಸ್ ಜಗ್ಗೊಳ್ ಪಾವ್ಲಾ; ಮಡ್ಡಿಯಾಂಚ್ಯಾ ವರ್‍ತಿ ಯೆತಲಿ ಧನ್ ಮಜ್ಯಾ ಕರ್ತಲೊ ಧನ್ ನ್ಹಯ್, ಕಳ್ವಳೊಚ್.

8 ಅನಿ ಉಲ್ಲ್ಯಾ ಯೆಳಾನ್ ಮಾಜೊ ರಾಗ್ ತುಜ್ಯಾ ವರ್‍ತಿ ವತ್ತಾ, ಅನಿ ಮಾಜೊ ರಾಗ್ ಕಾಡುನ್ ಘೆವ್ನ್, ತುಜ್ಯಾ ಚಾಲ್ನುಕಿಚ್ಯಾ ವಯ್ನಾ ಶಿಕ್ಷ್ಯಾ ದಿತಾ. 9 ಅನಿ ತುಜ್ಯಾ ವರ್‍ತಿ ಉಸ್ಕೊ ಕರಿನಾ, ತುಜ್ಯಾ ವರ್‍ತಿ ದಯಾ ದಾಕ್ವಿನಾ, ಹುರ್ವಿನಾ, ತನ್ನಾ ತುಜ್ಯಾ ಬುರ್ಶಿಕಾಮಾ ತುಕಾಚ್ ಕಳ್ತಾ; ಮಾನಾ ಮಿಯಾಚ್ ಸರ್ವೆಸ್ಪರ್ ದೆವ್ ತುಕಾ ಶಿಕ್ಷ್ಯಾ ದಿವ್ಲಾ ಮನುನ್ ಅರ್ಥ್ ಹೊತಾ.

10 ಅಬಕ್, ಶಿಕ್ಷ್ಯಾ ದಿತಲಿ ದಿಸ್ ಯೆಲೊ! ತುಜಿ ಬುರ್ಶಿ ಗತ್ ಎವ್ನ್ ಪಾವ್ಲಾ, ದಾಂಡೊ ಫುಲ್ಲಾ ಸೊಡ್ಲಾ. ಅನಿ ತುಜಿ ಘಮೆಂಡಿ ಚಿಗರ್ಲಾ. 11 ಅನಿ ತರಾಸ್ ಉಗ್ವುನ್ ಬುರ್ಸೆಪಾನಾಚೊ ದಾಂಡೊ ಹೊಲಾ; ತುಮ್ಚ್ಯಾತ್ಲೆ ಕೊನ್ಬಿ ಹುರಿನಾತ್, ತ್ಯಾ ಲೊಕಾಂಚ್ಯಾ ತಾಂಡ್ಯಾತ್ನಿ ತೆಂಚ್ಯಾ ಆಸ್ತಿ ಕಾಯ್ಬಿ ರ್‍ಹಾಯ್ನಾ ತೆಂಚ್ಯಾತ್ ಕಾಯ್ಬಿ ಮೊಟೆಪಾನ್ ಹುರಿನಾ.

12 ಎಳ್ ಯೆಲೊ, ದಿಸ್ ಜಗ್ಗೊಳ್ ಪಾವ್ಲೊ, ಇಕಾತ್ ಘೆತಲೊ ಮಾನುಸ್ ಭಾಜುಕ್ ರಾವ್ನೆಯ್, ಇಕ್ತಲೊ ಮಾನುಸ್ ದುಕ್ಕೆನ್ ರಾವ್ನೆಯ್, ಕಶ್ಯಾಕ್ ಮಟ್ಲ್ಯಾರ್, ರಾಗಾಚೊ ಆಗ್ ಲೊಕಾಂಚ್ಯಾ ತಾಂಡ್ಯಾಚ್ಯಾ ವರ್‍ತಿ ಚಡ್ಲಾ. 13 ಕಶ್ಯಾಕ್ ಮಟ್ಲ್ಯಾರ್, ಇಕ್ತಲೊ ಮಾನುಸ್ ಕವ್ಡೊ ವರಿಸ್ ಝಿತ್ತೊ ರಾಲ್ಯಾರ್ಬಿ ಇಕಲ್ಲೆ ಬದಿಕ್ ತೆಚ್ಯಾಕ್ಡೆ ತಾಬೆತ್ ಪರ್‍ತುನ್ ಯೆಯ್ನಾ, ಅನಿ ಘಡಲ್ಲಿ ದಿವ್ಯ್ ದರ್ಶನಾ ಸಗ್ಳಿ ತಾಂಡ್ಯಾತ್ಲ್ಯಾ ಸಗ್ಳ್ಯಾಕ್ನಿ ಸಮಂಧ್ ಪಡಲ್ಲೆ ಹಾಯ್, ತನ್ನಾ ಕೊನ್ಬಿ ಪರ್‍ತುನ್ ಯೆಯ್ನಾತ್, ಕೊನ್ಬಿ ತೆಂಚ್ಯಾ ಬುರ್ಸ್ಯಾಪಾನಾನ್ ತೆಂಚೊ ಜಿವ್ ಹುರ್ವುನ್ ಘೆವ್ಕ್ ಹೊಯ್ನಾ. 14 ತೆನಿ ಬೊಂಗೊ ವಾಜ್ವುನ್ ಸಗ್ಳೆ ತಯಾರ್ ಕರಲ್ಲೆ ರಾಲ್ಯಾರ್ಬಿ, ಕೊನ್ಬಿ ಝಗ್ಡ್ಯಾಕ್ ಜಾಯ್ನಾತ್, ಕಶ್ಯಾಕ್ ಮಟ್ಲ್ಯಾರ್, ದೆವ್ ಹೊಲ್ಲ್ಯಾ ಮಾಜ್ಯಾ ರಾಗಾಚಿ ಆಗ್ ತ್ಯಾ ತಾಂಡ್ಯಾ ವರ್‍ತಿ ಚಡ್ಲಾ.

15 ಗಾಂವಾಚ್ಯಾ ಭಾಯ್ರ್ ತಲ್ವಾರ್ ಹಾಯ್, ಗಾಂವಾಚ್ಯಾ ಭುತ್ತುರ್ ರೊಗ್ ಅನಿ ಬರ್‍ಗಾಲ್ ಹಾತ್; ಗಾಂವಾಚ್ಯಾ ಬಾರ್ಯ್ ಹೊತ್ತೆ ತಲ್ವಾರಾಕ್ನಿ ಗಾವ್ತಾತ್, ಅನಿ ಭುತ್ತುರ್ ಹೊತ್ತಿ ಲೊಕಾ ದುಕ್ನ್ಯಾಕ್ ಅನಿ ಬರ್ಗಾಲಾಕ್ ಗಾವುನ್ ಪಡ್ತಾತ್. 16 ತೆಂಚ್ಯಾತ್ಲಿ ಪಳುನ್ ಗೆಲ್ಲಿ ಲೊಕಾ ಚುಕ್ವುನ್ ಘೆವ್ನ್ ಜಾವ್ನ್, ಅಪ್ನಾಚ್ಯಾ ಬುರ್ಸ್ಯಾಪಾನಾತುಚ್ ರ್‍ಹಾವ್ನ್ ಮಡ್ಡಿಯಾಂಚ್ಯಾ ವರ್‍ತಿ ಅನಿ ಕೊಳ್ಳಾತ್ನಿ ಪಾರಿವಳಾಂಚ್ಯಾ ಸಾರ್ಕೆ ಗೊಳಾಟ್ ಕರಿತ್ ರ್‍ಹಾತ್ಯಾತ್. 17 ತನ್ನಾ ತೆಂಚಿ ಸಗ್ಳ್ಯಾಚಿ ಹಾತಾ ಬಳ್ ನಸ್ತಾನಾ ಲೊಂಬಾತ್ ಪಡ್ತಲಿ. ಅನಿ ಸಗ್ಳ್ಯಾಚಿ ಡೊಪ್ರಾ ಪಾನಿಯಾಚ್ಯಾ ಸಾರ್ಕೆ ಸಯ್ಲ್ ಹೊತಾತ್. 18 ಅನಿ ತೆನಿ ಚಿಲಾ ಲಪ್ಟುನ್ಗೆವ್ನ್ ಘೆತಾತ್, ಅನಿ ತೆಂಕಾ ಭ್ಹಿಯೆ ಧಾಪುನ್ ಘಾಲ್ತಾ; ಅನಿ ತೆಂಚಿ ತೊಂಡಾ ಲಜ್ಜೆನ್ ಭರ್ತಲಿ, ಮಾನಾ ತೆನಿ ಸಗ್ಳ್ಯಾಂಚ್ಯಾ ಟಕ್ಲ್ಯಾಚಿ ಕೆಸಾ ಕಾಡುನ್ ಘೆವ್ನ್ ರ್‍ಹಾತ್ಯಾತ್. 19 ಅನಿ ಅಪ್ನಾಚೆ ಚಾಂದಿ ಸಗ್ಳಿ ವಾಟೆರ್ ಟಾಕ್ತಾತ್, ಅನಿ ತೆಂಚೆ ಸೊನೆ ಸಗ್ಳೆ ಅಶುದ್ದ್ ಹೊಲ್ಲೆ ರ್‍ಹಾತಾ; ಹೆ ಸೊನೆ ಅನಿ ಚಾಂದಿ ಸಗ್ಳೆ ಸರ್ವೆಸ್ಪರಾಚ್ಯಾ ರಾಗಾಚ್ಯಾ ಚುಕ್ವುಕ್ ಹೊಯ್ನಾ; ಅನಿ ತೆಂಚ್ಯಾ ಮನಾಚ್ಯಾ ಸಾರ್ಕೆ ಕಾಯ್ಬಿ ಹೊಯ್ನಾ, ತೆಂಚಿ ಸುಕಾಕ್ ಲಾಗುನ್ ಪೊಟ್ ಭರುನ್ ಘೆವ್ಕ್ ಹೊಯ್ನಾ, ಕಶ್ಯಾಕ್ ಮಟ್ಲ್ಯಾರ್, ತೆಂಕಾ ಆಸ್ತಿ ಪಾಪಾತ್ ಪಡಿ ಸಾರ್ಕೆ ಕರ್ತಾ. 20 ತಿ ಲೊಕಾ ಅಪ್ನಾಚ್ಯಾ ಸುಂದರ್ ಕರುನ್ ಘೆತಲ್ಯಾ ಸೊನ್ಯಾಚಾಂದಿನಿ ಬುರ್ಶಿ ಅನಿ ಬಗುಕ್ಬಿ ಬರಿ ದಿಸಿನಸಲ್ಲ್ಯಾ ಮುರ್ತಿಯಾ ತೆಂಚ್ಯಾ ಕರುನ್ ಘೆಟ್ಲ್ಯಾತ್, ತೆಚ್ಯಾ ಸಾಟ್ನಿ ತೆ ಮಿಯಾ ಅಶುದ್ದ್ ಖಾನೊ ಹೊವ್ನ್ ಕರ್ತಾ. 21 ದುಸ್ರಾಂಚ್ಯಾ ಹಾತಿತ್ನಾ ಲುಟ್ ಕರುನ್ ಲಾವ್ನ್ ದೆಶಾಚ್ಯಾ ಲೈ ಬುರ್ಸ್ಯಾ ಲೊಕಾಂಚ್ಯಾಕ್ನಾ ಲುಟ್ ಕರಸ್ತಾ ತೆನಿ ತೆ ಅಪಡ್ಸಿಪಡ್ ಕರ್‍ತಾತ್. 22 ಮಿಯಾ ಮಾಜೆ ತೊಂಡ್ ತೆಂಚ್ಯಾಕ್ನಾ ಪರ್‍ತುನ್ ಘೆತಾ, ಅನಿ ತೆನಿ ಮಾಜಿ ಅಮುಲ್ಯ್ ಗುಡಿ ಅಪಡ್ಸಿಪಡ್ ಕರ್‍ತಾತ್. ಅನಿ ಚೊರಾ ಭುತ್ತುರ್ ಗುಸುನ್ ಬುರ್ಸೆ ಕರ್‍ತಾತ್.

23 "ಎಕ್ ಸರ್ಪೊಳಿ ಕರ್! ಕಶ್ಯಾಕ್ ಮಟ್ಲ್ಯಾರ್, ದೆಶ್ ಮಾನ್ಸಾಕ್ನಿ ಜಿವಾನಿ ಮಾರ್ತಲ್ಯಾನಿ ಭರಲ್ಲೆ ಹಾಯ್, ಅನಿ ಶಾರ್ ತರಾಸಾನ್ ಭರುನ್ ಗೆಲಾ". 24 ಅಸಿ ರ್‍ಹಾತಾನಾ, ಮಿಯಾ ಲೈ ಬುರ್ಸ್ಯಾ ಲೊಕಾಕ್ನಿ ಬಲ್ವುತಾ, ತೆನಿ ಲೊಕಾಂಚಿ ಘರಾ ಸಗ್ಳೆ ತೆಂಚ್ಯಾ ತಾಬೆತ್ ಕರುನ್ ಘೆತಾತ್, ಮಿಯಾ ತಾಕ್ತಿತ್ ಹೊತ್ತ್ಯಾಂಚೊ ಗರ್ವಿಸ್ಠ್ ಪಾನ್ ಮೊಡುನ್ ಟಾಕ್ತಾ; ಅನಿ ತೆಂಚಿ ಪವಿತ್ರ್ ಜಾಗೆ ಹೊಲೆ ಹೊತಾತ್. 25 ಸಂಕಟ್ ಯೆಲ್ಲ್ಯಾ ತನ್ನಾ, ತೆನಿ ಸಮಾಧಾನ್ ಹುಡಕ್ಲ್ಯಾರ್ಬಿ ಉಲ್ಲೆಬಿ ತೆಂಕಾ ಗಾಯ್ನಾತ್, 26 ತರಾಸಾಚ್ಯಾ ವರ್‍ತಿ ತರಾಸ್; ಖಬ್ರಿಚ್ಯಾ ವರ್‍ತಿ ಖಬರ್ ಯೆತಾತ್, ತೆನಿ ಪರ್ವಾದಿಚ್ಯಾ ವಾಂಗ್ಡಾ ದರ್ಶನಾ ಗಾವ್ತಲಿ ವಾಟ್ ಬಗುನ್ಗೆತ್ ರ್‍ಹಾತ್ಯಾತ್, ಯಾಜಕಾತ್ನಿ ನೆಮಾ ನಾ ಹೊತಾತ್, ಜಾಂನ್ತ್ಯಾತ್ನಿ ಬುದ್ವಾದ್ ಸಾಂಗ್ತಲೆ ನಾ ಹೊವ್ನ್ ಜಾತಾತ್. 27 ರಾಜಾಕ್ ಲೈ ದುಕ್ಕ್ ಹೊತಾ, ರಾಜಾಚೊ ಲೆಕ್ ಭರ್ವೊಸೊ ಸೊಡುನ್ ಸೊಡ್ತಾ, ಅನಿ ಸಾದ್ರನ್ ಹೊತ್ತ್ಯಾ ಲೊಕಾಂಚಿ ಹಾತಾ ಭಿಂವ್ನ್ ಲಕ್ವಾ ಮಾರಲ್ಲ್ಯಾ ಸಾರ್ಕೆ ಥರ್ಥತಾತ್; ಮಿಯಾ ತೆಂಚ್ಯಾ ಬುರ್ಶಾ ಚಾಲ್ನುಕಿಚ್ಯಾ ವಯ್ನ್ ಮಿಯಾ ಶೆಡ್ ಕಾಡುನ್ ಘೆತಾ, ತೆಂಚ್ಯಾ ಬುರ್ಸ್ಯಾ ಕಾಮಾಂಚ್ಯಾ ವಯ್ನಾ ಶಿಕ್ಷ್ಯಾ ದಿತಾ; ತನ್ನಾ ತೆಂಕಾ ಮಿಯಾಚ್ ಸರ್ವೆಸ್ಪರ್ ಮನುನ್ ಕಳ್ತಾ.