1 ಸರ್ವೆಸ್ಪರ್ ದೆವ್ ಅಸೊ ಮನ್ತಾ, ವ್ಹಾರ್‍ಯಾತ್ ಕಾಮ್ ಕರ್‍ತಲ್ಯಾ ಸಾ ದಿಸಾತ್ನಿ ಭುತ್ತುರ್ಲ್ಯಾ ಖೊಲಿಚೆ ದಿಸ್ ಉಗಾವ್ತಲ್ಯಾ ದಿಕ್ಕಾಚೆ ದಾರ್ ಧಾಪಲ್ಲೆ ರ್‍ಹಾವ್ಚೆ, ಖರೆ ಸಬ್ಬತಾಚ್ಯಾ ಅನಿ ಅಮ್ಸೆಚ್ಯಾ ದಿಸಿ ಉಗಡಲ್ಲೆ ರ್‍ಹಾವ್ಚೆ. 2 ಮುಖಂಡ್ ಭಾಯ್ಲ್ಯಾ ವಾಟೆನ್ ಮುಖ್ಯ್ ದಾರ್ ಮಂಟಪ್ ಗುಸುನ್ ದಾರಾಚ್ಯಾ ಪಟ್ಟಿಚ್ಯಾ ಜಗ್ಗೊಳ್ ಇಬೆ ರ್‍ಹಾವ್ನ್, ಅಪ್ನಿ ಭೆಟ್ವಲ್ಲೆ ಜಾಳ್ವುತಲಿ ಬಲಿ ಜನಾವರ್ ಅನಿ ಸಮಾಧಾನಾಚ್ಯಾ ಬಲಿಚೆ ಜನಾವರ್ ಯಾಜಕಾನ್ ಭೆಟ್ವುತಾನಾ, ದಾರಾಚ್ಯಾ ಹುಂಬ್ಡ್ಯಾತ್ ಡಬ್ಬ್ ಪಡುಚೆ, ತೆಜ್ಯಾ ಮಾನಾ ಜಾಂವ್ದಿತ್, ತ್ಯಾ ದಿಸಿ ಸಾಂಜ್ ಪತರ್ಬಿ ದಾರ್ ಧಾಪ್ತಲೆ ನಕ್ಕೊ. 3 ಸಬ್ಬತಾಚ್ಯಾ ದಿಸಿ ಅನಿ ಅಮ್ಸೆಚ್ಯಾ ದಿಸಿ ದೆಶ್ಯಾಚಿ ಲೊಕಾ ತ್ಯಾ ಮುಖ್ಯ್ ದಾರಾಚ್ಯಾ ಫಿಡೆ ಸರ್ವೆಸ್ಪರಾಕ್ ಇದ್ರಾಕ್ ಥವ್ನ್ ಘೆವ್ನ್ ಡಬ್ಬ್ ಪಡುನ್ ಆರಾದನ್ ಕರುಚೆ. 4 ಸಬ್ಬತಾಚ್ಯಾ ದಿಸಿ ಮುಖಂಡಾನ್ ಸರ್ವೆಸ್ಪರಾಕ್ ಸಾ ಬೊಕ್ಡಾಂಚೆ ಜಾಳ್ವುತಲಿ ಬಲಿ ಅನಿ ಎಕ್ ಟಗ್ರಾಚೆ ಸಗ್ಳೆ ಜಾಳ್ವುತಲಿ ಬಲಿ ಭೆಟ್ವುಚೆ. 5 ಟಗ್ರಾಚ್ಯಾ ವಾಂಗ್ಡಾ ತಿಸ್ ಸೆರ್ ಘಂವಾಚೆ ಪಿಟ್ಟ್ ಬೊಕ್ಡಾಂಚ್ಯಾ ವಾಂಗ್ಡಾ ಕವ್ಡೆ ಹೊತಾ ತವ್ಡೆ ಘಂವಾಚೆ ಪಿಟ್ಟ್ ತಿಸ್ ತಿಸ್ ಸೆರ್ ಘಂವಾಚ್ಯಾ ಪಿಟ್ಟಾಕ್ ಸಾ ಸಾ ಸೆರ್ ತೆಲ್ ಅನಿ ದಾನೆ ಭೆಟ್ವುಚೆ. 6 ಅಮ್ಸೆಚ್ಯಾ ದಿಸಿ ತೆನಿ ಪಾಡ್ಯಾಚಿ ಬಲಿ ಅನಿ ಸಾ ಬೊಕ್ಡಾ ಅನಿ ಎಕ್ ಟಗರ್ ಭೆಟ್ವುಚೆ, ತೆಚೆ ಸಗ್ಳೆ ಜಾಳ್ವುತಲಿ ಬಲಿ ಭೆಟ್ವುಚೆ. 7 ಅನಿ ಪಾಡ್ಯಾಚ್ಯಾ ವಾಂಗ್ಡಾ ತಿಸ್ ಸೆರ್, ಅನಿ ಟಗ್ರಾಚ್ಯಾ ವಾಂಗ್ಡಾ ತಿಸ್ ಸೆರ್, ಬೊಕ್ಡಾಚ್ಯಾ ವಾಂಗ್ಡಾ ಕವ್ಡೆ ಹೊತಾ ತವ್ಡೆ ಘಂವಾಚೆ ಪಿಟ್ಟ್ ಅನಿ ತಿಸ್ ತಿಸ್ ಸೆರಾಕ್ ಸಾ ಸಾ ಸೆರ್ ಹೊಯ್ ಸಾರ್ಕೆ ತೆಲ್ ಅನಿ ದಾನ್ಯಾಂಚಿ ಬಲಿ ಭೆಟ್ವುಚೆ. 8 ಮುಖಂಡ್ ಭುತ್ತುರ್ ಗುಸ್ತಾನಾ, ಮುಖ್ಯ್ ದಾರಾಚ್ಯಾ ವಾಟೆನ್ ಗುಸುನ್ ತ್ಯಾಚ್ ವಾಟೆನ್ ಫಾಟಿ ಪರ್‍ತುನ್ ಜಾವ್ಚೊ. 9 ತನಿ ಸಗ್ಳಿ ದೆಶಾಚಿ ಲೊಕಾ ಸನಾತ್ನಿ ಸರ್ವೆಸ್ಪರಾಚ್ಯಾ ಇದ್ರಾಕ್ ದಿಸ್ತಾನಾ, ಉತ್ತರ್ ದಿಕ್ಕಾಕ್ನಾ ಆರಾದನ್ ಕರುಕ್ ಗುಸಲ್ಲೊ ದಕ್ಷಿನ್ ದಿಕ್ಕಾಕ್ನಾ ಭಾಯ್ರ್ ಜಾವ್ಚೊ, ದಕ್ಷಿನ್ ದಿಕ್ಕಾಚ್ಯಾ ವಾಟೆನ್ ಗುಸಲ್ಲೊ ಉತ್ತರ್ ದಿಕ್ಕಾಕ್ನಾ ಭಾಯ್ರ್ ಜಾವ್ಚೊ, ಅಪ್ನಿ ಗುಸಲ್ಲ್ಯಾ ದಾರಾನುಚ್ ಫಾಟಿ ಪರ್‍ತಿ ನಸ್ತಾನಾ, ಯೆಲ್ಲ್ಯಾ ವಾಟೆನುಚ್ ಜಾಂವ್ದಿತ್. 10 ಲೊಕಾ ಗುಸ್ತಾನಾ, ಮುಖಂಡ್ ತೆಂಚ್ಯಾ ವಾಂಗ್ಡಾ ಗುಸುಂದಿತ್, ತೆನಿ ಜಾತಾನಾ ತೊ ಬಿ ಜಾಂವ್ದಿತ್. 11 ಮುಖಂಡಾನ್ ಸನಾತ್ನಿ ಅನಿ ಬರ್ಯಾ ದಿಸಾತ್ನಿ ಪಾಡ್ಯಾಚ್ಯಾ ವಾಂಗ್ಡಾ ತಿಸ್ ಸೆರ್ ಅನಿ ಟಗ್ರಾಚ್ಯಾ ವಾಂಗ್ಡಾ ತಿಸ್ ಸೆರ್, ಅನಿ ಬೊಕ್ಡಾಚ್ಯಾ ವಾಂಗ್ಡಾ ಕವ್ಡೆ ಹೊತಾ ತವ್ಡೆ ಘಂವಾಚೆ ಪಿಟ್ಟ್ ತಿಸ್ ಸೆರಾಕ್ ಸಾ ಸಾ ಸೆರ್ ತೆಲ್ ಅನಿ ದಾನ್ಯಾಂಚಿ ಬಲಿ ಭೆಟ್ವುಚೆ. 12 ಮುಖಂಡಾನ್ ಅಪ್ನಾಚ್ಯಾ ಸ್ವತ್ಯಾಚ್ಯಾ ಇಚ್ಚ್ಯಾನ್ ಕಾನಿಕ್ ನಾತರ್ ಸಗ್ಳೆ ಜಾಳ್ವುತಲಿ ಬಲಿ, ನಾತರ್ ಸಮಾಧಾನಾಚಿ ಬಲಿ ಸರ್ವೆಸ್ಪರಾಕ್ ಭೆಟ್ವುತಲೆ ಹೊಲ್ಯಾರ್, ತೆಜ್ಯಾ ಸಾಟ್ನಿ ದಿಸ್ ಉಗಾವ್ತಲ್ಯಾ ದಿಕ್ಕಾಚೆ ದಾರ್ ಉಗ್ಡುಚೆ, ತೊ ಸಬ್ಬತಾಚ್ಯಾ ದಿಸಿ ಭೆಟ್ವಲ್ಲ್ಯಾ ಸಾರ್ಕೆಚ್ ಜಾಳ್ವುತಲಿ ಬಲಿ ಅನಿ ಸಮಾಧಾನಾಚಿ ಬಲಿ ಭೆಟ್ವುನ್ ಜಾವ್ಚೊ, ತೊ ಗೆಲ್ಯಾ ಮಾನಾ ದಾರ್ ಧಾಪುಚೆ.

13 ತಿಯಾ ಎಕ್ ವರ್ಸಾಚೆ ಬೊಕ್ಡು ಜಾಳ್ವುತಲಿ ಬಲಿ ಸಾಟ್ನಿ ಸದ್ದಾಬಿ ಭೆಟ್ವುಚೆ, ತೆ ಹರ್ ಎಕ್ ದಿಸಾಬಿ ಸಕ್ಕಾಳಿ ಭೆಟ್ವುಚೆ. 14 ತೆಜ್ಯಾ ವಾಂಗ್ಡಾ ಹರ್ ಎಕ್ ದಿಸಾಬಿ ಸಕ್ಕಾಳಿ ದಾನ್ಯಾಂಚ್ಯಾ ಬಲಿಕ್ ಪಾಂಚ್ ಸೆರ್ ಘಂವಾಚೆ ಪಿಟ್ಟ್ ಅನಿ ತೆ ಮ್ಹಳುಕ್ ದೊನ್ ಸೆರ್ ತೆಲ್ ಭೆಟ್ವುಚೆ, ಹೆ ಸಗ್ಳೆ ಹರ್ ಎಕ್ ದಿಸಾಬಿ ಸರ್ವೆಸ್ಪರಾಕ್ ದಾನ್ಯಾಂಚಿ ಬಲಿ ಕರುನ್ ಭೆಟ್ವುಚೆ. ಹ್ಯೊ ಶಾಶ್ವತ್ ನೆಮ್ ಹೊವ್ನ್ ಹಾಯ್. 15 ಯಾಜಕಾನಿ ಬೊಕ್ಡು ಅನಿ ದಾನ್ಯಾಂಚಿ ಬಲಿ ಅನಿ ತೆಲ್ ಹರ್ ದಿಸಾಚಿ ಸಗ್ಳೆ ಜಾಳ್ವುತಲಿ ಬಲಿ ಕರುನ್ ಸದ್ದಾ ಸಕ್ಕಾಳಿ ಭೆಟ್ವುಚೆ.

16 ಸರ್ವೆಸ್ಪರ್ ಅಸೊ ಮನ್ತಾ, ಮುಖಂಡಾನ್ ಅಪ್ನಾಚ್ಯಾ ಲೆಕಾತ್ನಿ ಎಕ್ಲ್ಯಾಕ್ ಜಿಮಿನ್ ದಿಲ್ಯಾರ್ ತೆ ಬಾಬಾಚಿ ಆಸ್ತಿ ಹೊಲ್ಲಿ ಹೊತ್ತ್ಯಾ ಸಾಟ್ನಿ ಪೊರಾಕ್ನಿಬಿ ವಾಟೊ ಗಾವ್ತಾ. ತಿ ವಾಟೆಕ್ ಗಾವಲ್ಲಿ ಆಸ್ತಿ ಹೊವ್ನ್ ಹಾಯ್. 17 ಖರೆ ಮುಖಂಡಾನ್ ಅಪ್ನಾಚ್ಯಾ ಸೆವಕಾತ್ನಿ ಎಕ್ಲ್ಯಾಕ್ ದಾನ್ ಕರಲ್ಲೆ ಹೊಲ್ಯಾರ್, ಸಾತ್ ವರ್ಸಾ ಪತರ್ಬಿ ತೆ ತೆಜ್ಯಾ ತಾಬೆತ್ ರ್‍ಹಾತಾ, ಖರೆ ಮುಖಂಡಾನ್ ಅಪ್ನಾಚ್ಯಾ ಲೆಕಾಕ್ನಿ ದಿಲ್ಲಿ ಜಿಮಿನ್ ತೆಂಚ್ಯಾಚ್ ತಾಬೆತ್ ರ್‍ಹಾತಾ. 18 ತವ್ಡೆಚ್ ನಸ್ತಾನಾ, ಮುಖಂಡಾನ್ ಅಪ್ನಾಚ್ಯಾ ಲೆಕಾಂಚಿ ಬಾಬಾಕ್ನಾ ಯೆಲ್ಲಿ ಆಸ್ತಿ ಸ್ವತಾಕ್ ಕರುನ್ ಘೆವ್ನ್, ತೆಂಚೊ ಹಕ್ಕ್ ಕಾಡುನ್ ಘೆವ್ಚೆ ನ್ಹಯ್, ತೆನಿ ಅಪ್ನಾಚಿ ಸ್ವತಾಚಿ ಜಿಮಿನ್ ವಾಟೆ ಕರುನ್ ಲೆಕಾಕ್ನಿ ದಿವ್ಚೆ, ನಾ ಹೊಲ್ಯಾರ್ ತೆಜ್ಯಾ ಲೆಕಾತ್ನಿ ಹರ್ ಎಕ್ಲೊಬಿ ಅಪ್ನಾ ಅಪ್ನಾಚಿ ಜಿಮಿನ್ ಕಳ್ದುನ್ ಘೆವ್ನ್ ದಿಕ್ಕಾನ್ ದಿವಾಳಿ ಹೊವ್ನ್ ಜಾಯ್ಲ್.

19 ಮಾನಾ ತ್ಯಾ ಮಾನ್ಸಾನ್ ಮಾಕಾ, ಮುಖ್ಯ್ ದಾರಾಚ್ಯಾ ಜಗ್ಗೊಳ್ಲ್ಯಾ ಗುಸ್ತಲ್ಯಾ ವಾಟೆನ್ ಉತ್ತರಾಕ್ ದಿಕ್ಕಾಕ್ ತೊಂಡ್ ಕರುನ್ ಯಾಜಕಾಕ್ನಿ ಮನುನ್ ನೆಮ್ಸುನ್ ಥವಲ್ಲ್ಯಾ ನಿತಳ್ ಖೊಲಿಕ್ ಯೆಯ್ ಸಾರ್ಕೆ ಕರ್ಲ್ಯಾನ್. ಅಬಕ್ ತೆಜ್ಯಾ ಫಾಟಿಕ್ಡೆ ದಿಸ್ ಬುಡ್ತಲ್ಯಾ ದಿಕ್ಕಾಕ್ ಎಕ್ ಜಾಗೊ ಹೊತ್ತೊ. 20 ತನ್ನಾ ತೆನಿ ಮಾಕಾ, ಯಾಜಕಾನಿ ಮಾಂಸ್ ಸಿಜ್ವುತಲೊ ಜಾಗೊ ತಯಾರ್ ಹೊಲಾ. ಥೈ ಲೊಕಾಕ್ನಿ ನಿತಳ್ ಕರಿನಾ ಸಾರ್ಕೆ ಪಶ್ಚಾತಾಪಾಚ್ಯಾ ಅನಿ ಪಾಪ್ ಮಾಪಿಚ್ಯಾ ಬಲಿಚ್ಯಾ ಜನಾವರಾಚೆ ಮಾಂಸ್ ಸಿಜ್ವುಕ್ ಅನಿ ದಾನ್ಯಾಂಚಿ ಬಲಿಯಾ ತಯಾರ್ ಕರುಕ್ ಹೊತಾ ಮಟ್ಲ್ಯಾನ್. 21 ತೆಜ್ಯಾ ಮಾನಾ ತೆನಿ ಮಾಕಾ ಭಾಯ್ಲ್ಯಾ ಖೊಲಿಕ್ ಬಲ್ವುನ್ ಹಾನುನ್, ಥೈತ್ಲ್ಯಾ ಚಾರಿ ಮುಲ್ಲ್ಯಾಂಚ್ಯಾ ವಾಟೆನ್ ಬಲ್ವುನ್ ನ್ಹೆಲ್ಯಾನ್, ಅಬಕ್ ಖೊಲಿಚ್ಯಾ ಹರ್ ಎಕ್ ಮುಲ್ಲ್ಯಾತ್ ಎಕೆಕ್ ಭುತ್ತುರ್ಲೆ ದಾರ್ ದಿಸ್ಲೆ. 22 ಹೊಯ್, ಖೊಲಿಚ್ಯಾ ಚಾರಿ ಮುಲ್ಲ್ಯಾತ್ನಿಬಿ ಇಸ್ ಹಾತ್ ಲಾಂಬಿ, ಅನಿ ಪಂದ್ರಾ ಹಾತ್ ರುಂದಿ ದುಸ್ರಿಚ್ ಅಂಗ್ನಾ ಹೊತ್ತಿ, ಮುಲ್ಲ್ಯಾತ್ನಿ ಚಾರಿ ಅಂಗ್ನಾಬಿ ಎಕುಚ್ ಮಾಪಾಚಿ ಹೊವ್ನ್ ಹೊತ್ತಿ. 23 ತೆಂಚ್ಯಾ ಭುತ್ತುರ್ ಭೊತ್ಯಾನಿ ಮಟ್ಲ್ಯಾರ್, ತ್ಯಾ ಚಾರಿ ದಾರಾಂಚ್ಯಾ ಭೊತ್ಯಾನಿಬಿ ಗುಂಡೊ ವಟ್ಕುನ್ ಥವಲ್ಲೆ ಹೊತ್ತೆ, ತೆಜ್ಯಾ ಖಾಲ್ತಿ ಭೊತ್ಯಾನ್ ಚುಲಿಯಾ ಭಾಂದಲ್ಲಿ ಹೊತ್ತಿ. 24 ತನ್ನಾ ತೆನಿ ಮಾಕಾ, ಹೆ ಗುಡಿಚ್ಯಾ ಸೆವಕಾನಿ ಬಲಿಚಿ ಜನಾವರಾ ಹಾನಲ್ಲ್ಯಾ ಲೊಕಾಂಚ್ಯಾ ಸಾಟ್ನಿ ತೆನಿ ಹಾನಲ್ಲೆ ಮಾಂಸ್ ಸಿಜ್ವುತಲಿ ಕೊನಾ ಮಟ್ಲ್ಯಾನ್.