1 ಅಮಿ ಬಂಧಿಹೊಲ್ಲ್ಯಾ ಪಂಚಿಸ್ವ್ಯಾ ವರ್ಸಾಚ್ಯಾ ಮಟ್ಲ್ಯಾರ್, ಶಾರ್ ನಾಶ್ ಹೊಲ್ಲ್ಯಾ ಚವ್ದಾವ್ಯಾ ವರ್ಸಾಚ್ಯಾ ಪಯ್ಲೆಚ್ಯಾ ಮ್ಹಯ್ನ್ಯಾಚ್ಯಾ ಧಾವ್ಯಾ ದಿಸಾತ್, ಹೊಯ್ ತ್ಯಾಚ್ ದಿಸಿ ಮಿಯಾ ಸರ್ವೆಸ್ಪರಾಚ್ಯಾ ಮಹಿಮೆನ್ ಭರುನ್ ರ್‍ಹಾತಾನಾ, ತೆನಿ ಮಾಕಾ ಥೈ ನ್ಹೆಲ್ಯಾನ್. 2 ತೆನಿ ಮಾಕಾ ಇಜ್ರಾಯೆಲ್ ದೆಸಾಕ್ ಹಾನುನ್, ಲೈ ಮೊಟ್ಟ್ಯಾ ಮಡ್ಡಿ ವರ್‍ತಿ ಉತರ್ಸಲ್ಯಾನ್ ಸಾರ್ಕೆ, ಮಾಕಾ ದೆವಾಚ್ಯಾ ದರ್ಶನಾತ್ ದಿಸುನ್ ಯೆಲೆ, ದಿಸ್ ಬುಡ್ತಲ್ಯಾ ದಿಕ್ಕಾಕ್ಡೆ ತ್ಯಾ ಮಡ್ಡಿಚ್ಯಾ ವರ್‍ತಿ ಶಾರಾ ಸಾರ್ಕೆ ಹೊತ್ತೆ ಎಕ್ ಮೊಟೆ ಘರ್ ದಿಸ್ಲೆ. 3 ತೆನಿ ಮಾಕಾ ಥೈ ಹಾನಲ್ಲ್ಯಾ ತನ್ನಾ ಅಬಕ್, ತಾಂಬ್ಯಾ ಗತಿನ್ ಹೊಳಾವ್ತಲೊ ಎಕ್ ಮಾನುಸ್, ದೊರಿ ಅನಿ ಮಾಪಾಚಿ ಖಾಟಿ ಹಾತಿತ್ ಧರುನ್ಗೆವ್ನ್ ದಾರಾತ್ ಇಬೆ ಹೊತ್ತೊ. 4 ತ್ಯಾ ಘವ್ಮಾನ್ಸಾನ್ ಮಾಕಾ, ನರ್ ಮಾನ್ಸಾ, ತಿಯಾ ಡೊಳೆ ಲಾವ್ನ್ ಬಗ್, ಕಾನ್ ದಿವ್ನ್ ಆಯ್ಕ್, ಮಿಯಾ ತುಕಾ ದಾಕ್ವಲ್ಲೆ ಸಗ್ಳೆ ಮನ್ ದಿವ್ನ್ ಕಳ್ವುನ್ ಘೆ. ಮಿಯಾ ತುಕಾ ದಾಕ್ವುತಲೆ ತಿಯಾ ಬಗುಚೆ ಮನುನುಚ್ ತುಕಾ ಹಿತ್ತೆ ಹಾನುನ್ ಹೊಲಾ, ತಿಯಾ ಬಗಲ್ಲೆ ಸಗ್ಳೆ ಇಜ್ರಾಯೆಲ್ ಪಿಳ್ಗಿಚ್ಯಾ ಲೊಕಾಕ್ನಿ ಪರ್ಗಟ್ ಕರ್ ಮಟ್ಲ್ಯಾನ್.

5 ಅಬಕ್ ಎಕ್ ಭಿತ್ತ್ ಮೊಟ್ಟ್ಯಾ ಘರಾಕ್ ಭೊತ್ಯಾನಿ ಘಾಟಲ್ಲಿ ಹೊತ್ತಿ, ತ್ಯಾ ಮಾನ್ಸಾಚ್ಯಾ ಹಾತಿತ್, ತಿನ್ ಹಾತ್ ಲಾಂಬಿಚಿ ಮಾಪಾಚಿ ಖಾಟಿ ಹೊತ್ತಿ, ತೆನಿ ತ್ಯಾ ಭಿತ್ತಿಕ್ ರುಂದಿ ತಿನ್ ಹಾತ್ ಅನಿ ಉನ್ಚಿಕ್ ತಿನ್ ಹಾತ್ ಮಾಪ್ಲ್ಯಾನ್. 6 ತೆಜ್ಯಾ ಮಾನಾ ತೆನಿ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ಮುಖ್ಯ್ ದಡ್ಪ್ಯಾಕ್ಡೆ ಎವ್ನ್ ಪಯ್ರಿಯಾ ವಯ್ನಿ ಚಡುನ್, ಹುಂಬ್ಡ್ಯಾಕ್ ಎಕ್ ಖಾಟಿ ಮಾಪ್ಲ್ಯಾನ್, ಎಕೆಕ್ ಹುಂಬ್ಡೊ ತಿನ್ ಖಾಟಿ ರುಂದ್ ಹೊತ್ತೊ. 7 ಥೈ ಭಿತ್ತಿಕ್ಡೆ ಹೊತ್ತ್ಯಾ ಎಕೆಕ್ ಖೊಲಿಚಿ ಲಾಂಬಿ ಎಕೆಕ್ ಖಾಟಿ, ಅನಿ ರುಂದಿಬಿ ಎಕೆಕ್ ಖಾಟಿ, ತ್ಯಾ ಭಿತ್ತಿಯಾಂಚಿ ಖೊಲಿಯಾ ಎಕಾಕ್ ಎಕ್ ಪಾಚ್ ಪಾಚ್ ಹಾತ್ ಧುರ್ ಹೊತ್ತಿ, ಗುಡಿಚ್ಯಾ ಇದ್ರಾಕ್ ಹೊತ್ತೊ, ದಾರ್ ಮಂಟಪ್, ಎಕ್ ಖಾಟಿ ರುಂದ್ ಹೊತ್ತೊ. 8 ಮಾನಾ ತೆನಿ ಮುಖ್ಯ್ ದಾರಾಚ್ಯಾ, ದಾರ್ ಮಂಟಪ್ಬಿ ರುಂದಿ ಮಾಪ್ಲ್ಯಾನ್, ತೆ ಎಕ್ ಖಾಟಿ ಲಾಂಬಿಕ್ ಹೊತ್ತೆ. 9 ಮಾನಾ ತೆನಿ ಮುಖ್ಯ್ ದಾರಾಚೆ ದಾರ್ ಮಂಟಪಾಚಿ ರುಂದಿ ಮಾಪ್ಲ್ಯಾನ್, ತೆ ಆಟ್ ಹಾತ್ ಅನಿ ಖಾಂಬ್ಯಾಂಚಿ ರುಂದಿ ದೊನ್ ಹಾತ್ ಮನುನ್ ಮಾಪ್ಲ್ಯಾನ್, ಮುಖ್ಯ್ ದಾರಾಚ್ಯಾ ದಾರ್ ಮಂಟಪ್ ಗುಡಿಚ್ಯಾ ಇದ್ರಾಕ್ ಹೊವ್ನ್ ಹೊತ್ತೊ. 10 ದಿಸ್ ಉಗಾವ್ತಲ್ಯಾ ಮುಖ್ಯ್ ದಾರಾಚ್ಯಾ ದೊನಿ ಭಾಜುಕ್ನಿ, ತಿನ್ ಭಿತ್ತಿಯಾಂಚಿ ಖೊಲಿಯಾ ಹೊತ್ತಿ, ತ್ಯಾ ತಿನ್ಬಿ ಎಕುಚ್ ಮಾಪಾಚೆ ಹೊತ್ತೆ, ಅನಿ ದೊನಿ ಭಾಜುಚೆ ಖಾಂಬೆಬಿ ಎಕುಚ್ ಮಾಪಾಚೆ ಹೊತ್ತೆ.

11 ತೆಜ್ಯಾ ಮಾನಾ ತೆನಿ ಮುಖ್ಯ್ ದಡ್ಪೊ ಮಾಪ್ಲ್ಯಾನ್, ತೆಚಿ ರುಂದಿ ಪಾಂಚ್ ಹಾತ್, ಲಾಂಬಿ ಸಾಡೆ ಸಾ ಹಾತ್. 12 ದೊನಿ ಭಾಜುಚ್ಯಾ ಭಿತ್ತಿಯಾಂಚ್ಯಾ ಖೊಲಿಯಾಂಚ್ಯಾ ಇದ್ರಾಕ್ ಎಕೆಕ್ ಹಾತ್ ಜಾಗೊ ಹೊತ್ತೊ, ದೊನಿ ಭಾಜುಚ್ಯಾ ಭಿತ್ತಿಯಾಂಚ್ಯಾ ಖೊನಾಂಚಿ ರುಂದಿ ಸಾ ಹಾತ್ ಹೊತ್ತಿ. 13 ತೆನಿ ಎಕ್ ಭಾಜುಚ್ಯಾ ಭಿತ್ತಿಚ್ಯಾ ಖೊಲಿಯಾಂಚ್ಯಾ ಮಾಳ್ಯಾಚ್ಯಾ ಭಾಯ್ಲ್ಯಾ, ಅನಿ ಎಕ್ ಭಾಜುಚ್ಯಾ ಭಿತ್ತಿಚ್ಯಾ ಖೊಲಿಚ್ಯಾ ಮಾಳ್ಯಾಚ್ಯಾ ಭಾಯ್ಲ್ಯಾ ತುದಿಕ್ ಮಟ್ಲ್ಯಾರ್, ಎಕ್ ಖೊಲಿಚ್ಯಾ ದಾರಾಕ್ನಾ ಅನಿ ಎಕ್ ಖೊಲಿಚ್ಯಾ ಮುಖ್ಯ್ ದಾರಾಕ್ ರುಂದಿ ಮಾಪ್ತಾನಾ, ತೆ ಪಂಚಿಸ್ ಹಾತ್ ಹೊತ್ತೆ. 14 ದಾರಾತ್ಲೆ ಖಾಂಬ್ಯಾಕ್ನಿ ಮಾಪ್ತಾನಾ, ತಿಸ್ ಹಾತ್ ಹೊತ್ತೆ, ಮುಖ್ಯ್ ದಾರಾಕ್ನಿ ಭೊತ್ಯಾನ್ ರ್‍ಹಾತಲ್ಯಾ ಖಾಂಬ್ಯಾಚ್ಯಾ ಸಗೊಳ್ ಮಾಪ್ ಕರ್ಲ್ಯಾನ್. 15 ಗುಸ್ತಲ್ಯಾ ವಾಟೆಚ್ಯಾ ಭಾಯ್ಲ್ಯಾ ಭಾಜುಕ್ನಾ, ಭುತ್ತುರ್ ಗುಸ್ತಲ್ಯಾ ಆಕ್ರಿ ಪತರ್ ಮುಖ್ಯ್ ದಾರಾಚ್ಯಾ ಪತರ್ ಪಂಚಿಸ್ ಹಾತ್ ಲಾಂಬಿ ಹೊತ್ತೆ. 16 ಭಿತ್ತಿಚ್ಯಾ ಖೊಲಿಯಾತ್ನಿ ಅನಿ ಭುತ್ತುರ್ಲ್ಯಾ ದಾರ್ ಮಂಟಪಾಚ್ಯಾ ದೊನಿ ಭಾಜುಚ್ಯಾ ಖಾಂಬ್ಯಾತ್ನಿಬಿ ಉಗ್ಡುಕ್ ಹೊಯ್ನಸಲ್ಲಿ ಕಿಡ್ಕಿಯಾ ಮುಖ್ಯ್ ದಾರಾಚ್ಯಾ ಭೊತ್ಯಾನ್ ಹೊತ್ತಿ, ಭಾಯ್ಲ್ಯಾ ಖಾಂಬ್ಯಾಂಚ್ಯಾ ವರ್‍ತಿ ಖಜುರಾಚ್ಯಾ ಝಾಡಾಂಚಿ ಚಿತ್ತಾರ್ ಕಾಡಲ್ಲಿ ಹೊತ್ತಿ.

17 ಮಾನಾ ತೆನಿ ಮಾಕಾ ಭಾಯ್ಲ್ಯಾ ಆಂಗ್ನಾಕ್ ಬಲ್ವುನ್ ಹಾನ್ಲ್ಯಾನ್; ಅಬಗ್, ಖೊಲಿಯಾ ಅನಿ ದಾರಾಚ್ಯಾ ಭೊತ್ಯಾನ್ ಘಾಟಲ್ಲಿ ಉಸಿ ದಿಸ್ಲಿ, ಸಗ್ಳೆ ಮಿಳುನ್ ಜಿಮ್ನಿ ವರ್‍ತಿ ಉಸಿಚ್ಯಾ ವರ್‍ತಿ ತಿಸ್ ಖೊಲಿಯಾ ಹೊತ್ತಿ. 18 ತ್ಯಾ ಖಾಯ್ಲ್ಯಾ ಭಾಜುಚಿ ಉಸಿಯಾ, ಮುಖ್ಯ್ ದಾರಾಂಚ್ಯಾ ಅಜುಭಾಜುಕ್ನಿ ಹಾತ್ರುನ್ ತೆಂಚ್ಯಾ ತವ್ಡಿಚ್ ರುಂದ್ ಹೊತ್ತಿ. 19 ತೆನಿ ದಿಸ್ ಉಗಾವ್ಲಾ ದಿಕ್ಕಾಕ್ಬಿ ಉತ್ತರ್ ದಿಕ್ಕಾಚ್ಯಾ ಖಾಯ್ಲ್ಯಾ ಮುಖ್ಯ್ ದಾರಾಚ್ಯಾ ಭುತ್ತುರ್ನಾ, ಭುತ್ತುರ್ಲ್ಯಾ ಅಂಗ್ನಾಚ್ಯಾ ಬಾರ್ಯ್ ಪತರ್ ಮಾಪ್ತಾನಾ ತೆ ಪನ್ನಾಸ್ ಹಾತ್ ಹೊತ್ತೆ.

20 ತವ್ಡೆಚ್ ನಸ್ತಾನಾ, ಭಾಯ್ಲ್ಯಾ ಭಾಗಾಚ್ಯಾ ಉತ್ತರ್ ದಿಕ್ಕಾಚ್ಯಾ ಮುಖ್ಯ್ ದಾರಾಚಿ ರುಂದಿ ಅನಿ ಲಾಂಬಿ ಮಾಪ್ಲ್ಯಾನ್. 21 ತ್ಯಾತುರ್ ದೊನಿ ಭಾಜುಕ್ನಿ ತಿನ್ ಭಿತ್ತಿಚಿ ಖೊಲಿಯಾ ಹೊತ್ತಿ, ಥೈತ್ಲೆ ಖಾಂಬೆಬಿ ದಾರ್ ಮಂಟಪ್ಬಿ ಪಯ್ಲೆಚ್ಯಾ ಮುಖ್ಯ್ ದಾರಾಚ್ಯಾ ಮಾಪಾ ತವ್ಡೆಚ್ ಹೊತ್ತೆ, ತ್ಯಾ ಮುಖ್ಯ್ ದಾರಾಚಿ ಲಾಂಬಿ ಪಂಚಿಸ್ ಹಾತ್ ಅನಿ ರುಂದಿ ಸಾಡೆ ಬಾರಾ ಹಾತ್. 22 ಥೈತ್ಲಿ ಕಿಡ್ಕಿಯಾ ಅನಿ ದಾರ್ ಮಂಟಪಾಚ್ಯಾ ಚಿತ್ತರಾತ್ನಿ ಹೊತ್ತಿ ಖಜುರಾಚಿ ಝಾಡಾ ಸಗ್ಳೆ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ದಾರಾಚ್ಯಾ ಮಾಪಾ ತವ್ಡೆಚ್ ಹೊತ್ತೆ, ಸಾ ಪಯ್ರಿಯಾ ವಯ್ನಿ ಚಡುನ್ ಥೈ, ಉಸಿಚೊ ಜಾಗೊ ಭುತ್ತುರ್ ಹೊತ್ತೊ. 23 ಭಾಯ್ಲ್ಯಾ ದಾರಾಚ್ಯಾ ದಿಸ್ ಉಗಾವ್ತಲ್ಯಾ ಅನಿ ಬುಡ್ತಲ್ಯಾ ದಿಕ್ಕಾಂಚ್ಯಾ ಮುಖ್ಯ್ ದಾರಾಕ್ನಿ ಇದ್ರಾಕ್ ಭುತ್ತುರ್ಲ್ಯಾ ಮುಖ್ಯ್ ದಾರಾ ಹೊತ್ತಿ, ಎಕ್ ದಾರಾಕ್ನಾ ಅನಿ ಎಕ್ ದಾರಾಕ್ ಪನ್ನಾಸ್ ಹಾತ್ ಮಾಪ್ಲ್ಯಾನ್.

24 ಮಾನಾ ತೆನಿ ಮಾಕಾ ದಕ್ಷಿನ್ ದಿಕ್ಕಾಕ್ ಬಲ್ವುನ್ ಹಾನ್ಲ್ಯಾನ್, ಥೈಬಿ ಎಕ್ ಮುಖ್ಯ್ ದಾರ್ ಹೊತ್ತೆ, ತೆನಿ ಥೈ ಹೊತ್ತ್ಯಾ ದಾರ್ ಮಂಟಪಾಚ್ಯಾ ಖಾಂಬ್ಯಾಕ್ನಿ ಅದ್ದಿ ಮಾಪಲ್ಲ್ಯಾ ಮಾಪಾನ್ ಮಾಪ್ಲ್ಯಾನ್. 25 ತ್ಯಾ ತುರ್ ಅನಿ ತೆಜ್ಯಾ ದಾರ್ ಮಂಟಪಾತ್ನಿಬಿ ಸಗ್ಳ್ಯಾ ಭಾಜುಕ್ನಿಬಿ ತಸ್ಲಿಚ್ ಕಿಡ್ಕಿಯಾ ಹೊತ್ತಿ, ಮುಖ್ಯ್ ದಾರಾಚೆ ಲಾಂಬಿ ಪಂಚಿಸ್ ಹಾತ್ ಅನಿ ರುಂದಿ ಸಾಡೆ ಬಾರಾ ಹಾತ್ ಹೊತ್ತೆ. 26 ಥೈ ಚಡುಕ್ ಸಾತ್ ಪಯ್ರಿಯಾ ಹೊತ್ತಿ, ದಾರ್ ಮಂಟಪಾಚ್ಯಾ ಭುತ್ತುರ್ ಹೊತ್ತೊ, ದಾರ್ ಮಂಟಪಾಚ್ಯಾ ಇದ್ರಾ ಬದ್ರಾಚ್ಯಾ ಖಾಂಬ್ಯಾತ್ನಿ ಖಜುರಾಚ್ಯಾ ಝಾಡಾಂಚಿ ಚಿತ್ರಾ ಕಾಡಲ್ಲಿ ಹೊತ್ತಿ. 27 ಭುತ್ತುರ್ಲ್ಯಾ ಜಾಗ್ಯಾತ್ ದಕ್ಷಿನ್ ದಿಕ್ಕಾಕ್ ಮುಕ್ಯ್ ದಾರ್ ಹೊತ್ತೆ, ದಕ್ಷಿನ್ ದಿಕ್ಕಾಕ್ ಎಕ್ ದಾರಾಕ್ನಾ ಅನಿ ಎಕ್ ದಾರಾಕ್ ಪನ್ನಾಸ್ ಹಾತ್ ಮಾಪ್ಲ್ಯಾನ್.

28 ಮಾನಾ ತೆನಿ ಮಾಕಾ ದಕ್ಷಿನ್ ದಿಕ್ಕಾಚ್ಯಾ ದಾರಾಚ್ಯಾ ವಾಟೆನ್, ಭುತ್ತುರ್ಲ್ಯಾ ಭಾಗಾತ್ ಬಲ್ವುನ್ ಹಾನ್ಲ್ಯಾನ್, ತೆನಿ ದಕ್ಷಿನ್ ದಿಕ್ಕಾಚೆ ದಾರ್, ಥೈ ಹೊತ್ತಿ ಭಿತ್ತಿಯಾಂಚಿ ಖೊಲಿ, ಖಾಂಬೆ ಅನಿ ದಾರ್ ಮಂಟಪ್ ಬಿ ಮಾಪ್ತಾನಾ ಸಮಾ ಹೊವ್ನ್ ಹೊತ್ತೆ. 29 ತ್ಯಾತುರ್ಬಿ ಅನಿ ತೆಜ್ಯಾ ದಾರ್ ಮಂಟಪಾಚ್ಯಾ ಸಗ್ಳ್ಯಾ ಭಾಜುಕ್ ಕಿಡ್ಕಿಯಾ ಹೊತ್ತಿ, ಮುಖ್ಯ್ ದಾರಾಚೆ ಲಾಂಬಿ ಪಂಚಿಸ್ ಹಾತ್ ಅನಿ ರುಂದಿ ಸಾಡೆ ಬಾರಾ ಹಾತ್ ಹೊತ್ತೆ. 30 ಭೊತ್ಯಾನ್ ದಾರ್ ಮಂಟಪ್ ಹೊತ್ತೊ, ಹರ್ ಎಕಾಚಿ ಲಾಂಬಿ ಸಾಡೆ ಬಾರಾ ಹಾತ್ ಅನಿ ರುಂದಿ ಸಾಡೆ ದೊನ್ ಹಾತ್ ಹೊತ್ತೆ. 31 ತ್ಯಾ ಮುಖ್ಯ್ ದಾರಾಚಿ ದಾರ್ ಮಂಟಪಾಚಿ ವಾಟ್ ಭಾಯ್ಲ್ಯಾ ಭಾಗಾಚ್ಯಾ ಇದ್ರಾಕ್ ಹೊತ್ತೆ, ತೆಚೆ ಖಾಂಬೆ ಖಜುರಾಚ್ಯಾ ಝಾಡಾಂಚಿ ಚಿತ್ತರಾನಿ ಸಿಂಗಾರ್ ಕರಲ್ಲೆ ಹೊತ್ತೆ, ಅನಿ ಥೈ ಚಡುಕ್ ಆಟ್ ಪಯ್ರಿಯಾ ಹೊತ್ತಿ.

32 ತೆನಿ ಮಾಕಾ ಭುತ್ತುರ್ಲ್ಯಾ ಜಾಗ್ಯಾಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಬಲ್ವುನ್ ಹಾನುನ್, ಥೈ ಹೊತ್ತೆ ಮುಖ್ಯ್ ದಾರ್ ಅನಿ ತೆಚಿ ಭಿತ್ತಿಯಾಂಚಿ ಖೊಲಿ, ಖಾಂಬೆ, ಅನಿ ದಾರ್ ಮಂಟಪ್ ಹೆ ಸಗ್ಳೆ ಮಾಪ್ತಾನಾ, ಅದ್ದಿ ಹೊತ್ತೆ ತವ್ಡೆಚ್ ಮಾಪ್ ಹೊತ್ತೆ. 33 ತ್ಯಾತುರ್ ಅನಿ ತೆಜ್ಯಾ ದಾರ್ ಮಂಟಪಾಚ್ಯಾ ಸಗ್ಳ್ಯಾ ಭಾಜುಕ್ನಿ ಕಿಡ್ಕಿಯಾ ಹೊತ್ತಿ, ತ್ಯಾ ಮುಖ್ಯ್ ದಾರಾಚಿ ಲಾಂಬಿ ಪಂಚಿಸ್ ಹಾತ್ ಅನಿ ರುಂದಿ ಸಾಡೆ ಬಾರಾ ಹಾತ್ ಹೊತ್ತೆ. 34 ತೆಜೊ ದ್ವಾರ್ ಮಂಟಪಾಚ್ಯಾ ಭುತ್ತುರ್ಲ್ಯಾ ಜಾಗ್ಯಾಕ್ ಇದ್ರಾಕ್ ಹೊತ್ತೊ, ಫಿರುನ್ ಖೆಳ್ತಲ್ಯಾ ಜಾಗ್ಯಾಚ್ಯಾ ಇದ್ರಾ ಬದ್ರಾಕ್ ಖಾಂಬ್ಯಾಂಚ್ಯಾ ವರ್‍ತಿ ಖಜುರಾಚಿ ಝಾಡಾ ಚಿತ್ತರ್ ಕಾಡಲ್ಲಿ ಹೊತ್ತಿ, ಅನಿ ಥೈ ಚಡುಕ್ ಆಟ್ ಪಯ್ರಿಯಾ ಹೊತ್ತಿ.

35 ತೆಜ್ಯಾ ಮಾನಾ, ತೆನಿ ಮಾಕಾ ಉತ್ತರಾಚ್ಯಾ ದಿಕ್ಕಾಚ್ಯಾ ದಾರಾಕ್ಡೆ ಬಲ್ವುನ್ ಹಾನುನ್, ತೆ ಅನಿ ತೆಚಿ ಭಿತ್ತಿಯಾಂಚಿ ಖೊಲಿ, ಖಾಂಬೆ, ಅನಿ ದಾರ್ ಮಂಟಪ್ ಹೆ ಸಗ್ಳೆ ಮಾಪ್ತಾನಾ ತಿ ಎಕುಚ್ ಮಾಪಾಚ್ ಹೊತ್ತಿ. 36 ತ್ಯಾತುರ್ ಸಗ್ಳ್ಯಾಕ್ಡೆ ಕಿಡ್ಕಿಯಾ ಹೊತ್ತಿ, ಅನಿ ತೆಚಿ ಲಾಂಬಿ ಪಂಚಿಸ್ ಹಾತ್, ರುಂದಿ ಸಾಡೆ ಬಾರಾ ಹಾತ್ ಹೊತ್ತೆ. 37 ತೆಚೆ ಖಾಂಬೆ ಭಾಯ್ಲ್ಯಾ ಭಾಗಾಕ್ ಇದ್ರಾಕ್ ಹೊತ್ತಿ, ತ್ಯಾ ಇದ್ರಾ ಬದ್ರಾಚ್ಯಾ ಖಾಂಬ್ಯಾಂಚ್ಯಾ ವರ್‍ತಿ ಖಜುರಾಚಿ ಝಾಡಾ ಚಿತ್ತರ್ ಕಾಡಲ್ಲಿ ಹೊತ್ತಿ, ಥೈ ಚಡುಕ್ ಆಟ್ ಪಯ್ರಿಯಾ ಹೊತ್ತಿ.

38 ಪಿಡ್ಲ್ಯಾ ದಾರಾಚ್ಯಾ ಖಾಂಬ್ಯಾಂಚ್ಯಾ ಭಾಜುಕ್ ಎಕ್ ಖೊಲಿ ಅನಿ ತೆಚೆ ದಾರ್ ದಿಸ್ಲೆ, ತ್ಯಾ ಖೊಲಿಯಾತ್ನಿ ಸಗ್ಳೆ ಅಂಗ್ ಬಲಿ ಕರಲ್ಲ್ಯಾ ಜನಾವರಾಂಚೆ ಮಾಸ್ ಧುವ್ನ್ಗೆತ್ ಹೊತ್ತೆ. 39 ಪಿಡ್ಲ್ಯಾ ದಾರಾಚ್ಯಾ ಭಾಜುಚ್ಯಾ ಫಿರುನ್ ಖೆಳ್ತಲ್ಯಾ ಜಾಗ್ಯಾಂಚ್ಯಾ ದೊನಿ ಭಾಜುಕ್ನಿ ದೊನ್ದೊನ್ ಮೆಜ್ ಹೊತ್ತೆ; ತೆಜ್ಯಾ ವರ್‍ತಿ ಸಗ್ಳೆ ಅಂಗ್ ಹೊಮ್ ಬಲಿ ಕರಲ್ಲಿ ಜನಾವರಾ, ಪಾಪ್ ಪರಿಹಾರ್ ಬಲಿ ಭೆಟ್ವಲ್ಲೆ ಜನಾವರ್, ಅನಿ ಪಶ್ಚಾತಾಪಾಚಿ ಬಲಿ ಭೆಟ್ವಲ್ಲೆ ಜನಾವರ್ ಹೆ ಸಗ್ಳೆ ಮಾರಿತ್. 40 ಉತ್ತರಾಚ್ಯಾ ದಿಕ್ಕಾಚ್ಯಾ ಫಿಡ್ಲ್ಯಾ ದಾರಾಚಿ ಗುಸ್ತಲಿ ವಾಟ್ ಹೊಲ್ಲ್ಯಾ ಪಯ್ರಿಯಾಂಚ್ಯಾ ಜಗ್ಗೊಳ್ ತ್ಯಾ ದಾರಾಚ್ಯಾ ಫಿರುನ್ ಖೆಳ್ತಲ್ಯಾ ಜಾಗ್ಯಾಚ್ಯಾ ಭಾಯ್ರ್ ಎಕ್ ಆಕ್ರಿಕ್ ದೊನ್ ಮೆಜಾ, ಅನಿ ಎಕ್ ಭಾಜುಕ್ ದೊನ್ ಮ್ಹನಿಯಾ ಹೊತ್ತಿ. 41 ಪಿಡ್ಲ್ಯಾ ದಾರಾಚ್ಯಾ ದೊನಿ ಬಾಜುನ್ ಹಿಕ್ಡಿನ್ ಚಾರ್ ತಿಕ್ಡಿನ್ ಚಾರ್ ಮೆಜಾ ಹೊತ್ತಿ, ಬಲಿಚಿ ಜನಾವರಾ ಭೆಟ್ವುತಲೆ ಆಟ್ ಮೆಜಾ ಹೊತ್ತಿ. 42 ತವ್ಡೆಚ್ ನಸ್ತಾನಾ ಸಗ್ಳ್ಯಾ ಅಂಗ್ ಹೊಮ್ ಬಲಿಕ್ ಪಾಜೆ ಹೊಲ್ಲಿ, ಕೊರದಲ್ಲ್ಯಾ ಗುಂಡ್ಯಾಂಚೆ ಚಾರ್ ಮೆಜಾ ತೆಂಚಿ ರುಂದಿ ದೆಡ್ ಹಾತಾ ವಯ್ರ್ ಎಕ್ ಹಿತ್, ಅನಿ ದೆಡ್ ಹಾತಾ ವಯ್ರ್ ಎಕ್ ಹಿತ್, ಉಂಚಿಕ್ ಅರ್ದೊ ಹಾತ್, ತೆಜ್ಯಾ ವರ್‍ತಿ ಜನಾವರಾಂಚೆ ಸಗ್ಳೆ ಅಂಗ್ ಹೊಮ್ ಬಲಿ ಕರ್ತಲಿ ಸಾಮಾನಾ ಥವಲ್ಲಿ ರಾಯ್ತ್. 43 ಬುತ್ತುರ್ ಚಾರಿ ಬಾಜುನ್ ಹಾತಿಚ್ಯಾ ರುಂದಿ ತವ್ಡೆ ಅಡ್ಕಳಿಯಾ ಮಾರಲ್ಲೆ ಹೊತ್ತೆ, ಬಲಿಚೆ ಮಾಸ್ ಮೆಜಾಂಚ್ಯಾ ವರ್‍ತಿ ಥವಲ್ಲೆ ಹೊತ್ತೆ.

44 ತೆಜ್ಯಾ ಮಾನಾ ತೆನಿ ಮಾಕಾ ಭುತ್ತುರ್ಲ್ಯಾ ಭಾಗಾಕ್ ಬಲ್ವುನ್ ಹಾನ್ಲ್ಯಾನ್, ಅಬಕ್ ಥೈ ದೊನ್ ಖೊಲಿಯಾ ದಿಸ್ಲಿ, ಉತ್ತರ್ ದಿಕ್ಕಾಚ್ಯಾ ಮುಖ್ಯ್ ದಾರಾಚ್ಯಾ ಭಾಜುಕ್ ಎಕ್ ಖೊಲಿ, ದಕ್ಷಿನ್ ದಿಕ್ಕಾಕ್ ತೊಂಡ್ ಕರುನ್ ಹೊತ್ತೆ. ಉತ್ತರ್ ದಿಕ್ಕಾಚ್ಯಾ ಫಿಡ್ಲ್ಯಾ ದಾರಾಚ್ಯಾ ಭಾಜುಕ್ ಅನಿ ಎಕ್ ಖೊಲಿ ದಕ್ಷಿನ್ ದಿಕ್ಕಾಕ್ ತೊಂಡ್ ಕರುನ್ ಹೊತ್ತೆ. 45 ಮಾನಾ ತೆನಿ ಮಾಕಾ, ದಕ್ಷಿನ್ ದಿಕ್ಕಾಕ್ ತೊಂಡ್ ಕರುನ್ ಹೊತ್ತ್ಯಾ ತಿ ಖೊಲಿ ಗುಡಿಚಿ ಫುಜ್ಯಾ ಕರ್‍ತಲ್ಯಾ ಯಾಜಕಾಕ್ನಿ ಮನುನ್ ನೆಮ್ಸುನ್ ಥವಲ್ಲ್ಯಾ ಖೊಲಿಕ್ ನ್ಹೆವ್ನ್ ಹೊಲೆ. 46 ಅನಿ ಉತ್ತರ್ ದಿಕ್ಕಾಕ್ ತೊಂಡ್ ಕರುನ್ ಹೊತ್ತ್ಯಾ ತಿ ಖೊಲಿ ಬಲಿ ಭೆಟ್ವುತಲೆ ಕಾಮ್ ಕರ್‍ತಲ್ಯಾ ಯಾಜಕಾಕ್ನಿ ನೆಮ್ಸುನ್ ಥವಲ್ಲಿ ಹಾಯ್, ಚಾದೊಕಾಚ್ಯಾ ಪಿಳ್ಗಿಚಿ ಲೆವಿಚ್ಯಾ ಕುಳಿಚಿ ಹಿ ಲೊಕಾ, ಸರ್ವೆಸ್ಪರಾಚ್ಯಾ ಇದ್ರಾಕ್ ಸೆವಕಾ ಹೊವ್ನ್ ಹಾತ್ ಮಟ್ಲ್ಯಾನ್.

47 ತೆಜ್ಯಾ ಮಾನಾ ತೆನಿ ತೊ ಭುತ್ತುರ್ಲೊ ಭಾಗ್ ಮಾಪ್ ಕರುನ್ ಬಗ್ತಾನಾ, ತೆ ಪನ್ನಾಸ್ ಹಾತ್ ಲಾಂಬ್ ಅನಿ ಪನ್ನಾಸ್ ಹಾತ್ ರುಂದ್ ಹೊವ್ನ್ ಚವ್ಕ್ ಹೊತ್ತೆ, ಅನಿ ಬಲಿಚೊ ಕಟ್ಟೊ ಗುಡಿಚ್ಯಾ ಇದ್ರಾಕ್ ಹೊತ್ತೊ. 48 ತನ್ನಾಚ್ ತೆನಿ ಮಾಕಾ ಗುಡಿಚ್ಯಾ ವಾಟೆ ವಯ್ಲ್ಯಾ ದಾರ್ ಮಂಟಪಾಕ್ ಬಲ್ವುನ್ ಹಾನುನ್, ತೆ ಮಾಪುಕ್ ತೆಜ್ಯಾ ಇದ್ರಾ ಬದ್ರಾಚ್ಯಾ ಖಾಂಬ್ಯಾಂಚಿ ಸಾಡೆ ದೊನ್ ಹಾತ್ ಅನಿ ದಾರಾಚ್ಯಾ ದೊನಿ ಭಾಜುವಾಂಚಿ ದೆಡ್ ಹಾತ್ ಹೊತ್ತೆ. 49 ದಾರ್ ಮಂಟಪಾಚಿ ಲಾಂಬಿ ಧಾ ಹಾತ್ ಅನಿ, ರುಂದಿ ಸಾ ಹಾತ್ ಹೊತ್ತೆ, ಅನಿ ಇಸ್ ಪಾಯ್ರಿಯಾ ಚಡುನ್ ಥೈ ಪಾವಿತ್, ದೊನೆ ಭಾಜುಕ್ಲ್ಯಾ ಖಾಂಬ್ಯಾಂಚ್ಯಾ ಭಾಜುಕ್ ಎಕ್ ಎಕ್ ಖಾಂಬ್ಯಾ ವಯ್ರ್ ಅನಿ ಎಕ್ ಖಾಂಬೆ ಆಧಾರ್ ಹೊವ್ನ್ ಹೊತ್ತೆ.