1 ಯೆಹೊಯಾಕಿನ್ ಬಂಧಿಹೊಲ್ಲ್ಯಾ ಸಾವ್ಯಾ ವರ್ಸಾಚ್ಯಾ ಸಾವ್ಯಾ ಮ್ಹೆನ್ಯಾಚ್ಯಾ ಪಾಂಚ್ವ್ಯಾ ದಿಸಾ ಮಿಯಾ ಅನಿ ಜುದೆವಾಂಚಿ ಜಾಂನ್ತ್ಯಾ ಮಾಜ್ಯಾ ಇದ್ರಾಕ್ ಮಾಜ್ಯಾ ಘರ್‍ಹಾತ್ ಬಸಲ್ಯಾ ತನ್ನಾ; ಸರ್ವೆಸ್ಪರಾನ್ ಹಾತ್ ಮಾಜ್ಯಾ ವರ್‍ತಿ ಥವಲ್ಲ್ಯಾ ವಯ್ನಾ ದೆವಾಚ್ಯಾ ಮಹಿಮೆನ್ ಭರ್ಲೊ, 2 ಅಬಕ್, ಮಿಯಾ ಬಗಿತ್ ರ್‍ಹಾತಾನಾ ಆಗ್ ಪೆಟಲ್ಲ್ಯಾ ಗತಿನ್ ಮೊಟ್ಟೊ ಉಜ್ವೊಡ್ ದಿಸ್ಲೊ, ತೊ ಮಾನ್ಸಾಚ್ಯಾ ರುಪಾಚ್ಯಾ ಸಾರ್ಕೆ ದಿಸಿತ್ ಹೊತ್ತೆ, ಕಂಬ್ರೆಚ್ಯಾ ಭಾಸೆನ್ ದಿಸ್ತಲ್ಯಾ ತೆಚ್ಯಾ ಮದ್ಲ್ಯಾ ಭಾಗಾಕ್ನಾ ಖಾಲ್ತಿ ಆಗ್ ಪೆಟಿತ್ ಹೊತ್ತಿ. ತೆಚ್ಯಾ ಮದ್ಲ್ಯಾ ಭಾಗಾಕ್ನಾ ವರ್‍ತಿ ಹೊಳಾವ್ತಲ್ಯಾ ಸೊನ್ಯಾಚ್ಯಾ ಸಾರ್ಕೆ ಅಜಾಪಾಚೊ ಉಜ್ವೊಡ್ ಹೊಳಾದ್ಲೊ. 3 ತನ್ನಾ ತೆಜೊ ಹಾತ್ ಫಿಡೆ ಕರುನ್ ಮಾಜೆ ಟಕ್ಲೆ ಧರುನ್ ಘೆಟ್ಲ್ಯಾನ್, ದೆವಾಚೊ ಆತ್ಮೊ ಮಾಕಾ ಉಕ್ಲುನ್ ಘೆವ್ನ್ ಜಿಮ್ನಿಚ್ಯಾ ಅನಿ ಮಳ್ಬಾಚ್ಯಾ ಮದ್ದಿ ಹೊತ್ತ್ಯಾ ಜರುಜಲೆಮಾಚ್ಯಾ ಪತರ್ ನೆವ್ನ್ ಭುತ್ತುರ್ಲ್ಯಾ ಭಾಗಾಚ್ಯಾ ಉತ್ತರ್ ದಿಕ್ಕಾಚ್ಯಾ ದಾರಾಚ್ಯಾ ಇದ್ರಾಕ್ ದೆವಾಕ್ ರಾಗ್ ಯೆಯ್ ಸಾರ್ಕೆ ಕರ್‍ತಲ್ಯಾ ಮುರ್ತಿಕ್ ಅದ್ದಿ ಹೊತ್ತ್ಯಾ ಜಾಗ್ಯಾರ್ ಇಬೆ ಕರಲ್ಲ್ಯಾ ಸಾರ್ಕೆ ದೆವಾಚ್ಯಾ ದರ್ಶನಾತ್ ದಿಸುನ್ ಯೆಲೆ.

4 ಆಹಾ, ಇಜ್ರಾಯೆಲಾಚ್ಯಾ ದೆವಾಚಿ ಮಹಿಮಾ ಅದ್ಬುತ್ ದರ್ಶನ್ ಮ್ಹಾಳ್ ಜಾಗ್ಯಾರ್ ಹೊಲ್ಲ್ಯಾ ಸಾರ್ಕೆ ಹಿತ್ತೆಬಿ ಹೊಲ್ಲ್ಯಾ ಸಾರ್ಕೆ ಮಾಕಾಬಿ ಹೊಲೆ. 5 ತನ್ನಾ ದೆವಾನ್ ಮಾಕಾ ಸಾಂಗ್ಲ್ಯಾನ್, "ನರ್ ಮಾನ್ಸಾ, ಉತ್ತರಾಚ್ಯಾ ದಿಕ್ಕಾಕ್ಡೆ ತೆಚಿ ದಿಸ್ಟ್ ಘಾಲ್, ತನ್ನಾ ಮಿಯಾ ಉತ್ತರ್ ದಿಕ್ಕಾಕ್ನಾ ಮಾಜಿ ದಿಸ್ಟ್ ಬಗಲ್ಯಾ ತನ್ನಾ; ಅಬಕ್, ದೆವಾಕ್ ರಾಗ್ ಯೆಯ್ ಸಾರ್ಕೆ ಕರ್ತಲಿ ತಿ ಮುರ್ತಿ ಅಲ್ತಾರಿಕ್ಡೆ ಭುತ್ತುರ್ ಗುಸ್ತಲ್ಯಾ ದಾರಾಚ್ಯಾ ಇದ್ರಾಕ್ ಇಬೆ ಹೊತ್ತೆ". 6 ತನ್ನಾ ತೆನಿ ಮಾಕಾ ಸಾಂಗ್ಲ್ಯಾನ್, "ನರ್ ಮಾನ್ಸಾ, ಹೆನಿ ಕಾಯ್ ಕರುನ್ಗೆತ್ ಹಾತ್ ಮನುನ್ ಬಗುಲೈ ಕಾಯ್? ಇಜ್ರಾಯೆಲ್ ಪಿಳ್ಗಿಚ್ಯಾನಿ ಹಿತ್ತೆ ಕರುಲಾಗಲ್ಲೊ ಬುರ್ಶಿಕಾಮಾ ಬಗಲೈ ಕಾಯ್? ಹೆಚ್ಯಾ ವಯ್ನಾ ಮಿಯಾ ಪವಿತ್ರ್ ದೆವಾಚಿ ಗುಡಿ ಸೊಡುನ್ ದುರ್ ಜಾತಲೆ ಯೆಲೆ. ಯೆ, ಹೆಚ್ಯಾನ್ ಅನಿ ಲೈ ಬುರ್ಶಿ ಕಾಮಾ ಬಗ್ತಯ್".

7 ಮಾನಾ ತೆನಿ ಮಾಕಾ ಅಂಗ್ನಾಚ್ಯಾ ದಾರಾಕ್ಡೆ ಹಾನ್ಲ್ಯಾನ್; ಅಬಕ್, ತ್ಯಾ ಭಿತ್ತಿತ್ ಮಾಕಾ ಎಕ್ ಡೊಂಮ್ಕೊ ದಿಸ್ಲೊ. 8 ತನ್ನಾ ತೆನಿ ಮಾಕಾ ಸಾಂಗ್ಲ್ಯಾನ್, ನರ್ ಮಾನ್ಸಾ, ಭಿತ್ತಿಕ್ ಖಂಡ್, ತನ್ನಾ ಮಿಯಾ ಭಿತ್ತ್ ಖಂಡ್ತಾನಾ ಎಕ್ ದಾರ್ ದಿಸ್ಲೆ. 9 ತನ್ನಾ ತೆನಿ ಮಾಕಾ ಸಾಂಗ್ಲ್ಯಾನ್, ತಿಯಾ ಭುತ್ತುರ್ ಜಾ ಥೈ ತೆನಿ ಹಿತ್ತೆ ಕವ್ಡೆ ಬುರ್ಶಿ ಕಾಮಾ ಕರುಲಾತ್ ಮನುನ್ ಬಗ್, 10 ತನ್ನಾ ಮಿಯಾ ಭುತ್ತುರ್ ಗುಸುನ್ ಬಗಟ್ಲೊ. ಥೈ, ಸಗ್ಳ್ಯಾ ನಮುನ್ಯಾಚಿ ಕಿಡ್ಯಾಂಚೆ, ಬುರ್ಶಿ ಜನಾವರಾಂಚೆ ಅನಿ ಇಜ್ರಾಯೆಲ್ ಲೊಕಾ ಫುಜ್ಯಾ ಕರ್ತಲಿ ಸಗ್ಳಿ ಮುರ್ತಿಯಾಂಚಿ ಚಿತ್ರಾ ಭಿತ್ತಿಯಾ ವಯ್ನಿ ಕಾಡಲ್ಲೆ ಹೊತ್ತಿ. 11 ಅನಿ ಇಜ್ರಾಯೆಲ್ ಪಿಳ್ಗಿಚ್ಯಾ ಸತ್ತರ್ ಲೊಕಾ ಜಾಂನ್ತೆ ತೆಂಚ್ಯಾ ಮದ್ದಿ ಶೆಪಾನಾಚೊ ಲೆಕ್ ಜಾಜನ್ಯ್ ಮನ್ತಲೊ ತೆಂಚ್ಯಾ ಹಾತಿತ್ನಿ ಧುಪಾಚಿ ಆರತಿಯಾ ಧರುನ್ ಘೆವ್ನ್ ತ್ಯಾ ಚಿತ್ರಾಂಚ್ಯಾ ಇದ್ರಾಕ್ ಇಬೆ ಹೊತ್ತೆ; ತ್ಯಾ ಧುಪಾಚಿ ವಾಸ್ ಅನಿ ಡುಕೊಟ್ ಮಳ್ಬಾಚ್ಯಾ ಸಾರ್ಕೆ ವರ್‍ತಿ ಜಾಯ್. 12 ತನ್ನಾ ತೆನಿ ಮಾಕಾ ಸಾಂಗ್ಲ್ಯಾನ್, "ನರ್ ಮಾನ್ಸಾ, ಇಜ್ರಾಯೆಲ್ ಪಿಳ್ಗಿಚ್ಯಾ ಜಾಂನ್ತ್ಯಾನಿ ನಾನಾ ನಮುನ್ಯಾಚ್ಯಾ ರುಪಾನಿ ಚಿತ್ರ್ ಕಾಡಲ್ಯಾ ಕಾಳೊಕ್ ಹೊತ್ತ್ಯಾ ಖೊಲಿಯಾತ್ನಿ ಕರ್ತಲಿ ಕಾಮಾ ಬಗಲೈ ಕಾಯ್? ಸರ್ವೆಸ್ಪರ್ ಅಮ್ಕಾ ಬಗಿನಾ, ಸರ್ವೆಸ್ಪರಾನ್ ಹೊ ದೆಶ್ ಸೊಡುನ್ ಸೊಡ್ಲಾ ಮನುನ್ ಬೊಲುನ್ ಘೆತಾತ್".

13 ಮಾನಾ ತೆನಿ ಮಾಕಾ ಸಾಂಗ್ಲ್ಯಾನ್, "ತಿಯಾ ತೆನಿ ಕರ್ತಲಿ ಹೆಚ್ಯಾನ್ಕಿ ಲೈಬಿ ಬುರ್ಶಿ ಕಾಮಾ ಬಗ್ತಯ್". 14 ತನ್ನಾ ತೆನಿ ಮಾಕಾ ಸರ್ವೆಸ್ಪರಾಚ್ಯಾ ಗುಡಿಚ್ಯಾ ಉತ್ತರ್ ದಿಕ್ಕಾಚ್ಯಾ ದಾರಾಚ್ಯಾ ಇದ್ರಾಕ್ ಬಲ್ವುನ್ ಹಾನ್ಲ್ಯಾನ್; ಅಬಕ್, ಹಿತ್ತೆ ಬಾಯ್ಕಾ ಮಾನ್ಸಾ ತಮ್ಮುಜ್ ದೆವಾ ಸಾಟ್ನಿ ರಡುನ್ಗೆತ್ ಬಸಲ್ಯಾನಿ.

15 ತೆನಿ ಮಾಕಾ ಸಾಂಗ್ಲ್ಯಾನ್, "ನರ್ ಮಾನ್ಸಾ, ಹೆ ಸಗ್ಳೆ ಬಗಟ್ಲೆ ಕಾಯ್? ತಿಯಾ ಹೆಚ್ಯಾನ್ಬಿ ಲೈ ಬುರ್ಶಿ ಕಾಮಾ ಬಗ್ತಯ್", 16 ತೆನಿ ಮಾಕಾ ಸರ್ವೆಸ್ಪರಾಚ್ಯಾ ಗುಡಿಚ್ಯಾ ಭುತ್ತುರ್ಲ್ಯಾ ಭಾಗಾಚ್ಯಾ ದಾರಾತ್ ಮಾಕಾ ಬಲ್ವುನ್ ಹಾನ್ಲ್ಯಾನ್; ಅಬಕ್ ಸರ್ವೆಸ್ಪರಾಚ್ಯಾ ಗುಡಿಚ್ಯಾ ದಾರಾಚ್ಯಾ ಇದ್ರಾಕ್ ಹೊತ್ತ್ಯಾ ಮಂಟಪಾಕ್ ಅನಿ ಬಲಿ ಭೆಟ್ವುತ್ತಲ್ಯಾ ಅಲ್ತಾರಿಚ್ಯಾ ಮದ್ದಿ ಲೈ ಕರುನ್ ಪಂಚಿಸ್ ಘವ್ಮಾನ್ಸಾ ಸರ್ವೆಸ್ಪರಾಚ್ಯಾ ಗುಡಿಕ್ ಪಾಟ್ ಕರುನ್ ಘೆವ್ನ್ ದಿಸ್ ಉಗಾವ್ತಲ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ಡೆ ತೊಂಡ್ ಕರುನ್ ಘೆವ್ನ್ ದಿಸಾಕ್ ಫುಜ್ಯಾ ಕರಿತ್ ಹೊತ್ತೆ.

17 ತನ್ನಾ ತೆನಿ ಮಾಕಾ ಸಾಂಗ್ಲ್ಯಾನ್, "ನರ್ ಮಾನ್ಸಾ, ಹೆ ಸಗ್ಳೆ ಬಗ್ತೆಯ್ ಕಾಯ್? ಜುದೆವಾಂಚ್ಯಾ ಪಿಳ್ಗಿಚ್ಯಾಕ್ನಿ ತೆನಿ ಕರುಲಾಗಲ್ಲಿ ಸಗ್ಳಿ ಬುರ್ಶಿ ಕಾಮಾ ಕಾಯ್ಬಿ ಮೊಟಿ ನ್ಹಯ್ ಮನುನ್ ಯೆವಜ್ಲಾತ್ ಕಾಯ್ಕಿ? ದೆಶ್ ಸಗ್ಳೊ ಸಂಕಟಾನ್ ಭರುನ್ ಥವಲ್ಲೆ ಯೆವ್ಡೆಚ್ ನಸ್ತಾನಾ ಮಾಕಾಬಿ ಕಿಡ್ವುಚೆ ಮನುನ್ ಕಟ್ಪಟ್ ಕರುಲಾತ್; ಬಗ್, ನಾಕಾಕ್ ಟಾಳಿಯಾ ಘಾಲುನ್ ಘೆತಾತ್". 18 ತೆಚ್ಯಾ ಸಾಟ್ನಿ ಮಿಯಾ ತೆಂಚ್ಯಾ ವರ್‍ತಿ ರಾಗಾನ್ ಚಲ್ತಾ, ಅನಿ ದಯಾ ದಾಕ್ವಿನಾ, ತೆಂಕಾ ಹುರ್ವಿನಾ; ತೆನಿ ರಡಿತ್ ಬೊಬ್ ಮಾರುನ್ ಘೆಟಲ್ಲೊ ಮೊಟ್ಟೊ ಅವಾಜ್ ಮಾಜ್ಯಾ ಕಾನಾತ್ ಪಡ್ಲ್ಯಾಬಿ ಆಯ್ಕಿನಾ.