1 ತನ್ನಾ ಮಿಯಾ ಬಗ್ತಾನಾ ಕೆರುಬಿಯಾಚ್ಯಾ ಟಕ್ಲ್ಯಾಚ್ಯಾ ವರ್‍ತಿ ನಿಳ್ಯಾ ಕಿಮ್ತಿಚ್ಯಾ ಫೊಡ್ಯಾಂಚ್ಯಾ ಸಾರ್ಕೆ ಹೊಳಾವ್ತಲ್ಯಾ ಸಿಂವಾಸನಾಚೊ ಆಕಾರ್ ಸಾರ್ಕೆ ದಿಸ್ಲೆ. 2 ತೆನಿ ಕಿಮ್ತಿಚೆ ಕಪ್ಡೆ ನೆಸಲ್ಲ್ಯಾ ತ್ಯಾ ಮಾನ್ಸಾಕ್, ತಿಯಾ ಗರಗರ್ ಫಿರ್ತಲ್ಯಾ ಚಕ್ರಾಚ್ಯಾ ಮದ್ದಿ ಕೆರುಬಿಯಾಚ್ಯಾ ಖಾಲ್ತಿ ಜಾ ಕೆರುಬಿಯಾಂಚ್ಯಾ ಮದ್ನಾ ಪೊಸೊ ಬರ್ ಆಗಿಚೆ ಇಂಗ್ಳೆ ಭರುನ್ ಘೆವ್ನ್ ಶಾರಾಚ್ಯಾ ವರ್‍ತಿ ಹೊಡಾಂಗ್ ಮನುನ್ ಸಾಂಗ್ತಾನಾ ತನ್ನಾ ತೊ ಮಾಜ್ಯಾ ಡೊಳ್ಯಾಚ್ಯಾ ಇದ್ರಾಕ್ನಾ ಥೈ ಭುತ್ತುರ್ ಗೆಲೊ.

3 ತೊ ಭುತ್ತುರ್ ಗೆಲ್ಲ್ಯಾ ತನ್ನಾ ಕೆರುಬಿಯಾ ದೆವಾಚ್ಯಾ ಗುಡಿಚ್ಯಾ ದಕ್ಷಿನ್ ದಿಕ್ಕಾಕ್ ಇಬೆ ಹೊತ್ತಿ, ತನ್ನಾ ಮೊಡಾ ಭುತ್ತುರ್ಲ್ಯಾ ಅಂಕ್ನಾತ್ ಭರ್ಲೆ. 4 ಅಸಿ ರ್‍ಹಾತಾನಾ, ಸರ್ವೆಸ್ಪರಾಚೊ ಉಜ್ವೊಡ್ ಕೆರುಬಿಯಾಕ್ನಿ ಸೊಡುನ್ ವರ್‍ತಿ ಜಾವ್ನ್ ದೆವಾಚ್ಯಾ ಗುಡಿಚ್ಯಾ ಹುಂಬ್ಡ್ಯಾಚ್ಯಾ ವರ್‍ತಿ ಇಬೆ ರಾಲಿ; ದೆವಾಚ್ಯಾ ಗುಡಿತ್ ಪುರಾ ಮೊಡಾ ಭರ್ಲೆ, ತನ್ನಾ ಸರ್ವೆಸ್ಪರಾಚೊ ಉಜ್ವೊಡ್ ಅಂಕ್ನಾತ್ ಪುರಾ ಪಗಳ್ಳಿ. 5 ತನ್ನಾ ಕೆರುಬಿಯಾಂಚ್ಯಾ ಫಾಕುಟ್ಯಾಚೊ ಆವಾಜ್ ಸಗ್ಳೆ ಕರುಕ್ ಶಕ್ತ್ ಹೊತ್ತ್ಯಾ ದೆವಾನ್ ಬೊಲ್ತಲ್ಯಾ ಧನಾ ಸಾರ್ಕೊ ಗಂಬಿರ್ ಹೊವ್ನ್ ಭಾಯ್ಲ್ಯಾ ಅಂಕ್ನಾತ್ ಪತರ್ ಆಯ್ಕೊ ಯೆಲೊ.

6 ತೆನಿ ಕಿಮ್ತಿಚೆ ಕಪ್ಡೆ ನೆಸುನ್ ಹೊತ್ತ್ಯಾ ಮಾನ್ಸಾಕ್, ತಿಯಾ ಗರಾಗರ್ ಫಿರ್ತಲ್ಯಾ ಚಕ್ರಾಚ್ಯಾ ಮದ್ದಿ ಜಾವ್ನ್ ಕೆರುಬಿಮಾಂಚ್ಯಾ ಮದ್ನಾ ಆಗ್ ಕಾಡುನ್ ಘೆ, ಮನುನ್ ಹುಕುಮ್ ದಿತಾನಾ, ತೊ ಭುತ್ತುರ್ ಜಾವ್ನ್ ಎಕ್ ಚಕ್ರಾಚ್ಯಾ ಭಾಜುಕ್ ಇಬೆ ರಾಲೊ. 7 ತನ್ನಾ ಎಕ್ ಕೆರುಬಿನ್ ಕೆರುಬಿಮಾಚ್ಯಾ ಮದ್ನಾ ಹಾತ್ ಲಾಂಬ್ ಕರುನ್ ಆಗ್ ಕಾಡುನ್ ಘೆವ್ನ್ ಕಿಮ್ತಿಚೆ ಕಪ್ಡೆ ನೆಸಲ್ಯಾಚ್ಯಾ ಹಾತಿತ್ ದಿಲ್ಯಾನ್. ತೊ ತೆ ಘೆವ್ನ್ ಭಾಯ್ರ್ ಗೆಲೊ.

8 ಕೆರುಬಾಂಚ್ಯಾ ಫಾಕುಟ್ಯಾಂಚ್ಯಾ ಖಾಲ್ತಿ ಮಾನ್ಸಾಚ್ಯಾ ಹಾತ್ ಸಾರ್ಕಿ ಹಾತಾ ದಿಸ್ಲಿ. 9 ಅಬಕ್, ಮಿಯಾ ಬಗಿತ್ ರ್‍ಹಾತಾನಾಚ್ ತ್ಯಾ ಕೆರುಬಿಯಾಂಚ್ಯಾ ಭೊತ್ಯಾನಿ ಎಕೆಕ್ ಚಕ್ರಾಂಚ್ಯಾ ಸಾರ್ಕೆ ಚಾರ್ ಚಕ್ರಾ ಹೊತ್ತಿ, ತ್ಯಾ ಚಕ್ರಾಂಚೊ ರಂಗ್ ಕಿಮ್ತಿಚೊ ಗುಂಡೊ ಹೊಳಾವ್ತಲ್ಯಾ ಮೊತಿ ಸರ್ಕೊ ಹೊಳ್ದಿ. 10 ತೆಂಚೊ ರುಪ್ ಕಸಿ ಮಟ್ಲ್ಯಾರ್, ಎಕ್ ಚಕ್ಕರಾತ್ ಅನಿ ಎಕ್ ಚಕ್ಕರ್ ಆಡ್ವೆ ಲಾವ್ನ್ ರಚಲ್ಲೆ ಸಾರ್ಕೆ ಹೊತ್ತಿ. ತಿ ಚಾರಿಬಿ ಎಕುಚ್ ನಮುನಿ ಹೊತ್ತಿ. 11 ತಿ ಪರತ್ ತಾನಾ ಚಾರ್ ಕಡೆನ್ಬಿ ಖಲ್ಯಾಕ್ಡೆಬಿ ಪರ್ತಿತ್, ಖರೆ ವ್ಹಾಕ್ಡೆ ಹೊವ್ನ್ ಫಿರಿ ನಸಿತ್, ಫಿಡೆ ತೊಂಡ್ ಕರುನ್ ಜಾಯ್ತ್ ಖರೆ ವ್ಹಾಂಕ್ಡೆ ಹೊವ್ನ್ ಜಾಯ್ ನಸಿತ್. 12 ಅನಿ ಕೆರುಬಿಯಾಂಚಿ ಡುಬ್ಬರ್, ಹಾತ್, ಫಾಕುಟೆ, ಅನಿ ಸಗ್ಳೆ ಆಂಗಾತ್ಲ್ಯಾ ಭಾಗಾಕ್ ಚಕ್ರಾಕ್ನಿಬಿ ಡೊಳೆ ಭೊತ್ಯಾನಿ ಭರಲ್ಲೆ. ಚಾರ್ ಕೆರುಬಿಯಾತ್ನಿ ಎಕೆಕ್ಲ್ಯಾಕ್ ಎಕೆಕ್ ಚಕ್ಕರ್ ಹೊತ್ತೆ. 13 ಅನಿ ಮಿಯಾ ಆಯ್ಕಲ್ಲ್ಯಾ ಸಾರ್ಕೆ ತ್ಯಾ ಚಕ್ಕರಾಚಿ ನಾವ್ ಗಿರ್ಗಿರ್ ಫಿರ್ತಲಿ ಚಕ್ರಾ ಮನುನ್ ಹೊತ್ತೆ.

14 ಅನಿ ಎಕೆಕ್ ಕೆರುಬಿಯಾಕ್ನಿ ಚಾರ್ ತೊಂಡಾ ಹೊತ್ತಿ, ಪಯ್ಲೆಚೆ ಕೆರುಬಿಚೆ ತೊಂಡ್, ದೊನ್ವೆಚೆ ಮಾನ್ಸಾಚೆ, ತಿನ್ವೆಚೆ ಸಿಂವಾಚೆ, ಚಾರ್ವೆಚೆ ಗಿಡ್ಗ್ಯಾಚೆ ತೊಂಡ್, 15 ತಿ ಕೆರುಬಿಯಾ ವರ್‍ತಿ ಚಡ್ಲಿ; ಮಿಯಾ ಕೆಬಾರ್ ನ್ಹಯಿಕ್ಡೆ ಬಗಲ್ಲಿ ಜಿವ್ದಾಳಾ ಹಿಚ್. 16 ಅನಿ ಕೆರುಬಿಯಾ ಫಿಡೆ ಜಾತಾನಾ, ತೆಂಚಿ ಚಕ್ರಾಬಿ ತೆಂಚ್ಯಾ ವಾಂಗ್ಡಾಚ್ ಜಾಯ್ತ್, ಕೆರುಬಿಯಾ ಜಿಮ್ನಿ ವಯ್ನಾ ಹುಡುಚೆ ಮನುನ್ ಫಾಕುಟೆ ಪಗಳ್ತಾನಾ, ಚಕ್ರಾಬಿ ವಾಂಕ್ಡೆ ಹೊಯ್ ನಸ್ತಾನಾ ಚಡ್ಲಿ, 17 ಕಶ್ಯಾಕ್ ಮಟ್ಲ್ಯಾರ್, ಜಿವ್ದಾನಿಯಾಂಚೊ ಆತ್ಮೊ ಚಕ್ಕರಾತ್ನಿ ಹೊತ್ತ್ಯಾ ವಯ್ನಾ ತಿ ಇಬೆ ರ್‍ಹಾತಾನಾ ಹಿಬಿ ಇಬೆ ರಾಯ್ತ್, ಅನಿ ತಿ ಹುಡ್ತಾನಾ ಹಿಬಿ ತೆಂಚೆ ವಾಂಗ್ಡಾಚ್ ಹುಡಿತ್.

18 ತನ್ನಾ ಸರ್ವೆಸ್ಪರಾಚೊ ಉಜ್ವೊಡ್ ದೆವಾಚ್ಯಾ ಗುಡಿಚ್ಯಾ ಹುಂಬ್ಡ್ಯಾಕ್ನಾ ಸೊಡುನ್ ಕೆರುಬಿಯಾಂಚ್ಯಾ ವರ್‍ತಿ ಇಬೆ ರಾಲೊ. 19 ತನ್ನಾ ಕೆರುಬಿಯಾ ಮಾಜ್ಯಾ ಡೊಳ್ಯಾಂಚ್ಯಾ ಇದ್ರಾಕುಚ್ ಫಾಕುಟೆ ಪಗ್ಳುನ್ ಘೆವ್ನ್ ಚಕ್ರಾಂಚ್ಯಾ ವಾಂಗ್ಡಾಚ್ ಜಿಮ್ನಿ ವಯ್ನಾ ಚಡುನ್ ಜಾವ್ನ್ ಸರ್ವೆಸ್ಪರಾಚ್ಯಾ ಗುಡಿಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾತ್ ದಾರಾಚ್ಯಾ ಇದ್ರಾಕ್ ಜಾವ್ನ್ ಇಬೆ ರಾಲಿ ತೆಂಚ್ಯಾ ವರ್‍ತಿ ಇಜ್ರಾಯೆಲಾಂಚೊ ದೆವ್ ಹೊಲ್ಲ್ಯಾ ಸರ್ವೆಸ್ಪರಾಚೊ ಉಜ್ವೊಡ್ ತೆಂಚ್ಯಾ ವರ್‍ತಿ ಇಬೆ ರ್‍ಹಾಲೆ. 20 ತನ್ನಾ ಕೆಬಾರ್ ನ್ಹಯಿಕ್ಡೆ ಇಜ್ರಾಯೆಲಾಂಚ್ಯಾ ದೆವಾಚಿ ಗಾಡಿ ಹೊವ್ನ್ ಹೊತ್ತಿ ತನ್ನಾ ಮಾಕಾ ದಿಸಲ್ಲಿ ಜಿವ್ದಾನಿಯಾ ಹಿಚ್, ಹಿ ಕೆರುಬಿಮಾ ಮನುನ್ ಮಾಕಾ ಅತ್ತಾ ಕಳುನ್ ಯೆಲೆ.

21 ಅನಿ ಎಕೆಕಾಕ್ ಚಾಚಾರ್ ತೊಂಡಾ, ಚಾಚಾರ್ ಫಾಕುಟೆ ಹೊತ್ತೆ; ತೆಂಚ್ಯಾ ಫಾಕುಟ್ಯಾಂಚ್ಯಾ ಖಾಲ್ತಿ ಮಾನ್ಸಾಚ್ಯಾ ಹಾತಿ ಸಾರ್ಕೆ ಹಾತಾ ಹೊತ್ತಿ. 22 ತೆಂಚಿ ತೊಂಡಾ ಕೆಬಾರ್ ನ್ಹಯ್ಚ್ಯಾ ಜಗ್ಗೊಳ್ ಮಿಯಾ ಬಗಟಲ್ಲ್ಯಾ ತೊಂಡಾಚ್ಯಾ ಸಾರ್ಕೆ ಮಾಕಾ ದಿಸುನ್ ಯೆಲೆ, ತೆನಿ ತಿಚ್ ತೊಂಡಾ; ಅನಿ ಹರ್ ಜಿವಿಚಿ ತೊಂಡಾ ನಿಸಾನಿ ಜಾಯ್ತ್.