1 ಸರ್ವೆಸ್ಪರಾನ್ ಮಾಜ್ಯಾ ವಾಂಗ್ಡಾ ಬೊಲ್ಲ್ಯಾನ್. 2 ನರ್ ಮಾನ್ಸಾ, ಇಜ್ರಾಯೆಲ್ ಮನ್ತಲ್ಯಾ ಬಕ್ರ್ಯಾಂಚ್ಯಾ ತಾಂಡ್ಯಾಕ್ ರಾಕ್ತಲ್ಯಾ ಕುರ್ಬುರಾಕ್ನಿ ಹಿ ದೆವಾಚಿ ಗೊಸ್ಟಿಯಾ ಸಾಂಗ್, ಪ್ರವಾದನ್ ಕರುನ್ ಅಸಿ ಸಾಂಗ್, ಸರ್ವೆಸ್ಪರ್ ದೆವ್ ಅಸೆ ಸಾಂಗ್ತಾ, ಅಯ್ಯೊ ಸ್ವತ್ಯಾಚ್ಯಾ ಪೊಟಾಕ್ನಿಚ್ ಕಾಪುನ್ಗೆತಲ್ಯಾ ಇಜ್ರಾಯೆಲಾಚ್ಯಾ ಕುರ್ಬುರಾಂಚಿ ಗತ್ ಕಾಯ್ ಸಾಂಗು! ಕುರ್ಬುರಾಂಚೆ ಕಾಮ್ ಬಕ್ರ್ಯಾಂಚೆ ಪೊಟ್ ಭರ್ತಲೆಚ್ ಹೊವ್ನ್ ಹಾಯ್. 3 ತುಮಿ ಮಾಂದ್ಯಾಚೆ ಮಾಂಸ್ ಖಾತ್ಯಾಸಿ, ಬಕ್ರ್ಯಾಚ್ಯಾ ಕೆಸಾಂಚೆ ಕಾಂಬ್ರಾನ್ ಘೆತ್ಯಾಸಿ, ಮಾಂದ್ಯಾಚಿ ಬಕ್ರಿಯಾ ಕಾಪ್ತ್ಯಾಸಿ, ಖರೆ ಬಕ್ರ್ಯಾಕ್ನಿ ಚಾರ್ವಿನ್ಯಾಸಿ. 4 ಹಾ, ತುಮಿ ಬಳ್ ನಸಲ್ಲ್ಯಾಕ್ನಿ ಬಳ್ ದಿವ್ಕ್ ನ್ಯಾಸಿ, ರೊಗಾತ್ ಹೊತ್ತ್ಯಾಕ್ನಿ ಆರಾಮ್ ಕರುಕ್ ನಾಸಿ, ತೆಂಚೆ ಕಾಯ್ಬಿ ಮೊಡಲ್ಲೆ ರಾಲ್ಯಾರ್ ಭಾಂದಿನ್ಯಾಸಿ, ಕಳ್ದುನ್ ಗೆಲ್ಲ್ಯಾಕ್ ಹುಡ್ಕಿನ್ಯಾಸಿ, ಪಳಸಲ್ಲ್ಯಾಕ್ನಿ ಪರ್‍ತುನ್ ತಾಂಡ್ಯಾಕ್ ಮಿಳ್ವುಕ್ನಾತ್, ತೆಂಚ್ಯಾ ತರಸಾ ಜಬರ್ದಸ್ತಿನ್ ರಾಜ್ವಡ್ಕಿ ಕರಿತ್ ಯೆಲ್ಯಾಸಿ. 5 ಕುರ್ಬುರ್ ನಸ್ತಾನಾ ಹೊತ್ತ್ಯಾ ಸಾಟ್ನಿ, ತಿ ಪಗ್ಳುನ್ ಗೆಲಿ, ಪಗ್ಳುನ್ ಜಾವ್ನ್ ಸಗ್ಳಿ ಡಂಗ್ಳಿತ್ಲ್ಯಾ ಕ್ರುರ್ ಜನಾವರಾಕ್ನಿ ವಾಟೊ ಹೊಲಿ. 6 ಮಾಜಿ ಸಗ್ಳಿ ಬಕ್ರಿಯಾ ಪರ್ವತಾಂಚ್ಯಾ ಸಗ್ಳ್ಯಾ ಜಾಗ್ಯಾ ವೈನಿ ಉಪ್ಪರ್ಲ್ಯಾ ಹರ್ ಎಕ್ ಮಡ್ಡಿ ವರ್‍ತಿ ಫಿರುನ್ ಖೆಳುನ್ಗೆತ್ ಹೊತ್ತಿ, ಹೊಯ್, ಮಾಜಿ ಬಕ್ರಿಯಾ ಸಗ್ಳ್ಯಾ ಜಿಮ್ನಿ ವರ್‍ತಿ ಪಗ್ಳುನ್ ಗೆಲಿ, ಕೊನಿಬಿ ತೆಂಚ್ಯಾ ಪಾಟ್ನಾ ಜಾವ್ನ್ ಹುಡ್ಕುಕ್ನಾತ್, ಅನಿ ತೆಂಕಾ ರಾಕುಕ್ನಾತ್. 7 ಕುರ್ಬುರಾನೊ, ಸರ್ವೆಸ್ಪರಾಚೆ ಬೊಲ್ನೆ ಆಯ್ಕಾ.

8 ಸರ್ವೆಸ್ಪರ್ ಅಸೊ ಮನ್ತಾ, ಅಯ್ಯೊ ಮಾಜಿ ಬಕ್ರಿಯಾ ಚೊರಿ ಹೊಲಿ, ಡಂಗ್ಳಿತ್ಲ್ಯಾ ಸಗ್ಳ್ಯಾ ಕ್ರುರ್ ಜನಾವರಾಂಚ್ಯಾ ವಾಟ್ಯಾಕ್ ಹೊಲಿ, ಕುರ್ಬುರಾಬಿ ನಾತ್ ನ್ಹಯ್, ಮಾಜ್ಯಾ ಕುರ್ಬುರಾನಿ ಬಕ್ರಿಯಾಕ್ನಿ ಹುಡ್ಕುಕ್ನಾತ್, ತೆನಿ ಅಪ್ನಾಚಿ ಪೊಟಾ ತವ್ಡಿಚ್ ಭರುನ್ ಘೆಟ್ಲ್ಯಾನಿ, ಖರೆ ಬಕ್ರ್ಯಾಂಚಿ ಪೊಟಾ ಭರ್ತಲೆ ಬಗುಕ್ನಾತ್. 9 ತಸೆ ಹೊವ್ನ್, ಕುರ್ಬುರಾನೊ ಸರ್ವೆಸ್ಪರಾಚಿ ಧನ್ ಆಯ್ಕಾ. 10 ಸರ್ವೆಸ್ಪರ್ ಅಸೊ ಮನ್ತಾ, ಮಾಜ್ಯಾ ಜಿವಾ ವರ್‍ತಿ ಆನ್ ಘಾಲುನ್ ಸಾಂಗ್ತಾ, ಮಿಯಾ ಕುರ್ಬುರಾಕ್ನಿ ವಿರೊದ್ ಹೊವ್ನ್ ಹಾಯ್, ತೆನಿ ಮಾಜ್ಯಾ ಬಕ್ರ್ಯಾಂಚೊ ಇಸಬ್ ಮಾಕಾ ದಿವ್ಚೆ, ಮಾಜಿ ಬಕ್ರಿಯಾ ರಾಕ್ತಲ್ಯಾ ಕಾಮಾತ್ನಾ ತೆಂಕಾ ಚುಕ್ವುತಾ, ತ್ಯಾ ಕುರ್ಬುರಾಕ್ನಿ ಅಪ್ನಾಚೆ ಸ್ವತಾಚೆ ಪೊಟ್ ಭರುನ್ಗೆವ್ಕ್ ಹೊಯ್ನಾ, ಮಾಜಿ ಬಕ್ರಿಯಾ ತೆಂಕಾ ಜೆವಾನ್ ಹೊವ್ನ್ ತೆಂಚ್ಯಾ ತೊಂಡಾಕ್ ಗಾಯ್ನಾ ಸಾರ್ಕೆ ಕರ್ತಾ.

11 ಸರ್ವೆಸ್ಪರ್ ಅಸೊ ಮನ್ತಾ, ಆಹಾ, ಮಾಜ್ಯಾ ಬಕ್ರ್ಯಾಕ್ನಿ ಮಿಯಾಚ್ ಫಾಟ್ ಲಾಗುನ್ ಸೊದುನ್ ಕಾಡ್ತಾ. 12 ತಾಂಡ್ಯಾಚ್ಯಾ ಕುರ್ಬುರಾನ್ ಭೊತ್ಯಾನಿ ಪಗ್ಳುನ್ ಗೆಲ್ಲ್ಯಾ ಅಪ್ನಾಚ್ಯಾ ಬಕ್ರ್ಯಾಕ್ನಿ ಹುಡಕಲ್ಲ್ಯಾ ಸಾರ್ಕೆ, ಮಿಯಾ ಮಾಜ್ಯಾ ಬಕ್ರ್ಯಾಕ್ನಿ ಹುಡಕ್ತಾ, ಕಾಳಿ ಮೊಡಾ ಹೊವ್ನ್, ಪಗ್ಳುನ್ ಗೆಲ್ಲ್ಯಾ ಸಗ್ಳ್ಯಾ ಜಾಗ್ಯಾಂಚ್ಯಾ ವಯ್ನಾ ತೆಂಕಾ ಸೊಡಸ್ತಾ. 13 ಲೊಕಾಂಚ್ಯಾ ಮದ್ನಾ ಚುಕ್ವುನ್, ಸಗ್ಳ್ಯಾ ದೆಶಾಂಚ್ಯಾಕ್ನಾ ಗೊಳಾ ಕರ್ತಾ. ಸ್ವತ್ಯಾಚ್ಯಾ ದೆಸಾಕ್ ಹಾನ್ತಾ. ಅನಿ ಇಜ್ರಾಯೆಲಾಚ್ಯಾ ಮಡ್ಡಿಯಾತ್ನಿ ಅನಿ ಕೊಡ್ಲಾಂಚ್ಯಾ ಜಗ್ಗೊಳ್, ಗಾಂವಾಚ್ಯಾ ಸಗ್ಳ್ಯಾ ಗಡಿಯಾತ್ನಿಬಿ ಚಾರ್ವುತಾ. 14 ತೆಂಕಾ ಬರೊ ಚಾರೊ ಚಾರ್ವುತಾ. ತೆಂಚೆ ಗವಾತ್ ಇಜ್ರಾಯೆಲಾಚ್ಯಾ ಉಪ್ಪರ್ಲ್ಯಾ ಮಡ್ಡಿಯಾ ವಯ್ಲಿ ಹಾಯ್, ಥೈ ಬರ್ಯಾ ಚಾರ್ಯಾತ್ ನಿಜ್ತಾತ್. ಅನಿ ಇಜ್ರಾಯೆಲಾಚ್ಯಾ ಡಂಗ್ಳಿಯಾತ್ನಿ ಹಿರ್ವೊ ಚಾರೊ ಚರ್ತಾತ್. 15 ಮಿಯಾ ಮಾಜ್ಯಾ ಬಕ್ರ್ಯಾಕ್ನಿ ಚಾರ್ವುನ್ ಆರಾಮ್ ನಿಜುನ್ ರಾಯ್ ಸಾರ್ಕೆ ಕರ್ತಾ. ಹೆ ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್. 16 ಚುಕ್ವುನ್ಗೆವ್ನ್ ಗೆಲ್ಲೆ ಹುಡಕ್ತಾ, ಪಳ್ಸುನ್ ಘಾಟಲ್ಲ್ಯಾಕ್ ಪರ್‍ತುನ್ ತಾಂಡ್ಯಾಕ್ ಮಿಳ್ವುತಾ, ಬಳ್ ನಸಲ್ಲ್ಯಾಕ್ ಬಳ್ ಯೆಯ್ ಸಾರ್ಕೆ ಕರ್ತಾ, ತೆಚೆ ಕಾಯ್ಬಿ ಮೊಡಲ್ಲೊ ಭಾಗ್ ರಾಲ್ಯಾರ್ ಭಾಂದುನ್ ಸಮಾ ಕರ್ತಾ. ಲೈ ಮಾಂದ್ಯಾನ್ ವಾಡಲ್ಲ್ಯಾ ಬಕ್ರ್ಯಾಕ್ನಿ ನಾಶ್ ಕರುನ್, ತೆಂಕಾ ಝಡ್ತಿ ಮನ್ತಲೊ ಚಾರೊ ಚಾರ್ವುತಾ.

17 ಸರ್ವೆಸ್ಪರ್ ಅಸೊ ಮನ್ತಾ, ಮಾಜ್ಯಾ ಹಿಂಡಾ, ಮಿಯಾ ತುಮ್ಚ್ಯಾತ್ಲ್ಯಾ ಬೊಕ್ಡಾ, ಬಕ್ರ್ಯಾಂಚ್ಯಾ ಅನಿ ಬಕ್ರೆ, ಪಾಲ್ವ್ಯಾಂಚ್ಯಾ ಅನಿ ಬಕ್ರೆ, ಟಗ್ರಾಕ್ನಿ ಮದ್ದಿ ಇಬೆ ರ್‍ಹಾವ್ನ್ ಝಡ್ತಿ ಕರ್ತಾ. 18 ಟಗ್ರಾ ಬಕ್ರ್ಯಾನೊ, ತುಮಿ ಬರೊ ಚಾರೊ ಚರುನ್ ಹುರಲ್ಲೊ ಚಾರೊ ತುಡ್ವುನ್, ಪಾಂಯಾತ್ಲೊ ಕೆರ್ ಕರುನ್ ಘೆಟಲ್ಲೆ ಕಮ್ಮಿಚೆ ಕಾಮುಚ್ ನ್ಹಯ್ ಕಾಯ್? ನಿತಳ್ ಪಾನಿ ಫಿವ್ನ್ ಹುರಲ್ಲೆ ಪಾನಿ ಪಾಂಯಾನಿ ಕಾಲ್ವುನ್ ರಾಡ್ ಕರಲ್ಲೆ ಬಾರಿಕ್ ಕಾಮ್ ಕಾಯ್? 19 ತುಮಿ ಪಾಂಯಾತ್ಲೊ ಕೆರ್ ಕರುನ್ ತುಡ್ವುನ್ ರಾಡ್ ಸೊಡಲ್ಲೊ ಚಾರೊ, ಮಾಜ್ಯಾ ಬಕ್ರ್ಯಾಕ್ನಿ ಚಾರ್ವುಚೆ ಹೊಲೆ. ತುಮಿ ಕಾಲ್ವುನ್ ಕಡೆಕ್ ಕರಲ್ಲೆ ಪಾನಿ ಮಿಯಾ ತೆಂಕಾ ಪಾಜ್ವುತಲೆ ಹೊಲೆ. 20 ಅಸೆ ರ್‍ಹಾತಾನಾ, ಸರ್ವೆಸ್ಪರ್ ಅಸೊ ಮನ್ತಾ, ಅಬಕ್, ಮಿಯಾಚ್ ಮಾಂದ್ಯಾಚ್ಯಾ ಟಗ್ರಾಕ್ ಅನಿ ಶೆಳಿಯಾ, ಪಾಲ್ವ್ಯಾಕ್ನಿ ಮದ್ದಿ ಝಡ್ತಿ ಕರ್ತಾ. 21 ಟಗ್ರಾ ಬಕ್ರ್ಯಾನೊ, ತುಮಿ ಶೆಳಿಯಾ, ಪಾಲ್ವ್ಯಾಕ್ನಿ ಭಾಜುಕ್ನಾ ಅನಿ ಭುಜಾನಿ ಡಕ್ಳುನ್ಗೆತ್ ಬಳ್ ನಸಲ್ಲ್ಯಾಕ್ನಿ ಸಿಂಗಾನಿ ಮಾರುನ್ಗೆತ್ ಮಾಜ್ಯಾ ಹಿಂಡಾಕ್ ಪಗ್ಳುನ್ ಘಾಟ್ಲ್ಯಾಸಿ. 22 ತಸೆಹೊವ್ನ್, ಮಾಜೊ ತಾಂಡೊ ಅನಿ ಕನ್ನಾಬಿ ಚೊರಿ ಹೊಯ್ನಾ ಸಾರ್ಕೆ ಮಿಯಾ ತೆಂಕಾ ರಾಕ್ವನ್ ಕರುನ್, ಬೊಕ್ಡು, ಬಕ್ರೆ ಅನಿ ಶೆಳಿ, ಪಾಲ್ವ್ಯಾಕ್ನಿ ಝಡ್ತಿ ಕರ್ತಾ.

23 ಮಾಜ್ಯಾ ಹಿಂಡಾಕ್ ರಾಕುಕ್ ಎಕುಚ್ ಕುರ್ಬುರಾಕ್ ನೆಮಸ್ಲೊ, ಮಾಜೊ ಸೆವಕ್ ದಾವಿದ್ ಮನ್ತಲೊ ತೊ ಕುರ್ಬುರ್. ತೆಂಕಾ ಚಾರ್ವುತಾ, ಹೊಯ್ ತೊಚ್ ತೆಂಚೊ ಕುರ್ಬುರ್ ಹೊವ್ನ್ ತೆಂಕಾ ಚಾರ್ವುತಾ. 24 ಸರ್ವೆಸ್ಪರ್ ಮಿಯಾ ಮಾಜ್ಯಾ ಲೊಕಾಕ್ನಿ ದೆವ್ ಹೊವ್ನ್ ರ್‍ಹಾತಾ, ಮಾಜೊ ಸೆವಕ್ ದಾವಿದ್ ತೆಂಕಾ ರಾಜ್ವಡ್ಕಿ ಕರ್ತಲೊ ರಾಜಾ ಹೊವ್ನ್ ರ್‍ಹಾತಾ, ಸರ್ವೆಸ್ಪರ್ ಹೊವ್ನ್ ಹೊತ್ತ್ಯಾ ಮಿಯಾಚ್ ಹೆ ಸಾಂಗ್ಲಾ. 25 ಮಿಯಾ ತೆಂಚ್ಯಾ ವಾಂಗ್ಡಾ ಸಮಾಧಾನಾಚೊ ಕರಾರ್ ಕರುನ್ಗೆತಾ, ದೆಸಾತ್ ಬುರ್ಶಿ ಜನಾವರಾ ಅನಿ ಪರ್‍ತುನ್ ನಾ ಕರ್ತಾ, ಮಾಜಿ ಲೊಕಾ ಭಿಂಯ್ಯೆ ನಸ್ತಾನಾ ಡಂಗ್ಳಿತ್ ವಸ್ತಿ ರ್‍ಹಾತ್ಯಾತ್. ಅನಿ ಡಂಗ್ಳಿತ್ ಆರಾಮ್ ನಿಜ್ತಾತ್. 26 ಮಿಯಾ ತೆಂಕಾ ಮಾಜ್ಯಾ ಭೊತ್ಯಾನಿ ಹೊತ್ತ್ಯಾ ಮಡ್ಡಿಯಾಂಚೊ ಜಾಗೊ ಆಶಿರ್ವಾದ್ ಕರುನ್ ಸುಕ್ ದಿತಾ, ಸಮಾ ಎಳಾರ್ ಬರೊ ಪಾವ್ಸ್ ಯೆಯ್ ಸಾರ್ಕೆ ಕರ್ತಾ, ಅನಿ ಆರ್ಶಿವಾದಾಚೊ ಪಾವ್ಸ್ ಹೊತಾ. 27 ಮ್ಹಳ್ಯಾಚಿ ಝಾಡಾ ಹನ್ನಾ ದಿತಾತ್, ಸೆತಾತ್ನಿ ಬರಿ ಪಿಕ್ ಯೆತಾ. ಲೊಕಾ ಸ್ವತ್ಯಾಚ್ಯಾ ದೆಸಾತ್ ಆರಾಮಾನ್ ರ್‍ಹಾತ್ಯಾತ್, ತೆಂಚ್ಯಾ ವರ್‍ತಿ ವಾವಲ್ಲ್ಯಾ ಜುಂವಾಕ್ನಿ ಮಿಯಾ ಮೊಡುನ್ ತೆಂಕಾ ಆಳ್ ಕರುನ್ಗೆಟಲ್ಲ್ಯಾಂಚ್ಯಾ ಹಾತಿತ್ನಾ ಅಧಿಕಾರಾಕ್ನಾ ತೆಂಕಾ ಸೊಡ್ಸುತಾನಾ, ಮಿಯಾಚ್ ಸರ್ವೆಸ್ಪರ್ ಮನುನ್ ತೆಂಕಾ ಖರೆಚ್ ಕಳ್ತಾ. 28 ತೆಂಕಾ ತ್ಯಾ ದಿಸಾಕ್ನಾ ದುಶ್ರಿಲೊಕಾ ಲುಟ್ ಕರಿನಾತ್, ಡಂಗ್ಳಿಚಿ ಜನಾವರಾ ತೆಂಕಾ ಮೊಡಿನಾತ್, ತೆನಿ ಕೊನಾಕ್ಬಿ ಭಿಂಯ್ನಸ್ತಾನಾ ಆರಾಮಾನ್ ವಸ್ತಿ ರ್‍ಹಾತ್ಯಾತ್. 29 ಮಿಯಾ ತೆಂಚ್ಯಾ ಸಾಟ್ನಿ ಬರಿ ಫಳಾಂಚಿ ಝಾಡಾ ವಾಡ್ವುತಾ, ತೆಜ್ಯಾ ದೆಶ್ಯಾಕ್ ಬರ್‍ಗಾಲ್ ಅನಿ ಪರ್‍ತುನ್ ಹಾಳ್ ಕರಿನಾ, ತೆನಿ ದುಶ್ರ್ಯಾ ಲೊಕಾಂಚ್ಯಾ ತಿರಸ್ಕಾರಾಕ್ ಗುರಿ ಪಡಿನಾತ್. 30 ತನ್ನಾ, ತೆನಿ ಅಪ್ನಾಚೊ ದೆವ್ ಸರ್ವೆಸ್ಪರ್ ಮನ್ತಲೊ ಮಿಯಾ ಅಪ್ನಾಚ್ಯಾ ವಾಂಗ್ಡಾ ಹಾಯ್ ಮನುನ್, ಅನಿ ಇಜ್ರಾಯೆಲ್ ಪಿಳ್ಗಿಚೆ ಮಾಜಿ ಲೊಕಾ ಹೊವ್ನ್ ರ್‍ಹಾತ್ಯಾತ್ ಮನುನ್ ಖಾತ್ರಿ ಕರುನ್ಗೆತಾತ್, ಹೆ ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್. 31 ತುಮಿ ಮಾಜಿ ಬಕ್ರಿಯಾ, ಮಾಜಿ ರಾಕ್ವನಿಚಿ ಬಕ್ರಿಯಾ, ಮಾನ್ಸಾಹೊವ್ನ್ ಹೊತ್ತ್ಯಾ ತುಮ್ಕಾ ಮಿಯಾಚ್ ದೆವ್ ಹೊವ್ನ್ ಹಾಯ್ ಮನುನ್ ಸರ್ವೆಸ್ಪರ್ ಸಾಂಗ್ತಾ.