ಹಬಕ್ಕುಕ್ 2

ಹಬಕ್ಕುಕಾಕ್ ಸರ್ವೆಸ್ಪರಾಚೆ ಜವಾಬ್

1 ಮಾಜ್ಯಾ ರಾಕ್ತಲ್ಯಾ ಜಾಗ್ಯಾರ್ ಇಬೆ ರ್‍ಹಾತಾ, ಖಿಲ್ಲ್ಯಾಚ್ಯಾ ವರ್‍ತಿ ವಸ್ತಿ ರ್‍ಹಾತಾ, ಸರ್ವೆಸ್ಪರ್ ಮಾಕಾ ಕಾಯ್ ಸಾಂಗ್ತಾ, ಕಾಯ್ ಜವಾಬ್ ದಿವ್ಚೆ ಮನುನ್ ರಾಕುನ್ಗೆತ್ ರ್‍ಹಾತಾ. 2 ತನ್ನಾ ಸರ್ವೆಸ್ಪರಾನ್ ಮಾಕಾ ದಿಲ್ಲೊ ಜವಾಬ್ ಹ್ಯೊ; ತುಕಾ ದಿಸಲ್ಲಿ ದರ್ಶನಾ ಲಿವ್; ವಾಚುಕ್ ಸಸಾರ್ ಹೊಯ್ ಸಾರ್ಕೆ ಫಳಿಚ್ಯಾ ವರ್‍ತಿ ಲಿವ್. 3 ತೆ ಸಮಾ ಎಳಾರ್ ತಿ ದರ್ಶನಾ ಘಡ್ತಾತ್, ತೆಚೆ ಆಕ್ರಿಚೆ ಪರಿನಾಮ್ ಲಗ್ಗುನಾಚ್ ಗೊತ್ತ್ ಹೊತಾ, ತಡೊ ಹೊಲ್ಯಾರ್ಬಿ ರಾಕುನ್ ರಾ; ಪಸ್ವಿನಾ, ತೆ ಖರೆಚ್ ಹೊತಾ, ತಡೊ ಹೊಯ್ನಾ. 4 ಅಬಕ್, ವಿರೊಧಿ ಬಡಾಯ್ ಕರುಕ್ ಲಾಗ್ಲಾ, ತೆಚಿ ಆಶ್ಯಾ ಸಮಾ ನ್ಹಯ್, ಖರೆ ಬರೊ ಮಾನುಸ್ ಅಪ್ನಾಚ್ಯಾ ನಿತಿಚ್ಯಾ ವೈನಾ ಝಿತ್ತೊ ರ್‍ಹಾತಾ.

ಬುರ್ಸ್ಯಾಕ್ನಿ ಹೊತಲೊ ತರಾಸ್

5 "ಸಾವ್ಕಾರ್ಕಿಪಾನ್ ತೆಕಾ ಘಾತ್ ಕರ್ತಾ, ತೊ ನಿಶ್ಯಾ ಚಡಲ್ಲೊ ಸಾರ್ಕೊ ಹೊವ್ನ್ ಎಕ್ಡೆ ಇಬೆ ರ್‍ಹಾಯ್ನಾ, ಕಶ್ಯಾಕ್ ಮಟ್ಲ್ಯಾರ್, ತೆನಿ ಅಪ್ನಾಚಿ ಆಶ್ಯಾ ಪಾತಾಳಾಚ್ಯಾ ಗತಿನ್ ಲೈ ಕರುನ್ಗೆಟ್ಲಾ, ತೆನಿ ದೆಸಾಕ್ನಿ ಅಪ್ನಾಚ್ಯಾ ಸಾಟ್ನಿ ಗೊಳಾ ಕರುನ್ಗೆತಾ, ಅನಿ ಸಗ್ಳ್ಯಾ ಲೊಕಾಕ್ನಿ ಬಂಧಿ ಕರ್ತಾ." 6 ತೆಜ್ಯಾ ಪಾಶಾಕ್ ಗಾವ್ನ್ ಪಡಲ್ಲೆ ಸಗ್ಳೆ ತೆಕಾ ಹೆಡ್ಸಡುನ್ ಗಿತಾ ಗಾವ್ತಾತ್, ದುಶ್ರ್ಯಾಂಚಿ ವಸ್ತಾ ಕಾಡುನ್ಗೆವ್ನ್ ಸಾವ್ಕಾರ್ ಹೊಲ್ಲ್ಯಾಚಿ ಗತ್ ಕಾಯ್ ಸಾಂಗು, ತೊ ಅನಿ ಕವ್ಡೊ ಎಳ್ ಅಸೊ ಕರ್ತಿಲ್?

7 ತುಜಿ ರಿನ್ ಕಾರಾ ತುಜ್ಯಾ ಇದ್ರಾಕ್ ಇಬೆ ರ್‍ಹಾತಾತ್, ತಿಯಾ ಬಾಕಿ ದಿತಲಿ ಹೊತ್ತಿ ಲೊಕಾ ತುಕಾ ಪರ್‍ತುನ್ ಪಡಿನಾತ್ ಕಾಯ್? ತನ್ನಾ ತೆನಿ ತುಕಾ ಚೊರುನ್ ಲುಟ್ತಾತ್. 8 ಕಶ್ಯಾಕ್ ಮಟ್ಲ್ಯಾರ್ ತಿಯಾ ಲೈ ಲೊಕಾಕ್ನಿ ಲುಟ್ಲೆ, ತೆಂಚೆ ರಗಾತ್ ವೊತ್ಲೆ, ಗಾವಾ, ಶಾರಾ, ಅನಿ ತ್ಯಾತುರ್ಲ್ಯಾ ದೆಸಾಕ್ನಿ ತರಾಸ್ ದಿಲೆಯ್.

9 ತ್ಯಾ ತರಾಸಾತ್ನಾ ಚುಕ್ವುನ್ ಘೆವ್ಕ್ ಸಾಟ್ನಿ ತುಜೆ ಘರ್ ಲೈ ಉಪ್ಪರ್ಲ್ಯಾ ಜಾಗ್ಯಾ ವರ್‍ತಿ ಬಾಂದುನ್ಗೆಟ್ಲೆ, ತುಜ್ಯಾ ಕುಟ್ಮಾಸಾಟ್ನಿ ದುಶ್ರ್ಯಾಂಚಿ ಆಸ್ತಿ ಚೊರಲ್ಲ್ಯಾ, ತುಜಿ ಗತ್ ಕಾಯ್ ಸಾಂಗು! 10 ತುಜ್ಯಾ ಯೆವ್ಜನಿಯಾಂಚ್ಯಾ ವಯ್ನಾ ತುಜ್ಯಾ ಘರಾನಾಕ್ ಅವ್ಮಾನ್ ಹಾನುನ್ಗೆಟ್ಲೆಯ್, ಲೈ ಗಾಂವಾಕ್ನಿ ನಾಶ್ ಕರುನ್, ತುಜ್ಯಾ ಪಿಳ್ಗಿಕ್ ನಾಶ್ ಹಾನುನ್ಗೆಟ್ಲೆಯ್. 11 ಭಿತ್ತಿತ್ನಾ ಗುಂಡೆ ತುಜ್ಯಾ ವರ್‍ತಿ ಚುಕ್ ವಾವುನ್ ಬೊಬ್ ಮಾರ್‍ತಾತ್, ನಾಕ್ಡಾಚಿ ವಸ್ತಾ ಪರ್‍ತುನ್ ಧನ್ ಕರ್‍ತಾತ್.

12 ಮಾನ್ಸಾಚೊ ಜಿವ್ ಕಾಡುನ್ ಶಾರಾ ಭಾಂದುನ್ ಘೆಟಲ್ಲ್ಯಾ, ಅನ್ಯಾಯಾಚ್ಯಾ ಪಾಯಾವರ್‍ತಿ ಶಾರ್ ಭಾಂದ್ತಲ್ಯಾಚಿ ಗತ್ ಕಾಯ್ ಸಾಂಗು! 13 ಲೊಕಾಂಚೆ ಘೊಳಾಪ್ ಆಗಿಚೊ ವಾಟೊ, ಅನಿ ಮಾನ್ಸಾಂಚೆ ತರಾಸ್ ವ್ಯರ್ಥ್, ಹೆ ಸಗ್ಳೆ ಮಹೊನ್ನತ್ ಸರ್ವೆಸ್ಪರಾಚಿ ಇಚ್ಚಾ ನ್ಹಯ್ ಕಾಯ್? 14 ಸಮುಂದರ್ ಪಾನಿಯಾನ್ ಭರುನ್ ಹೊತ್ತ್ಯಾ ಸಾರ್ಕೆ, ಜಿಮಿನ್ ಸರ್ವೆಸ್ಪರಾಚ್ಯಾ ಮಹಿಮಾಚ್ಯಾ ಜ್ಞಾನಾನ್ ಭರುನ್ ರ್‍ಹಾತಾ.

15 ತುಜೊ ರಾಗ್ ವಾಯ್ನಾರ್ ಘಾಲುನ್, ತುಜ್ಯಾ ಸೆಜಾರಾಕ್ ನಿಶೆಡಿ ಕರುನ್, ತೆಂಚೆ ನಾಗ್ಡೆಪಾನ್ ಬಗುಚೆ ಮನುನ್ ಹೊತ್ತ್ಯಾ ತುಜಿ ಗತ್ ಕಾಯ್ ಸಾಂಗು! 16 ತಿಯಾ ಮರ್ಯಾದಿಚೊ ನ್ಹಯ್, ಅವ್ಮಾನಾನ್ ಭರುನ್ ಹಾಸ್, ತಿಯಾ ಫಿವ್ ಫಿವ್ನ್ ನಾಗ್ಡೊ ಹೊ, ಮಹೊನ್ನತ್ ಸರ್ವೆಸ್ಪರಾಚ್ಯಾ ಉಜ್ವೊ ಹಾತಿತ್ಲೊ ರಾಗಾಚೊ ಬಿಂದ್ಗೊ ತುಜ್ಯಾ ವಾಟ್ಯಾಕ್ ಹಾಯ್, ಅವ್ಮಾನುಚ್ ತುಜ್ಯಾ ಮರ್ಯಾದಿಕ್ ಧಾಪುನ್ ರ್‍ಹಾತಾ. 17 ತಿಯಾ ಮಾನ್ಸಾಂಚೆ ರಗಾತ್ ಪಾಡ್ವುಲೆ, ದೆಶ್, ಶಾರ್, ಅನಿ ತ್ಯಾತುರ್ ವಸ್ತಿ ರ್‍ಹಾತಲ್ಯಾ ಸಗ್ಳ್ಯಾಕ್ನಿ ತರಾಸ್ ದಿಲೆಯ್, ಲೆಬೊನಾಚ್ಯಾ ಡಂಗ್ಳಿಯಾಕ್ನಿ ತೊಡ್ಲೆಯ್, ಅತ್ತಾ ತುಕಾಚ್ ತೊಡುನ್ ಹೊತಾ, ತೆಜ್ಯಾ ಕ್ರುರ್ ಜನಾವರಾಕ್ನಿ ನಾಶ್ ಕರ್‍ಲೆಯ್ ಆತ್ತಾ ತಿ ತುಕಾಚ್ ಭಯಾನಕ್ ಹೊವ್ನ್ ಹಾತ್.

18 ಕೊರದಲ್ಲ್ಯಾ ಮುರ್ತಿಯಾನಿ ಕಾಯ್ ಫಾಯ್ದೊ? ತೆ ಮಾನ್ಸಾಚೆ ಕಾಮ್, ಝುಟೆ ಭವಿಶ್ಯ್ ಸಾಂಗುಕ್ ಸಾಟ್ನಿ ಥವ್ನ್ ಘೆಟಲ್ಲಿ ಮುರ್ತಿಯಾ, ತೆ ರಚಲ್ಲ್ಯಾ ಮಾನ್ಸಾಕ್ ತೆ ಕಾಯ್ ಬರೆಪಾನ್ ಹಾನ್ತಾ? ತಿ ಬೊಲಿ ನಸಲ್ಲಿ ಮುಕ್ಕಿ ಗೊಂಬಿಚ್. 19 ಝಾಡಾಂಚ್ಯಾ ತುಕ್ಡ್ಯಾಕ್ನಿ ಧ್ಯಾನ್ ದಿ, ಜಿವ್ ನಸಲ್ಲ್ಯಾ ಗುಂಡ್ಯಾಕ್ ಉಟ್, ಮನುನ್ ಹುಕುಮ್ ದಿನಾರೊ ಖರೆಚ್ಬಿ ಅಕ್ಕಲ್ ಗೆಡಿ, ಗೊಂಬಿಯಾ ಶಿಕಾಪ್ ಕರ್‍ತಾತ್ ಕಾಯ್? ಸೊನೆ ಚಾಂದಿ ತೆಕಾ ನೆಸ್ವುತಲೆ ಖರೆ ಹಾಯ್, ಖರೆ ತೆಕಾ ಉಸಿಲುಚ್ ನಾ.

20 ಖರೆ, ಸರ್ವೆಸ್ಪರ್ ಅಪ್ನಾಚ್ಯಾ ಪರಿಶುದ್ದ್ ಗುಡಿತ್ ಹಾಯ್; ಜಿಮಿನ್ ಸಗ್ಳಿ ತೆಚ್ಯಾ ಇದ್ರಾಕ್ ಗಪ್ ರ್‍ಹಾಂವ್ದಿತ್.