ಜುವಾ 21

ಜೆಜು ಸಾತ್ ಜಾನಾ ಶಿಸಾಕ್ನಿ ದಿಸ್ತಾ

1 ಹೆಚ್ಯಾ ಮಾನಾ ಜೆಜು ತಿಬೆರಿಯಸ್ ಮನ್ತಲ್ಯಾ ಸಮುಂದರಾತ್ ಅನಿ ಎಗ್ದಾ ಶಿಸಾಕ್ನಿ ದಿಸ್ತಾ ತೆ ಅಶೆ ಹೊಲ್ಲೆ. 2 ಸಿಮಾವ್ ಪೆದ್ರು, ಥೊಮಸ್, ಗಾಲಿಲಿಯಾತ್ಲ್ಯಾ ಕಾನಾ ಶಾರಾತ್ಲೊ ನಾಥಾನಾಯೆಲ್ ಜೆಬೆದೆವಾಚಿ ಲೆಕಾ, ಅನಿ ದೊಗೆಲೊಕಾ ಜೆಜುಚಿ ಶಿಸಾ ಎಕಾಕ್ಡೆ ಜಮಾ ಹೊಲೆ. 3 ಸಿಮಾವ್ ಪೆದ್ರುನ್ ಹುರಲ್ಲ್ಯಾಕ್ನಿ"ಮಿಯಾ ಮಾಸೊಳ್ಯಾ ಧರುಕ್ ಜಾವ್ಕ್ ಲಾಗ್ಲಾ" ಮಟ್ಲ್ಯಾನ್.

ತನ್ನಾ ತೆನಿ "ಅಮಿಬಿ ತುಜ್ಯಾ ವಾಂಗ್ಡಾ ಯೆತಾಂವ್" ಮಟ್ಲ್ಯಾನಿ.

ತಸೆಮನುನ್ ತೆನಿ ಢೊನ್ ಘೆವ್ನ್ ಗೆಲ್ಯಾನಿ, ಖರೆ ಸಗ್ಳಿ ರಾತ್ಬರ್ ತೆಂಕಾ ಎಕ್ ಸೈತ್ ಮಾಸೊಳಿ ಗಾವುಕ್ನಾ. 4 ದಿಸ್ ಉಜ್ವಾಡ್ತಾನಾ ಜೆಜು ದಂಡೆಕ್ ಇಬೆ ಹೊತ್ತೊ, ಖರೆ ಶಿಸಾಕ್ನಿ ತೊ ಜೆಜುಚ್ ಮನುನ್ ಕಳುಕ್ ನಾ.

5 ತನ್ನಾ ಜೆಜುನ್ ತೆಂಕಾ, "ದೊಸ್ತಾನೊ, ತುಮ್ಕಾ ಕಾಯ್ಬಿ ಗಾವುಕ್ನಾ ಕಾಯ್?" ಮನುನ್ ಇಚಾರ್‍ಲ್ಯಾನ್.

ತನ್ನಾ ತೆನಿ "ನಾ, ಕಾಯ್ಬಿ ಮಾಸೊಳ್ಯಾ ಗಾವುಕ್ನಾ" ಮನುನ್ ಜಬಾಬ್ ದಿಲ್ಯಾನಿ.

6 ತೆನಿ ತೆಂಕಾ, "ತುಮಿ ತುಮ್ಚಿ ಜಾಳಿ ಢೊನಿಚ್ಯಾ ಉಜ್ವ್ಯಾ ಬಾಜುಕ್ ಟಾಕಾ, ತನ್ನಾ ತುಮ್ಕಾ ಕಾಯ್ಬಿ ಗಾವ್ತಾ," ಮಟ್ಲ್ಯಾನ್ ತನ್ನಾ ತೆನಿ ಜಾಳೆ ಟಾಕ್ಲ್ಯಾನಿ ತನ್ನಾ ತೆಂಚ್ಯಾನ್ ಜಾಳೆ ವೊಡುಕ್ ಹೊಯ್ನಾ ಹೊಲೆ, ತವ್ಡ್ಯಾ ಮಾಸೊಳ್ಯಾ ತ್ಯಾತುರ್ ಪಡಲ್ಲ್ಯಾ.

7 ಜೆಜುಚ್ಯಾ ತ್ಯಾ ಪ್ರೆಮಾಚ್ಯಾ ಶಿಸಾನ್ ಸಿಮಾವ್ ಪೆದ್ರುಕ್ "ಧನಿ ತೊ!" ಮಟ್ಲ್ಯಾನ್, ತೊ ಧನಿ ಮನುನ್ ಆಯ್ಕಲ್ಲ್ಯಾ ತನ್ನಾ ಪೆದ್ರುನ್ ಅಪ್ನಾಚೆ ಕಪ್ಡೆ ನೆಸುನ್ ಘೆಟ್ಲ್ಯಾನ್, ಅನಿ ಪಾನಿಯಾತ್ ಹುಡಿ ಮಾರ್‍ಲ್ಯಾನ್. 8 ಹುರಲ್ಲಿ ಶಿಸಾ ಮಾಸೊಳ್ಯಾನಿ ಭರಲ್ಲೆ ಜಾಳೆ ವೊಡುಂಗೆತ್ ದಂಡೆಕ್ ಯೆಲಿ, ತೆನಿ ದಂಡೆಕ್ನಾ ಧುರ್ ನತ್ತೆ ಸುಮಾರ್ ತಿನ್ಸೆ ಪುಟ್ ಭುತ್ತುರ್ ಹೊತ್ತೆ. 9 ತೆನಿ ದಂಡೆಕ್ ಯೆವ್ನ್ ಪಾವಲ್ಲ್ಯಾ ತನ್ನಾ ಎಕ್ ಧುಮಿ ಪೆಟಲ್ಲಿ ಹೊತ್ತಿ ಅನಿ ತೆಚೆವರ್ತಿ ಮಾಸೊಳಿ, ಅನಿ ಉಲ್ಲಿ ಭಾಕ್ರಿ ಹೊತ್ತಿ ತೆನಿ ಬಗಟ್ಲ್ಯಾನಿ. 10 ತನ್ನಾ ಜೆಜುನ್ ತೆಂಕಾ, "ತುಮಿ ಧರಲ್ಲ್ಯಾತ್ಲ್ಯಾ ಉಲ್ಲ್ಯಾ ಮಾಸೊಳ್ಯಾ ಘೆವ್ನ್ ಯೆವಾ" ಮಟ್ಲ್ಯಾನ್.

11 ತನ್ನಾ ಸಿಮಾವ್ ಪೆದ್ರು ಡೊನಿಕ್ಡೆ ಗೆಲೊ, ಅನಿ ಮೊಟ್ಯಾ ಮೊಟ್ಯಾ ಮಾಸೊಳ್ಯಾ ಪಡಲ್ಲೆ ಜಾಳೆ ದಂಡೆಕ್ ವೊಡುನ್ ಘೆಟ್ಲ್ಯಾನ್, ಎಕ್ಸೆ ಪನ್ನಾಸಾರ್ ತಿನ್ ಮಾಸೊಳ್ಯಾ ಹೊತ್ತ್ಯಾ ತ್ಯಾ ತವ್ಡ್ಯಾ ಲೈ ಮಾಸೊಳ್ಯಾ ರ್‍ಹಾಲ್ಯಾರ್‍ಬಿ ಜಾಳೆ ಪಿಂಜುಕ್ ನತ್ತೆ. 12 ಜೆಜುನ್ ತೆಂಕಾ,"ಯೆವಾ ಅನಿ ಖಾವಾ" ಮಟ್ಲ್ಯಾನ್, ತೆಕಾ "ತಿಯಾ ಕೊನ್?" ಮನುನ್ ಇಚಾರುಕ್ ಶಿಸಾನಿತ್ಲ್ಯಾ ಕೊನಾಕ್ಬಿ ಧೈರೊ ಹೊವ್ಕ್ ನಾ, ಕಶ್ಯಾಕ್ ಮಟ್ಲ್ಯಾರ್ ತೊ ಧನಿಚ್ ಮನುನ್ ತೆಂಕಾ ಕಳಲ್ಲೆ. 13 ಅಶೆ ಜೆಜು ಯೆಲೊ, ಅನಿ ಭಾಕ್ರಿ ಘೆಟ್ಲ್ಯಾನ್ ಅನಿ ತೆಂಕಾ ದಿಲ್ಯಾನ್ ಮಾಸೊಳಿಬಿ ತಸೆಚ್ ಕರುನ್ ದಿಲ್ಯಾನ್.

14 ಅಸೆ, ಜೆಜು ಝಿತ್ತೊ ಹೊವ್ನ್ ಉಟಲ್ಲ್ಯಾಕ್ನಾ ತಿನ್ವೆಪಟಿ ಶಿಸಾಕ್ನಿ ದಿಸ್ಲೊ.

ಜೆಜು ಅನಿ ಪೆದ್ರು

15 ತೆಂಚೆ ಖಾವ್ನ್ ಹೊಲ್ಲ್ಯಾ ತನ್ನಾ ಜೆಜುನ್ ಸಿಮಾವ್ ಪೆದ್ರುಕ್, "ಸಿಮಾವ್ ಜುವಾಂವಾಚ್ಯಾ ಲೆಕಾ ತಿಯಾ ಸಗ್ಳ್ಯಾಚ್ಯಾನ್ಕಿ ಜಾಸ್ತಿ ಮಾಜೊ ಪ್ರೆಮ್ ಕರ್‍ತೆ ಕಾಯ್?" ಮಟ್ಲ್ಯಾನ್.

ತನ್ನಾ ಪೆದ್ರುನ್ "ಹೊಯ್ ಧನಿಯಾ, ಮಿಯಾ ತುಜೊ ಪ್ರೆಮ್ ಕರ್‍ತಾ ಮನುನ್ ತುಕಾಚ್ ಗೊತ್ತ್ ಹಾಯ್‍" ಮನುನ್ ಜಬಾಬ್ ದಿಲ್ಯಾನ್.

ಜೆಜುನ್ ತೆಕಾ, "ಮಾಜ್ಯಾ ಬೊಕ್ಡಾಕ್ನಿ ಚಾರ್‍ವು" ಮಟ್ಲ್ಯಾನ್. 16 ಅನಿ ಎಕ್ ಉಲ್ಲೊ ಎಳ್ ಹೊಲ್ಲ್ಯಾ ತನ್ನಾ, ಜೆಜುನ್ ಪೆದ್ರುಕ್, "ಸಿಮಾವ್ ಜುವಾಂವಾಚ್ಯಾ ಲೆಕಾ ತಿಯಾ ಮಾಜೊ ಪ್ರೆಮ್ ಕರ್‍ತೆ ಕಾಯ್?" ಮಟ್ಲ್ಯಾನ್.

ತನ್ನಾ ತೆನಿ, "ಹೊಯ್, ಮಿಯಾ ತುಜೊ ಪ್ರೆಮ್ ಕರ್‍ತಾ ಮನುನ್ ತುಕಾ ಗೊತ್ತ್ ಹಾಯ್" ಮನುನ್ ಜಬಾಬ್ ದಿಲ್ಯಾನ್.

ಜೆಜುನ್ ತೆಕಾ, "ಮಾಜ್ಯಾ ಬಕ್ರ್ಯಾಕ್ನಿ ಬಗುನ್ ಘೆ" ಮಟ್ಲ್ಯಾನ್.

17 ತಿನ್ವೆಪಟಿ ಜೆಜುನ್, "ಸಿಮಾವ್ ಜುವಾಂವಾಚ್ಯಾ ಲೆಕಾ, ತಿಯಾ ಮಾಜೊ ಪ್ರೆಮ್ ಕರ್‍ತೆ ಕಾಯ್?" ಮಟ್ಲ್ಯಾನ್.

ಜೆಜುನ್ ತಿನ್ವೆಪಟಿ "ತಿಯಾ ಮಾಜೊ ಪ್ರೆಮ್ ಕರ್‍ತೆ ಕಾಯ್?" ಮನುನ್ ಇಚಾರ್‍ತಾನಾ ಪೆದ್ರುಕ್ ಜೆಜಾರ್ ದಿಸ್ಲೊ, ಅನಿ ತೆನಿ "ಧನಿಯಾ ತುಕಾ ಸಗ್ಳೆ ಗೊತ್ತ್ ಹಾಯ್, ಮಿಯಾ ತುಜೊ ಪ್ರೆಮ್ ಕರ್‍ತಾ ಮನುನ್ ತುಕಾ ಗೊತ್ತ್ ಹಾಯ್!" ಮನುನ್ ಮಟ್ಲ್ಯಾನ್ ಜೆಜುನ್ ತೆಕಾ,"ಮಾಜ್ಯಾ ಬಕ್ರ್ಯಾಕ್ನಿ ಚಾರ್‍ವು, 18 ಮಿಯಾ ತುಕಾ ಖರೆ ಹೊತ್ತೆ ಸಾಂಗುಕ್ ಲಾಗ್ಲಾ, ತಿಯಾ ದಾಂಡ್ಗೊ ಹೊತ್ತ್ಯಾ ತನ್ನಾ ತಯಾರ್ ಹೊಯ್ಸ್, ಅನಿ ತುಕಾ ಖೈ ಜಾತಲೆ ಹಾಯ್ ಥೈ ಜಾಯ್ಸ್, ಖರೆ ತಿಯಾ ಮ್ಹಾತಾರೊ ಹೊಲ್ಲ್ಯಾ ತನ್ನಾ ತಿಯಾ ತುಜಿ ಹಾತಾ ವೈರ್ ಕರ್‍ತೆ, ಅನಿ ಕೊನ್ಬಿ ದುಸ್ರೆಚ್ ತುಕಾ ಕಪ್ಡೆ ನೆಸ್ವುತಾತ್ ಅನಿ ತುಕಾ ಮನ್‍ ನಸಲ್ಲ್ಯಾಕ್ಡೆ ಘೆವ್ನ್ ಜಾತಾತ್" ಮನುನ್ ಸಾಂಗಟ್ಲ್ಯಾನ್. 19 ಹೆ ಸಾಂಗುನ್ ಜೆಜುನ್ ಪೆದ್ರು ದೆವಾಚ್ಯಾ ನಾವಾಕ್ ಮಹಿಮಾ ಹಾನುಕ್ ಮನುನ್ ಕಸ್ಲೆ ಮರಾನ್ ಮರ್‍ತಲೊ ಹಾಯ್ ಮನುನ್ ದಾಕ್ವುನ್ ದಿಲ್ಯಾನ್. ಮಾನಾ ಜೆಜುನ್ ತೆಕಾ,"ಮಾಜ್ಯಾ ಫಾಟ್ನಾ ಯೆ!" ಮಟ್ಲ್ಯಾನ್.

ಜೆಜು ಅನಿ ತೊ ಅನಿ ಎಕ್ಲೊ ಶಿಸ್

20 ಪೆದ್ರು ಫಾಟಿ ಪರತಲ್ಲ್ಯಾ ತನ್ನಾ ತೆಕಾ ತೊ ಜೆಜುಚೊ ಪ್ರೆಮಾಚೊ ಅನಿ ಎಕ್ಲೊ ಶಿಸ್, ಜೆವ್ನಾಚ್ಯಾ ಎಳಾರ್ ಜೆಜುಚ್ಯಾ ಬಾಜುಕ್ ಬಸಲ್ಲೊ, ಅನಿ ಜೆಜುಚ್ಯಾ ಜಗ್ಗೊಳ್ ವ್ಹಾಕುನ್ "ಧನಿಯಾ ತುಕಾ ಘಾತ್ ಕರ್‍ತಲೊ ಕೊನ್ ತೊ?" ಮನುನ್ ಇಚಾರಲ್ಲೊ ಶಿಸ್ ದಿಸ್ಲೊ. 21 ಪೆದ್ರುನ್ ತೆಕಾ ಬಗಟಲ್ಲ್ಯಾ ತನ್ನಾ ಜೆಜುಕ್ "ಧನಿಯಾ ಹ್ಯಾ ಮಾನ್ಸಾಚ್ಯಾ ಬದಲ್ ತಿಯಾ ಕಾಯ್ ಮನ್ತೆ?" ಮನುನ್ ಇಚಾರ್‍ಲ್ಯಾನ್.

22 ಜೆಜುನ್ ತೆಕಾ, "ಮಿಯಾ ಯೆಯ್ ಪತರ್ ತೊ ಝಿತ್ತೊ ರ್‍ಹಾವ್ಕ್ ಪಾಜೆ, ಮನುನ್ ರ್‍ಹಾಲ್ಯಾರ್, ತೆ ಸಗ್ಳೆ ತುಕಾ ಕಾಯ್? ಮಾಜ್ಯಾ ಫಾಟ್ನಾ ಯೆ!" ಮನುನ್ ಜಬಾಬ್ ದಿಲ್ಯಾನ್.

23 "ಅಶೆ ಹೊವ್ನ್ ಜೆಜುಚ್ಯಾ ವಾಂಗ್ಡಾ ಹೊತ್ತ್ಯಾಂಚ್ಯಾ ಮದ್ದಿ ಹ್ಯೊ ಶಿಸ್ ಮರುಚೆ ನೈಯ್‍ ಮನ್ತಲಿ ಖಬರ್ ಉಟ್ಲಿ". ಖರೆ ತೊ ಮರ್‍ತಲೆ ನಕ್ಕೊ ಮನುನ್ ಜೆಜುನ್ ಸಾಂಗುಕ್‍ನಾ. ತೆನಿ, "ಮಿಯಾ ಯೆಯ್ ಪತರ್ ಜರ್ ತರ್ ತೊ ಝಿತ್ತೊ ರ್‍ಹಾವ್ಕ್ ಪಾಜೆ ಮನುನ್ ಮಾಕಾ ಪಾಜೆ ಹೊಲ್ಯಾರ್, ತುಕಾ ಕಶ್ಯಾಕ್ ಪಾಜೆ ತೆ?" ಮಟ್ಲ್ಯಾನ್.

24 ತೊಚ್ ತೊ ಶಿಸ್ ಹಿ ಸಗ್ಳಿ ವಿಶಯಾ ಸಾಂಗಟಲ್ಲೊ, ಅನಿ ಸಗ್ಳೆ ಲಿವ್ನ್ ಥವಲ್ಲೊ: ಅನಿ ತೆನಿ ಸಾಂಗಟಲ್ಲಿ ಸಾಕ್ಷಿ ಖರಿ ಮನುನ್ ಅಮ್ಕಾ ಗೊತ್ತ್ ಹಾಯ್.

ಸರ್ನಿ

25 ಜೆಜುನ್ ಕರಲ್ಲಿ ಕಾಮಾ, ಅನಿ ಲೈ ಹಾತ್ ತಿ ಸಗ್ಳಿ ಎಕಾಚ್ಯಾ ಮಾನಾ ಎಕ್ ಲಿವ್ಲ್ಯಾರ್, ತಿ ಲಿವ್‍ಸಾಟಿ ಪಾಜೆ ಹೊಲ್ಲಿ ಪುಸ್ತಕಾ ಹ್ಯಾ ಜಗಾಕುಚ್ ಅಟ್ಪಿನಸಿ ಹೊತ್ತಿ ಕಾಯ್ಕಿ ಮನುನ್ ಮಾಕಾ ದಿಸ್ತಾ .