Lucas 13

ತುಮ್ಚೆ ಪಾಪಾಚೆ ಜಿವನ್ ಬದ್ಲಾ ನಾಹೊಲ್ಯಾರ್ ಮರಾ.

1 ಎಗ್ದಾ ಉಲ್ಲ್ಯಾ ಲೊಕಾನಿ, ಜೆಜುಕ್ಡೆ ಪಿಲಾತಾನ್ ಗಾಲಿಲಿಯಾಚ್ಯಾ ಉಲ್ಲ್ಯಾ ಲೊಕಾಕ್ನಿ ದೆವಾಕ್ ಬಲಿ ಭೆಟ್ವುತಾನಾ ಜಿವಾನಿ ಮಾರಲ್ಲ್ಯಾ ವಿಶಯಾತ್ ಸಾಂಗಟ್ಲ್ಯಾನಿ. 2 ಜೆಜುನ್ ತೆಂಕಾ "ತಿ ಗಾಲಿಲಿಯಾಚಿ ಜಿವಾನಿ ಮಾರಲ್ಲಿ ಲೊಕಾ, ಹುರಲ್ಲ್ಯಾ ಸಗ್ಳ್ಯಾಂಚ್ಯಾನ್ಕಿ ಲೈ ಪಾಪಿ ಲೊಕಾ ಮನುನ್ ತುಮಿ ಯೌಜುಲ್ಯಾಸಿ ಕಾಯ್? 3 'ನಾ. ಮಿಯಾ ತುಮ್ಕಾ ಸಾಂಗ್ತಾ, ತುಮಿ ತುಮ್ಚ್ಯಾ ಪಾಪಾನಿತ್ನಾ ಫಾಟಿ ಪರ್‍ತಿ ನಸ್ಲ್ಯಾರ್, ತುಮಿಬಿ ತಸೆಚ್ ಮರ್‍ತ್ಯಾಶಿ. 4 ಎಕ್ ಲಾಂಬ್, ಉಪ್ಪರ್ಲೆ ಭಾಂದಾಪ್ ಕೊಸ್ಳುನ್ ಪಡುನ್ ಸಿಲೊಆಮಾತ್ ಮರಲ್ಲ್ಯಾ ಅಟ್ರಾ ಲೊಕಾಂಚ್ಯಾ ವಿಶಯಾತ್ ತುಮಿ ಕಾಯ್ ಮನ್ತ್ಯಾಶಿ? ಜೆರುಜಲೆಮಾತ್ಲ್ಯಾ ಹುರಲ್ಲ್ಯಾ ಲೊಕಾಂಚ್ಯಾನ್ಕಿ, ತೆನಿ ಲೈ ಪಾಪಿ ಲೊಕಾ ಮನುನ್ ಯೆವಜ್ಲ್ಯಾಶಿ ಕಾಯ್? 5 'ನಾ, ಮಿಯಾ ತುಮ್ಕಾ ಸಾಂಗ್ತಾ, ತುಮಿ ತುಮ್ಚೆ ಪಾಪಾಚೆ ಜಿವನ್ ಬದ್ಲಿನಸ್ಲ್ಯಾರ್, ತುಮಿಬಿ ತಸೆಚ್ ಮರ್‍ತ್ಯಾಶಿ", ಮಟ್ಲ್ಯಾನ್.

ಫಳಾ ದಿ ನಸಲ್ಲ್ಯಾ ಅಂಜುರಾಚ್ಯಾ ಝಾಡಾಚಿ ಕಾನಿ

6 ತನ್ನಾ ಜೆಜುನ್ ತೆಂಕಾ, ಹಿ ಕಾನಿ ಸಾಂಗಟ್ಲ್ಯಾನ್. "ಎಕ್ ಮಾನ್ಸಾಚ್ಯಾ ದ್ರಾಕ್ಷಿಚ್ಯಾ ಮಳ್ಯಾತ್ ಎಕ್ ಅಂಜುರಾಚೆ ಝಾಡ್ ಹೊತ್ತೆ. ತೊ ತ್ಯಾ ಝಾಡಾಕ್ ಅಂಜುರಾಚಿ ಫಳಾ ಹುಡ್ಕುಕ್ ಗೆಲೊ, ತನ್ನಾ ತೆಂಕಾ ಎಕ್‍ಬಿ ಫಳ್ ಗಾವುಕ್ನಾ". 7 ತಸೆ ಮನುನ್ ತೆನಿ ಅಪ್ನಾಚ್ಯಾ ಮಳ್ಯಾತ್ ಕಾಮ್ ಕರ್‍ತಲ್ಯಾಕ್ "ಬಗ್, ತಿನ್ ವರ್ಸಾಕ್ನಾ ಮಿಯಾ ಹ್ಯಾ ಝಾಡಾಚಿ ಫಳಾ ಹುಡ್ಕುಕ್ ಯೆವ್ಲಾ, ಖರೆ ಮಾಕಾ ಎಕ್ ಸೈತ್ ಅಂಜುರಾಚೆ ಫಳ್ ಗಾವಿನಾ ಹೊಲಾ. ಜಿಮ್ನಿಕ್ ವಜ್ಜೆ ಹೊವ್ನ್ ಕಶ್ಯಾಕ್ ರ್‍ಹಾತಲೆ ತೆ,ತೊಡುನ್ ಟಾಕ್!" ಮಟ್ಲ್ಯಾನ್. 8 ಖರೆ, ತ್ಯಾ ಕಾಮ್ ಕರ್‍ತಲ್ಯಾನ್, "ಸಾವ್ಕಾರ್, ತೊಡ್ತಲೆ ನಕ್ಕೊ ರಾಂವ್ದಿತ್; ಮಿಯಾ ತೆಚ್ಯಾ ಮುಳಾತ್ ಕೊಚುನ್, ತೆಕಾ ಗೊಬರ್ ಘಾಲ್ತಾ, 9 ಅನಿ ಫಿಡ್ಲ್ಯಾ ವರ್ಸಾಕ್ ತೆ ಬರಿ ಫಳಾ ದಿತಾ ಕಾಯ್ ಬಗುವಾ; ಅನಿಬಿ ತೆನಿ ಫಳಾ ದಿನಸ್ಲ್ಯಾರ್, ತೊಡುವಾ ಮನಿ" ಮಟ್ಲ್ಯಾನ್.

ಜೆಜು ಸಬ್ಬಾತಾಚ್ಯಾ ದಿಸಿ ಎಕ್ ಬಾಯ್ಕೊಮನ್ಸಿಕ್ ಗುನ್ ಕರ್‍ತಾ.

10 ಎಕ್ ಸಬ್ಬತಾಚ್ಯಾ ದಿಸಿ ಜೆಜು ಸಿನಾಗೊಗಾತ್ ಶಿಕ್ವುಲಾಗಲ್ಲೊ. 11 ಎಕ್ ಗಿರೊಲಾಗಲ್ಲಿ ಬಾಯ್ಕೊಮನುಸ್ ಹೊತ್ತಿ, ತೆನಿ ತಿಕಾ ಅಟ್ರಾ ವರ್ಸಾ ಅರಾಮನತ್ತ್ಯಾ ಸಾರ್ಕೆ ಕರಲ್ಲ್ಯಾನ್, ತಿ ಬಾಗುನ್ ಗೆಲ್ಲಿ, ತಿಕಾ ವಟ್ಟೊಚ್ ಇಬೆ ರಾವ್ಕ್ ಹೊಯ್ನಶಿ. 12 ಜೆಜುನ್ ತ್ಯಾ ಬಾಯ್ಕೊಮನ್ಸಿಕ್ ಬಲ್ವುನ್ ಅನಿ "ಬಾಯ್ಕೊಮನ್ಸಿ, ತಿಯಾ ತುಜ್ಯಾ ಶಿಕಾತ್ನಾ ಸ್ವತಂತ್ರ್ ಹೊಲೆ!" ಮಟ್ಲ್ಯಾನ್. 13 ಜೆಜುನ್ ಅಪ್ನಾಚಿ ಹಾತಾ ತಿಚ್ಯಾ ವರ್‍ತಿ ಥವ್ಲ್ಯಾನ್, ಅನಿ ತಾಬೊಡ್ತೊಬ್ ತಿ ನಿಟ್ ಹೊವ್ನ್ ಇಬೆ ರ್‍ಹಾಲಿ, ಅನಿ ದೆವಾಕ್ ತೆನಿ ಹೊಗಳ್ಳಿನ್.

14 ಹ್ಯಾ ಬಾಯ್ಕೊಮನ್ಸಿಕ್ ಜೆಜುನ್ ಸಬ್ಬತಾಚ್ಯಾ ದಿಸಿ ಗುನ್ ಕರಲ್ಲೆ ಬಗುನ್ ಸಿನಾಗೊಗಾಚ್ಯಾ ಅದಿಕಾರ್‍ಯಾಕ್ ರಾಗ್ ಯೆಲೊ, ಅನಿ ತೊ ಲೊಕಾಕ್ನಿ "ಅಮ್ಕಾ ಕಾಮ್ ಕರುಕ್, ಸಾ ದಿಸಾ ಹಾತ್, ತ್ಯಾ ದಿಸಾತ್ನಿ ಯೆವಾ, ಅನಿ ತುಮ್ಕಾ ತುಮಿ ಗುನ್ ಕರುನ್ ಘೆವ್ನ್ ಜಾಂವಾ, ಸಾಬ್ಬಾತಾಚ್ಯಾ ದಿಸಿ ಯೌನಕಾಸಿ!" ಮನುನ್ ಸಾಂಗುಕ್‍ಲಾಲೊ.

15 ಧನಿಯಾನ್ ತೆಕಾ "ತುಮಿ ಕುಸ್ಡ್ಯಾನೊ! ತುಮ್ಚ್ಯಾತ್ಲೊ ಕೊನ್ಬಿ ಸಬ್ಬತಾಚ್ಯಾ ದಿಸಿ,ತುಮ್ಚ್ಯಾ ಗಾಡ್ವಾಕ್ ನಾಹೊಲ್ಯಾರ್, ಬೈಲಾಕ್ ಗೊಟ್ಯಾತ್ನಾ ಸೊಡ್ವುನ್ ಪಾನಿಯಾಕ್ ನ್ಹೆಯ್‌ನ್ಯಾಶಿ ಕಾಯ್; 16 ಅತ್ತಾ ಹಿತ್ತೆ, ಅಬ್ರಾಹಾಮಾಚ್ಯಾ ಘರಾನ್ಯಾತ್ಲ್ಯಾ ಎಕ್ಲಿಕ್ ಸೈತಾನಾನ್ ಅಟ್ರಾ ವರ್ಸಾಕ್ನಾ ಭಾಂದುನ್ ಥವ್ಲ್ಯಾನಾಯ್, ತಿ ಸಬ್ಬತಾಚ್ಯಾ ದಿಸಿ ಸುಟ್ಕಾ ಹೊವ್‍ ನ್ಹಯ್ ಕಾಯ್?" ಮನುನ್ ಜಬಾಬ್ ದಿಲ್ಯಾನ್.

17 ಹ್ಯಾ ಜೆಜುಚ್ಯಾ ಜಬಾಬಾನ್ ತೆಚ್ಯಾ ದುಸ್ಮಾನಾಕ್ನಿ ಲಜ್ಜಾ ಕರ್‍ಲಿ, ಲೊಕಾ ಜೆಜುನ್ ಕರಲ್ಲಿ ಮೊಟಿ-ಮೊಟಿ ವಿಚತ್ರ್ ಕಾಮಾ ಬಗುನ್ ಕುಶಿ ಹೊಲಿ.

ಸಾಸಾಂವಾಚ್ಯಾ ಬಿಯಾಚಿ ಕಾನಿ

18 ಜೆಜುನ್ ದೆವಾಚೆ ರಾಜ್ ಮಟ್ಲ್ಯಾರ್ ಕಶೆ? ಮನುನ್ ಇಚಾರ್‍ಲ್ಯಾನ್. "ದೆವಾಚ್ಯಾ ರಾಜಾಕ್ ಮಿಯಾ ಕಸ್ಲ್ಯಾಕ್ ಸಮಾ ಕರುಕ್ ಹೊತಾ? 19 ತೆ ಕಶೆ ಮಟ್ಲ್ಯಾರ್, ಎಕ್ ಮಾನುಸ್ ಎಕ್ ಸಾಸಾವಾಚಿ ಭ್ಹಿಂಯ್ ಘೆತಾ, ಅನಿ ಅಪ್ನಾಚ್ಯಾ ಶೆತಾತ್ ಉಗಾತ್ ಘಾಲ್ತಾ, ತೆ ಝಾಡ್ ಮೊಟೆ ಹೊತಾ, ಅನಿ ಮೊಟೆ ಝಾಡ್ ಹೊತಾ, ಅನಿ ಫಾಂಕ್ರಾ ಯೆವ್ನ್ ತೆಚ್ಯಾ ಟಾಳಿಯಾಕ್ನಿ ಘಂಟೆ ಭಾಂದ್ತ್ಯಾತ್", ಮಟ್ಲ್ಯಾನ್.

ಇಸ್ಟಾಚಿ ಕಾನಿ

20 ಅನಿಬಿ ಜೆಜುನ್, ದೆವಾಚೆ ರಾಜ್ ಮಟ್ಲ್ಯಾರ್, ಮಿಯಾ ಕಸ್ಲ್ಯಾಕ್ ಸಮಾ ಕರು? ಮನುನ್ ಇಚಾರ್‍ಲ್ಯಾನ್. 21 ತೆ, ಕಶೆ ಮಟ್ಲ್ಯಾರ್, ಎಕ್ ಬಾಯ್ಕೊಮನುಸ್ ಸೊಡೊ ಘೆತಾ, ಅನಿ ಲೈಶ್ಯಾ ಪಿಟ್ಟಾತ್ ಘಾಲುನ್ ಥವ್ತಾ, ಅನಿ ತೆ ಪಿಟ್ಟ್ ಸಗ್ಳೆ ಫುಗ್ತಾ.

ಬಾರಿಕ್ಲೆ ದಾರ್

22 ಜೆಜು ಶಾರಾತ್ನಿ, ಅನಿ ಗಾಂವಾತ್ನಿ ಲೊಕಾಕ್ನಿ ಶಿಕ್ವುನ್ಗೆತ್, ಅನಿ ಜೆರುಜಲೆಮಾಕ್ಡೆ ಅಪ್ನಾಚಿ ವಾಟ್ ಕರುನ್ಗೆತ್ ಗೆಲೊ. 23 ಕೊನ್‍ ಕಿ ಎಕ್ಲ್ಯಾನ್ "ಗುರುಜಿ ಬಚಾವ್ ಹೊತಲಿ ಉಲ್ಲಿಸಿಚ್ ಲೊಕಾ ಕಾಯ್?" ಮನುನ್ ಜೆಜುಕ್ ಇಚಾರ್‍ಲ್ಯಾನ್.

ಜೆಜುನ್ ತೆಂಕಾ. 24 "ಬಾರಿಕ್ಲ್ಯಾ ದಾರಾತ್ನಾ ಭುತ್ತುರ್ ಗುಸುಕ್ ಖಟ್ಪಟ್ ಕರಾ; ಕಶ್ಯಾಕ್ ಮಟ್ಲ್ಯಾರ್, ಲೈ ಲೊಕಾ ತ್ಯಾತುರ್ ಗುಸುಕ್ ಕಸ್‍ರತ್ ಕರ್‍ತ್ಯಾತ್, ಖರೆ ತೆಂಕಾ ಗುಸುಕ್ ಹೊಯ್ನಾ". 25 ಘರಾಚೊ ಧನಿ ಉಟ್ತಾ, ಅನಿ ದಾರ್ ಧಾಪ್ತಾ; ತನ್ನಾ ತಿಯಾ ಭಾಯ್ರ್ ಇಬೆ ರ್‍ಹಾವ್ನ್ ದಾರ್ ಬಡ್ವುನ್ "ಧನಿಯಾ ಮಾಕಾ ದಾರ್ ಕಾಡ್" ಮನುನ್ ಇಚಾರ್ಲ್ಯಾರ್. ತನ್ನಾ ತೊ "ತುಮಿ ಖೈತ್ನಾ ಯೆಲ್ಯಾಶಿ ಮನುನ್ ಮಾಕಾ ಗೊತ್ತ್ ನಾ!" ಮನ್ತಾ. 26 ತನ್ನಾ ತುಮಿ "ಅಮಿ ತುಜ್ಯಾ ವಾಂಗ್ಡಾಚ್ ಜೆವ್ಲಾವ್, ಅನಿ ಫಿಲಾಂವ್; ತಿಯಾ ಅಮ್ಚ್ಯಾ ಶಾರಾತ್ ಅಮ್ಕಾ ಶಿಕ್ವುಲೆ!" ಮನುನ್ ಜಬಾಬ್ ದಿತ್ಯಾಶಿ. 27 ಖರೆ ಅನಿಬಿ ತೊ "ತುಮಿ ಕೊನ್ ಅನಿ ತುಮಿ ಖೈತ್ನಾ ಯೆಲ್ಯಾಶಿ ಮನುನ್ ಮಾಕಾ ಗೊತ್ತ್ ನಾ! ಮಾಜೆಕ್ನಾ ಧುರ್ ಜಾವಾ ಬುರ್ಶ್ಯಾ ಲೊಕಾನು!" ಮನ್ತಾ.

28 ಅಶೆ ಅಬ್ರಾಹಾಮ್, ಇಸಾಕ್, ಅನಿ ಜಾಕೊಬ್, ಅನಿ ಸಗ್ಳೆ ಪ್ರವಾದಿ ದೆವಾಚ್ಯಾ ರಾಜಾತ್ ರಾವ್ನ್ ತುಮ್ಕಾ ಭಾಯ್ರ್ ಘಾಟಲ್ಲ್ಯಾ ತನ್ನಾ ತುಮಿ ರಡ್ತ್ಯಾಶಿ, ಅನಿ ದಾತಾ ಚಾವ್ತ್ಯಾಶಿ. 29 ದಿಸ್ ಉಗಾವ್ತಲ್ಯಾ ಅನಿ, ದಿಸ್ ಬುಡ್ತಲ್ಯಾ ದಿಕ್ಕಾಕ್ನಾ, ಅನಿ ಉತ್ತರ್ ಅನಿ ದಕ್ಷಿನ್ ದಿಕ್ಕಾಕ್ನಾ ಲೊಕಾ ಯೆತ್ಯಾತ್, ಅನಿ ದೆವಾಚ್ಯಾ ರಾಜಾತ್ ಸನಾಚ್ಯಾ ಜೆವ್ನಾಕ್ ಬಸ್ತ್ಯಾತ್. 30 ತನ್ನಾ ಜೆ ಕೊನ್ ಅತ್ತಾ ಫಿಡೆ ಹಾತ್, ತೆನಿ ಫಾಟಿ ಹೊತ್ಯಾತ್, ಅನಿ ಜೆ ಕೊನ್ ಅತ್ತಾ ಫಾಟಿ ಹಾತ್, ತೆನಿ ಫಿಡೆ ಹೊತ್ಯಾತ್, ಮನುನ್ ಸಾಂಗಟ್ಲ್ಯಾನ್.

ಜೆರುಜಲೆಮಾಸಾಟ್ನಿ ಜೆಜುಚೊ ಪ್ರೆಮ್

31 ತ್ಯಾಚ್ ಎಳಾರ್ ಉಲ್ಲೆ ಫಾರಿಜೆವ್ ಜೆಜುಕ್ಡೆ ಯೆಲೆ, ಅನಿ ತೆಕಾ "ತಿಯಾ ಹಿತ್ನಾ ಖೈ ತರ್ ಜಾ, ಹೆರೊದ್ ತುಕಾ ಜಿವಾನಿ ಮಾರುಕ್ ಬಗುಲಾ", ಮನುನ್ ಸಾಂಗಟ್ಲ್ಯಾನಿ. 32 ಜೆಜುನ್ ತೆಂಕಾ, "ಜಾವಾ, ಅನಿ ತ್ಯಾ ಕೊಲ್ಯಾಕ್, ಆಜ್ ಅನಿ ಉದ್ದ್ಯಾ ಮಾಕಾ ಗಿರೆ ಕಾಡ್ತಲೆ, ಅನಿ ಲೊಕಾಕ್ನಿ ಗುನ್ ಕರ್‍ತಲೆ ಕಾಮ್ ಹಾಯ್, ತಿನ್ವ್ಯಾ ದಿಸಿ ಮಿಯಾ ತೆ ಸಾರುನ್‍ ಘೆತಾ.ಮನುನ್ ಸಾಂಗಾ. 33 ತವ್ಡೆ ಪತರ್, ಮಾಜ್ಯಾ ವಾಟೆನ್ ಜಾವ್ನಗೆತ್ ರ್‍ಹಾತಾ.ಆಜ್ ಉದ್ದ್ಯಾ, ಅನಿ ಪರ್ವಾ, ಎಕ್ ಪ್ರವಾದ್ಯಾಕ್ ಜೆರುಜಲೆಮಾಚ್ಯಾ ಭಾಯ್ರ್ ಜಿವಾನಿ ಮಾರುಕ್ ಹೊಯ್ನಾ". ಮನುನ್ ಜಬಾಬ್ ದಿಲ್ಯಾನ್.

34 ಜೆರುಜಲೆಮಾ, ಜೆರುಜಲೆಮಾ! ತಿಯಾ ಪ್ರವಾದ್ಯಾಕ್ನಿ ಜಿವಾನಿ ಮಾರ್‍ತೆ,ದೆವಾನ್ ಧಾಡಲ್ಲ್ಯಾ, ಬರಿ ಖಬರ್ ಸಾಂಗ್ತಲ್ಯಾಕ್ನಿ, ತಿಯಾ ಗುಂಡ್ಯಾನ್ ಮಾರ್‍ತೆ! ಎಕ್ ಕೊಂಬ್ಡಿನ್ ಅಪ್ನಾಚ್ಯಾ ಪಿಲ್ಲಾಕ್ನಿ ಅಪ್ನಾಚ್ಯಾ ಫಾಕಾಟ್ಯಾತ್ನಿ ನಿಪ್ವುನ್ ಥವ್ನ್ ಘೆಟ್ಲ್ಯಾ ಸರ್ಕೆ,ಅನಿ ಕವ್ಡೆ ಪತರ್ ತುಜ್ಯಾ ಭೊತ್ಯಾನಿ ಮಿಯಾ ಹಾತ್ ಘಾಲುನ್ ಘೆವ್ನ್ ರಾವ್ಚೆ, ತಸೆ ರ್‍ಹಾಲ್ಯಾರ್‍ಬಿ ತಿಯಾ ಮಾಕಾ ಸೊಡಿನೆಯ್! 35 ಅನಿ ತಿಯಾ ತುಜಿ ದೆವಾಚಿ ಗುಡಿ ಕಳ್ದುನ್ ಘೆತೆ. ಮಿಯಾ ತುಕಾ ಖರೆಚ್ ಸಾಂಗ್ತಾ, "ಸರ್ವೆಸ್ವರಾಚ್ಯಾ ನಾವಾನ್ ಯೆತಾ ತೆಕಾ ಜೈ ಹೊಂವ್ದಿ ಮನುನ್ ತಿಯಾ ಮಾಕಾ ಮನಿ ಪತರ್, ಮಿಯಾ ತುಕಾ ಬಗುಕ್ ಗಾವಿನಾ", ಮಟ್ಲ್ಯಾನ್.