ಲುಕ್ 2

ಬಾರಾ ವರ್ಸಾಚೊ ಪೊರ್ ಜೆಜು ದೆವಾಚ್ಯಾ ಗುಡಿತ್ .

41 ಹರಿಎಕ್ ವರ್ಸಾ ಜೆಜುಚೆ ಬಾಯ್-ಬಾಬಾ ಪಾಸ್ಕಾಚ್ಯಾ ಸನಾಕ್ ಮನುನ್ ಜೆರುಜಲೆಮಾಕ್ ಜಾಯ್ತ್. 42 ಜೆಜು ಬಾರಾ ವರ್ಸಾಚೊ ಹೊತ್ತೊ ತನ್ನಾ, ಸದ್ದಿಚ್ಯಾ ಸರ್ಕೆ ತೆನಿ ಪಾಸ್ಕಾಚ್ಯಾ ಸನಾಕ್ ಜೆರುಜಲೆಮಾಕ್ ಗೆಲ್ಯಾನಿ. 43 ಸನ್ ಸರಲ್ಲ್ಯಾ ತನ್ನಾ ತೆನಿ ಪರ್ತುನ್ ಘರಾಕ್ ಗೆಲ್ಯಾನಿ, ಖರೆ ಪೊರ್ ಜೆಜು ಜೆರುಜಲೆಮಾತುಚ್ ರ್‍ಹಾಲೊ, ಹೆ ತೆಚ್ಯಾ ಬಾಯ್-ಬಾಬಾಕ್ ಕಳುಕುಚ್ ನತ್ತೆ . 44 ತೆನಿ ಅಪ್ನಾಚ್ಯಾ ಗಾವಾಕ್ ಯೆತಲ್ಯಾ ಲೊಕಾಂಚ್ಯಾ ವಾಂಗ್ಡಾ ಯೆವ್ಲಾ ಕಾಯ್ಕಿ ಮನುನ್ ಯವ್ಜುನ್, ಎಕ್ ದಿಸಾಚಿ ವಾಟ್ ಚಲುನ್ ಗೆಲ್ಲ್ಯಾ ಮಾನಾ, ತೆನಿ ತೆಂಚ್ಯಾ ಸೊಯ್ರ್ಯಾತ್ನಿ ಅನಿ ವಳ್ಕಿಚ್ಯಾತ್ನಿ ಜೆಜುಕ್ ಹುಡಕ್ಲ್ಯಾನಿ . 45 ಖರೆ ತೊ ತೆಂಕಾ ಗಾವುಕ್ನಾ, ತಸೆ ಮನುನ್ ತೆನಿ ಜೆಜುಕ್ ಹುಡ್ಕುನ್ಗೆತ್, ಅನಿ ಪರ್ತುನ್ ಜೆರುಜಲೆಮಾಕ್ ಗೆಲ್ಯಾನಿ,

46 ತಿನ್ವ್ಯಾ ದಿಸಿ ಜುದೆವಾಂಚ್ಯಾ ಮಾಸ್ತರಾಂಚ್ಯಾ ವಾಂಗ್ಡಾ ಬೊಲುನ್ಗೆತ್ ಅನಿ ತೆಂಕಾ ಪರಸ್ನೆ ಇಚಾರುಂಗೆತ್ ದೆವಾಚ್ಯಾ ಗುಡಿತ್ ಬಸಲ್ಲೊ, ತೆಂಕಾ ಗಾವ್ಲೊ. 47 ತೊ ಉಶಾರ್ಕಿನ್ ಜಬಾಬ್ ದಿತಲೆ ಬಗುನ್, ಆಯ್ಕಲ್ಲೆ ಸಗ್ಳೆಜಾನ್ ಅಜಾಪ್ ಹೊಲ್ಲೆ. 48 ತೆಕಾ ಬಗುನ್ ತೆಚೆ ಬಾಯ್ ಬಾಬಾ ಅಜಾಪ್ ಹೊಲ್ಯಾನಿ, ಅನಿ ತೆಚ್ಯಾ ಬಾಯ್ನ್ ತೆಕಾ "ಮಾಜ್ಯಾ ಪೊರಾ, ತಿಯಾ ಅಮ್ಕಾ ಅಶೆ ಕಶ್ಯಾಕ್ ಕರ್‍ಲೆ? ತುಕಾ ಹುಡ್ಕುಕ್, ಮಿಯಾ ಅನಿ ತುಮ್ಚೊ ಬಾಬಾ ಕವ್ಡೊ ತರಾಸ್ ಕರುನ್ ಘೆಟ್ಲಾಂವ್ ಗೊತ್ತ್ ಹಾಯ್?" ಮಟ್ಲಿನ್.

49 ತನ್ನಾ ತೆನಿ "ತುಮಿ ಮಾಕಾ ಕಶ್ಯಾಕ್ ಹುಡ್ಕುಕ್ ಲಾಗಲ್ಲ್ಯಾಶಿ? ಮಿಯಾ ಮಾಜ್ಯಾ ಬಾಬಾಚ್ಯಾ ಘರಾತ್ ರಾವ್ಕ್ ಪಾಜೆ ಮನುನ್ ತುಮ್ಕಾ ಗೊತ್ತ್ ನಾ ಕಾಯ್?" ಮನುನ್ ಜಬಾಬ್ ದಿಲ್ಯಾನ್. 50 ಖರೆ ತೆನಿ ದಿಲ್ಲ್ಯಾ ಜಬಾಬಾಚೊ ತೆಂಕಾ ಅರ್‍ತುಚ್ ಹೊವುಕ್ನಾ.

51 ಅಶೆ ಜೆಜು ತೆಂಚ್ಯಾ ವಾಂಗ್ಡಾ ನಜರೆತಾಕ್ ಗೆಲೊ. ತೊ ತೆಂಕಾ ಖಾಲ್ತಿ ಹೊವ್ನ್ ರ್‍ಹಾಲೊ.ತೆಚ್ಯಾ ಬಾಯ್ನ್ ಹೆ ಸಗ್ಳೆ ಅಪ್ನಾಚ್ಯಾ ಮನಾತ್ ಗೊಳಾ ಕರುನ್ ಥವ್ನ್ ಘೆಟ್ಲಿನ್. 52 ದೆವಾಚ್ಯಾ ಅನಿ ಲೊಕಾಂಚ್ಯಾ ದಯೆನ್ ಜೆಜು ಆಂಗಾನ್ ಅನಿ ಬುದ್ದಿನ್ ಮೊಟೊ ಹೊಲೊ.