1 ತನ್ನಾ ಜೆಜುನ್, ಸರ್ಗಾಚೊ ರಾಜ್ ಮಟ್ಲ್ಯಾರ್ ಅಶೆ. ಎಗ್ದಾ ಎಕ್ ಮಾನುಸ್ ಸಕ್ಕಾಳಿ ಫಿಡೆ ಅಪ್ನಾಚ್ಯಾ ದರಾಕ್ಷಿಚ್ಯಾ ಮಳ್ಯಾತ್ ಕಾಮಾಕ್ ಯೆತಲಿ ಆಳಾ ಹುಡ್ಕುಕ್ ಮನುನ್ ಜಾತಾ. 2 ತೆನಿ ತ್ಯಾ ಆಳಾಕ್ನಿ ಎಕ್ ದಿಸಾಕ್ ಎಕ್ ಚಾಂದಿಚೊ ಪೈಸೊ ದಿತಾ ಮನುನ್ ಸಾಂಗುನ್ ಅಪ್ನಾಚ್ಯಾ ಶೆತಾತ್ ಕಾಮಾಕ್ ಧಾಡುನ್ ದಿಲ್ಯಾನ್. 3 ಮಾನಾ ಅನಿ ಎಗ್ದಾ ನ್ಹವ್ ಘಂಟ್ಯಾಕ್ ತೊ ಬಾಜಾರಾತ್ ಗೆಲೊ. ಅನಿ ಕಾಯ್ಬಿ ಕಾಮ್ ನಸ್ತಾನಾ ಇಬೆ ಹೊತ್ತ್ಯಾ ಉಲ್ಲ್ಯಾಸ್ಯಾ ಲೊಕಾಕ್ನಿ ತೆನಿ ಬಗಟ್ಲ್ಯಾನ್. 4 ತೆಚೆಸಾಟ್ನಿ ತೆನಿ ತೆಂಕಾ, ತುಮಿ ಬಿ ಮಾಜ್ಯಾ ಶೆತಾತ್ ಕಾಮಾಕ್ ಚಲಾ, ತುಮ್ಚಿ ಕಾಯ್ ತಿ ಮಜುರಿ ಮಿಯಾ ತುಮ್ಕಾ ದಿತಾ ಮಟ್ಲ್ಯಾನ್. 5 ತನ್ನಾ ತೆನಿ ಗೆಲೆ. ಮಾನಾ ದೊಪಾರ್ಚೆ ಬಾರಾ ಘಂಟ್ಯಾಕ್ ಅನಿ ತಿನ್ ಘಂಟ್ಯಾಕ್ ತೆನಿ ಭಾಯ್ರ್ ಜಾವ್ನ್ ಅಪ್ನಾಚ್ಯಾ ಶೆತಾತ್ ಕಾಮ್ ಕರುಕ್ ಲೊಕಾಕ್ನಿ ಧಾಡುನ್ ದಿಲ್ಯಾನ್. 6 ಸಾದಾರನ್ ಪಾಚ್ ಘಂಟ್ಯಾಕ್ ತೊ ಅನಿ ಎಗ್ದಾ ಬಾಜಾರಾತ್ ಗೆಲೊ ಅನಿ ಕಾಯ್ಬಿ ಕಾಮ್ ನಸ್ತಾನಾ ಇಬೆ ಹೊತ್ತ್ಯಾ ಅನಿ ಉಲ್ಲ್ಯಾಸ್ಯಾ ಲೊಕಾಕ್ನಿ ತೆನಿ ಬಗಟ್ಲ್ಯಾನ್. ಅನಿ ತೆಂಕಾ, ದಿಸ್ ಬರ್ ಕಾಮ್ ಕರಿನಸ್ತಾನಾ ಕಶ್ಯಾಕ್ ಎಳ್ ಹಾಳ್ ಕರುಕ್ ಲಾಗ್ಲ್ಯಾಶಿ ತುಮಿ? ಮನುನ್ ಇಚಾರ್‍ಲ್ಯಾನ್. 7 ತನ್ನಾ ತೆನಿ, ಅಮ್ಕಾ ಕೊನ್ಬಿ ಕಾಮಾಕ್ ಬಲ್ವುಕ್‍ನ್ಯಾತ್. ಮನುನ್ ಸಾಂಗ್ಲ್ಯಾನಿ. ತನ್ನಾ ತೆನಿ ತೆಂಕಾ,ತಸೆ ಜಾಲ್ಯಾರ್ ತುಮಿಬಿ ಜಾವಾ ಅನಿ ಮಾಜ್ಯಾ ಶೆತಾತ್ ಕಾಮಾಕ್‍ಲಾಗಾ ಮಟ್ಲ್ಯಾನ್.

8 ಸಾಂಚೆಕ್ಡೆ ತ್ಯಾ ಮಳ್ಯಾಚ್ಯಾ ಮಾಲ್ಕಾನ್ ಅಪ್ನಾಚ್ಯಾ ಮಕಾದಮಾಕ್ ಬಲ್ವುಲ್ಯಾನ್. ಅನಿ, ಅದ್ದಿ ಬಲ್ವಲ್ಲ್ಯಾಕ್ನಾ ಧರುನ್ ಆಕ್ರಿಕ್ ಬಲ್ವಲ್ಲ್ಯಾ ಪತರ್ ಸಗ್ಳ್ಯಾಕ್ನಿ ತೆಂಚಿ-ತೆಂಚಿ ದಿಸಾಚಿ ಮಜುರಿ ವಾಟುನ್ ದಿ. ಮನುನ್ ಸಾಂಗಟ್ಲ್ಯಾನ್. 9 ಪಾಚ್ ಘಂಟ್ಯಾಕ್ ಕಾಮಾಕ್ ಯೆವ್ನ್ ಲಾಗಲ್ಲ್ಯಾಕ್ನಿ ಸೈತ್ ಎಕ್ ಚಾಂದಿಚೊ ಪೈಸೊಚ್ ಮಜುರಿ ಗಾವ್ಲಿ. 10 ತನ್ನಾ ಸಕ್ಕಾಳಿ ಫಿಡೆ ಯೆಲ್ಲ್ಯಾಂಚಿ ಪಾಳಿ ಯೆಲಿ. ತೆನಿ ತೆಂಕಾ ಜಾಸ್ತಿಚಿ ಮಜುರಿ ಗಾವ್ತಾ ಮನುನ್ ಯವಜಲ್ಲ್ಯಾನಿ. ಖರೆ ತೆಂಕಾಬಿ ಎಕುಚ್ ಚಾಂದಿಚೊ ಪೈಸೊ ಗಾವ್ಲೊ. 11 ತೆನಿ ತೆ ಘೆಟ್ಲ್ಯಾನಿ ಅನಿ ಮಾಲ್ಕಾಚ್ಯಾ ವರ್‍ತಿ ಪುರ್‍ವುರುಕ್‍ಲಾಗ್ಲ್ಯಾನಿ.ಅನಿ, 12 "ಅಮಿ ಸಕ್ಕಾಳ್ಚ್ಯಾನ್ ನಿಂಬ್ರಾತ್ ಅನಿ ಗರ್‍ಮಿತ್ ಕಾಮ್ ಕರ್ಲಾಂವ್, ಅನಿ ಹೆನಿ ಖಾಲಿ ಎಕುಚ್ ಎಕ್ ತಾಸ್ ಕಾಮ್ ಕರ್‍ಲ್ಯಾನಾತ್ ತೆಕಾಬಿ ಅಮ್ಕಾಬಿ ತವ್ಡಿಚ್ ಮಜುರಿ ದಿಲೆ". ಮಟ್ಲ್ಯಾನಿ.

13 ತನ್ನಾ ತ್ಯಾ ಮಾಲ್ಕಾನ್, ತೆಂಚ್ಯಾತ್ಲ್ಯಾ ಎಕ್ಲ್ಯಾಕ್, ಮಾಜ್ಯಾ ದೊಸ್ತಾ, ಮಿಯಾ ತುಕಾ ಅನ್ನ್ಯಾಯ್ ಕರುಕ್ ನಾ. ಎಕ್ ದಿಸಾಚಿ ಮಜುರಿ ಎಕ್ ಚಾಂದಿಚೊ ಪೈಸೊ ಮನುನ್ ಮಿಯಾ ತುಕಾ ಸಾಂಗಟಲ್ಲೊ. 14 ಅತ್ತಾ ತುಜಿ ಸಾಂಗಲ್ಲಿ ಮಜುರಿ ಘೆ ಅನಿ ಘರಾಕ್ ಜಾ; ಆಕ್ರಿಕ್ ಯೆಲ್ಲ್ಯಾ ಹೆಕಾಬಿ ತುಕಾ ದಿಲ್ಲಿ ತವ್ಡಿಚ್ ಮಜುರಿ ದಿತಲಿ ಮಾಜಿ ಕುಶಿ. 15 ಮಾಜೆ ಸ್ವತಾಚೆ ಪೈಸೆ ಮಿಯಾ ಮಾಕಾ ಪಾಜೆ ತಸೆ ಕರುಕ್ ಮಾಕಾ ಹಕ್ಕ್ ನಾ ಕಾಯ್? ಅನಿ ಎಕ್ಲ್ಯಾಕ್ ಬರೆ ಕರ್‍ತಲೆ ಬಗುನ್ ಪೊಟಾತ್ ಜಳುಲಾ ಕಾಯ್‍? ಮನುನ್ ಸಾಂಗಟ್ಲ್ಯಾನ್.

16 ತನ್ನಾ ಜೆಜುನ್," ಜೆ ಕೊನ್ ಫಿಡೆ ಹಾತ್ ತೆನಿ ಫಾಟಿ ಹೊತ್ಯಾತ್, ಅನಿ ಜೆ ಕೊನ್ ಫಾಟಿ ಹಾತ್ ತೆನಿ ಫಿಡೆ ಹೊತ್ಯಾತ್" ಮನುನ್ ಸಾಂಗಟ್ಲ್ಯಾನ್.

17 ಜೆಜು ಜೆರುಜಲೆಮಾಕ್ಡೆ ಜವ್‍ಲಾಗಲ್ಲೊ. ತನ್ನಾ ತೆಚಿ ಬಾರಾ ಶಿಸಾಬಿ ತೆಚ್ಯಾ ವಾಂಗ್ಡಾ ಹೊತ್ತಿ. ಜಾತಾಜಾನಾಚ್ ತೆನಿ ಅಪ್ನಾಚ್ಯಾ ಶಿಸಾಕ್ನಿ ಎವ್ಡೆಚ್ ಕಡೆಕ್ ಬಲ್ವುನ್ ಘೆಟ್ಲ್ಯಾನ್, ಅನಿ ತೆಂಕಾ, 18 "ಆಯ್ಕಾ! ಅತ್ತಾ ಅಮಿ ಜೆರುಜಲೆಮಾ ಪತರ್ ಜಾವ್ಕ್ ಲಾಗ್ಲಾಂವ್. ಥೈ ಮಾನ್ಸಾಚ್ಯಾ ಲೆಕಾಕ್ ಧರುನ್ ಮುಖ್ಯ ಯಾಜಕಾಂಚ್ಯಾ ಮುಖಂಡಾಂಚ್ಯಾ ಅನಿ ಶಾಸ್ತರಾ ಶಿಕ್ವುತಲ್ಯಾಂಚ್ಯಾ ಹಾತಾತ್ ದಿತ್ಯಾತ್. ತೆನಿ ತೆಕಾ ಮರ್‍ನಾಚಿ ಶಿಕ್ಷಾ ದಿತ್ಯಾತ್. 19 ಅನಿ ಮಾನಾ ತೆನಿ ತೆಕಾ ಜುದೆವ್ ನ್ಹಯ್ ಹೊತ್ತ್ಯಾ ಲೊಕಾಂಚ್ಯಾ ಹಾತಾತ್ ದಿತ್ಯಾತ್. ತೆನಿ ತೆಕಾ ಎಡ್ಸಡ್ತಾತ್, ಬಾರ್‍ಕೊಲಾನಿ ಮಾರ್‍ತ್ಯಾತ್ ಅನಿ ಕುರ್ಸಾರ್ ಮಾರ್‍ತ್ಯಾತ್. ಖರೆ ತಿನ್ ದಿಸಾಂಚ್ಯಾ ಮಾನಾ ತೊ ಝಿತ್ತೊ ಹೊವ್ನ್ ಉಟುನ್ ಯೆತಾ." ಮನುನ್ ಸಾಂಗಟ್ಲ್ಯಾನ್.

20 ಮಾನಾ ಜೆಬೆದೆವಾಚಿ ಬಾಯ್ಕೊ ಅಪ್ನಾಚ್ಯಾ ದೊನ್ ಲೆಕಾಂಚ್ಯಾ ವಾಂಗ್ಡಾ ಜೆಜುಕ್ಡೆ ಯೆವ್ನ್ ತೆಚ್ಯಾ ಇದ್ರಾಕ್ ಮಾನ್ ಬಾಗ್ವುಲಿನ್ , ಅನಿ ಎಕ್ ಉಪ್ಕಾರ್ ಇಚಾರ್‍ಲಿನ್.

21 ತನ್ನಾ ಜೆಜುನ್ ತಿಕಾ "ಕಾಯ್ ತೆ?" ಮನುನ್ ಇಚಾರ್‍ಲ್ಯಾನ್.

ತನ್ನಾ ತೆನಿ ಜೆಜುಕ್,"ತಿಯಾ ರಾಜಾ ಹೊಲ್ಲ್ಯಾ ತನ್ನಾ ಹ್ಯಾ ಮಾಜ್ಯಾ ದೊನಿಬಿ ಲೆಕಾಕ್ನಿ ಎಕ್ಲ್ಯಾಕ್ ತುಜ್ಯಾ ಉಜ್ವ್ಯಾ ಬಾಜುಕ್ ಅನಿ ಎಕ್ಲ್ಯಾಕ್ ಡಾವ್ಯಾ ಬಾಜುಕ್ ಬಸ್ವುತಾ ಮನುನ್ ಮಾಕಾ ಗೊಸ್ಟ್ ದಿ." ಮಟ್ಲಿನ್.

22 ತನ್ನಾ ತಿಚ್ಯಾ ಲೆಕಾಕ್ನಿ ಜೆಜುನ್," ತುಮಿ ಕಾಯ್ ಇಚಾರುಲ್ಯಾಶಿ, ಮನುನ್ ತುಮ್ಕಾ ಗೊತ್ತ್ ಹಾಯ್ ಕಾಯ್? ಮಿಯಾ ಫಿತಲೆ ಹಾಯ್ ತ್ಯಾ ಕಸ್ಟಾಚ್ಯಾ ಆಯ್ದಾನಾತ್ಲೆ ತುಮ್ಚ್ಯಾನ್ ಫಿವ್ಕ್ ಹೊತಾ ಕಾಯ್?" ಮನುನ್ ಇಚಾರ್‍ಲ್ಯಾನ್. ತನ್ನಾ ತೆನಿ " ಹೊಯ್ ಅಮ್ಕಾ ಫಿವ್ಕ್ ಹೊತಾ." ಮಟ್ಲ್ಯಾನಿ.

23 ತನ್ನಾ ಜೆಜುನ್ ತೆಂಕಾ," ತುಮಿ ಮಿಯಾ ಫಿತಲ್ಯಾ ಕಸ್ಟಾಚ್ಯಾ ಆಯ್ದಾನಾತ್ಲೆ ತುಮಿ ಫಿತ್ಯಾಶಿ ತೆ ಖರೆ ಹಾಯ್. ಖರೆ ಕೊನ್ ಮಾಜ್ಯಾ ಉಜ್ವ್ಯಾಬಾಜುಕ್ ಅನಿ ರೊಡ್ಡ್ಯಾ ಬಾಜುಕ್ ಬಸ್ತಲೆ ಮನುನ್ ಎಚುನ್ ಕಾಡ್ತಲೊ ಅದಿಕಾರ್ ಮಾಕಾ ನಾ. ಜೆ ಕೊನಾಕ್ ತೊ ಜಾಗೊ ಮಾಜ್ಯಾ ಬಾಬಾನ್ ತಯಾರ್ ಕರುನ್ ಥವ್ಲ್ಯಾನಾಯ್ ತೆಂಕಾ ತೊ ಗಾವ್ತಾ." ಮನುನ್ ಸಾಂಗಟ್ಲ್ಯಾನ್.

24 ಹುರಲ್ಲ್ಯಾ ಧಾ ಶಿಸಾನಿ ಹೆ ಆಯಿಕ್ಲ್ಯಾನಿ. ತನ್ನಾ ತೆಕಾ ಹ್ಯಾ ದೊನ್ ಭಾವಾಂಚ್ಯಾ ವರ್‍ತಿ ರಾಗ್ ಯೆಲೊ. 25 ತೆಚೆಸಾಟ್ನಿ ಜೆಜುನ್ ತೆಂಕಾ ಸಗ್ಳ್ಯಾಕ್ನಿ ಎಕಾಕ್ಡೆ ಬಲ್ವುಲ್ಯಾನ್. ಅನಿ "ಖಲ್ಯಾಬಿ ಜುದೆವ್ ನ್ಹಯ್ ಹೊತ್ತೆ ಅದಿಕಾರಿ ಅಪ್ನಾ ವರ್‍ತಿ ಎಕ್ ಅದಿಕಾರ್ ಹಾಯ್ ಅನಿ ತೆಂಚ್ಯಾ ಮುಖಂಡಾಕ್ನಿ ಸಗ್ಳೆ ಕರ್‍ತಲೊ ಅದಿಕಾರ್ ಹಾಯ್ ಮನುನ್ ತುಮ್ಕಾ ಗೊತ್ತ್ ಹಾಯ್. 26 ಖರೆ ತುಮ್ಚ್ಯಾ ಮದ್ದಿ ತಸೆ ಹೊವ್ಚೆ ನ್ಹಯ್, ಜರ್ ತುಮ್ಚ್ಯಾತ್ಲೊ ಕೊನ್‍ಬಿ ಮೊಟೊ ಹೊವ್ಚೆ ಮನುನ್ ಯವಜ್ತಾ, ತೆನಿ ಹುರಲ್ಲ್ಯಾ ಸಗ್ಳ್ಯಾಂಚೊ ಸೆವಕ್ ಹೊವ್ಚೆ. 27 ಅನಿ ತುಮ್ಚ್ಯಾತ್ಲೊ ಜೊ ಕೊನ್ ಪಯ್ಲೆ ಹೊವ್ಚೆ ಮನುನ್ ಯವಜ್ತಾ ತೊ ದುಸ್ರ್ಯಾಂಚೊ ಗುಲಾಮ್ ಹೊವ್ಚೆ. 28 ಮಾನ್ಸಾಚೊ ಲೆಕ್ ಲೊಕಾನಿಕ್ನಾ ಸೆವಾ ಕರುನ್ ಘೆವ್ಕ್ ಮನುನ್ ಯೆವ್ಕ್ ನಾ. ತೊ ಸೆವಾ ಕರುಕ್ ಅನಿ ಲೈ ಲೊಕಾಂಚ್ಯಾ ಸಾಟ್ನಿ ಜಿವ್ ದಿವ್ನ್ ತೆಂಕಾ ಸುಟ್ಕಾ ದಿವ್ಚೆ ಮನುನ್ ಯೆಲಾ!" ಮನುನ್ ಸಾಂಗಟ್ಲ್ಯಾನ್.

29 ಜೆಜು ಅನಿ ತೆಚಿ ಶಿಸಾ ಜೆರಿಕೊ ಸೊಡುನ್ ಜಾತಾನಾ. ಲೊಕಾಂಚೊ ಎಕ್ ಮೊಟೊ ತಾಂಡೊ ತೆಂಚ್ಯಾ ಫಾಟ್ನಾ ಹೊತ್ತೊ. 30 ಥೈ ರಸ್ತ್ಯಾಚ್ಯಾ ದಂಡೆಕ್ ಬಸಲ್ಲ್ಯಾ ದೊಗ್ಯಾ ಕುಡ್ಡ್ಯಾನಿ ಜೆಜು ಹಿತ್ನಾ ಪಾರ್ ಹೊವ್ನ್ ಜಾವ್ಕ್ ಲಾಗ್ಲಾ ಮನ್ತಲೆ ಆಯ್ಕುನ್, "ಧನಿಯಾ, ದಾವಿದಾಚ್ಯಾ ಲೆಕಾ ಅಮ್ಚೆ ವರ್‍ತಿ ದಯಾ ದಾಕ್ವು!" ಮನುನ್ ಬೊಬ್ ಮಾರುಕ್ ಚಾಲು ಕರ್‍ಲ್ಯಾನಿ.

31 ಲೊಕಾನಿ ತೆಂಕಾ ಜೊರ್ ಕರುನ್ "ಗಪ್ ರ್‍ಹಾವಾ." ಮಟ್ಲ್ಯಾನಿ. ಖರೆ ತೆನಿ ಅನಿ ಉಲ್ಲೆ ಜೊರಾನಿ, "ಧನಿಯಾ, ದಾವಿದಾಚ್ಯಾ ಲೆಕಾ ಅಮ್ಚೆ ವರ್‍ತಿ ದಯಾ ದಾಕ್ವು!" ಮನುನ್ ಬೊಬ್ ಮಾರ್‍ಲ್ಯಾನಿ. 32 ತನ್ನಾ ಜೆಜು ಇಬೆ ರ್‍ಹಾಲೊ ಅನಿ ತೆಂಕಾ ಬಲ್ವುನ್, "ಮಿಯಾ ತುಮ್ಚ್ಯಾಸಾಟ್ನಿ ಕಾಯ್ ಕರುಚೆ?" ಮನುನ್ ಇಚಾರ್‍ಲ್ಯಾನ್.

33 ತನ್ನಾ ತ್ಯಾ ಕುಡ್ಡ್ಯಾನಿ, "ಧನಿಯಾ, ಅಮ್ಕಾ ದಿಸಿ ಸರ್ಕೆ ಕರ್." ಮನುನ್ ತೆಕಾ ಜಬಾಬ್ ದಿಲ್ಯಾನಿ.

34 ತನ್ನಾ ಜೆಜುನ್ ತೆಂಚೆ ವರ್‍ತಿ ದಯಾ ದಾಕ್ವುಲ್ಯಾನ್ ಅನಿ ತೆಂಚ್ಯಾ ಡೊಳ್ಯಾಕ್ನಿ ಅಪಡ್ಲ್ಯಾನ್. ತನ್ನಾ ತಾಬೊಡ್ತೊಬ್ ತೆಂಕಾ ದಿಸುಕ್‍ ಲಾಗ್ಲೆ. ತನ್ನಾ ತೆನಿ ಜೆಜುಚ್ಯಾ ಫಾಟ್ನಾಚ್ ಗೆಲ್ಯಾನಿ.