Rute 3

ರುತಾಕ್ ಘವ್ ಗಾವಲ್ಲೆ

1 ಉಲ್ಲ್ಯಾ ದಿಸಾಂಚ್ಯಾ ಮಾನಾ, ನವೊಮಿನ್ ಅಪ್ನಾಚಿ ಸುನ್ನ್ ರುತಾಕ್, "ಮಾಜ್ಯಾ ಲೆಕಿ ತಿಯಾ ಘರ್ ಕಾರ್‍ನಿ ಹೊವ್ನ್ ಸುಕಾನ್ ರಾಯ್ ಸಾರ್ಕೆ ಕರುಕ್ ಮಿಯಾ ಕಟ್ಪಟ್ ಕರುಕ್ ಪಾಜೆ ನ್ಹಯ್ . 2 ಬೊವಾಜ್ ಅಮ್ಚೊ ಸಂಬಂದಿಕ್, ತೆಚ್ಯಾ ಹೆನ್ನ್ ಆಳಾಂಚ್ಯಾ ವಾಂಗ್ಡಾ ತಿಯಾ ಕಾಮ್ ಕರ್ತೆ ನ್ಹಯ್ ? ಅತ್ತಾ ಮಿಯಾ ಸಾಂಗ್ತಲೆ ಆಯ್ಕ್; ತೊ ಆಜ್ ರಾತ್ತಿನ್ ಖಳ್ಯಾತ್ ಬಾರ್‍ಲಿ ವಾರೆ ದಿತಾ. 3 ತಿಯಾ ಪಾನಿ ನ್ಹಾವ್ನ್ ಬರ್‍ಯಾ ತೆಲ್ ಲಾವ್ನ್ ಘೆವ್ನ್, ಬರೆ ಕಪ್ಡೆ ನೆಸುನ್ ಘೆವ್ನ್ ಖಳ್ಯಾತ್ ಜಾ; ತೆಚೆ ಜೆವಾನ್ ಹೊಯ್ ಪತರ್ ತೆಕಾ ದಾಕ್ವುನ್ ಘೆವ್ ನಕ್ಕೊ. 4 ತೊ ನಿಜ್ತಲೊ ಜಾಗೊ ಕಳ್ವುನ್ ಘೆವ್ನ್ ಜಾವ್ನ್, ತೆಜ್ಯಾ ಪಾಂಯಾಂಚ್ಯಾ ವೈಲೆ ಕಾಂಬ್ರಾನ್ ಕಾಡುನ್ ಪಾಂಯಾಂಚ್ಯಾಕ್ಡೆಚ್ ಆಡ್ ಪಡ್; ಮಾನಾ ತಿಯಾ ಕರುಚೆ ಹೊಲ್ಲೆ ಸಗ್ಳೆ ತೊ ತುಕಾ ಕಳ್ವುತಾ." ಮಟ್ಲಿನ್.

5 ತನ್ನಾ ಸುನ್ನೆನ್ ಮಾಮಿಕ್, "ತಿಯಾ ಸಾಂಗಲ್ಲ್ಯಾ ಸಾರ್ಕೆಚ್ ಕರ್ತಾ" ಮಟ್ಲಿನ್.

6 ತಸೆಚ್ ರುತಾನ್ ಖಳ್ಯಾತ್ ಜಾವ್ನ್ ಅಪ್ನಾಚ್ಯಾ ಮಾಮಿನ್ ಸಾಂಗಲ್ಲ್ಯಾ ಸಾರ್ಕೆಚ್ ಕರ್‍ಲಿನ್. 7 ಬೊವಾಜ್ ಜೆವ್ನ್, ಫಿವ್ನ್ ಬಾರ್‍ಲಿಚ್ಯಾ ರಾಸಿಕ್ಡೆ ಜಾವ್ನ್ ನಿಜ್ಲೊ. ಮಾನಾ ತಿ ಘುಟ್ಟಾನ್ ಯೆವ್ನ್, ತೆಜ್ಯಾ ಪಾಂಯಾಚ್ಯಾ ವಯ್ಲೆ ಕಾಂಬ್ರಾನ್ ಕಾಡುನ್ ಪಾಂಯಾಂಚ್ಯಾಕ್ಡೆಚ್ ಆಡ್ ಪಡ್ಲಿ. 8 ಮದ್ಯಾನ್ ರಾತ್ತಿನ್ ಬೊವಜಾನ್ ಉಟುನ್ ಅಪ್ನಾಚ್ಯಾ ಪಾಂಯಾಂಚ್ಯಾಕ್ಡೆ ನಿಜಲ್ಲ್ಯಾ ಬಾಯ್ಕೊಮಾನ್ಸಿಕ್ ಬಗುನ್ ಅಜಿಬ್ ಹೊಲೊ. 9 ತನ್ನಾ ತೆನಿ ತಿಕಾ ತಿಯಾ ಕೊನ್? ಮನುನ್ ಇಚಾರ್‍ತಾನಾ,

ತಿನಿ ಮಿಯಾ ತುಜಿ ಚಾಕ್ರಿನ್ ರುತ್. ತಿಯಾ ಮಾಜೊ ಜಗ್ಗೊಳ್ಲೊ ಸಮಂದಿಕ್ ಹೊಲ್ಲ್ಯಾ ಸಾಟ್ನಿ ತುಜ್ಯಾ ಕಾಂಬ್ರಾನಾಚಿ ತುದಿ ಮಾಜ್ಯಾ ವರ್‍ತಿ ಧಾಪ್ ಮಟ್ಲಿನ್.

10 ತನ್ನಾ ತೆನಿ, ಮಾಜ್ಯಾ ಲೆಕಿ, "ತುಕಾ ಸರ್ವೆಸ್ಪರಾಕ್ನಾ ಆಶಿರ್ವಾದ್ ಗಾಂವ್ದಿತ್," "ತಿಯಾ ಗರಿಬ್ ನಾತರ್ ಸಾವ್ಕಾರ್ ದಾಂಡ್ಗ್ಯಾ ಮಾನ್ಸಾಕ್ ಬಗುನ್ ಜಾವ್ಕ್ ನ್ಹಯ್ . ತುಜೆ ಗವ್ರವ್ ಪೈಲೆಚ್ಯಾಕಿಂತಾಬಿ ಲೈ ಹೊವ್ನ್ ದಿಸುನ್ ಯೆಲಾ. 11 ಮಾಜ್ಯಾ ಲೆಕಿ, ಅತ್ತಾ ಭಿಂವ್ ನಕ್ಕೊ, ತಿಯಾ ಬರ್‍ಯಾ ಮನಾಚಿ ಮನ್ತಲೆ ಸಗ್ಳ್ಯಾ ಗಾಂವಾಕ್ ಗೊತ್ತ್ ಹಾಯ್; ತಸೆ ಹೊವ್ನ್ ತಿಯಾ ಮಾಗಲ್ಲೆ ಸಾರ್ಕೆ ಕರ್ತಾ. 12 ಮಿಯಾ ಜಗ್ಗೊಳ್ಲೊ ಸಮಂದಿಕ್ ಮನ್ತಲೆ ಖರೆಚ್ ಹಾಯ್. ಹೊಲಾರ್ಬಿ ಮಾಜ್ಯಾಕಿಂತಾ ಜಗ್ಗೊಳ್ಲೊ ಅನಿ ಎಕ್ಲೊ ಹಾಯ್. 13 ಆಜ್ ರಾತ್ತಿನ್ ಹಿತ್ತೆಚ್ ರ್‍ಹಾ; ಉದ್ದ್ಯಾ ತೆನಿ ಜವಾಬ್ದಾರಿ ಘೆತಾ ಕಾಯ್ ಇಚಾರುಂವಾ; ನಾ ಹೊಲ್ಯಾರ್ ಸರ್ವೆಸ್ಪರಾಚ್ಯಾ ವರ್‍ತಿ ಆನ್, ಮಿಯಾಚ್ ತೆ ಕಾಮ್ ಕರ್ತಾ, ಉಜ್ವಾಡಿ ಪತರ್ ಹಿತ್ತೆಚ್ ನಿಜ್ ಮನುನ್ ಸಾಂಗ್ಲ್ಯಾನ್."

14 ತಿ ತವ್ಡ್ಯಾ ಪತರ್ಬಿ ತೆಜ್ಯಾ ಪಾಂಯಾಂಚ್ಯಾಕ್ಡೆ ನಿಜುನ್ ಹೊತ್ತಿ. "ಎಕ್ ಬಾಯ್ಕೊಮನುಸ್ ಖಳ್ಯಾಕ್ ಯೆಲ್ಲಿ ಮನ್ತಲೆ ಕೊನಾಕ್ಬಿ ಕಳುಚೆ ನ್ಹಯ್ " ಮನುನ್ ತೆನಿ ಸಾಂಗಲ್ಲ್ಯಾ ಸಾಟ್ನಿ, ನಸ್ಕಾತ್ ವಳಕ್ ಗಾಯ್ ನಸಲ್ಲೊ ತವ್ಡೊ ಕಾಳೊಕ್ ರ್‍ಹಾತಾನಾಚ್ ತಿ ಉಟ್ಲಿ. 15 ತನ್ನಾ ತೆನಿ ತಿಕಾ, ತುಜೆ ಕಂಬ್ಳೆ ಹಾತರ್ ಮನ್ತಾನಾ ತಿನಿ ಹಾತರ್‍ಲಿನ್, ತೆನಿ ತ್ಯಾತುರ್ ಜಾಸ್ತಿ ಕಮ್ಮಿ ತಿನ್ ಪಾಯ್ಲಿ ಬಾರ್‍ಲಿ ಭರುನ್ ವಾಂವ್ಲ್ಯಾನ್, ತಿ ಗಾಂವಾತ್ ಗೆಲಿ. 16 ಅಪ್ನಾಚ್ಯಾ ಮಾಮಿಕ್ಡೆ ಯೆಲ್ಲ್ಯಾ ತನ್ನಾ, ಮಾಮಿನ್ ತಿಕಾ "ಮಾಜ್ಯಾ ಲೆಕಿ, ತುಜೆ ಕಾಮ್ ಕಾಯ್ ಹೊಲೆ?" ಮನುನ್ ಇಚಾರ್‍ತಾನಾ,

ತಿನಿ ತ್ಯಾ ಮಾನ್ಸಾನ್ ಕರಲ್ಲೆ ಸಗ್ಳೆ ಸಾಂಗ್ಲಿನ್. 17 ತಿಯಾ ಖಾಲಿ ಹಾತಿನ್ ಮಾಮಿಕ್ಡೆ ಜಾವ್ನಕ್ಕೊ ಮನುನ್ ಜಾಸ್ತಿ ಕಮ್ಮಿ ತಿನ್ ಪಾಯ್ಲಿ ಬಾರ್‍ಲಿ ದಿಲ್ಯಾನ್ ಮಟ್ಲಿನ್.

18 ಮಾಮಿನ್ ಮಾಜ್ಯಾ ಲೆಕಿ, "ಹೆ ಕಾಮ್ ಹೊಯ್ ಪತರ್ ಗಪ್ ರ್‍ಹಾ; ಬೊವಾಜ್ ತೆ ಕಾಮ್ ಕರಿ ಪತರ್ ಗಪ್ ರ್‍ಹಾಯ್ನಾ ಮಟ್ಲಿನ್."