Rute 4

ಬೊವಾಜ್ ರುತಾಕ್ ಲಗಿನ್ ಹೊತಲೆ

1 ಬೊವಾಜ್ ಜಾವ್ನ್ ಗಾಂವಾಚ್ಯಾ ಯೆಸಿತ್ ಬೈಟೆಕ್ ಕರ್‍ತಲ್ಯಾ ಜಾಗ್ಯಾರ್ ಜಾವ್ನ್ ಬಸ್ಲೊ, ಅಪ್ನಿ ಸಾಂಗಲ್ಲೊ ಜಗ್ಗೊಳ್ಲೊ ಸಮಂದಿಕ್ ತ್ಯಾ ವಾಟೆನ್ ಜಾವ್ನ್ ಗೆತ್ ಹೊತ್ತೊ ಬಗುನ್, ತೆಕಾ ವಾಂಗ್ಡಿ ಹಿತ್ತೆ ಯೆ, ಬಸ್ ಮನುನ್ ಬಲ್ವುತಾನಾ, ತೊ ಯೆವ್ನ್ ಬಸ್ಲೊ. 2 ತವ್ಡೆಚ್ ನಸ್ತಾನಾ ತೆನಿ ಧಾ ಜಾಂನ್ತ್ಯಾ ಲೊಕಾಕ್ನಿ ಬಲ್ವುತಾನಾ, ತೆನಿಬಿ ಯೆವ್ನ್ ಬಸ್ಲೆ. 3 ತನ್ನಾ ತೆನಿ ತ್ಯಾ ಜಗ್ಗೊಳ್ಲ್ಯಾ ಸಮಂದಿಕಾಕ್ ಮೊವಾಬ್ ದೆಸಾಕ್ನಾ ಫಾಟಿ ಪರ್‍ತುನ್ ಯೆಲ್ಲ್ಯಾ ನವೊಮಿನ್ ಎಲಿಮೆಲೆಕಾಚ್ಯಾ ವಾಟ್ಯಾಚೆ ಸೆತ್ ಇಕುಚೆ ಮನುನ್ ಹಾಯ್. 4 ಮಿಯಾ ತುಕಾ ಸಾಂಗುಚೆ ಮನುನ್ ಹೊತ್ತೊ, ಹಿತ್ತೆ ಬಸಲ್ಲ್ಯಾ ಜಾಂನ್ತ್ಯಾಂಚ್ಯಾ ಇದ್ರಾಕುಚ್ ಇಕಾತ್ ಘೆ, ತುಕಾ ತೆ ಇಕಾತ್ ಘೆತಲೊ ಮನ್ ರ್‍ಹಾಲ್ಯಾರ್ ಘೆ, ನಾ ಹೊಲ್ಯಾರ್ ಮಾಕಾ ಸಾಂಗ್, ತಿಯಾ ಸೊಡ್ಲ್ಯಾರ್ ಮಿಯಾಚ್, ಅನಿ ಮಾಕಾ ಸೊಡುನ್ ಅನಿ ಕೊನ್ ಬಿ ತೆ ಇಕಾತ್ ಘೆವ್ಕ್ ಹೊಯ್ನಾ, ಮನ್ತಾನಾ ತೆನಿ ಮಿಯಾಚ್ ಇಕಾತ್ ಘೆತಾ ಮಟ್ಲ್ಯಾನ್. 5 ತನ್ನಾ ಬೊವಾಜಾನ್, "ತಿಯಾ ನವೊಮಿಕ್ನಾ ತೆ ಸೆತ್ ಇಕಾತ್ ಘೆತಲೆ ಹೊಲ್ಯಾರ್, ತೆ ಸೆತ್ ತಿಚ್ಯಾ ಮರುನ್ ಗೆಲ್ಲ್ಯಾ ಲೆಕಾಚ್ಯಾ ನಾವಾರ್ ವರ್‍ತಿಚ್ ರ್‍ಹಾಯ್ ಸಾರ್ಕೆ, ಅನಿ ತೆಚಿ ಬಾಯ್ಕೊ ಹೊಲ್ಲ್ಯಾ ಮೊವಾಬಾಂಚ್ಯಾ ರುತಾಕ್ ತಿಯಾ ಬಾಯ್ಕೊ ಕರುನ್ ಘೆವ್ಚೆ" ಮಟ್ಲ್ಯಾನ್. 6 ತ್ಯಾ ಜಗ್ಗೊಳ್ಲ್ಯಾ ಸಮಂದಿಕಾನ್, ತಸೆ ಹೊಲ್ಯಾರ್ ತಿ ಜಿಮಿನ್ ಇಕಾತ್ ಘೆವ್ನ್ ಮಿಯಾ ಮಾಜೆ ವಾರಿಸ್ದಾರ್ ನಾ ಕರುನ್ ಘೆವ್ಕ್ ತಯಾರ್ ನಾ, ತಿ ಜವಾಬ್ದಾರಿ ತಿಯಾಚ್ ವಾವುನ್ ಘೆ; ಮಾಜೆಕ್ಡೆ ಹೊಯ್ನಾ ಮಟ್ಲ್ಯಾನ್. 7 ಖಲೊ ತರ್ಬಿ ವಸ್ತ್ ಘೆತಾನಾ ನಾತರ್ ದಿತಾನಾ, ಗೊಸ್ಟ್ ಘಟ್ ಕರುಕ್ ಸಾಟ್ನಿ ಇಜ್ರಾಯೆಲ್ ಲೊಕಾತ್ನಿ ಪೈಲೆಚ್ಯಾನ್ ಯೆಲ್ಲಿ ಪದ್ದತ್ ಖಲಿ ಮಟ್ಲ್ಯಾರ್, ಘೆತಲ್ಯಾಕ್ ದಿತಲೊ ಅಪ್ನಾಚಿ ಹೊನಯಾ ದಿತಲೆ; ಹೆಜ್ಯಾ ವೈನಾ ಗೊಸ್ಟ್ ಘಟ್ ಹೊಲಿ ಮನ್ತಲೆ ಇಜ್ರಾಯೆಲ್ ಲೊಕಾ ಕಳ್ವುನ್ ಘೆತಾತ್. 8 ತಸೆಚ್ ತ್ಯಾ ಜಗ್ಗೊಳ್ಲ್ಯಾ ಸಮಂದಿಕಾನ್ ಬೊವಾಜಾಕ್, "ತಿಯಾಚ್ ಇಕಾತ್ ಘೆ" ಮನುನ್ ಅಪ್ನಾಚಿ ಹೊನಯಾ ಕಾಡುನ್ ದಿಲ್ಯಾನ್. 9 ತನ್ನಾ ಬೊವಾಜಾನ್ ಜಾಂನ್ತ್ಯಾಕ್ನಿ ಅನಿ ಹುರಲ್ಲ್ಯಾ ಲೊಕಾಕ್ನಿ, ಮಿಯಾ ಎಲಿಮೆಲೆಕ್, ಕಿಲ್ಯೊನ್, ಮಹ್ಲುನ್ ಹೆಂಚಿ ಆಸ್ತಿ ನವೊಮಿಕ್ನಾ ಘೆಟ್ಲೊ, ಹೆಕಾ ತುಮಿಚ್ ಸಾಕ್ಷಿ ಹೊವ್ನ್ ಹಾಸಿ. 10 ಸೆತ್ಯಾಚ್ಯಾ ಖಾತ್ಯಾವರ್‍ತಿ ಮರುನ್ ಗೆಲ್ಲ್ಯಾ ಮಹ್ಲುಚ್ಯಾ ನಾವಾವರ್‍ತಿ ರಾವ್ನ್ ತೆಜ್ಯಾ ಸಮಂದಿಕಾತ್ನಿ ಅನಿ ಗಾಂವಾತ್ನಿ ತೆಂಚಿ ಪಿಳ್ಗಿ ಹುರಿಸಾರ್ಕೆ ಮೊವಾಬಾಂಚಿ ತೆಚಿ ಬಾಯ್ಕೊ ರುತಾಕ್ ಬಾಯ್ಕೊ ಕರುನ್ ಘೆಟ್ಲೊ. ಹೆಕಾ ತುಮಿಚ್ ಸಾಕ್ಷಿ ಹೊವ್ನ್ ಹಾಸಿ. 11 ತನ್ನಾ ಗಾಂವಾಚ್ಯಾ ಯೆಸಿತ್ ಬೈಟೆಕ್ ಕರ್‍ತಲ್ಯಾ ಜಾಗ್ಯಾರ್ ಬಸಲ್ಲ್ಯಾ ಸಗ್ಳ್ಯಾ ಲೊಕಾನಿ ಅನಿ ಜಾಂನ್ತ್ಯಾನಿ, "ಹೊಯ್ ಅಮಿ ಸಾಕ್ಷಿ ಹಾಂವ್, ಸರ್ವೆಸ್ಪರ್ ಇಜ್ರಾಯೆಲಾಚೆ ಘರಾನ್ ಭಾಂದಲ್ಲ್ಯಾ ರಾಹೆಲ್, ತಿಯಾ ಲೆಯಾ ಮನ್ತಲ್ಲ್ಯಾ ಬಾಯ್ಕೊ ಮನ್ಸಿ ಸಾರ್ಕೆಚ್ ತುಜ್ಯಾ ಘರಾಕ್ ಯೆತಲ್ಯಾ ಹ್ಯಾ ಬಾಯ್ಕೊ ಮನ್ಸಿಕ್ ಬಿ ವಾಡ್ವಳ್ಕಿ ಕರುಂದಿತ್ ಎಪ್ರಾತಾತ್ ವಾಡ್ವಳ್ಕಿ, ಬೆತ್ಲೆಹೆಮಾತ್ ನಾವ್ ಖಮ್ವು. 12 ಸರ್ವೆಸ್ಪರಾನ್ ಹ್ಯಾ ಬಾಯ್ಕೊ ಮನ್ಸಿಚ್ಯಾ ವೈನಾ ತುಕಾ ದಿತಲ್ಯಾ ಪೊರಾಕ್ನಿಬಿ ತುಜೆ ಘರ್ ಜುದಾಕ್ ತಾಮರಾಕ್ನಾ ಉಪಾಜಲ್ಲ್ಯಾ ಪೆರೆಚಾಚ್ಯಾ ಘರಾಕ್ ಸಮಾ ಹೊವ್ನ್ ರ್‍ಹಾಂವ್ದಿತ್."

ಬೊವಾಜ್ ಅನಿ ತೆಚಿ ಪಿಳ್ಗಿ

13 ಬೊವಾಜಾನ್ ರುತಾಕ್ ಬಾಯ್ಕೊ ಕರುನ್ ಒಪ್ಪುನ್ ಘೆವ್ನ್, ಮಿಳ್ತಾನಾ ಸರ್ವೆಸ್ಪರಾಚ್ಯಾ ದಯಾನ್ ತಿ ಗರ್‍ವಾರ್ ರ್‍ಹಾವ್ನ್ ಎಕ್ ಲೆಕ್ ಉಪಜ್ಲೊ. 14 ತನ್ನಾ ಬಾಯ್ಕೊ ಮನ್ಸಿಯಾನಿ ನವೊಮಿಕ್, ಹ್ಯಾ ಎಳಾರ್ ತುಕಾ ವಾರಿಸ್ದಾರ್ ದಿಲ್ಲ್ಯಾ ಸರ್ವೆಸ್ಪರಾಕ್ ಹೊಗ್ಳಾಪ್ ಹೊಂವ್ದಿತ್, ಹ್ಯೊ ಲೆಕ್ ಇಜ್ರಾಯೆಲಾಚ್ಯಾ ದೆಸಾತ್ ನಾವ್ ಹೊಲ್ಲೊ ಹೊಂವ್ದಿತ್. 15 ಹ್ಯೊ ತುಕಾ ನವೊ ಜಿವನ್ ದಿತಾ; ಮ್ಹಾತಾರ್‍ಯಾ ಎಳಾರ್ ತುಕಾ ರಾಕ್ವನ್ ಕರ್‍ನಾರೊ ಹೊವ್ನ್ ರ್‍ಹಾತಾ, ತುಕಾ ಲೈ ಪ್ರೆಮ್ ಕರ್‍ತಲ್ಯಾ ಸಾತ್ ಲೆಕಾಂಚ್ಯಾ ಕಿಂತಾಬಿ ಬರಿ ಹೊಲ್ಲ್ಯಾ ತುಜ್ಯಾ ಸುನ್ನೆನ್ ಹೆಕಾ ಜಲಮ್ ದಿಲಾ, ಮಟ್ಲ್ಯಾನಿ. 16 ತ್ಯಾ ಲೆಕಾಕ್ ನವೊಮಿನುಚ್ ಹೊಟ್ಟ್ಯಾತ್ ಥವ್ನ್ ಘೆವ್ನ್ ಬಾಳಗ್ಲಿನ್. 17 ಆಜುಭಾಜುಚ್ಯಾ ಬಾಯ್ಕೊಮನ್ಸಿಯಾನಿ ನವೊಮಿಕ್ ಎಕ್ ಲೆಕ್ ಉಪಜ್ಲೊ ಮನುನ್ ತೆಕಾ ಒಬೆದ್ ಮನುನ್ ನಾವ್ ಥವ್ಲ್ಯಾನಿ, ಹೊ ಜೆಸ್ಸೆಚೊ ಬಾಬಾ ಜೆಸ್ಸೆ ದಾವಿದಾಚೊ ಬಾಬಾ. 18 ಪೆರೆಚಾಚಿ ವಂಶಾವಳಿ, ಪೆರೆಚಾಕ್ ಹೆಚ್ರೊನ್ ಉಪಜ್ಲೊ; 19 ಹೆಚ್ರೊನಾಕ್ ರಾಮ್ ಉಪಜ್ಲೊ; ರಾಮಾಕ್ ಅಮ್ಮಿನಾದಾಬ್ ಉಪಜ್ಲೊ; 20 ಅಮ್ಮಿನಾದಾಬಾಕ್ ನಹಶೊನ್ ಉಪಜ್ಲೊ; ನಹಶೊನಾಕ್ ಸಲ್ಮೊನ್ ಉಪಜ್ಲೊ; 21 ಸಲ್ಮೊನಾಕ್ ಬೊವಾಜ್ ಉಪಜ್ಲೊ; ಬೊವಾಜಾಕ್ ಒಬೆದ್ ಉಪಜ್ಲೊ, 22 ಒಬೆದಾಕ್ ಜೆಸ್ಸೆ ಉಪಜ್ಲೊ, ಜೆಸ್ಸೆಕ್ ದಾವಿದ್ ಉಪಜ್ಲೊ.