1 Na kyɛbɔ adiifoɛ bɔ bɛnga nahorɛ wale bɛ nu ne, sɔ ala yeɛ akyerɛkyerɛfoɛ bɔ bɛnga nahorɛ kɔwa ɛmɔ nu ɔ. Bekowia bɛ nwo bɛkɔɔtete kue bɔ ɔsɛkye mmenia, bɛkɔha kyɛ bɛnze bɛ wura bɔ ɔtɔle bɛ ne po, na ɛhe kɔmaa bɛkɔsɛkye bɛ ndɛ. 2 Mmeni pee koli bɛ san-nza-mmra ne si, na ɛhe kɔmaa bɛkɔkeka edwirɛ tɛɛ bɛkɔfa nahorɛ nanwo. 3 Bɛ nye bɔ ɔboro nikye nati, bɛkɔfa nnaka-naka so bɛkodidi ɛmɔ nwo. Nakoso bɛ atemmuo bɔ ɔla berɛ fi tete ne, ɔngɔhyɛ, na kyɛbɔ ɔte biala ne, bɛkɔsɛkye bɛ.

4 Abɔfo bɔ bɛyɛle bɔne ne, Nyameɛ amva bɛ nwo angyɛ bɛ, mmom ɔtole bɛ guale Tartarus, ná wafa kyenyi wakyekye bɛ wagua awosii tumm nu, bɔ bɛnwondɛ atemmuo. 5 Ná tete wiase ne, wamva bɛ nwo wangyɛ bɛ, mmom ɔmaa nzue yi sɛkyele amumuyɛfoɛ ne; nakoso olɛle Nowa bɔ ɔhane tenenee nwo nzɛmba ne, ɔne mmenia nzoo bɔ bɛboka ye so ne. 6 Afei, obuli Sodom ne Gomora nguro ne fɔ sɛkyele bɛ maa bɛkakyile nzoen, na wafa wayɛ sɛnnahɔ wama amumuyɛfoɛ. 7 Ná ɔpepɛ lɛle teneneeniɛ Lot bɔ amumuyɛfoɛ ne san-nza-mmra ne maa ye nwo yerɛ-yerale ye ne. 8 Ofikyɛ daa biala mmenia bɔ né teneneeniɛ ne te bɛ nu ne, bɛ nneyɛɛ tɛɛ bɔ né onwu ye na ɔte ne, ɔmaa ye kra bɔ ɔtengyɛ ne nwo yerɛ-yerale ye. 9 Ɛhe amukoraati maa yɛnwu kyɛ, Awurade se kyɛbɔ okole bɛ bɔ bɛsuro ye ne kofi nzɔhwɛ nu, ná waboɔboa bɛ bɔ bɛndengyɛ ne noa wama atemmuda. 10 Ye titire ne, bɛ bɔ bafa basie bɛ nye so kyɛ bɛkogua mmenia nwo fiɛ, na bɛbu tumidie animtia ne.

Sɔ mmenia ne nye yɛ se, bɛdi b'ahone so dwirɛ, na bɛnzuro kyɛ bɛkɔha edwirɛ bekotia bɛ bɔ bɛle anuonyam ne. 11 Ɔwɔ nu, abɔfo le tumi ne anwoserɛ paa, nakoso bɛngeka edwirɛ bɛmva bɛmmu bɛ atɛn, ofikyɛ bɛsuro Awurade.

12 Sɔ mmenia hemɔ te kyɛ ngaka bɔ adwene nne bɛ ti anu, ná atenga yeɛ bɛfa bɛyɛ bɛ nikye ne; bɛ deɛ ala yeɛ ole kyɛ bɛhye bɛ na bɛhu bɛ. Nikye biala bɔ bɛnde yebo ne,* bɛdwudwo betia. Atee bɔ bɛnate so nala yeɛ ɔkɔsɛkye bɛ ɔ. 13 Na bekonya bɛ bɔne nanwo akatua.

Bɛ nye gye ye nwo kyɛ bɛkɔbɔ ahohwibra eyia ketee. Bɛte dɛm ne ngekayɛɛ, na bɔ bɛkuro ala yeɛ ole kyɛ, bɛne ɛmɔ kɔbonu kodidi, na bafa ngyerɛkyerɛ bɔ ɔtte nahorɛ balaka-laka ɛmɔ. 14 Bɛle anyeɛ bɔ ɔsɛkye agyaa, bɛngora bɛndwe bɛ nwo bɛmvi bɔne nwo, na bɛlaka-laka bɛ bɔ bɛ bo timunne ne. Bɛ nye boro nikye, na bɛte ngwalaa bɔ badome bɛ. 15 Bayakyi nahorɛ atee ne, na bamini baafa Beor awa Balaam atee so, ye yeɛ né ye nye gye ye nwo kyɛ okonya akatua kofi bɔne nu ne. 16 Nakoso, bɛhwili ye nyunu wɔ ye mmerato nanwo, kaka bɔ ondwudwo fale sona konvi dwudwo hyirele ye, na osili sɔ diifo ne ngwaseasɛm né atee.

17 Sɔ mmenia hemɔ te abura bɔ nzue nne nu, ɔne munungum bɔ mvrama bɔ ye huu kɔ. Bɛ yeɛ basiesie awosii kabii bato bɛ berɛ ne. 18 Ofikyɛ bɛkeka edwirɛ mbiri-mbiri bɔ mvasoɛ biala nne so, bɛ́fa anwoɔnaen akɔnnɔ bɛlaka-laka mmenia, na bɛ bɔ bahwe bɛ nwo bafi abɔnefoɛ nwo ne, bɛfa b'ahohwibra ne bɛtwetwe bɛ. 19 Bɛhyɛ bɛ bɔ kyɛ bɛkɔma bɛ fahodie, nakoso bɛ bɔbɔ, bayɛ ngoaa bama nningyein bɔ waporɔ. Ofikyɛ sɛ nikye bie di ebie so a, sona ne ayɛ akoaa ama sɔ nikye ne. 20 Bɔ ɔte yeɛ ole kyɛ, sɛ bɛnate Awurade ne Agyenkwa Yesu Kristo nwo nimdeɛ so bɛtete bɛ nwo bɛfi wiase né abrabɔ fiɛ nanwo, na nziɛn, besa bɛfa bɛ nwo bɛkowura sɔ abrabɔ nanu maa ɔfa bɛ yɛ ngoaa a, ɔmaa bɛ tebea ne sɛkye koraa tra daa deɛ ne. 21 Ye de, sɛ bannwu tenenee atee ne a, ahaa ɔte pa tra kyɛ bekonwu ye, na basa bahwe bɛ nwo bafi ahyɛdeɛ krongron bɔ bɛfa bɛmane bɛ nanwo. 22 Ɔba sɔ a, né bamaa sɔ anyandera he ayɛ nahorɛ: "Kyea fe a, osa kodi," na "Ebia prako a, osa kɔbo asɛaa."