1 Paul, bɔ Nyameɛ adaworoma nde Yesu Kristo akoaa, kyɛbɔ ngoa nwo bɔhyɛ bɔ ɔnate Kristo Yesu so ne te ne,

2 mefa krataa he mekɔma mma Timoteo bɔ medɔ ye ne:

Adom, anwunvoin, ne asomdwie bɔ ofi yɛ Baba Nyameɛ ne y’Awurade Yesu Kristo berɛ ha wɔ.

3 Meda Nyameɛ bɔ mefa ahonim pa me so ye, kyɛbɔ me baba mɔ yɛle ne ase paa. Na daa biala mekaye wɔ wɔ me mbaeɛ nu eyia ne kɔngɔen. 4 Sɛ mekaye ɛmoen bɔ ɛtele ne a, ɛyɛ a né mafe wɔ, na mepena kyɛ menwu wɔ, ná wamaa me nye agye. 5 Ofikyɛ mekaye gyidie bɔ nyaatwom nne nu bɔ ne ɔwɔ wɔ nana Lois ne wɔ maame Yunise nu ne, na medɛ́ medi kyɛ sɔ gyidie ne bie wɔ wɔ nu. 6 Yeti mekaye wɔ kyɛ, Nyameɛ akyɛdeɛ bɔ mvale me sa nguale wɔ so maa enyane ye ne, ma ɔsɔ te kyɛ see. 7 Ofikyɛ Nyameɛ amma yɛ esuronyi honhom, mmom honhom bɔ ɔfa mane yɛ ne maa yɛnya tumi, ɔdɔ, ne adwene bɔ enu la berɛ.

8 Yeti, adanzeɛ bɔ edi fa Awurade nwo ne, nnɛfɛle ye nwo; na me, bɔ Kristo ti nna prizin ne koso, nnɛfɛle me nwo. Mmom fa wɔ nwo to Nyameɛ tumi so, na nwu nzɛmba nanwo amaneɛ ne bie. 9 Ye yeɛ olɛle yɛ, na wafrɛ yɛ kyɛ yɛɛyɛ akrongronfoɛ, nná yɛ nyumaa pa ti yeɛ ɔfrɛle yɛ ɔ, mmom ye bɔbɔ ye atirimbɔ ne ye adom ti ɔ. Sɔ adom ne yeɛ wafa walo yɛ wɔ Yesu Kristo nu fi teteete ne. 10 Nakoso kesaalae de, wamaa yanwu sɔ adom ne pefee, nate y’Agyenkwa, Kristo Yesu bɔ wala ye ali naso. Ye yeɛ ɔnate nzɛmba naso aye ewue afi berɛ, na wamaa yanwu kyɛbɔ yekonya ngoa ne bɔ ɔmborɔ ne. 11 Sɔ nzɛmba nati yeɛ bɛyele me kyɛ ebie bɔ ɔka nzɛmba, somafoɛ, ne kyerɛkyerɛniɛ ne. 12 Ɛhe ati yeɛ menwu amaneɛ sɔ ne, nakoso menvɛle. Ofikyɛ mese bɔ medɛ́ Ye medi ne, na mese kyɛ bɔ mafa mawura ye sa ne,* ɔkɔbɔ ye nwo waen koodwu sɔ kyẽa ne. 13 Edwirɛ pa bɔ ɛte fili me berɛ ne, kɔ so fa gyidie ne ɔdɔ bɔ ele ye wɔ Kristo Yesu nu ne tira nu yé. 14 Nikye pa bɔ bafa bawura wɔ sa ne, sɔ nu yé nate honhom krongron bɔ ɔwɔ yɛ nu naso.

15 Ɛse kyɛ bɛ bɔ bɛwɔ Asia mandanu wa namukoraati aye me nu, Figelo ne Hermogene po boka sɔ mmenia naso. 16 Awurade nwu Onesiforo awurofoɛ anwunvo, ofikyɛ bɛmaa me nwo tɔle me paa, na banvɛle kyenyi bɔ bafa bakyekye me nanwo. 17 Bɔ ɔte yeɛ ole kyɛ, oodwuli Roman ne, ɔpenane me tonn oodwuli kyɛ onwuni me ɔ. 18 Mesrɛ Nyameɛ * kyɛ, ɔma Awurade nwu ye anwunvo sɔ kyẽa ne. Na wɔ koso, ɛse bɔ ɔyɛ mane me wɔ Efeso namukoraati.