1 Ngyi Nyameɛ ne Kristo Yesu bɔ okobu ateasefoɛ ne awufo mukoraati atɛn mmerɛ bɔ bala ye ali, ɔne mmerɛ bɔ wawa ye Ahennie nu ne nyunu mehyɛ wɔ kitii kyɛ: 2 Ka edwirɛ ne, yere wɔ nwo ka ye wɔ mmerɛ pa ne mmerɛ tɛɛ nu, ka mmenia nyunu, tengyɛ bɛ so, na tu bɛ fo, nakoso fa aboterɛ ne ngyerɛkyerɛ yɛ ye mukoraati. 3 Ofikyɛ mmerɛ bie kɔwa bɔ mmenia nngotie ngyerɛkyerɛ pa ne, mmom bɛkoli b'akɔnnɔ si, na bapena akyerɛkyerɛfoɛ bɔ bɛkɔha edwirɛ bɔ ɔkɔyɛ bɛ so anu fɛ ɔ. 4 Yeti bɛngotie nahorɛ ne kõ, edwirɛ bɔ ɔtte nahorɛ* mmom yeɛ bɛkotie ɔ.

5 Nakoso wɔ de, ma wɔnye la berɛ wɔ nikye biala nu, mia wɔnye nwu amaneɛ, yɛ asɛnka adwuma ne, yɛ wɔ som adwuma ne pɛpɛɛpɛ. 6 Ofikyɛ kesaalae de, bɛhwie me kyɛ nzãa afɔleɛ, na ɔngɔhyɛ né manya me nwo matete. 7 Maho koɛ pa ne, matu mirika ne mayie, masɔ gyidie nanu. 8 Afei de, bɔ ɔla berɛ onwondɛ me yeɛ ole tenenee abotire, bɔ Awurade, temmufoɛ bɔ obu atɛn tenenee ne kɔfa kɔma me kyɛ akatua sɔ kyẽa ne, nná me ngome, mmom bɛ bɔ bɛnea atee paa kyɛ bɛkɔla ye ali namukoraati.

9 Bɔ mmɔden bra me nwo wa ndɛ. 10 Ofikyɛ wiase nanwo dɔ ti, Dema ayakyi me berɛ ahɔ Tɛsalonika, Kreske ahɔ Galatia, yeɛ Tito ahɔ Dalmatia. 11 Luka ngome yeɛ ɔwɔ me nwo wa ɔ, ɛne Marko bra, ofikyɛ ɔboka me paa wɔ asɛnka adwuma nanu. 12 Tikiko koso, masoma ye kyɛ ɔhɔ Efeso. 13 Sɛ́ ɛba a, fa m'atadeɛ bɔ mefa mekõ ayirɛ ne berɛ me, nyakyile ye wɔ Karpo berɛ wɔ Troa, na fa nwomaa bɔ babobo ne koso bra, ye titire ne, ngaka nwomaa deɛ ne. 14 Alɛzanda bɔ ɔyɛ kɔɔbere nwo adwuma ne ayɛ me bɔne paa. Awurade kotua ye kerɛ kyɛbɔ ye nneyɛɛ te ɔ. 15 Wɔ koso, ɛyɛ a nea wɔ nwo ye wɔ ye nwo, ofikyɛ odwɔso tiale edwirɛ bɔ yɛka ne paa. 16 Mmerɛ bɔ oli moa bɔ ngɔle kɔɔto kyɛ mekwaaye me nwo noa ne, ebiala amma angyina me si, bɛ mukoraati bɛyakyile me nu. Nnɛmaa bɛfa ye nwo asodi bɛto bɛ so. 17 Ofikyɛ Awurade gyinane me si mane me anwoserɛ, kyɛbɔ ɔkɔyɛ a ɔkɔfa me so kɔyɛ ɔsom adwuma ne pɛpɛɛpɛ, na wamaa maen-maen namukoraati ate edwirɛ ne. Yeti olɛle me fili gyata noa nu. 18 Awurade kole me kofi nikye tɛɛ biala nu, na ɔkɔfa me kɔhɔ Ye anwuro Ahennie nanu. Anuonyam ha ye daa, daa. Amen.

19 Kyea Prisila ne Akwila, ne Onesiforo awurofoɛ ma me.

20 Erasto hale Korinto, na né Trofimo afokyɛ, yeti nyakyile ye wɔ Mileto.

21 Bɔ mmɔden kyɛ ɛkɔwa koodwu wa kora ne ayirɛ ne awa. Eubulo nwa ɔkyea wɔ, yeɛ Pude, Lino, Klaudia ne aliemaa mɔ mukoraati koso nwa bɛkyea wɔ.

22 Awurade boka wɔ so wɔ suban pa bɔ ɛda ye ali nanwo. Ye adom ha ɛmɔ.