1 "Tworɔ kɔma Sardi asafo n’abɔfo ne kyɛ:

Bɔ ole Nyameɛ honhom nzoo ne nzramaa nzoo ne nwa nyoo:

‘Mese wɔ adwuma; alɛ́ dumaa kyɛ ɛte ase, nakoso awu. 2 Ma wɔ nye la berɛ; ná bɔ waha bɔ ahaa owu ne, maa enu yɛ se. Ofikyɛ menwu ye kyɛ, me Nyameɛ nye so de, ɛyielle w’adwuma ne. 3 Yeti, kaye bɔ enyane ye na ɛtele ne; di so na sakra. Sɛ andingye a, ngɔwa kyɛ awieniɛ, na ɛngonwu mmerɛ bɔ ngɔwa wɔ so ne po. 4 Nakoso ɛle mmenia kaa wɔ Sardi bɔ bɛ de bɛyɛlle b’atadeɛ nanu fiɛ, na ɔnate kyɛ bɛfata nati, bɛkowura ndadeɛ fufue na bɛne me anate. 5 Bɔ okoli ngunim ne, bɛkowura ye atadeɛ fufue, na mengɔkyikyi ye dumaa mengofi ngoa nwomaa nanu, mmom ngɔbɔ ye dumaa wɔ me Baba ne ye abɔfo nemɔ nyunu.

6 Bɔ ole asoɛ ne, ma otie bɔ honhom ne ka kyire asafo nemɔ ne.’

7 "Tworɔ kɔma Filadefia asafo n’abɔfo ne kyɛ:

‘Bɔ ɔte krongron na odi nahorɛ, bɔ otira David nzafoa, na obukye a ebie ngora ndonu, ná oto nu koso a ebie ngora mmukye ne nwa nyoo:

8 "Mese wɔ adwuma. Nea, mafa anoa bɔ babukye masie wɔ nyunu, sɔ anoa ne, ebiala ngɔhora nu to. Mese kyɛ ɛlle anwoserɛ pa, nakoso ali me dwirɛ so, na ɛpolle me dumaa. 9 Nea, bɛ bɔ bɛta Satan si ne,* ngondombofoɛ bɔ bɛnwa bɛte Yudafoɛ nakoso ɔtte nahorɛ ne, ngɔmaa bɛkɔwa wɔ nyunu bɛkɔɔkoto wɔ gya bo, na bekonwu kyɛ, mekuro wɔ dwirɛ. 10 Na ɔnate kyɛ ali me dwirɛ bɔ ɔfa animia nwo naso nati, me koso, nzɔhwɛ mmerɛ bɔ ɔba wiase mukoraati basɔ aseɛ he asofoɛ nea ne, ngɔbɔ wɔ nwo waen ngofi ye nwo. 11 Meyɛ ndɛ meba. Tira bɔ ɛle ye nanu yé, na ebiala anne wɔ abotire ne amvi wɔ sa nu. 12 Bɔ okoli ngunim ne, ngɔmaa ɔkɔyɛ pila wɔ me Nyameɛ asɔre awuro berɛ na ɔngofi berɛ ngɔfite kõ. Na ngɔhworɔ me Nyameɛ dumaa, me Nyameɛ kuro bɔ yeɛ ole Yerusalem foforɛ bɔ ofi me Nyameɛ berɛ wɔ anwuro odwu ne dumaa, ɔne me dumaa foforɛ ne ngogua ye nwo.

13 Bɔ ole asoɛ ne, ma otie bɔ honhom ne ka kyire asafo nemɔ ne."’

14 "Tworɔ kɔma Laodikea asafo n’abɔfo ne kyɛ:

‘Amen ne, adanzeniɛ bɔ odi nahorɛ na ɛkora fa wɔ nwo to ye so, Nyameɛ abɔdeɛ ahyɛaseɛ ne nwa nyoo:

15 "Mese wɔ adwuma; wɔ ahɔ a ɛnyɛ hye, na wɔ koso ɛtte frɔlɔɔ. Ɔhale me ngome a, ahaa ɛyɛ hye anaa ɛte frɔlɔɔ. 16 Nakoso ɔnate kyɛ ayɛ nnedɛɛ-nnedɛɛ, na wɔ ahɔ a ɛnyɛ hye, ná koso ɛtte frɔlɔɔ nati, ngɔfe wɔ ngofi me noa nu." 17 Ofikyɛ ɛka kyɛ "Nde sikaniɛ, nne agyapadeɛ pee, na menhia hwee." Nakoso ɛnze kyɛ sãa wɔ dwirɛ yɛ anwunvo, wɔ nwo yɛ aworabɔ, wahia wɔ, wɔ nye asi, ná ɛla adagya. 18 Yeti metu wɔ fo, tɔ sikaa kɔkorɛ bɔ bɛ afa bafa see nu fi me berɛ, kyɛbɔ ɔkɔyɛ a ɛkɔyɛ sikaniɛ, na tɔ ndadeɛ fufue, bɔ ɛkɔfa kowura kɔkata wɔ adagya naso ná amvɛle. Na tɔ ayire bɔ ɛkɔfa kɔyɛ wɔ nye naso ná ahora anwu nikye. 19 Bɛ bɔ mekuro bɛ dwirɛ namukoraati, metwi bɛ nyunu na metwe bɛ so. Yeti maa wɔ nye boro, na sakra.’ 20 ‘Nea, ngyi anoa ne si mebɔ nu. Sɛ ebie te me konvi na obukye me a, ngɔwa ye awuro, ná mene ye adidi, na ye koso ɔne me adidi. 21 Bɔ okoli ngunim ne, ngɔmaa ɔne me kɔtena me bia* naso, kyɛbɔ me koso nnili ngunim, na mene me Baba tenane ye bia naso ne.

22 Bɔ ole asoɛ ne, ma otie bɔ honhom ne ka kyire asafo nemɔ ne.’ "