1 Ɛhemɔ si ne, nwuni abɔfo nna kyɛ bɛgyigyi aseɛ ne ahameɛ nna ne, na né basosɔ aseɛ so mvrama nna nanu yé paa, kyɛbɔ ɔkɔyɛ a, mvrama biala ngɔbɔ ngɔfa aseɛ ne, ɛpo ne, anaa mmakaa nemɔ so. 2 Nza nwuni abɔfo foforɛ kyɛ ofi eyia afiteleɛ ɔfo kɔ anwuro, na ne otira Nyameɛ teasefoɛ ne stamp ne. Na ɔteane nu ha hyirele abɔfo nna bɔ bafa bawura bɛ sa kyɛ bɛsɛkye aseɛ ne ɛpo ne kyɛ: 3 "Nnɛmɔ ha aseɛ ne, ɛpo ne, anaa mmakaa ne ma oodwu kyɛ yɛkɔhyɛ Nyameɛ ngoaa nemɔ nzorɛ wɔ bɛ nwoma so ɔ." 4 Na ndele bɛ bɔ bahyɛ bɛ nzorɛ ne dodoɔ, mmenia 144,000 yeɛ bɛhyɛle bɛ nzorɛ wɔ Israel mmaa mmusuakue namukoraati nu ɔ.

5 Yuda abusua nu, mmenia 12,000;

Ruben abusua nu, mmenia 12,000;

Gad abusua nu, mmenia 12,000;

6 Aser abusua nu, mmenia 12,000;

Naftali abusua nu, mmenia 12,000;

Manase abusua nu, mmenia 12,000;

7 Simeon abusua nu, mmenia 12,000;

Lewi abusua nu, mmenia 12,000;

Isakar abusua nu, mmenia 12,000;

8 Sebulun abusua nu, mmenia 12,000;

Yosef abusua nu, mmenia 12,000;

Bengyamin abusua nu, mmenia 12,000 yeɛ bɛhyɛle bɛ nzorɛ ɔ.

9 Ɛhemɔ si ne, ndole me nye, na nwuni mmeni lɔen kandinga bie bɔ sona biala ngɔhora bɛka, bɔ bɛfi maen, mmusuakue, mmenia, ne dwudwolɛ biala nu, kyɛ bɛgyi ɔhene bia ne, ɔne Boan Ba ne nyunu. Ne sɔ mmenia nemɔ wuro-wura ndadeɛ tendee fufue, na né bɛtire-tira ɛberɛ. 10 Na bɛteane nu serɛ-serɛ kyɛ:

"Yɛ Nyameɛ bɔ ɔte ɔhene bia naso ne,

ɔne Boan Ba ne yeɛ bɛkole yɛ ngoa ɔ."

11 Na abɔfo namukoraati pɛle ɔhene bia ne, mbanyi ne ateasefoɛ nna nanwo yiale, na bɛfale bɛ nyunu bɛ butuli ɔhene bia ne nyunu bɛsõne Nyameɛ, 12 yeɛ bɛhane kyɛ: "Amen! Ayɛyie, anuonyam, nyanza, asennaa, nidie, tumi, ne anwoserɛ te yɛ Nyameɛ deɛ daa daa. Amen."

13 Afei, mbanyi nanu kõ bisale me kyɛ: "Nwamɔ yeɛ bɛwura ndadeɛ tendee fufue ne, na bɛfi nisua?" 14 Yeti ɛberɛ ala yeɛ nga ngyirele ye kyɛ: "Me wura, ɛhe de, wɔ yeɛ ɛse ɔ." Na ɔha hyirele me kyɛ: "Ɛhemɔ yeɛ bafi ahohiehia kandinga nanu bafite ne, na bapo bɛ ndadeɛ maa wayɛ fufue hyɛnn wɔ Boan Ba ne mogya nanu. 15 Ɛhe ati yeɛ bɛgyi Nyameɛ bia* ne nyunu ne,

ná bɛsõ ye eyia ne kɔngɔen wɔ ye asɔre awuro berɛ ne.

Na bɔ ɔte ɔhene bia naso ne kɔtrɛ ye tɛnt nanu

maa ɔkɔkata bɛ so.

16 Ɛhɔen ne nzuhɔen ngɔhu bɛ kõ,

Sɔ ala yeɛ eyia ngɔyera bɛ,

na ahuhuro biala ngɔhu bɛ.

17 Ofikyɛ Boan ba bɔ ɔwɔ ɔhene bia ne afia ne kɔnea bɛ.

Na okoli bɛ nyunu kɔhɔ nekaa bɔ ngoa nzue pukye fi ne.

Na Nyameɛ kokyikyi bɛ nye mmoen mukoraati."