1 Na nwuni abɔfo foforɛ bɔ ole anwoserɛ paa kyɛ odwu fi anwuro, ne wafa munungum wahra, na nyangondoen wɔ ye ti so, né ye nyunu te kyɛ eyia, na ne ye gya te kyɛ see pila. 2 Né otira nwomaa kamba bie bɔ basangye nu wɔ ye sa nu. Na ɔfale ye gya famaa siele ɛpo nu, yeɛ ɔfale bɛen ne siele aseɛ so. 3 Na ɔfale konviɛ kandinga teane nu te kyɛ gyata bɔ ɔbobɔ nu ne. Ɔteane nu ne, agralaa nzoo ne dwudwole. 4 Agralaa nzoo ne dwudwole ne, ahaa metworɔ, nakoso ndele konviɛ bie mvili anwuro kyɛ: "Edwirɛ bɔ agralaa nzoo ne hane ne, fa fea, nnɛ tworɔ." 5 Na abɔfo bɔ nwuni ye kyɛ ogyi aseɛ ne ɛpo so ne mane ye sa famaa so hɔle anwuro, 6 na ɔtale bɔ ɔte ase daa daa, bɔ ɔbɔle anwuro ne enu nningyein, aseɛ ne enu nningyein, ne ɛpo ne enu nningyein ne ndaen kyɛ: "Ɔngɔ nwondɛ kõ. 7 Mmom, kyɛ dee bɔ abɔfo bɔ ɔtɔ so nzoo ne hu ye awɛen* ne, né Nyameɛ dwirɛ krongron bɔ wafea, bɔ ɔhane ye nwo dwirɛ hyirele ye bɔbɔ ye ngoaa adiifoɛ ne awa nu."

8 Na konviɛ bɔ nde mvili anwuro ne, osa ne me dwudwole bieku, na ɔhane kyɛ: "Kɔ abɔfo bɔ ogyi ɛpo ne aseɛ so ne berɛ, na kole nwomaa bɔ enu asangye, bɔ ɔwɔ ye sa nu ne." 9 Na ngɔle abɔfo ne berɛ, yeɛ nga ngyirele ye kyɛ, ɔfa nwomaa kamba ne ma me. Yeɛ ɔha hyirele me kyɛ: "De, na di, na ɔkɔyɛ wee-wee wɔ wɔ kunu, nakoso wɔ noa nu de, ɔkɔyɛ fɛ kyɛ woɛ." 10 Na nnɛle nwomaa kamba ne mvili abɔfo ne sa nu nnili, na ɔyɛle me noa nu fɛɛ-fɛɛ kyɛ woɛ, nakoso nni nyiele ye, ɔyɛle wee-wee wɔ me kunu. 11 Na bɛha bɛhyirele me kyɛ: "Odikyɛ ɛhyɛ mmenia, maen, dwudwolɛ, ne ahemvo pee nwo ngɔm bieku."