1 Afei nwuni abɔfo bie kyɛ ofi anwuro odwu ba ase, né otira kumaa kuron-kuron né nzafoa ne kyenyi kandinga bie wɔ ye sa nu. 2 Na ɔhyele ɛwoo suronyi-suronyi ne, sɔ daa tete ɛwoo, bɔ yeɛ ole Abɔnzam ne Satan ne, na ɔkyekyele ye afoɛ 1,000. 3 Na ogyili ye tole kumaa nanu, na ɔtole nu fale nikye tale ye noa, kyɛbɔ ɔkɔyɛ a, ɔngɔlaka-laka maen-maen ne kõ, kodwu kyɛ afoɛ 1,000 ne kɔwa awieɛ ɔ. Ɛhe si ne, odikyɛ bɛyakyi ye kaa.

4 Afei nwuni ɔhene bia* biemɔ, na bɛmane bɛ bɔ bɛtete so nemɔ tumi kyɛ bɛbu atɛn. Na nwuni bɛ bɔ ɔnate Yesu nwo adanzeɛ ne Nyameɛ dwirɛ nati bɛpepɛle bɛ ti nemɔ kra, ɔne bɛ bɔ bannzo kaka ne anaa ye statu ne, ná banne ahyɛnsodeɛ ne bie wɔ bɛ nwoma so anaa bɛ sa nwo ne. Bɛwale ngoa nu bieku, na bɛne Kristo lili hene afoɛ 1,000. 5 Nakoso awufo ngaa nemɔ de, bamma ngoa nu tonn maa afoɛ 1,000 ne wale awieɛ. Ɛhe yeɛ ole ewue tingyele bɔ oli moa ne. 6 Ebiala bɔ onyane ewue tingyelɛ bɔ oli moa ne bie ne, ole anigye* na ɔte krongron; ofikyɛ ewue bɔ ɔtɔ so nyɔ ne, olle bɛ so tumi. Mmom bɛkɔyɛ asɔfo bɛkɔma Nyameɛ ne Kristo, na bɛne ye koli hene afoɛ 1,000.

7 Afoɛ 1,000 ne so ala pɛ, bɛkɔye Satan bɛkofi prizin, 8 na okofite kɔɔlaka-laka maen-maen bɔ bɛwɔ aseɛ naso namukoraati, Gog ne Magog, ná waboɔboa bɛ noa wama koɛ ne. Ɛhemɔ dodoɔ te kyɛ ɛpo noa anweaa. 9 Bɛhɔle aseɛ naso nekaa biala, na bɛpɛle nekaa bɔ akrongronfoɛ nemɔ te ne kuro bɔ bɛdɔ ye nanwo beyiale. Nakoso see fili anwuro ɔɔyerale bɛ. 10 Na Abɔnzam bɔ ɔlaka-lakale bɛ ne, bɛgyili ye bɛtole see bɔ sɔfa wɔ nu nanu, nekaa bɔ ne kaka ne né ngondombo diifoɛ ne wɔ ne, na bɛkɔyɛ bɛ ayayade daa, eyia ne kɔngɔen.

11 Na nwuni ɔhene bia* fufue pirikua bie ne bɔ ɔte so ne. Na aseɛ ne anwuro nwati fili ye nyunu, na bannya nekaa bamma bɛ. 12 Na nwuni awufo, mmaa-mmaa ne atitire kyɛ bɛgyigyi ɔhene bia ne nyunu. Na bɛbukyele nwomaa* biemɔ nu, besa bɛbukyele nwomaa foforɛ nu, ɛhene yeɛ ole ngoa nwomaa ne. Na bɛgyinane edwirɛ bɔ bahworɔ ye wɔ nwomaa nemɔ nu naso bebule awufo nemɔ atɛn, kyɛbɔ bɛ nneyɛɛ te ɔ. 13 Na ɛpo yele awufo bɔ bɛwɔ nu ne wale, ná ewue ne Asieleɛ yele awufo bɔ bɛwɔ bɛ nu nemɔ wale, na bɛbule bɛ nu biala atɛn, kyɛbɔ ye nneyɛɛ te ɔ. 14 Na bɛgyili ewue ne Asieleɛ bɛguale see nanu. See ne yeɛ ole ewue bɔ ɔtɔ so nyɔ ne. 15 Afei koso, ebiala bɔ bannwu ye dumaa wɔ ngoa nwomaa nanu ne, bɛgyili ye bɛtole see nanu.