1 Na oogyinane anweaa bɔ ɔwɔ ɛpo ne noa naso. Na nwuni kyɛ kaka suronyi-suronyi bie fi ɛpo nanu ofite, né ole tiri nzoo ne mmɛen buru, na ne ahemotire buru bobɔ ye mmɛen nanwo, na mmusue dumaa wɔ ye ti nemɔ nwo. 2 Kaka suronyi-suronyi bɔ nwuni ye ne, né ɔte kyɛ sebɔ, nakoso ne ye gya te kyɛ kwabrafo gya, na né ye noa te kyɛ gyata noa. Na ɛwoo* ne fale ye anwoserɛ, ye bia,* ne ye tumi kandinga né mane kaka* ne. 3 Na nwuni kyɛ ye ti nemɔ nu kõ de, wayɛ kyɛ ɛnwa bapira ye paa, nakoso né ye kena ne ahɔ. Na kaka ne nwo yɛle aseɛ sofoɛ mukoraati nwanwa maa belili ye si. 4 Na bɛsõne ɛwoo ne, ofikyɛ ye yeɛ ɔfale tumi mane kaka* ne ɔ. Na bɛsõne kaka ne bɛhane kyɛ: "Nwa yeɛ ɔte kyɛ kaka suronyi-suronyi ne ɔ? Na nwa yeɛ ɔkɔhora ye ne ye kõ ɔ?"

5 Bɛmane ye noa bɔ ɔfa keka edwirɛ mbiri-mbiri ne mmusue dwirɛ, na bɛmane ye atee kyɛ oli tumi bosome 42. 6 Na obukyele ye noa kekane mmusue dwirɛ tiale Nyameɛ, odwudwo tiale ye dumaa ne nekaa bɔ ɔte ne, kyire kyɛ, odwudwo tiale bɛ bɔ bɛtete anwuro ne. 7 Na bɛmane ye atee kyɛ ɔne akrongronfoɛ nemɔ hõ, na oli bɛ so ngunim; na bɛmane ye tumi wɔ abusuakue, mmenia, dwudwolɛ ne maen biala so. 8 Na bɛ bɔ bɛtete aseɛ naso mukoraati kɔsõ ye. Na ofi mmerɛ bɔ bɛbɔle wiase ne, bɛ nu biala nne berɛ bɔ ne bahworɔ ye dumaa wɔ Boan Ba bɔ bɛhuni ye né ngoa nwomaa* nanu ɔ. 9 Sɛ ebie le asoɛ a, ma otie.

10 Sɛ odikyɛ ebie kɔ nnɔmun nu a, ɔkɔhɔ.

Sɛ odikyɛ bɛfa dadeɛ beku ebie a, bɛkɔfa bɛkɔhu ye.

Ɛwa yeɛ ohia paa kyɛ akrongronfoɛ nemɔ mia bɛ nye, na benya gyidie ne.

11 Na nza nwuni kaka suronyi-suronyi foforɛ kyɛ ofi aseɛ nu ofite, né ole mmɛen nyɔ te kyɛ boan ba, nakoso ɔhyɛle yebo dwudwole te kyɛ ɛwoo bɔ ye nwo yɛ suro. 12 Na ɔfale kaka bɔ oli moa né tumi mukoraati yɛle adwuma wɔ ye nyunu. Na ɔhyɛle aseɛ ne bɛ bɔ bɛtete so namukoraati maa bɛsõne kaka bɔ oli moa, bɔ né wapira maa ye kena ne ahɔ ne. 13 Na ɔyɛle nzɛngyerɛneɛ mbiri-mbiri; ɔmaa see po fili anwuro wale aseɛ so wɔ ebiala nyunu. 14 Na nzɛngyerɛneɛ bɔ onyane atee yɛle ye wɔ kaka ne nyunu nati, ɔlaka-lakale bɛ bɔ bɛtete aseɛ naso namu, na ɔha hyirele bɛ bɔ bɛte aseɛ naso ne kyɛ, bɛyɛ statu bɛma kaka bɔ bɛpɛle ye dadeɛ, na ye kena ne ahɔ ne. 15 Na bɛmane ye atee maa ohuli nwomeɛ mane kaka né statu ne, kyɛbɔ ɔkɔyɛ a, kaka né statu ne kodwudwo, ná ebiala bɔ onguro kyɛ ɔkɔsõ ye ne, wamaa bahu ye.

16 Na ɔhyɛle ebiala, kwahweabaa oo, sona titire oo, sikaniɛ oo, hianiɛ oo, akoaa ne bɔ ɔtte akoaa mukoraati kyɛ, bɛhyɛ bɛ nzorɛ wɔ bɛ sa famaa nwo, anaa bɛ nwoma so. 17 Na sɛ ebie kɔhora kɔtɔ anaa ɔkɔtɔne nikye a, sana ole sɔ ahyɛnsodeɛ, bɔ yeɛ ole kaka ne dumaa anaa ye dumaa ne namba ne bie ne. 18 Ɛwa yeɛ nyanza nwo hia paa ne. Ebiala bɔ ɔse nworɛ ne, ma ɔsese kaka ne namba ne, ofikyɛ, ɔte sona namba, na namba né te 666.