1 Na abɔfo bɔ ɔtɔ so nnu ne huli ye awɛen ne. Na nwuni kyɛ nzramaa bie ate afi anwuro waatɔ aseɛ so, na bɛfale kumaa kuron-kuron ne nzafoa bɛmane ye. 2 Na obukyele kumaa kuron-kuron ne noa, na nwosina bɔ ɔte kyɛ fonoo kandinga bie nu nwosina fili kumaa nanu wale, na kumaa nanu nwosina ne maa eyia ne ewienu yɛle tumm. 3 Na mmɛbɛ fili nwosina nanu wale aseɛ so, na bɛmane bɛ tumi; sɔ tumi ne bie yeɛ anyanyangyeleɛ bɔ bɛwɔ aseɛ naso ne le ne. 4 Bɛha bɛhyirele bɛ kyɛ, nnɛmaa bɛha ndire, nyaa monɛ, anaa bakaa biala bɔ ɔwɔ aseɛ naso ne, mmom bɛha mmenia bɔ bɛlle Nyameɛ stamp ne bie wɔ bɛ nwoma so ne. 5 Bamma mmɛbɛ nemɔ angu bɛ, mmom bɛmane bɛ atee kyɛ bɛyɛ bɛ ayayade bosome nnu. Na ayayade bɔ bɛyɛle bɛ ne, ne ɔte kyɛ yealɛ bɔ ebie te, mmerɛ bɔ anyanyangyeleɛ aha ye ne. 6 Sɔ mmerɛ ne, mmenia kɔpena ewue, nakoso bɛngɔ nwu ye, ɔhale bɛ ngome a, ahaa bawu, nakoso, ewue kɔnwati kofi bɛ nwo.

7 Né mmɛbɛ nemɔ soma pɔngɔ bɔ bɛfa bɛ bɛkɔ koɛ ne; né nikye bie bɔ wayɛ kyɛ sikaa kɔkorɛ abotire bobɔ bɛ ti, na bɛ nyunu te kyɛ sona nyunu. 8 Bɛ ti so nwiaa te kyɛ mmrasua nwiaa, na bɛ gye te kyɛ gyata gye. 9 Né nikye bie kata bɛ hue so te kyɛ buralɛ bɔ bɛfa bɛkata bɛ hue so ne, na dede bɔ bɛ ndaa ne yɛ ne, ɔte kyɛ teaseɛnam somaa bɔ mbɔngɔ twe bɛ kri-di-di kɔ koɛ ne. 10 Afei, bɛle dua bɔ ɔwowɔ te kyɛ anyanyangyeleɛ, na bɛ dua nanu yeɛ tumi bɔ bɛkɔfa bɛkɔyɛ mmenia ayayade bosome nnu ne wɔ ɔ. 11 Bɛle ɔhene bɔ odi bɛ so, ye yeɛ ole abɔfo bɔ ɔnea kumaa naso ne. Hebri nu ne, bɛfrɛ ye Abadon,* na Greek nu de, bɛfrɛ ye Apolion.*

12 Mmusue kõ apɛ nu. Na tie, ɛhe si ne, mmusue nyɔ koso kɔwa.

13 Abɔfo bɔ ɔtɔ so nzia ne huli ye awɛen* ne. Na ndele konviɛ bie mvili mmɛen bɔ ogyi-gyi sikaa kɔkorɛ afɔleɛ bokyea bɔ ɔwɔ Nyameɛ nyunu nanu, 14 ɔha hyirele abɔfo bɔ ɔtɔ so nzia bɔ otira awɛen ne kyɛ: "Sangye abɔfo nna bɔ bakyekye bɛ wɔ Eufrate nzue kandinga nanwo ne." 15 Yeti abɔfo bɔ basiesie bɛ bama dɔnhwere ne, kyẽa ne, bosome ne, ne afoɛ ne, bɛsangyele bɛ kyɛ bɛhu mmenia nanu ngyekyɛmue nza nu kõ. 16 Na ndele sogyafoɛ bɔ bɛtena mbɔngɔ so bɛkõ ne dodoɔ, ne bɛte 200,000,000.* 17 Ná anisoadehu nu ne, sɔa yeɛ nwuni mbɔngɔ ne, ɔne bɛ bɔ bɛtete bɛ so ne ɔ: Né buralɛ kata bɛ hue so, na né buralɛ nemɔ kɔla né te kɔkorɛ kɔɔ,* bluu,* yeɛ yalo.* Né mbɔngɔ nemɔ ti te kyɛ gyata ti, na see, nwosina ne sɔfa fi bɛ noa nu fite. 18 Sɛ ɛkyɛ mmenia nanu nza a, see, nwosina, ne sɔfa bɔ ofi bɛ noa nanu wale ne, ohuni bɛ nu kõ. 19 Na tumi bɔ mbɔngɔ nemɔ le ye ne, ɔwɔ bɛ noa ne bɛ dua nanu, ofikyɛ bɛ dua ne te kyɛ ɛwoo bɔ ole tire, na ɛhene yeɛ bɛfa bɛpira mmenia ɔ.

20 Na mmenia ne ngaa bɔ sɔ haw hemɔ angu bɛ ne, nningyein bɔ bɛfa bɛ sa bɛyɛ ne, banyakyi. Na sunzummɔne ne nningyein bɔ bafa sikaa kɔkorɛ, dwetɛ, kɔɔbere, nyɔboɛ, ne mmakaa bayɛ ne, né betɛ́ so bɛ; sɔ nningyein hemɔ nnwu nikye, bɛnde dwirɛ, na bɛngora nate po. 21 Ná b'awudie, b'ahonhomzɛm, b'adwaman, ne b'awie ne koso, banzakra bamvi ye nwo.