1 Yesu Kristo adiisɛm; Nyameɛ fa mane ye kyɛ ɔma ye ngoaa nwu nningyein bɔ ɔngɔhyɛ okosisi ne. Na ɔsomane ye abɔfo maa ɔfa mane ye akoaa Yohane. 2 Ye yeɛ olili nikye biala nwo adanzeɛ ne; olili edwirɛ bɔ Nyameɛ fa mane, ɔne adanzeɛ bɔ Yesu Kristo fa mane nanwo adanzeɛ. 3 Anigye* yeɛ ole sona bɔ ɔkenga ngɔmhyɛ he anu dwirɛ ne,* ɔne bɛ bɔ betie, ná bɛfa bɔ bahworɔ ye wɔ ngɔmhyɛ nanu ne bɛyɛ adwuma ne, ofikyɛ waha kaa bie né mmerɛ bɔ bahyɛ ne aso.

4 Me Yohane, mefa krataa he mekɔma asafo nzoo bɔ ɔwɔ Asia mandam nanu ne:

Adom ne asomdwie bɔ ofi Bɔ né ɔwɔ berɛ, ná ɔtɛ́ wɔ berɛ, na ɔba ne, ɔne honhom nzoo bɔ bɛgyigyi ye bia né nyunu ne, 5 yeɛ Yesu Kristo, Danzeniɛ bɔ odi nahorɛ bɔ bali moa batingye ye bafi awufo nu, ná odi aseɛ aso ahemvo so ne berɛ ha ɛmɔ.

Ye yeɛ ɔdɔ yɛ, ná ɔnate ye mogya naso alɛ́ yɛ koraa afi yɛ bɔne nu ne, 6 na wayɛ yɛ ahemman ne asɔfo wama ye Nyameɛ ne ye Baba ne, amba, ye yeɛ anuonyam ne tumi ha ye daa. Amen.

7 Nea, ɔnate munungum nu ɔba, na anyeɛ mukoraati konwu ye, bɛ bɔ bɛfale nikye bɛwɔle ye ne po konwu ye. Na ye ti aseɛ so mmusua mukoraati koli aworaborɛ. Sɔ ala yeɛ ɔkɔyɛ ɔ! Amen.

8 Awurade Nyameɛ nwa: "Me yeɛ nne Alfa ne Omega, Otumvoɛ bɔ ne ɔwɔ berɛ, na ɔtɛ́ wɔ berɛ, ná ɔba ne."

9 Me, ɛmɔ aliema Yohane, bɔ ɔnate adamvoa bɔ yɛne Yesu afa nati, yɛ mukoraati yanya kyɛfa wɔ amanehunu, ahennie, ne animia nu ne. Nyameɛ dwirɛ bɔ ngane, ɔne Yesu nwo adanzeɛ bɔ nnili nati, bɛfale me bɛhɔle Patmo supɔ naso. 10 Mmale Awurade kyẽa nanu wɔ honhom nu, na ndele konviɛ kandinga bie te kyɛ awɛen* wɔ me si 11 kyɛ: "Bɔ enwu ye ne, tworɔ gua nwomaa bɔ babobɔ nu na fa kɔma asafo nzoo he: Efeso, Smirna, Pergamo, Tiatira, Sardi, Filadefia ne Laodikea."

12 Na ngyakyile me nwo kyɛ menea bɔ ɔne me dwudwo ne, mmerɛ bɔ ngyakyile me nwo ne, nwuni kanea mmakaa nzoo bɔ bafa sikaa kɔkorɛ bayɛ, 13 né ebie bɔ wayɛ kyɛ Sona Awa ne gyi kanea mmakaa n'afia na atadeɛ bɔ owura ye ne, né ogua ye gya bo, yeɛ wafa sikaa kɔkorɛ abɔsoɛ* wabɔ ye afia. 14 Afei koso, né ye ti nwiaa ayɛ te kyɛ gyese, né wayɛ fufue hyɛnn te kyɛ asukɔtwea, na ne ye nye mmaa ayɛ te kyɛ see bɔ ɔsɔ ne; 15 né ye gya ne ayɛ kyɛ kɔɔbere bɔ wasɔ kɔɔ wɔ fonoo nu ne, na ne ye konvi ayɛ te kyɛ nzue pee bɔ obu fa so ne. 16 Né nzramaa nzoo wɔ ye sa nu, ná dadeɛ tendee naen-naen, bɔ ye nyunu ne ye si mukoraati pɛ fili ye noa nu fitele, na né ye nyunu ata hyireinn te kyɛ eyia bɔ wata paa ne.

17 Nwuni ye nyunu ne, mbɛ nvini ye gya bo te kyɛ ebie bɔ wawu ne. Ná ɔfale ye sa famaa tole me so hane kyɛ: "Nnɛsuro. Me yeɛ nne bɔ oli moa ne bɔ ɔpɛ yebo ne, 18 na me yeɛ nne bɔ ɔte ase ne; nwuli, nakoso nea, nde ase daa, na ndira Ewue ne Asieleɛ nzafoa. 19 Yeti, tworɔ bɔ ɛnwuni ye, bɔ ɔwɔ berɛ, ne bɔ yesi ne okosisi ne. 20 Na nzramaa nzoo bɔ ɛnwuni ye wɔ me sa famaa nanu, ɔne kanea mmakaa nzoo ne de, ye nwo dwirɛ krongron bɔ wafea ɛhe: Nzramaa nzoo ne te asafo nzoo nemɔ abɔfo, na kanea mmakaa nzoo ne te asafo nzoo ne."