ADIISƐM 18

1 Ɛhemɔ si ne, nwuni kyɛ abɔfo foforɛ dwu fi anwuro. Né ole tumi paa, na ye anuonyam nati aseɛ naso mukoraati tale hyireinn. 2 Na ɔfale konviɛ pirikua teane nu kyɛ:

"Wafi ase oo! Babilon Kandinga ne afi ase!

Na wayɛ sunzummɔne mɔ awuro,

ne nekaa bɔ honhom bɔ bɛ nwo nde, nnomaa bɔ bɛ nwo nde,

ɔne nnomaa bɔ bekyi kɔtetɛ ɔ.

3 Ná ɔnate ye adwamammɔ akɔnnɔ nanwo nzãa naso anya maen-maen namukoraati,

na aseɛ naso ahemvo ne ye abɔ adwaman;

ná ye ahonyadeɛ bɔ waboa ye noa wagua berɛ ne amaa aseɛ so adwadifoɛ anya bɛ nwo."

4 Na ndele konviɛ foforɛ mvili anwuro kyɛ:

"Me maen,*18:4 Anaa "Mmenia." ɛmɔfi ye nu,

ná ɛmɔ anyɛ ye bɔne ne bie,

ná ɛmɔ annya ye haw ne bie.

5 Ofikyɛ ye bɔne ne aboaboa ye noa waadwu anwuro,

ná Nyameɛ akaye ye amumuyɛɛ ne.

6 Bɔ ɔfa yɛle mmenia ne, ɛmɔyɛ ye bie betua ye kerɛ;

bɔ ɔyɛle ne, ɛmɔbɔ ye nwo nyɔ bɛma ye;

kwangoa bɔ ɔfrale ye nzãa wɔ nu ne, ɛmɔfra ye mmɔho nyɔ wɔ nu bɛma ye.

7 Kyɛbɔ ɔhyɛle ye nwo anuonyam, na ɔgyele ye nye ne,

sɔ ala yeɛ ɛmɔyɛ ye ayayade na ɛmɔma oli aworaborɛ ɔ;

ofikyɛ né ɔka ye wɔ y’ahone nu kyɛ: ‘Nde berɛ kyɛ ɔhemaa,

nnde kunaniɛ, na mengonwu aworaborɛ lle.’

8 Ɛhene ati yeɛ ye haw kɔwa ɛlɛhomapɛ ne,

ewue, aworaborɛ ne ɛhɔen;

na bɛkɔfa see bɛkɔyera ye dwerebɛɛ,

Ofikyɛ Awurade, Nyameɛ bɔ obuli ye atɛn ne, ye nwo yɛ se."

9 Sɛ́ bɛyera ye, ná aseɛ naso ahemvo bɔ bɛne ye bɔle adwaman, na bɛne ye gyele bɛ nye ne nwu ye nwosina bɔ ɔfo kɔ anwuro ne a, bɛkosu ye na babɔ awuye. 10 Na ɔnate kyɛ bɛsuro ayayade bɔ bɛyɛ ye nati bɛkogyina dede, na baha kyɛ:

"Yaakɔ oo! Yaakɔ! kuro kandinga,

Babilon, kuro bɔ wɔ nwo yɛ se!

Dɔnhwere komapɛ nu yeɛ w’atemmuo awa ne."

11 "Na aseɛ naso adwadifoɛ nemɔ koso kosu, na bali ye nwo aworaborɛ, ofikyɛ ebiala nne berɛ bɔ ɔkɔtɔ bɛ nningyein nemɔ kõ; 12 sikaa kɔkorɛ, dwetɛ, nyɔboɛ bɔ ye nyɔboɛ yɛ se, agudeɛ, nwera pa, ɛtena valent, ɛtena pa, koogyan,*18:12 Anaa "Ɛtena kɔkorɛ." nikye biala bɔ bafa bakaa bɔ ɔbo fona bayɛ, ɔne nikye biala bɔ bafa ɛsoen gye, bakaa pa, kɔɔbere, buralɛ ɔne nyɔboɛ pa bayɛ; 13 afei sinamon, spises, insɛns, ngoo fona-fona, ɛyɛɛ, nzãa, anwa, esam pa, hwiit, nandwie ne mmoan, mbɔngɔ ne teaseɛnam, ngoaa, ne mmenia ngoa.*18:13 Anaa "Mmenia kra." 14 Na bɛkɔha kyɛ:

‘Aduaba bɔ wɔ konvi wɔ so ne,

wafi wɔ nwo wahɔ;

w’aleɛ sɔkyee ne nningyein bɔ ole anuonyam namukoraati anwati ahɔ,

na ɛngonwu bɛ kõ.’

15 "Na adwadifoɛ bɔ bɛtɔne nningyein hemɔ, bɔ ɔnate ye so maa banya bɛ nwo ne kogyina dede, na ɔnate kyɛ bɛsuro ayayade bɔ bɛyɛ ye nati, bɛkosu na bali aworaborɛ, 16 ná bɛkɔha kyɛ:

‘Yaakɔ oo! Yaakɔ!

kuro kandinga bɔ afa nwera pa, ɛtena valent ne ɛtena kɔkorɛ ahra,

ná afa sikaa kɔkorɛ, nyɔboɛ bɔ ye nyɔboɛ yɛ se, ne agudeɛ asiesie wɔ nwo!

17 Ofikyɛ dɔnhwere komapɛ yeɛ basɛkye ɛhe amukoraati ne.’

Na bɛ bɔ bɛtwi hyep, bɛ bɔ bɛfa hyep bɛtu atee, bɛ bɔ bɛyɛ adwuma wɔ hyep nu, ɔne bɛ bɔ bɛyɛ adwuma wɔ ɛpo so namukoraati kogyina dede, 18 na sɛ bɛnwu nwosina bɔ ofi see bɔ bɛfa bɛyera ye nanu a, bɛkɔha kyɛ: ‘Kuro beni yeɛ ɔte kyɛ kuro kandinga he ɔ?’

19 Bɛkɔfa mvuture bɛkogua bɛ ti so, na basu bali aworaborɛ baha kyɛ:

‘Yaakɔ oo! Yaakɔ! kuro kandinga,

kuro bɔ bɛ bɔ bɛle hyep mukoraati nate ye ahonyadeɛ so anya bɛ nwo!

Ofikyɛ dɔnhwere komapɛ,

yeɛ basɛkye ye koraa ne.’

20 ‘O anwuro, ɛmɔma ɛmɔ nye gye,

na akrongronfoɛ, asomafoɛ ne adiifoɛ ne koso

ɛmɔma ɛmɔ nye gye;

ofikyɛ Nyameɛ abu ye atɛn ama ɛmɔ!’ "

21 Na abɔfo bie bɔ ole anwoserɛ paa fale nyɔboɛ kandinga bie, né ɔte kyɛ nyɔboɛ bɔ bɛfa bɛtĩ hwiit ne, ná ogyi tole ɛpo nanu hane kyɛ:

"Sɔ ala yeɛ bɛkogyi Babilon kandinga ne bɛkɔto ɔ

ná bɛngonwu ye kõ.

22 Na bɛngɔte bɛ bɔ bɛbɔ dwotai, bɛ bɔ bɛto dwein,

bɛ bɔ bɛhu atɛntɛnbɛn, ɔne bɛ bɔ bɛhu awɛen nga wɔ wɔ nu kõ.

Na sɔ ala yeɛ bɛngonwu ebiala bɔ ole ye sa noa adwuma wɔ wɔ nu kõ,

na bɛngɔte nyɔboɛ bɔ bɛfa bɛtĩ nikye nga wɔ wɔ nu kõ.

23 Na kanea biala ngɔta wɔ wɔ nu kõ,

na bɛngɔte ayeforɔ ne brienzua bɔ ɔbaagya nga wɔ wɔ nu kõ.

Ofikyɛ w’adwadifoɛ yeɛ ne bɛdi mu paa wɔ aseɛ naso ɔ,

na ɛfale w’ahonhomzɛm naso laka-lakale maen-maen namukoraati.

24 "Ye nu yeɛ bɛnwuni adiifoɛ, akrongronfoɛ ne bɛ bɔ bɛhuni bɛ wɔ aseɛ so namukoraati ne mogya ɔ."