1 Ɛhemɔ si ne, ndole me nye, na nwuni kyɛ babukye anoa bie wɔ anwuro. Na konviɛ bɔ nni moa ndele, bɔ né wayɛ kyɛ awɛen ne ha hyirele me kyɛ: "Fo bra wa, na ngɔmaa ekonwu nningyein bɔ odikyɛ osisi ne." 2 Na ɛberɛ ala, honhom ne wale me so. Mekwaanea a, ɔhene bia bie gyi anwuro, na ebie te sɔ bia naso. 3 Bɔ ɔte so ne, ɔta hyireinn te kyɛ nyɔboɛ bɔ bɛfrɛ ye jasper ne nyɔboɛ bɔ bɛfrɛ ye sardius ne. Né nyangondoen apɛ bia nanwo mukoraati ayia, na né nyangondoen ne te kyɛ nyɔboɛ bɔ bɛfrɛ ye emerald ne. 4 Né ahemvo bia 24 apɛ sɔ bia nanwo ayia, na nwuni mbanyi 24 bɔ bewuro-wura ndadeɛ fufue kyɛ bɛtete ahemvo bia nemɔ so, na ɔhene kyerɛ bɔ bafa sikaa kɔkorɛ bayɛ wuro-wura bɛ ti. 5 Na agralaa bɔ ɔte yerɛm-yerɛm, konviɛ ahoroɛ, ne agralaa bɔ obobɔnu fi ɔhene bia nanu ba. Na né see nganea nzoo sɔ wɔ ɔhene bia ne nyunu; sɔ nganea ne gyi berɛ ma Nyameɛ honhom nzoo ne. 6 Ne nikye bie wɔ ɔhene bia ne nyunu te kyɛ ahwehwɛ-ɛpo, né ye nye te paa te kyɛ ahwehwɛ ne. Ne ateasefoɛ nna gyigyi ɔhene bia nanwo, na anyeɛ wɔ bɛ nyunu ne bɛ si mukoraati. 7 Ateasefoɛ bɔ oli moa ne te kyɛ gyata, bɔ ɔtɔ so nyɔ ne te kyɛ nandwie ba, bɔ ɔtɔ so nza ne nyunu soma sona nyunu, na bɔ ɔtɔ so nna ne te kyɛ kɔleɛ bɔ otu ne. 8 Na ateasefoɛ nna nanu biala le ndaa nzia; na anyeɛ apɛ bɛ ndaa nanwo mukoraati ayia. Na eyia ne kɔngɔen biala bɛka kyɛ:

"Krongron, krongron, krongron yeɛ ole Awurade,

Otumvoɛ Nyameɛ ne.

Ye yeɛ né ɔwɔ berɛ, na ɔtɛ́ wɔ berɛ, na ɔba ne."

9 Mmerɛ biala bɔ ateasefoɛ nemɔ kɔfa anuonyam, nidie ne asennaa kɔma bɔ ɔte ɔhene bia naso, bɔ ɔte ase daa daa ne, 10 mbanyi 24 ne bu ndwerɛ wɔ bɔ ɔte ɔhene bia naso ne nyunu, na bɛsõ bɔ ɔte ase daa daa ne; bɛtutu bɛ kyerɛ bɛgua ɔhene bia ne nyunu, ná baha kyɛ:

11 "Awurade, yɛ Nyameɛ,

wɔ yeɛ anuonyam, nidie ne tumi fata wɔ ɔ,

ofikyɛ wɔ yeɛ ɛbɔle nikye biala,

na wɔ pɛ ti yeɛ ɛbɔle maa bɛwale ɔ."