1 Na abɔfo nzoo bɔ bɛtira kyɛnzee nzoo nanu kõ ha hyirele me kyɛ: "Bra, na ngohyire wɔ tuutuuniɛ kandinga bɔ ɔte nzue pee so né atemmuo. 2 Ye yeɛ aseɛ so ahemvo ne ye abɔ adwaman, ná ye adwamammɔ nzãa ne amaa aseɛ sofoɛ mukoraati abobo ne." 3 Na ɔnate honhom naso fale me hɔle ɛserɛ so, na nwuni kyɛ brasua bie te kaka suronyi-suronyi kɔkorɛ bie so. Né mmusue dumaa wɔ kaka nanwo mukoraati, na né ole tire nzoo ne mmɛen buru. 4 Né brasua ne wura atadeɛ valent *Brɔfo "Purple." ne atadeɛ kɔkorɛ, na né wafa sikaa kɔkorɛ ne agudeɛ pa wasiesie ye nwo. Né otira sikaa kɔkorɛ kwangoa wɔ ye sa nu, na né akyiwadeɛ ne ye adwamammɔ tɛɛ-tɛɛ ne ayi ye dɛm. 5 Né bahworɔ dumaa bie bagua ye nwoma so, ɔte edwirɛ bɔ wafea, yeɛ ole:

Babilon Kandinga,

Tuutuufoɛ ne aseɛ so abusudeɛ mukoraati maame.

6 Na nwuni kyɛ akrongronfoɛ ne Yesu nwo adanzefoɛ né mogya amaa brasua ne abo. Nwuni ye sɔ ne, me nwo dwirili me pa-pa. 7 Yeɛ abɔfo ne bisale me kyɛ: "Nzuati yeɛ wɔ nwo adwiri wɔ sɔ ne? Ngɔha brasua ne, ɔne kaka bɔ ɔte ye so, bɔ yeti nzoo na ye mmɛen buru nanwo dwirɛ bɔ wafea ngohyire wɔ. 8 Kaka bɔ ɛnwuni ye ne, né ɔwɔ berɛ, nakoso kesaalae de ɔnne berɛ, ná okofi kumaa kuron-kuron nanu kofite, na bɛkɔsɛkye ye. Na sɛ aseɛ nasofoɛ bɔ ofi wiase ahyɛaseɛ, bɛ dumaa nne ngoa nwomaa nanu ne nwu kyɛbɔ né kaka ne wɔ berɛ, na afei ɔnne berɛ, na okosa kɔwa ne a, ɔkɔyɛ bɛ nwanwa paa.

9 "Ɛwa yeɛ nyanza nwo hia paa ne: Tire nzoo ne gyi berɛ ma mmokaa nzoo bɔ brasua ne te so ɔ. 10 Na bɛte ahemvo nzoo: Nnu afi ase, kõ wɔ berɛ, bɔ waha ne de, ɔwalle; nakoso ɔba a, odikyɛ ɔtena berɛ kaa. 11 Kaka suronyi-suronyi bɔ ne ɔwɔ berɛ, nakoso kesaalae de ɔnne berɛ ne, ye ala yeɛ ole ɔhene bɔ ɔtɔ so mmɔtwɛ ne, ofi nzoo nanu yeɛ ɔwale ɔ, ná bɛkɔsɛkye ye. 12 Mmɛen buru bɔ ɛnwuni ye ne kyire ahemvo nzoo bɔ kesaalae de benyanne tumi, nakoso bɛne kaka ne konya tumi kyɛ ahemvo dɔnhwere kõ. 13 Ɛhemɔ le adwene kõ, yeti bɛkɔfa b'anwoserɛ ne bɛ tumi bɛkɔma kaka ne. 14 Ɛhemɔ ne Boan Ba ne kɔhõ, nakoso ɔnate kyɛ Boan Ba ne te awura mɔ nu Awurade ne ahemvo nu Hene nati, okoli bɛ so ngunim. Na bɛ bɔ bɛboka ye so bɔ bafrɛ bɛ, baye bɛ, ná bɛdi nahorɛ ne koso koli ngunim."

15 Ɔha hyirele me kyɛ: "Nzue pee bɔ ɛnwuni ye, nekaa bɔ tuutuuniɛ ne te ne, ɔte mmenia, mmeni lɔen, maen-maen ne dwudwolɛ ahoroɛ. 16 Na mmɛen buru bɔ ɛnwuni ye ne, ɔne kaka suronyi-suronyi ne, bɛkɔtane tuutuuniɛ ne, bɛkole ye nwo nningyein mukoraati maa ye nwo kɔla so, bɛkoli ye naen, ná bafa see bayera ye. 17 Nyameɛ yeɛ ɔfa wurale b'ahone nu kyɛ bɛma ye tianu adwene bra nu, ná bɛyɛ kõ bɛfa b'ahennie bɛma kaka ne kodwu kyɛ Nyameɛ dwirɛ kɔwa nu ɔ. 18 Na brasua bɔ ɛnwuni ye ne, yeɛ ole kuro kandinga bɔ odi aseɛ so ahemvo mukoraati so ne."