1 Yuda, Yesu Kristo akoaa ne Yakobo aliema;

Mefa krataa he mekɔma bɛ bɔ bafrɛ bɛ, bɔ bɛla Nyameɛ* ahone so ná Yesu Kristo afa bɛ asie ne.

2 Me mbaeɛ yeɛ ole kyɛ Nyameɛ nwu ɛmɔ anwunvo, na ɔma asomdwie ne ɔdɔ bu ɛmɔ so.

3 Aliemaa mɔ, ahaa metworɔ ngoa bɔ yɛ mukoraati yekonya ye nanwo dwirɛ mebrɛ ɛmɔ, nakoso nwuni kyɛ odikyɛ metworɔ mebatu ɛmɔ fo kyɛ, ɛmɔho paa bɛbɔ gyidie bɔ bafa bama akrongronfoɛ nanwo waen. Bafa sɔ gyidie ne bama yɛ pɛnko kyɛ ɔtena berɛ daa. 4 Bɔ ɔte yeɛ ole kyɛ, mmenia biemɔ awiewia bɛ nwo baawura ɛmɔ nu. Ofi teteete yeɛ tworɔnzɛm ne hane kyɛ sɔ mmenia nemɔ konya atemmuo, bɛte amumuyɛfoɛ, na bafa yɛ Nyameɛ adom ne bakata bɛ nyunu bɛfa bɛbɔ ahohwibra. Na Yesu Kristo bɔ ɔte yɛ wura ne y'Awurade komapɛ ne po, benne ye bɛndonu.

5 Ɔwɔ nu, ɛmɔse ɛhe dada, nakoso mepena kyɛ mekaye ɛmɔ kyɛ, mmerɛ bɔ Nyameɛ yele mmenia biemɔ fili Egypt ne si ne, ɔsɛkyele bɛ bɔ né belle gyidie ne. 6 Na abɔfo bɔ bandena nekaa bɔ bɛte, ná bɛyakyile dibea bɔ bɛle ye ne berɛ ne, wafa kyenyi wakyekye bɛ afebɔɔ wagua awosii nu, na bɛnwondɛ kyẽa kandinga bɔ okobu atɛn ne. 7 Sɔ ala yeɛ Sodom ne Gomora ne nguro bɔ wapɛ ye nwo wayia ne koso fale bɛ nwo wurale adwamammɔ bɔ ɔyɛ tɛ, ne nnaa nwo akɔnnɔ bɔ ɔte mmusue nu, na ɔfale see bɔ ɔsɔ daa hwene bɛ so fa yɛle nneasoɛ mane yɛ.

8 Ye mukoraati nu ne, sɔ mmenia hemɔ bɔ bɛnwa bɛkye nnaleɛ ne gua anwoɔnaen nanwo fiɛ, bɛmmu bɛ bɔ bɛle tumi ne, na bɛdwudwo betia bɛ bɔ bɛle anuonyam ne. 9 Nakoso, mmerɛ bɔ abɔfo panyi Mikael po ne Abɔnzam nyane dwudwolɛ wɔ Mose fuin nwo ne, wamva ye pɛ wanga edwirɛ biala wandia ye kyɛ ɔfa bu ye atɛn, mmom bɔ ɔhane yeɛ ole kyɛ, "Awurade hwi wɔ nyunu." 10 Nakoso, sɔ mmenia hemɔ de, nikye biala bɔ bɛnde yebo ne, bɛdwudwo betia, na bɔ bɛte yebo ne koso, bɛyɛ ye te kyɛ ngaka bɔ belle adwene ne; bɛyɛ bɛfa bɛsɛkye bɛ nwo. 11 Bɛ yaakɔ, ofikyɛ bɔ Kain yɛle ne bie yeɛ bɛyɛ ne, na adufum ti, baafa Balaam atee tɛɛ naso, bɛsuesua Kora atuateɛ ne, yeti kyɛbɔ bɛsɛkyele ye ne, sɔ ala yeɛ bɛkɔsɛkye bɛ ɔ. 12 Sɛ ɛmɔyia nu kyɛ ɛmɔdidi a, ɛyɛ a ne sɔ mmenia hemɔ ayɛ kyɛ nyɔboɛ bɔ wafea nzue bo ne, bɛte mmoan-neafoɛ bɔ bɛ ko ngome yeɛ ohia bɛ, bɛnzuro hwee. Bɛte munungum bɔ nzue nne nu, bɔ mvrama fa ye kyini, mmakaa bɔ mmerɛ aso kyɛ osu mmaa, nakoso hwee nne so, wawuwu koraa,* na ye bo atutu. 13 Bɛte ɛpo asorɔkye bɔ obu fa so pu ye bɔbɔ ye animguaseɛ ba, na bayɛ kyɛ nzramaa bɔ bɛkyini mbaen bɔ basiesie awosii bama bɛ ne.

14 Enok bɔ ɔtɔ Adam aworɛ ndoɔtoasoɛ so nzoo ne hyɛle sɔ mmenia hemɔ nwo ngɔm kyɛ:

"Nea, Awurade fale ye anwoteefoɛ pee wale,

15 na obuli ebiala atɛn,

obuli amumuyɛfoɛ atɛn wɔ nningyein tɛɛ bɔ bɛyɛle,

ɔne edwirɛ bɔ ɛte a, ne wɔ kunu ate wɔ,

bɔ abɔnefoɛ bɔ bɛnzuro Nyameɛ ne keka hyirele ye nanwo."

16 Sɔ mmenia hemɔ nwii-nwii, na bɔ bɛle ye biala ne, bɛ nye nzɔ. Bɛdi bɛ bɔbɔ b'akɔnnɔ si, bɛdwa bɛ noa nu, na mvasoɛ bɔ bɛpena nati bɛhoɔhoa mmenia.

17 Aliemaa mɔ, ɛmɔkaye bɔ Awurade Yesu Kristo asomafoɛ ne hane ne, 18 bɛhane kyɛ: "Awieɛ mmerɛ nanu ne, bɛ bɔ bɛka ayinga na bɛdi b'akɔnnɔ si kɔwa." 19 Sɔ mmenia hemɔ pakye-pakye asafo nanu, bɛdi anwoɔnaen akɔnnɔ si, na bɛmma Nyameɛ honhom ngyire bɛ atee. 20 Nakoso adɔfo, ɛmɔ de ɛmɔyɛ se wɔ ɛmɔ gyidie krongron nanu, na ɛmɔbɔ mbaeɛ wɔ honhom krongron nu 21 mmerɛ bɔ ɛmɔnwondɛ y'Awurade Yesu Kristo anwunvoin bɔ ɔkɔ daa ngoa nu ne, ɛmɔfa ɛmɔ nwo bɛwura Nyameɛ dɔ nu.

22 Ɛmɔnwu bɛ bɔ b'adwene nu yɛ bɛ naa n'anwunvo, 23 ɛmɔle bɛ ngoa mmerɛ bɔ ɛmɔtwe bɛ bɛfi see nu ne. Ɛmɔhɔ so bɛnwu afoforɛ anwunvo, nakoso ɛmɔnea yé, ofikyɛ bafa anwoɔnaen akɔnnɔ basɛkye ndadeɛ bɔ owura bɛ nanu. Yeti ɛmɔhwe ɛmɔ nwo bɛfi ndadeɛ bɔ owura bɛ nanwo.

24 Afei, Nyameɛ bɔ ɔbɔ ɛmɔ nwo waen, na hwee ando ɛmɔ sintidua, na ɔmaa ɛmɔfa anigye begyina ye anuonyam ne nyunu bɔ ngekayɛɛ biala nne ɛmɔ nwo ne, 25 y'Agyenkwa Nyameɛ komapɛ ne, ye yeɛ anuonyam, anwoserɛ ne tumi ha ye fi tete, ɛnɛ, ɔne daa wɔ y'Awurade Yesu Kristo nu.

Amen.