1 Me bɔ nde panyi ne;

Mefa krataa he mekɔma Gaius, bɔ medɔ ye wɔ nahorɛ nanu ne.

2 Nniema, me mbaeɛ yeɛ ole kyɛ nikye biala hɔ yé ma wɔ, na enya anwoserɛ, kyɛbɔ wasi wɔ kra yé ne. 3 Mmerɛ bɔ aliemaa nemɔ wale, na bɛlili nahorɛ bɔ etira nu, ɔne kyɛbɔ ɛfa nahorɛ ne bɔ wɔ bra* nanwo adanzeɛ ne, me nye gyele paa. 4 Nikye fee nne berɛ bɔ ɔmaa me nye gye tra kyɛ, ngɔte kyɛ me mmaa mɔ nate nahorɛ nanu ɔ.

5 Nniema, nikye biala bɔ ɛyɛ ma aliemaa mɔ ne, ɔmva ye nwo kyɛ bɛte ɛwɔfoɛ ne, okyire kyɛ edi nahorɛ. 6 Bali wɔ dɔ nanwo adanzeɛ bahyire asafo ne, yeti mesrɛ wɔ, gua bɛ atee kama, kyɛbɔ ɔfata wɔ Nyameɛ nyunu. 7 Ofikyɛ ye dumaa nu ti yeɛ bɛhɔle ɔ, na banne hwee bamvi maen-maen nanufoɛ ne berɛ. 8 Yeti, odikyɛ yedɛ sɔ mmenia nemɔ kama,* na wamaa yaboka bɛ bɔ bɛyɛ nahorɛ nanwo adwuma naso.

9 Ndworɔle krataa ngɔmane asafo ne, nakoso Diotrefe bɔ ɔpena kyɛ odi bɛ nyunu wɔ asafo nanu ne bu nningyein bɔ ofi yɛ berɛ ne animtia. 10 Yeti meba a, ngɔmaa okonwu nningyein bɔ ɔyɛ ne, yeɛ ole kyɛ ɔkeka yɛ nwo dwirɛ tɛɛ. Na ɛhene po anzo ye nu, ye ahɔ a, onne aliemaa mɔ ngɔ ye awuro, na bɛ bɔ bɛpena kyɛ bedɛ bɛ ne koso, osi bɛ atee, na otu bɛ fi asafo nanu po.

11 Nniema, nnɛsue nikye bɔ ɔttemaye, mmom, sua pa. Ofikyɛ bɔ ɔyɛ nikye pa ne fi Nyameɛ berɛ, na bɔ ɔyɛ bɔne ne de, ɔnze Nyameɛ.

12 Demetrio de, ebiala di ye nwo adanzeɛ, na nahorɛ ne koso di ye nwo adanzeɛ. Bɔ ɔte yeɛ ole kyɛ, yɛ koso, yɛdi ye nwo adanzeɛ, na ɛse kyɛ y'adanzeɛ ne te nahorɛ.

13 Nne edwirɛ pee bɔ odikyɛ meka mekyire wɔ ɔ, nakoso menguro kyɛ metworɔ ye wɔ krataa so.* 14 Mmom mese kyɛ ɔngɔhyɛ ngɔwa ngɔɔnea wɔ boso, na yali ngɔmmɔ.

Asomdwie ha wɔ.

Wɔ nnamvo bɔ bɛwɔ wa ne nwa bɛkyea wɔ.

Bobɔ yɛ nnamvo nemɔ dumaa ngoko-ngoko kyẽa bɛ ma yɛ.

15 -