1 Me bɔ nde panyi ne,

Mefa krataa he mebrɛ bra panyi bɔ baye ye, ɔne ye mmaa mɔ bɔ medɔ bɛ paa ne. Nná me ngome yeɛ medɔ bɛ ɔ, bɛ bɔ banwu nahorɛ namukoraati ne koso dɔ ɛmɔ, 2 ofikyɛ nahorɛ ne te yɛ nu, na ɔne yɛ kɔtena daa.

3 Adom, anwunvoin ne asomdwie bɔ ofi yɛ Baba Nyameɛ, ne ɔwa Yesu Kristo berɛ ha yɛ wɔ nahorɛ ne ɔdɔ nu.

4 Mmerɛ bɔ nwuni kyɛ wɔ mmaa ne biemɔ nate nahorɛ nanu, kyɛbɔ Baba ne ahyɛ ne, me nye gyele paa. 5 Nakoso bra panyi, kesaalae de mesrɛ wɔ, ɛmɔma yɛdodɔ yɛ nwo. Ɛhe de, nná mmeraa foforɛ bie yeɛ metworɔ mebrɛ ɛmɔ ɔ, mmom mmeraa bɔ ahyɛaseɛ ne, yɛnyane ye nala. 6 Na bɔ ɔdɔ ne kyire yeɛ ole kyɛ, yɛkoli ye ahyɛdeɛ so. Na ahyɛdeɛ ne yeɛ ole kyɛ, ɛmɔ nate ɔdɔ nu kyɛbɔ ofi ahyɛaseɛ ne, ɛmɔtele ne. 7 Ofikyɛ nnaka-nnakafoɛ pee awa wiase, sɔ mmenia nemɔ nne ndonu* kyɛ Yesu Kristo wale anwoɔnaen nu. Ebiala bɔ ɔte sɔ ne laka-laka mmenia, na ɔte antikristo. 8 Ɛmɔnea yé, na bɔ yafɛ yanya ye ne amvi yɛ sa, mmom ɛmɔ anya akatua bɔ odi mu.

9 Ebiala bɔ ɔpere ye nwo di anyunu, na ɔndena Kristo ngyerɛkyerɛ nu ne, ɔnze Nyameɛ. Na bɔ ɔtena Ye ngyerɛkyerɛ nu ne de, ɔse Baba ne né Baa ne. 10 Sɛ ebie ba ɛmɔ berɛ, ná ottira sɔ ngyerɛkyerɛ he a, nnɛmɔ dɛ́ ye bɛkɔ ɛmɔ awuro, na nnɛmɔ kyea ye po. 11 Na ebiala bɔ ɔkɔhyea sɔ sona ne, ɔboka ye bɔne naso.

12 Nne edwirɛ pee bɔ odikyɛ meka mekyire ɛmɔ ɔ, nakoso menguro kyɛ metworɔ ye wɔ krataa so.* Mmom mese kyɛ ɔngɔhyɛ ngɔwa ngɔɔnea ɛmɔ boso, na yali ngɔmmɔ. Na wamaa y'anigye ali mu.

13 Eliema brasua bɔ baye ye ne, ye mmaa nemɔ nwa bɛkyea wɔ.