Apocalipse 14

1 Afei ndole me nye, mekwaanea a, Boan Ba ne gyi Zion Bokaa naso, na mmenia 144,000 bɔ bahworɔ ye dumaa ne ye Baba dumaa bagua bɛ nwoma so ne boka ye so. 2 Na ndele dede bie mvili anwuro, ne dede ne ayɛ kyɛ nzue pee bɔ obu fa so, ne agralaa bɔ ɔbobɔ nu serɛ-serɛ ne; na ne wayɛ kyɛ bɛ bɔ bɛto dwein, bɔ bɛbɔ bɛ dwotai ne. 3 Ne bɛto dwein bie wɔ ɔhene bia ne né ateasefoɛ nna ne né mbanyi ne nyunu; na né wayɛ kyɛ edwein foforɛ bie. Na ebiala angora anzua sɔ dwein ne, sana mmenia 144,000 bɔ batɔ bɛ bafi aseɛ so ne ngome. 4 Ɛhemɔ yeɛ bamva mmrasua bangua bɛ nwo fiɛ; nahorɛ dwirɛ yeɛ ole kyɛ, bɛ nwo te.*14:4 Ɔkɔhora kohyire kyɛ: "Bɛte mmabunu." Na nekaa biala bɔ Boan Ba ne kɔhɔ ne, bɛdi ye si. Ɛhemɔ yeɛ batɔ bɛ bafi aseɛ naso kyɛ aba bɔ oli moa bama Nyameɛ ne Boan Ba ne. 5 Bannwu ngondombo biala wɔ bɛ noa nu; na dɛm biala nne bɛ nwo.

6 Afei nwuni abɔfo foforɛ kyɛ watu nate ewienu, né otira daa nzɛmba bɔ ɔkwaaha kyire bɛ bɔ bɛte aseɛ naso ne—maen, mmusuakue, dwudwolɛ ne mmenia mukoraati. 7 Na ɔteane nu kyɛ: "Ɛmɔsuro Nyameɛ, na ɛmɔhyɛ ye anuonyam, ofikyɛ mmerɛ bɔ ɔbaafa bu atɛn ne aso. Yeti ɛmɔsõ bɔ ɔbɔle anwuro ne aseɛ ne ɛpo ne nzue ti ne."

8 Na abɔfo foforɛ lili ye si wale, na ɔhane kyɛ: "Wafi ase! Babilon Kandinga ne afi ase. Ye yeɛ ɔmaa maen-maen namukoraati none ye adwamammɔ akɔnnɔ nanwo nzãa ne bie ne!"

9 Ɛhene si ne, abɔfo foforɛ bɔ ɔtɔ so nza wale, na ɔteane nu hane kyɛ: "Sɛ ebie sõ kaka suronyi-suronyi ne né ye statu ne, na odɛ ahyɛnsodeɛ ne bie gua ye nwoma so anaa ye sa nwo a, 10 ye de Nyameɛ ɛyaa-fɛlɛ nzãa gyengɔɔ-gyengɔɔ bɔ wahwie wagua ye yaa-fɛlɛ kwangoa nanu ne, ɔkɔno bie; na bɛkɔyɛ ye ayayade wɔ see ne sɔfa nu wɔ abɔfo krongron ne né Boan Ba ne nyunu. 11 Na nwosina bɔ okofi bɛ ayayade nanu ne kɔfo kɔhɔ anwuro daa daa. Na bɛ bɔ bɛsõne kaka ne né ye statu ne, ɔne ebiala bɔ olɛle ye dumaa né ahyɛnsodeɛ ne bie ne, bɛngonya mmerɛ bɛngole bɛ nwomeɛ eyia anaa kɔngɔen.

12 "Ɛwa yeɛ odikyɛ akrongronfoɛ bɔ bɛdi Nyameɛ ahyɛdeɛ so, ná bɛle gyidie wɔ Yesu nu ne mia bɛ nye ne."

13 Na ndele konviɛ bie mvili anwuro kyɛ: "Tworɔ ɛhe: ‘Ofi sɔ mmerɛ he bɔ ɔkɔ ne, bɛ bɔ bɛkowu wɔ Awurade nu ne, bɛle anigye.’ Honhom ne nwa: ‘Amba, bɛkole bɛ nwomeɛ bɛkofi bɛ fɛɛ nwo, ofikyɛ b’adwuma li bɛ si.’"

14 Afei ndole me nye, na nwuni munungum fufue bie, né ebie bɔ wayɛ kyɛ Sona Awa ne te munungum naso, bɔ sikaa kɔkorɛ kyerɛ wura ye ti ná otira koateɛ naen-naen bie wɔ ye sa nu. 15 Na abɔfo foforɛ fili asɔre awuro berɛ fitele, na ɔteane nu ha hyirele bɔ ɔte munungum naso ne kyɛ: "Fa wɔ koateɛ ne, na pɛ, ofikyɛ mmerɛ aso; na nningyein bɔ ɔwɔ aseɛ naso ne aboro." 16 Na bɔ ɔte munungum so ne hwene ye koateɛ ne hɔle aseɛ so, na ɔpɛle nningyein bɔ ɔwɔ aseɛ naso ne.

17 Na abɔfo foforɛ fili asɔre awuro bɔ ɔwɔ anwuro nanu fitele, ye koso, né otira koateɛ naen-naen bie. 18 Na abɔfo foforɛ fili afɔleɛ bokyea nanwo berɛ fitele, ye yeɛ né ole tumi wɔ see naso ne. Na ɔteane nu ha hyirele bɔ otira koateɛ naen-naen ne kyɛ: "Fa wɔ koateɛ naen-naen ne, na boɔboa aseɛ naso bobe taperɛ nemɔ noa, ofikyɛ ye mmaa ne aboro." 19 Yeti abɔfo ne hwene ye koateɛ ne hɔle aseɛ so, na ɔboɔboale bobe bɔ ɔwɔ aseɛ so ne noa, na ohwie guale Nyameɛ ɛyaa piri kumaa bɔ bɛtwi nzãa wɔ nu nanu. 20 Bɛtietiale bobe naso wɔ kuro ne si, na mogya fili kumaa bɔ bɛtwi nzãa wɔ nu nanu wale, né ɔne pɔngɔ tendee te pɛ,*14:20 Kɔyɛ kyɛ mita 1.5 na ɔtengyɛ pɛle kwanzii kɔyɛ 184.