1 "Tworɔ kɔma Efeso asafo n’abɔfo ne kyɛ:

Ɛhe yeɛ bɔ otira nzramaa nzoo wɔ ye sa famaa nu, na ɔnate kanea mmakaa nzoo bɔ bafa sikaa kɔkorɛ bayɛ né afia ne ka ɔ:

2 ‘Mese w’adwuma, wɔ fɛɛ, ne wɔ animia. Na mese kyɛ, ɛnzosɔ nnipa-bɔnefoɛ so, na bɛ bɔ bɛhane kyɛ bɛte asomafoɛ, nakoso ne ɔtte nahorɛ ne, ɛsɔle bɛ neane na ɛnwuni kyɛ bɛte ngondombofoɛ. 3 Afei koso, emia wɔ nye gyina nu, na me dumaa ti, etɛ́ nwu amaneɛ bɔ w’abanu bulli ɔ. 4 Nakoso nne nikye bie metia wɔ, yeɛ ole kyɛ ɔdɔ bɔ né ɛle ye fɛɛse ne, amaa wate wahɔ. 5 Yeti kaye nekaa bɔ ɛfini ase ne, na sakra yɛ nningyein bɔ fɛɛse ne, né ɛyɛ ne. Sɛ anyɛ sɔ a, ngɔwa wɔ berɛ ngɔɔye wɔ kanea bakaa ne ngofi nekaa bɔ ogyi ne, sana ɛsakra kora. 6 Nakoso nikye pa bie wɔ wɔ nwo, yeɛ ole kyɛ ɛkyi Nikolaifoɛ kue né nneyɛɛ kɔkɔ-kɔkɔ, kyɛbɔ me koso mekyi nala.

7 Bɔ ole asoɛ ne, ma otie bɔ honhom ne ka kyire asafo nemɔ ne. Bɔ okoli ngunim ne, ngɔmaa okoli ngoa bakaa bɔ ogyi Nyameɛ paradise berɛ ne bie.’

8 "Tworɔ kɔma Smirna asafo n’abɔfo ne kyɛ:

‘Ɛhe yeɛ bɔ "oli moa ná ɔpɛ yebo," bɔ owuli na osa wale ngoa nu ne ka ɔ:

9 Mese wɔ amanehunu ne wɔ hiaa, nakoso ɛte sikaniɛ paa. Na mese mmusue dwirɛ bɔ bɛ bɔ bɛfrɛ bɛ nwo Yudafoɛ ne ka ne. Nakoso bɛtte Yudafoɛ, mmom bɛta Satan si. 10 Nnɛsuro amaneɛ bɔ ɛbaanwu ye ne. Tie, Abɔnzam kɔfa ɛmɔ nu biemɔ kogua prizin, kyɛ ɔfa sɔ ɛmɔ nea, na ɛmɔ konwu amaneɛ ngyẽa buru. Nakoso kɔ so di nahorɛ kodwu ewue nu, na ngɔma wɔ ngoa abotire.

11 Bɔ ole asoɛ ne, ma otie bɔ honhom ne ka kyire asafo nemɔ ne. Bɔ okoli ngunim ne, ewue bɔ ɔtɔ so nyɔ ne nngɔyɛ ye hwee.’

12 "Tworɔ kɔma Pergamo asafo n’abɔfo ne kyɛ:

Ɛhe yeɛ bɔ ole dadeɛ naen-naen bɔ ye nyunu ne ye si pɛ ne ka ɔ:

13 ‘Mese nekaa bɔ ɛte ɔ, nekaa bɔ ɛte ne, ɛberɛ yeɛ Satan bia gyi ɔ; nakoso etɛ́ tira me dumaa nanu. Na mmerɛ bɔ bɛhuni Antipa bɔ ɔte m’adanzeniɛ bɔ odi nahorɛ ne wɔ wɔ nwo berɛ, nekaa bɔ Satan te ne po ne, anyakyi gyidie bɔ ɛle ye wɔ me nu nanu. 14 Nakoso, nne wɔ nwo dwirɛ kaa, yeɛ ole kyɛ: Mmenia biemɔ wɔ wɔ nu bɔ betɛ́ tira Balaam ngyerɛkyerɛ nu; Balaam he yeɛ ɔmaa Balak tole Israel mmaa nemɔ sintidua maa bɛlili nningyein bɔ bafa babɔ afɔleɛ bama bosoen, na bɛbɔle adwaman ne. 15 Afei koso, ebiemɔ wɔ wɔ nu bɔ basɔ Nikolai kue né ngyerɛkyerɛ nu ɔ. 16 Yeti sakra; sɛ anzakra a, ngɔwa wɔ berɛ ndɛ, na dadeɛ tendee bɔ ofi me noa nu ne, ɛhene yeɛ mene bɛ kɔfa kɔhõ ɔ.

17 Bɔ ole asoɛ ne, ma otie bɔ honhom ne ka kyire asafo nemɔ ne. Bɔ okoli ngunim ne, ngɔma ye mana bɔ wafea ne bie, na ngosa ngɔma ye nyɔboɛ fufue bie. Sɔ nyɔboɛ ne, bahworɔ dumaa bie bagua ye nwo, na ebiala nze sɔ dumaa ne, sana bɔ okole ne ngome.’

18 "Tworɔ kɔma Tiatira asafo n’abɔfo ne kyɛ:

Ɛhe yeɛ Nyameɛ Awa bɔ ye nye mmaa te kyɛ see bɔ ɔsɔ, na ye gya nwo te kyɛ kɔɔbere bɔ bahwi ye nwo ne ka ɔ:

19 ‘Mese wɔ adwuma, wɔ dɔ, wɔ gyidie, ne wɔ animia, na adwuma bɔ ɛyɛ ye ɛlɛsaen ne, ɔsone tra bɔ eli moa yɛle ne. 20 Nakoso, wɔ nwo dwirɛ bɔ nne ye yeɛ ole kyɛ: Ɛsosɔ sɔ brasua Jezebel, bɔ ɔfrɛ ye nwo diifoɛ naso. Sɔ brasua ne fa ye ngyerɛkyerɛ laka-laka me ngoaa maa bɛbɔ adwaman, na ɔmaa bɛdi aleɛ bɔ bafa babɔ afɔleɛ bama bosoen. 21 Ɔwɔ nu, mmane ye mmerɛ kyɛ ɔsakra, nakoso ɔyɛlle ye adwene kyɛ ɔsakra fi ye adwaman nanwo. 22 Nea, mebaagyi ye meto anwonyerɛ mba so, na bɛ bɔ bɛne ye sɛkye agyaa ne, ngɔmaa bekonwu amaneɛ paa, sana basakra bafi bɛ nneyɛɛ nwo. 23 Na ngohu ye mmaa mɔ maa asafo nemɔ konwu kyɛ, me yeɛ meneɛnea sona adwene ne ahone nu ne, na kyɛbɔ ɛmɔ nu biala nneyɛɛ te ne, sɔ ala yeɛ ngotua ye kerɛ ɔ.

24 Nakoso, ɛmɔ bɔ ɛmɔ aha wɔ Tiatira, bɔ ɛmɔnni sɔ ngyerɛkyerɛ he si, ná ɛmɔ anzua bɔ bɛfrɛ ye "Satan nningyein bɔ enu yɛ se" ne, bɔ meka mekyire ɛmɔ yeɛ ole kyɛ: Mengɔfa adesoa foforɛ biala mengɔto ɛmɔ so. 25 Yeti bɔ ɛmɔle ye ne, ɛmɔtira nu yé ma oodwu kyɛ ngɔwa ne. 26 Na bɔ okoli ngunim, na okoli me dwirɛ so koodwu awieɛ ne, ngɔma ye tumi wɔ maen-maen naso, 27 na ɔkɔfa buralɛ pɔmaa koli mmenia naso, ná wabubu bɛ pasaa te kyɛ ngukue, kyɛbɔ me koso nyane tumi mvili me Baba berɛ nala. 28 Na ngɔfa ngyerɛmɔ nzramaa ngɔma ye.

29 Bɔ ole asoɛ ne, ma otie bɔ honhom ne ka kyire asafo nemɔ ne.’ "