1 Basabasa ne wale ase ne, Paul maa bɛfrɛle asuafoɛ nemɔ bɛwale, na ɔhyɛle bɛ nguraen yiele ne, ɔne bɛ lili ngraa, na osili atee so hɔle Makedonia. 2 Mmerɛ bɔ ɔfale sɔ mandam nemɔ nu, ná ɔhyɛle bɛ bɔ bɛwɔ berɛ ne nguraen ne, ɔwale Greek. 3 Ɔtenane berɛ bosome nza. Né ahaa ɔpena kyɛ ɔfa hyep kɔ Siria, nakoso né Yudafoɛ nemɔ abɔ ye nwo porɛ, yeti ɔyɛle ye adwene kyɛ okosa kɔfa Makedonia. 4 Ɔne Piro bɔ ofi Berea né awa Sopata, Aristarko ne Sekundo bɔ bɛfi Tɛsalonika, Gaius bɔ ofi Derbi, Timoteo, Tikiko ne Trofimo bɔ bɛfi Asia mandam nanu ne yeɛ bɛhɔle ɔ. 5 Sɔ mmrienzua hemɔ lili moa, na bɛɛwondɛle yɛ wɔ Troa. 6 Paanoo bɔ Yiste Nne Nu afahyɛ ne si ne, yɛfale hyep wɔ Filipi, na ɛlɛnnu si ne, yɛɛtole bɛ wɔ Troa, na yɛtenane berɛ ngyẽa nzoo.

7 Kyẽa bɔ oli moa wɔ dapɛn nanu ne, yɛ mukoraati yɛyiale nu kyɛ yɛdidi. Ná Paul hyɛle yebo kyɛ ɔne bɛ dwudwo, ofikyɛ aleɛ kye a, né okofi berɛ kɔhɔ. Yeti odwudwole tonn maa odwuli kɔngɔen tumm. 8 Nekaa bɔ né yayia nu wɔ aborosaen naso ne, né kanea pee wɔ berɛ. 9 Paul dwudwo ne, né abrandeɛ bie bɔ bɛfrɛ ye Eutiko te mboma naso. Ɔte berɛ ne, sãa ne wafa nu wala. Ɔlale hatee maa ofili aborosaen bɔ ɔtɔ so nza naso tɔle ase. Bɛmane ye so ne, né wawu. 10 Na Paul dwu hɔle aseɛ nwo dɔ, na obutule ye so, yeɛ ɔto brale ye hane kyɛ: "Ɛmɔyakyi dede ne, ofikyɛ ɔte ase." 11 Afei Paul sa hɔle aborosaen naso, na ɔtenane ase didili. Oyiele ne, ɔtoale so dwudwole tonn maa aleɛ hene, yeɛ ofili berɛ hɔle ɔ. 12 Bɛfale abrandeɛ ne bɛhɔle awuro, na né b’ahone atɔ bɛ kunu alaa maa waboso, ofikyɛ ne abrandeɛ ne te ase.

13 Yeti yɛfale hyep yɛhɔle Asos kyɛ yɛkwaafa Paul. Ofikyɛ ne wali moa wabɔ y’amaneɛ kyɛ ɔfa ase kɔ dɔ. 14 Na mmerɛ bɔ yɛyiale ye wɔ Asos ne, yɛfale ye, na yɛhɔle Mitilene. 15 Aleɛ hene ne, yɛtu yɛfili berɛ yɛhɔle Kios, ye aleɛ hene ne, yɛhɔle Samo, na ye kyẽa bɔ oli berɛ ne, yɛhɔle Mileto. 16 Né Paul mbena kyɛ ɔsɛkye mmerɛ wɔ Asia mandam nanu, yeti ɔyɛle ye adwene kyɛ ongogyina Efeso, ofikyɛ né ɔpena kyɛ ɔyɛ ye ndɛ, na sɛ ɔkɔyɛ ye a, okodwu Yerusalem kora ne bali Pentekoste afahyɛ ne.

17 Paul wɔ Mileto ne, ɔfale ngraa mane mbanyi bɔ bɛwɔ Efeso asafo nanu ne. 18 Mmerɛ bɔ beeyiale ye ne, ɔha hyirele bɛ kyɛ: "Ɛmɔ bɔbɔ ɛmɔse kyɛbɔ mmɔle me bra, fi kyẽa bɔ oli moa bɔ mmale Asia mandam nanu ne, 19 kyɛbɔ mvale anwobraseɛ pee ne mmoen nzone Awurade, ɔne amaneɛ bɔ nwuni ye, ɔnate porɛ bɔ Yudafoɛ ne bɔle nati. 20 Mmerɛ bɔ né mekyirekyire ɛmɔ wɔ dwaaso ne awuro-awuro nu ne, edwirɛ bɔ ne ɔkɔboka ɛmɔ ne, mamva komapɛ po mamvea. 21 Mmom nnili Yudafoɛ ne Greekfoɛ adanzeɛ fengyemm kyɛ bɛsakra b’adwene bɛbra Nyameɛ berɛ, ná benya gyidie wɔ Yesu nu. 22 Na kesaalae ɛmɔnea, honhom ne ahyɛ me kyɛ ngɔ Yerusalem, ɔwɔ nu, menze bɔ ɔkɔto me wɔ berɛ ɔ, 23 nakoso bɔ mese yeɛ ole kyɛ, kuro biala nu ne, honhom krongron ne di m’adanzeɛ kyɛ, bɔ ɔla berɛ onwondɛ me yeɛ ole prizin nnaa ne amanehunu. 24 Nakoso nná bɔ ohia me yeɛ ole me ngoa, bɔ ohia me yeɛ ole kyɛ ngoyie mirika bɔ metu ne, na mayie ɔsom adwuma bɔ Awurade Yesu fa mane me ne, na ɛhene yeɛ ole kyɛ nni Nyameɛ adom nzɛmba nanwo adanzeɛ fekɔ-fekɔ. 25 Afei ɛmɔtie, ɛmɔ bɔ ngane Ahennie nanwo dwirɛ ngyirele ɛmɔ ne, mese kyɛ ɛmɔ nu biala ngonwu me nyunu kõ. 26 Yeti ɛnɛ, meye ɛmɔ adanzeɛ kyɛ, menni sona biala mogya nwo fɔ, 27 ofikyɛ bɔ Nyameɛ abɔ ye ti anu kyɛ ɔkɔyɛ biala ne, mamva mamvea ɛmɔ, ngane ye mukoraati ngyirele ɛmɔ. 28 Ɛmɔnea ɛmɔ nwo so, na ɛmɔnea mmoan bɔ honhom krongron né afa bɛ awura ɛmɔ sa naso. Ná ɛmɔnea Nyameɛ asafo bɔ ɔfale ɔwa ne bɔbɔ mogya tɔle naso yé. 29 Mese kyɛ, mmerɛ bɔ mekɔ ye, mbataku bɔ be ti anu yɛ se koowuraa ɛmɔ nu, na bɛngonya mmoan nanwo aboterɛ. 30 Afei koso, ɛmɔ bɔbɔ ɛmɔ nu yeɛ ebiemɔ kɔdwɔso kɔhyeɛhyea edwirɛ ne, kyɛbɔ ɔkɔyɛ a, bɛkɔhwe asuafoɛ nemɔ bɛkoli bɛ si. 31 Yeti ɛmɔma ɛmɔ nye la berɛ, na ɛmɔma ɔtena ɛmɔ ti anu kyɛ, mvale mmoen nduli ɛmɔ nu biala fo afoɛ nza, na manyakyi ye lle. 32 Afei mefa ɛmɔ mewura Nyameɛ sa, na mefa ɛmɔ mewura edwirɛ bɔ ofi ye adom nu nanu. Sɔ dwirɛ ne kɔhora kɔmaa ɛmɔ kɔyɛ se, ná wamaa ɛmɔ agyapadeɛ wɔ bɛbɔ bate bɛ nwo namukoraati nu. 33 Me nye ammoro ebiala dwetɛ, sikaa kɔkorɛ anaa atadeɛ. 34 Ɛmɔ bɔbɔ ɛmɔse kyɛ, asaa he ala yeɛ ɔmaa mene bɛbɔ bɛboka me so ne nyane bɔ yɛhia ɔ. 35 Mamaa ɛmɔ anwu ye wɔ nikye biala nu kyɛ, odikyɛ ɛmɔyɛ adwuma bɔ ɔyɛ se sɔa bɛfa bɛboka bɛbɔ bayɛ mmerɛ ne, ná ɛmɔkaye Awurade Yesu dwirɛ ne, yenwa: ‘Sɛ yɛkyɛ nikye a, ɔmaa yɛ nye gye pa tra kyɛ yɛkole ɔ.’"

36 Ɔhane ɛhemɔ yiele ne, obuli ndwerɛ, na ɔne bɛ mukoraati bɔle mbaeɛ. 37 Nahorɛ nu, bɛ mukoraati bɛsuni, na bɛyɛle Paul atuu bɛfele ye noa. 38 Bɔ ɔmaa bɛ wora bɔle koraa yeɛ ole edwirɛ bɔ ɔha hyirele bɛ kyɛ, bɛngonwu ye nyunu kõ ne. Ná bɛɛsomane ye bɛdwuli hyep nanwo berɛ.