1 Festo hyɛle ye adwuma bo wɔ mandam nanu ne, ye ɛlɛsa so ne, ofili Kaesarea hɔle* Yerusalem. 2 Ná sɔfo mbanyi ne Yuda kuro nanu mbanyi ne fale Paul kwaadu ne tole ye nyunu. Na bɛsrɛle Festo 3 kyɛ ɔlo bɛ, na ɔfa Paul bra Yerusalem. Né bayɛ b'adwene kyɛ bɛkɔtetɛ ye wɔ atee nu, na bahu ye. 4 Nakoso Festo ha hyirele bɛ kyɛ bɛma Paul la prizin wɔ Kaesarea, ofikyɛ ɔngɔhyɛ, ɔkɔhɔ dɔ. 5 Na ɔhane kyɛ: "Sɛ ɔte amba kyɛ biaa he ayɛ bɔne bie a, ɛmɔma atitire bɔ bɛwɔ ɛmɔ nu ne né me hɔ, na bɛɛbɔ ye kwaadu."

6 Festo tenane berɛ kɔyɛ ngyẽa mmɔtwɛ bɔ ɔkɔ buru so ne, osa hɔle Kaesarea. Aleɛ hene ne, ɔtenane ase kyɛ odi dwirɛ, na ɔmaa bɛfale Paul bɛwale. 7 Paul wale ne, Yudafoɛ bɔ bɛfi Yerusalem bawa ne pɛle ye nwo yiale, na bɛbɔle ye sommoɛ pee, nakoso né bɛlle adanzeɛ biala. 8 Ná Paul yele ye nwo noa kyɛ: "Nyɛlle bɔne biala ndiale Yudafoɛ mmeraa ne, asɔre awuro ne, anaa Kaesare." 9 Ɔnate kyɛ ne Festo pena kyɛ onya Yudafoɛ ne nyunu anuonyam nati, obisale Paul kyɛ: "Ɛpena kyɛ ɛkɔ Yerusalem, ná bɛkodi edwirɛ he wɔ me nyunu anaa?" 10 Nakoso Paul hane kyɛ: "Ngyi Kaesare kɔɔto, na ɛwa yeɛ odikyɛ bɛbu me atɛn ɔ. Na kyɛbɔ wɔ bɔbɔ anwu ye ne, nyɛlle Yudafoɛ ne bɔne biala. 11 Sɛ ɔte amba kyɛ mayɛ nikye bie bɔ odikyɛ mewu a, menzrɛ kyɛ bɛyakyi me; nakoso sɛ nahorɛ biala nne edwirɛ bɔ bafa bato me so nanu a, ebiala lle ye nwo atee kyɛ ɔfa me ma bɛ. Mefa me dwirɛ ne mema Kaesare." 12 Festo ne ye mbanyi ne tuli agyina yiele ne, ɔha hyirele Paul kyɛ: "Sɛ Kaesare yeɛ afa wɔ dwirɛ ne ama ye a, ɛkɔhɔ Kaesare dɔ."

13 Ngyẽa bie si ne, Ɔhene Agripa ne Bɛnis wale Kaesarea kyɛ bɛbaahyea Festo, na bɛyɛ ye ayikoo. 14 Né bɛkoli ngyẽa kaa wɔ berɛ, yeti Festo fale Paul dwirɛ ne tole bɛ nyunu kyɛ:

"Felix yakyile biaa bie wɔ prizin, 15 na mmerɛ bɔ né nwɔ Yerusalem ne, sɔfo mbanyi ne Yudafoɛ mbanyi ne fale ye nwo dwirɛ tole me nyunu, na bɛsrɛle kyɛ mmu ye kumfɔ. 16 Nakoso nga ngyirele bɛ kyɛ, ɔtte mmeraa wɔ Roman kyɛ yɛkobu ebie fɔ, kyɛbɔ ɔkɔyɛ a ɛkɔsɔ bɛ bɔ babɔ ye kwaadu ne nye, sana sona ne yia bɛ bɔ babɔ ye kwaadu ne, na ɔye ye nwo noa wɔ edwirɛ bɔ bafa bato yeso nanwo kora. 17 Yeti bɛwale wa ne, mandena-tena ye nwo, aleɛ hene nala ndenane kɔɔto berɛ, yeɛ mmaa bɛfale biaa ne bɛwale ɔ. 18 Bɛhyɛle yebo kyɛ bɛdwudwo ne, bɔne bɔ né m'adwene yɛ me kyɛ ebie a wayɛ ne, nná ɛhene po yeɛ bɛhane ɔ. 19 Mmom atee bɔ bɛfa so bɛsõ bɛ nyameɛ nanwo aporowaa, ɔne biaa bie bɔ bɛfrɛ ye Yesu bɔ wawu, nakoso Paul asɔ nu twann kyɛ ɔte ase nanwo aporowaa yeɛ bɛne ye suli ɔ. 20 Né mennwu bɔ nyɛ ye wɔ sɔ dwirɛ nanwo, yeti mmisale ye kyɛ, okuro kyɛ ɔkɔ Yerusalem maa bɛdi sɔ dwirɛ ne wɔ berɛ anaa? 21 Nakoso Paul hane kyɛ, bɛma ɔla prizin ma Otumvoɛ ne bua edwirɛ ne. Yeti ngane kyɛ bɛfa ye bɛto prizin kodwu kyɛ ngɔfa ye ngɔhɔ Kaesare dɔ." 22 Na Agripa ha hyirele Festo kyɛ: "Me bɔbɔ mepena kyɛ metie biaa ne noa dwirɛ." Na ɔhane kyɛ, "Ɛhema ɛkotie ye noa dwirɛ."

23 Aleɛ hene ne, Agripa ne Bɛnis wuro-wurale bɛ nwo pɔsɔɔ wale nekaa bɔ bɛdi edwirɛ ne. Bɛba ne, bɛne asahene, ne mmeni titire bɔ bɛwɔ kuro nanu ne yeɛ bɛwale ɔ. Yeɛ Festo hane kyɛ bɛfa Paul bɛbra, yeti bɛfale ye bɛwale. 24 Na Festo hane kyɛ: "Ɔhene Agripa, ne ɛmɔ bɔ ɛmɔ ne yɛ ayia nu mukoraati, ɛmɔ anwu sɔ biaa he? Biaa he yeɛ Yudafoɛ namukoraati fale ye nwo dwirɛ tole me nyunu wɔ Yerusalem ne ɛwa, ná bɛteɛteane nu kyɛ, nnɛmaa ɔtena ngoa nu kõ ne. 25 Nakoso manwu kyɛ, ɔyɛlle nikye biala bɔ odikyɛ bɛku ye ɔ, yeti mmerɛ bɔ biaa he hane kyɛ, wafa ye dwirɛ ne wama Otumvoɛ ne, nyɛle kyɛ ngɔmaa bɛkɔfa ye bɛkɔhɔ. 26 Nakoso nnne edwirɛ biala bɔ metworɔ mefa ye nwo mekɔma me Wura ɔ. Yeti mafa ye mawa ɛmɔ mukoraati nyunu, ye titire ne, wɔ, Ɔhene Agripa, na sɛ yɛneɛnea ye dwirɛ nanu yɛyie a, manwu bɔ metworɔ ɔ. 27 Ofikyɛ nyanza nne nu kyɛ ngɔfa ebie bɔ ɔla prizin ngɔhɔ bɔ olle kwaadu biala ɔ."