1 Afei, bɛsili gyinayɛ kyɛ odikyɛ yɛkɔ Italy, na bɛfale Paul ne prizinfoɛ biemɔ bɛwurale sogyaniɛ panyi bɔ bɛfrɛ ye Julius ne sa, né ɔboka sogyafoɛ kue bɔ bɛfrɛ ye Augusto naso. 2 Yeti yɛfole hyep bie wɔ Adramatio, né sɔ hyep ne baatu kɔ nekaa ahoroɛ bɔ hyep gyina wɔ Asia mandam nanu ne. Né Makedonianiɛ Aristarko, bɔ ofi Tɛsalonika ne boka yɛ so. 3 Aleɛ hene ne, yɛɛgyinane Sidon, na Julius bokale Paul paa, ɔmane ye atee maa ɔhɔle ye nnamvo mɔ berɛ maa bɛneane ye. 4 Yɛtu yɛfili Sidon ne, né mvrama ne bɔ yia yɛ, yeti yɛfale nekaa bie bɔ ne ɔkɔmaa Kipro kole yɛ kofi mvrama ne noa. 5 Na yɛfale Kilikia ne Pamfilia ɛpo naso alaa yɛwale nekaa bɔ hyep gyina wɔ Mira bɔ ɔwɔ Lisia ne. 6 Yɛdwuli berɛ ne, sogyaniɛ panyi ne nwuni hyep bie bɔ ofi Alɛzandria ɔkɔ Italy, na ɔmaa yɛfole. 7 Né hyep ne ngora kɔ, yeti yɛlili ngyẽa pee wɔ atee nu, na yɛ nwo hyerele yɛ paa, nakoso ngaka-ngaka, yɛɛdwuli Knido. Yeti, yɛfale Salmone, né ɛberɛ kɔmaa Kreta kole yɛ kofi mvrama nanu. 8 Na yɛmiane yɛ nye yɛfale ɛpo ne noa ngaka-ngaka yɛɛdwuli nekaa bie bɔ bɛfrɛ berɛ Nekaa Pa Bɔ Hyep Gyina ne, né opingye Lasea kuro ne.

9 Yɛhyɛle berɛ pa, na sɔ mmerɛ ne, né ɔyɛ suro kyɛ yɛkɔfa nzue naso, ofikyɛ ne Kyẽa bɔ bɛyɛ akɔngyere bɛsrɛ bɔne-fakyɛ ne po apɛ nu, yeti Paul tuli bɛ fo kyɛ, 10 "Ngya mɔ, menwu ye kyɛ sɛ yɛtoa so a, nningyein kɔsɛkye. Nná hyep ne né enu nningyein ngome yeɛ ɔkɔsɛkye ɔ, mmom yɛ ngoa koso kofi yɛ sa." 11 Nakoso sogyaniɛ panyi ne amva Paul dwirɛ ne, mmom otiele hyep ne wura ne bɔ ɔka hyep ne. 12 Afei koso, sɛ́ ayirɛ ba a, ɛyɛ né yenoa yɛ se paa wɔ nekaa bɔ hyep ne gyinane ne, yeti mmeni pee nala hane kyɛ, yɛtu yɛfi berɛ, na yɛnea sɛ yɛkɔhora yɛkoodwu Foinise a, ná yatena berɛ maa ayirɛ ne apɛ nu. Né Foinise te nekaa bɔ ɛlɛen gyina wɔ Kreta, na ɛkora fa North-East ne South-West kɔ berɛ.

13 Mvrama bɔkɔɔ bie hyɛle yebo kyɛ ɔbɔ fi ngwaen, yeti ne bɛnwu ye kyɛ, bɔ b'adwene ye nwo ne kɔyɛ yé. Yeti bɛtuli sɛkyɛ ne, na bɛfale Kreta po ne noa bɛhɔle. 14 Mmerɛ kaa bie si ne, mvrama kandinga bie bɔ bɛfrɛ ye Eurakilo* hyɛle yebo kyɛ otu. 15 Né mvrama ne bɔ yia hyep ne, na né yɛyɛ ye nwo hwee a, ɔnyɛ yé, yeti yɛyakyile maa mvrama ne hwene yɛ hɔle. 16 Yesi ne, yɛfale nekaa bie bɔ ne ɔkɔmaa supɔ kaa bie bɔ bɛfrɛ ye Kauda ne kɔbɔ yɛ nwo waen kofi mvrama nanwo, nakoso yɛfɛle pa, kora yeɛ yɛsa ka ɛlɛen* bɔ ɔbɔ yɛ hyep ne bo ne ɔ. 17 Bɛfale ɛlɛen ne bɛwale hyep nanu ne, bɛfale nyamaa bɛfale hyep nabo bɛkyekyele hyep ne paa. Na ɔnate kyɛ né bɛsuro kyɛ annea a né hyep ne atimu Sirti anweaa nanu nati, bɛsangyele nyamaa bɔ otire-tira hyep né tena nanu ne maa mvrama ne bɔbɔ fale yɛ hɔle. 18 Na ɔnate kyɛ ne mvrama ne toto yɛ nati, aleɛ hene ne, bɛhyɛle yebo kyɛ bɛye ɛlɛen nanu nningyein ne bie bɛgua. 19 Ye ɛlɛsa so ne, bɛfale bɛsa bɛtutule hyep nanwo nningyein ne bie bɛguale. 20 Ngyẽa pee pɛle nu bɔ né yɛnnwuni eyia anaa nzramaa, na ne mvrama kandinga ne tɛ́ tu. Yeti né yɛlle anidasoɛ biala kyɛ yekonya ngoa.

21 Né ngyẽa pee apɛ nu bɔ yɛllili hwee, yeti Paul dwɔso gyinane bɛ afia, na ɔhane kyɛ: "Ngya mɔ, né odikyɛ ahaa ɛmɔtie me. Sɛ yandu yamvi Kreta a, ahaa yɛngonwu sɔ amaneɛ he maa ɛmɔ ngɔhwere sɔ nningyein hemɔ. 22 Nakoso meka mekyire ɛmɔ kyɛ, ɛmɔha ɛmɔ ahone bɛto ɛmɔ kunu, ofikyɛ sona-horɛ po ngowu, hyep ne mmom yeɛ ɔkɔsɛkye ɔ. 23 Ɛnɛ kɔngɔen, Nyameɛ bɔ nde ye deɛ, na mesõ ye ne, ye abɔfo wale me nwo berɛ, 24 na ɔha hyirele me kyɛ: ‘Paul, nnɛsuro. Odikyɛ egyina Kaesare nyunu. Na ɛse, Nyameɛ afa bɛ bɔ ɛne bɛ tu atee namukoraati ama wɔ.’ 25 Yeti ngya mɔ, ɛmɔnya akukuduro, na medɛ́ Nyameɛ medi kyɛ, bɔ waha wahyire me ne, ɔkɔwa nu pɛpɛɛpɛ. 26 Nakoso, mvrama ne kɔfa yɛ koogua supɔ bie so."

27 Odwuli kɔngɔen bɔ ɔtɔ so buru-ne-nná ne, né mvrama ne tɛ́ fa yɛ di akɔ-ne-aba wɔ Adria* po naso. Na kɔngɔen tumm ne, né bɛ bɔ bɛyɛ adwuma wɔ hyep nanu ne adwene yɛ bɛ kyɛ, yɛpena yɛpingye aseɛ. 28 Yeti, bɛtole nyamaa bɛguale nzue nabo bɛfa bɛsusuli, na bɛnwuni kyɛ ye tendee ne te mita 36, yeti bɛhɔle bɛ nyunu kaa, na bɛsa bɛsusuli, na bɛnwuni kyɛ ɔte mita 27. 29 Né bɛsuro kyɛ yɛkɔɔfofo nyɔboɛ bie so; yeti bɛyakyile sɛkyɛ nná nu bɛfili ɛlɛen ne si dɔ bɛguale nzue nanu; ná ɔhale bɛ ngome a, né aleɛ ahe. 30 Né hyep nanu adwumayɛfoɛ ne pena kyɛ bɛnwati bɛfi hyep nanu, yeti bɛyakyile ɛlɛen ne bɛsiele ɛpo naso, na bɛhyɛda bɛyɛle bɛ nwo kyɛ bɛkwaasangye sɛkyɛ ne wɔ hyep ne nyunu dɔ, 31 nakoso Paul ha hyirele sogyaniɛ panyi ne kyɛ: "Sɛ sɔ mmenia hemɔ andena hyep nanu a, ɛmɔngonya ngoa." 32 Yeti sogyafoɛ nemɔ pɛle ɛlɛen ne nyamaa ne, na bɛmaa ɔtɔle nzue nanu.

33 Aleɛ baahe ne, Paul srɛle bɛ mukoraati kyɛ bɛdidi, na ɔhane kyɛ: "Ɛmɔ afa ngyẽa buru-ne-nná banwodɛ paa bɔ aleɛ biala hanne ɛmɔ noa. 34 Yeti mesrɛ ɛmɔ, ɛmɔdidi kaa, na ɔkɔboka ɛmɔ, ofikyɛ ɛmɔ nu biala nne berɛ bɔ ye ti nwiaa komapɛ po komini ɔ." 35 Ɔhane ɛhe yiele ne, ɔfale paanoo, na ɔlale Nyameɛ ase wɔ bɛ mukoraati nyunu, yeɛ obuli nu hyɛle yebo lili ɔ. 36 Yeti bɛ mukoraati benyane akukuduro bɛhyɛle yebo bɛdidili. 37 Mmenia 276 yeɛ ne bɛwɔ hyep nanu ɔ. 38 Bɛdidili maa bɛ ko yili ne, bɛgyili hwiit bɔ ɔwɔ ɛlɛen nanu ne bɛguale ɛpo nanu, maa hyep nanu yɛle nyera.

39 Aleɛ hene ne, né bɛnnwu aseɛ ne, nakoso bɛnwuni ɛpo noa bɔ ɛpo ne adidi awura aseɛ nanu, yeti bɛyɛle b'adwene kyɛ, sɛ ɔkɔyɛ ye a, bɛkɔfa hyep ne bɛkɔhɔ dɔ. 40 Yeti bɛpepɛle sɛkyɛ nemɔ nu maa oguale ɛpo nanu, na bɛsangyele stiya ne nyamaa nemɔ. Yeɛ bɛfale ɛtena bɔ ɔwɔ hyep ne nyunu ne bɛhyirele mvrama ne, na bɛsili nu kyɛ bɛkɔ ɛpo ne noa dɔ. 41 Nakoso, hyep ne fofole anweaa sire bie so wɔ ɛpo nanu, na ye nyunu ne timuni maa ɔhale berɛ, na asorɔkye bɔ né ɔbɔ serɛ-serɛ ne bubuli ye si nanu mmaa-mmaa. 42 Yeti, sogyafoɛ nemɔ yɛle kyɛ, bɛku prizinfoɛ ne, na ebiala ammia anwanti. 43 Nakoso né sogyaniɛ panyi ne abɔ ye ti anu porɛ kyɛ okole Paul ngoa, yeti wamma bɛ atee maa bannyɛ bɔ né bɛpena kyɛ bɛyɛ ne. Mmom ɔhane kyɛ, bɛ bɔ bɛse bia ne, bɛto bɛ nwo gua nzue nanu, na bɛbia bɛli moa bɛhɔ aseɛ naso dɔ. 44 Na bɛ ngaa ne koso, ebiemɔ butu ndaboa nemɔ so, na ebiemɔ koso butu hyep nanu nningyein ne biemɔ so, ná bɛli bɛ si. Yeti, bɛ mukoraati bɛɛdwuli aseɛ naso asomdwie nu.