ASOMAFOƐ NYUMAA 6

1 Ná mmerɛ bɔ asuafoɛ nemɔ dodoɔ kɔ anyunu ne, Yudafoɛ bɔ bɛka Greek dwudwolɛ ne hyɛle yebo dwudwo tiale Yudafoɛ bɔ bɛka Hebri dwudwolɛ ne, ofikyɛ né bɛbu bɛ nye bɛgua akunafoɛ bɔ bɛka Greek dwudwolɛ naso. Ná nningyein bɔ daa bɛkyɛ ne, né bɛmma bɛ. 2 Yeti, buru-ne-nyɔ ne frɛle mmenia namukoraati maa beyiale, na bɛha bɛhyirele bɛ kyɛ: "Ɔttemaye kyɛ yɛkɔyakyi Nyameɛ dwirɛ ne berɛ, ná yaagyina tɛbulu nwo yakyekyɛ aleɛ. 3 Yeti aliemaa mɔ, ɛmɔneɛnea ɛmɔ nu, ná ɛmɔye mmrienzua nzoo bɔ bɛle dumaa pa, mmenia bɔ honhom wɔ bɛ so, na bɛse nworɛ, na yɛfa adwuma bɔ ye nwo hia he yɛwura bɛ sa. 4 Na yɛ de, yɛkotu yɛ nwo yekosie berɛ yɛkɔbɔ mbaeɛ, na yayere yɛ nwo yaha Nyameɛ dwirɛ ne." 5 Bɔ bɛhane ne tɔle mmenia ne so anu, yeti bɛyele Steven, brienzua bɔ ole gyidie na honhom krongron wɔ ye so, ɔne Filipo, Prokoro, Nikanor, Timon, Parmena, ne Nikolas bɔ ofi Antiokia, ná wasakra waayɛ Yudaniɛ ne. 6 Bɛfale bɛ bɛbrɛle asomafoɛ ne, na bɛbɔle mbaeɛ beyiele ne, bɛfale bɛ sa bɛguale bɛ so.

7 Afei, Nyameɛ dwirɛ ne hɔle so trɛle, na asuafoɛ ne dodoɔ bu bɔle ye nwo wɔ Yerusalem, na asɔfo nanu pee yɛle gyidifoɛ.

8 Ná Steven bɔ Nyameɛ adom ne tumi wɔ ye so ne yɛle anwanwadeɛ ne nzɛngyerɛneɛ pee wɔ mmenia nanu. 9 Ná mmenia biemɔ bɔ bɛboka kue bie bɔ bɛfrɛ ye sua bɔ beyia nu nanu Ahofadifoɛ, ne Kirenfoɛ biemɔ, ne Alɛzandriafoɛ, ne mmenia biemɔ bɔ bɛfi Kilikia ne Asia wale kyɛ bɛne Steven baasu aporowaa. 10 Nakoso nyanza ne honhom bɔ ne ɔfa dwudwo ne, bangora ye noa gyina. 11 Yeti, bɛne ebiemɔ yɛle plan kyɛ bɛha kyɛ: "Yate kyɛ ɔka mmusue dwirɛ fa Mose ne Nyameɛ nwo." 12 Ná bɛ piepiane mmenia ne, mbanyi nemɔ, ne atwerɛfoɛ nemɔ maa bɛwale ye so komapɛ, na bɛhyele ye bɛhɔle Sanhendrin ne nyunu. 13 Yeɛ bɛmaa mmenia biemɔ lili adanzewia tiale ye kyɛ: "Daa biala, biaa he dwudwo tia nekaa krongron he ne Mmeraa ne. 14 Yɛtele ye po kyɛ ɔka kyɛ, Yesu bɔ ofi Nazerɛt ne kodwiri sua he kogua, na amanne bɔ Mose fa mane yɛ ne, ɔkɔsesa ye." 15 Mmerɛ bɔ Sanhendrin badwa namukoraati neane ye haa ne, bɛnwuni kyɛ ye nyunu ayɛ kyɛ abɔfo nyunu.