1 Teofilus, edwirɛ bɔ nni moa ndworɔ mmerɛle wɔ ne, ngane nningyein bɔ Yesu hyɛle yebo yɛle, ɔne nikye biala bɔ ohyirele 2 tonn oodwuli kyẽa bɔ bɛfale ye bɛhɔle anwuro ne. Ná kora bɔ ɔkɔ anwuro ne, ɔnate honhom krongron so mane asomafoɛ bɔ waye bɛ ne akwankyerɛ. 3 Amaneɛ bɔ onwuni ye ne si ne, ɔnate adanzeɛ pee bɔ odi mu so maa bɛnwuni kyɛ, amba, ɔte ase. Ngyẽa 40 nanu ne, ɔyele ye nwo ali hyirele bɛ, na ɔhane Nyameɛ Ahennie nanwo dwirɛ. 4 Mmerɛ bɔ oyiale bɛ ne, ɔha hyirele bɛ kyɛ: "Nnɛmɔ fi Yerusalem, ɛmɔ nwondɛ Baba ne bɔhyɛ bɔ ngane ye nwo dwirɛ ngyirele ɛmɔ ne; 5 ofikyɛ nzue yeɛ né Yohane fa bɔ asu ɔ, nakoso ɛmɔ de, ɔngɔhyɛ biala bɛkɔfa honhom krongron bɛkɔbɔ ɛmɔ asu."

6 Yeti beyiale ye ne, bɛbisale ye kyɛ: "Awurade, sɔ mmerɛ he ala yeɛ ɛfa Ahennie ne sie berɛ ma Israel anaa?" 7 Ɔha hyirele bɛ kyɛ: "Mmerɛ ne ngyẽa bɔ Baba ne afa ye tumi ahyɛ ne de, ye nwo nhia kyɛ ɛmɔnwu ye. 8 Mmom sɛ honhom krongron ne ba ɛmɔ so a, ɛmɔ konya tumi, na ɛmɔ kɔyɛ m'adanzefoɛ wɔ Yerusalem, Yudea, ne Samaria mukoraati koodwu aseɛ ne noa dɔ paa." 9 Ɔhane ɛhemɔ yiele ne, bɛfale ye bɛhɔle anwuro, na bɛguso bɛnea anwuro ne, munungum katale ye nwo bɔ bannwu ye kõ. 10 Ɔkɔ ne, né bɛnea anwuro haa, na ɛberɛ ala, mmrienzua nyɔ bɔ bɛwura ndadeɛ fufue wale bɛ nwo berɛ, 11 na bɛha bɛhyirele bɛ kyɛ: "Galilea mmrandeɛ, nzuati yeɛ ɛmɔgyi wa, bɔ ɛmɔnea anwuro sɔ ne? Yesu bɔ bafa ye bafi ɛmɔ nwo wa bahɔ anwuro ne, kyɛbɔ ɛmɔ nwuni ye kyɛ ɔkɔ ne, sɔ ala yeɛ okosa kɔwa ɔ."

12 Na bɛfili bokaa bɔ bɛfrɛ ye Olive naso bɛhɔle Yerusalem. Né ɛberɛ pingye Yerusalem; efi berɛ ɛkɔ Yerusalem a, né ɔte homeda atee.* 13 Bɛdwuli berɛ ne, bɛhɔle aborosaen bɔ bɛte nu nanu. Petro, Yohane, Yakobo, Andrea, Filipo, Tomas, Bartolomeo, Mateo, Alfeo awa Yakobo, Simon bɔ ɔbɔ ye nwo mmɔden ne, ɔne Yakobo awa Yuda yeɛ né bɛwɔ berɛ ɔ. 14 Bɛ mukoraati bɛyɛle adwene kõ bɛbɔle mbaeɛ daa, bɛ ne mmrasua nemɔ ne Yesu maame Mary, né Yesu aliemaa nemɔ koso wɔ berɛ.

15 Sɔ ngyẽa nanu ne, Petro dwɔso gyinane aliemaa nemɔ nu (mmenia kɔyɛ 120 yeɛ ne bɛwɔ berɛ ɔ) na ɔhane kyɛ: 16 "Nniema mɔ, ngɔm bɔ honhom krongron ne nate David so hyɛ fale Yuda nwo ne, né odikyɛ sɔ tworɔnzɛm ne ba nu. Sɔ Yuda ne yeɛ olili mmenia nemɔ nyunu maa bɛɛhyele Yesu ne. 17 Né ɔboka yɛ so, na ɔyɛle sɔ adwuma he bie. 18 (Sɔ biaa he fale akatua bɔ onya fili ye amumuyɛɛ nanu ne tɔle aseɛ. Na mmerɛ bɔ ye kɔme wɔle berɛ ne, ye nu pakyele maa ye nyaa mukoraati turu guale. 19 Bɛ bɔ bɛte Yerusalem namukoraati tele ye nwo dwirɛ, yeti bɛ dwudwolɛ nu ne, bɛfrɛle sɔ aseɛ ne Akeldama, bɔ yebo kyire kyɛ, ‘Mogya Aseɛ.’) 20 Ofikyɛ, bahworɔ ye wɔ Edwein nwomaa nanu kyɛ,

‘Ma nekaa bɔ ɔte ne yɛ dandue,

nnɛmaa ebiala tena berɛ,’

na

‘Ye dibea ne koso, ma ebie fa.’

21 Yeti, mmrienzua bɔ ne bɛli yɛ si, mmerɛ bɔ ne yɛne Awurade Yesu di akɔ-ne-aba, 22 fi mmerɛ bɔ Yohane bɔle ye asu, ɔbaadwu kyẽa bɔ bɛfale ye bɛfili yɛ nwo wa bɛhɔle anwuro ne, odikyɛ bɛ nu kõ baboka yɛ so, na ɔne yɛ yɛ ye tingyelɛ nanwo adanzefoɛ." 23 Yeti, bɛyele mmenia nyɔ, Yosef bɔ bɛfrɛ ye Barsaba, bɔ besa bɛfrɛ ye Yusto ne, ɔne Matias. 24 Na bɛbɔle mbaeɛ kyɛ: "O Awurade, wɔ bɔ ɛse ebiala ahone nu, mmrienzua nyɔ hemɔ, maa yɛnwu bɛ nu kõ bɔ aye ye 25 kyɛ oosi Yuda gya nu, na ɔfa ɔsom ne asomafoɛ adwuma bɔ ɔpole, na ɔɔyɛle bɔ okuro ne." 26 Yeti, bɛtɔɔsole ne,* ɔyele Matias, yeti, bɛfale ye bɛ bokale asomafoɛ 11 naso.