1 "Nniema mɔ ne me baba mɔ, ɛmɔtie me noa dwirɛ." 2 Mmerɛ bɔ bɛtele kyɛ, Hebri yeɛ ɔka kyire bɛ ne, ɛberɛ yɛle konn. Yeɛ Paul hane kyɛ: 3 "Nde Yudaniɛ, bɛwole me wɔ Tarsus bɔ ɔwɔ Kilikia ne, na kuro he ala nu yeɛ Gamaliel hyirele me nikye, kyɛbɔ ɔkɔyɛ a, ngoli yɛ baba mɔ mmeraa so pɛpɛɛpɛ. Né mebɔ mmɔden wɔ Nyameɛ adwuma nwo, kyɛbɔ ɛmɔyɛ ye ɛnɛ nala. 4 Bɛbɔ bɛnate Atee he aso ne, nduli me nye nziele bɛ so maa bɛhuni bɛ, na né me kyekye mmrienzua ne mmrasua maa bɛfa bɛ bɛgua prizin, 5 sɔfo panyi ne mbanyi namukoraati te ɛhe anwo adanzefoɛ. Nza nnɛle krataa mvili bɛ berɛ kyɛ mefa mekɔma aliemaa mɔ bɔ bɛwɔ Damasko ne, na nzili nu kyɛ me kwaahye bɛ bɔ bɛwɔ dɔ ne meba Yerusalem maa bɛtwe bɛ so.

6 "Na nnate atee so, bɔ waha kaa maa medwu Damasko, kɔyɛ eyia-gyina ne, kanea bie fili anwuro tɔle me so komapɛ, na ɔpɛle me nwo yiale. 7 Na ndɔle ase, yeɛ ndele kyɛ konviɛ bie ka kyire me kyɛ: ‘Saul, Saul, nzuati yeɛ ɛtane me sɔ ne?’ 8 Na ngane kyɛ: ‘Me wura, wɔ yeɛ ɛle nwa?’ Yeɛ ɔhane kyɛ: ‘Me yeɛ nne Nazerɛtniɛ Yesu bɔ ɛtane ye nye ne.’ 9 Mmrienzua bɔ bɛboka me so ne de, né bɛnwu kanea ne, nakoso né bɛnde bɔ ɔne me dwudwo ne konvi. 10 Yeti ngane kyɛ: ‘Awurade, nzu yeɛ nyɛ ɔ?’ Yeɛ Awurade ha hyirele me kyɛ: ‘Dwɔso kɔ Damasko, na bɛkɔmaa ekonwu nikye biala bɔ bahyɛ bato berɛ kyɛ ɛyɛ ne.’ 11 Kanea bɔ ɔtɔle me so ne anuonyam nati, né menwu hwee, yeti bɛ bɔ bɛboka me so ne yeɛ bɛsosɔle me nu bɛfale me bɛhɔle Damasko ɔ. 12 Né biaa bie wɔ berɛ bɔ bɛfrɛ ye Ananias, né osuro Nyameɛ, na né odi Mmeraa naso, né Yudafoɛ bɔ bɛwɔ berɛ namukoraati bɔ ye dumaa pa. 13 Sɔ biaa ne wale me berɛ, na ogyinane me nwo berɛ ha hyirele me kyɛ: ‘Nniema Saul, sa nwu nikye!’ Na ɛberɛ ala mmane me ti so, ná nwuni ye. 14 Yeɛ ɔhane kyɛ: ‘Yɛ nana mɔ Nyameɛ ne aye wɔ kyɛ enwu ye apɛdeɛ, na enwu teneneeniɛ ne, ná ɛte ye noa nu dwirɛ, 15 ofikyɛ nningyein bɔ anwu ye na ate ne, ɛkoli ye nwo adanzeɛ kohyire mmenia mukoraati. 16 Ye de ɛnwondɛ nzu? Dwɔso ma bɛbɔ wɔ asu, na bɔ ye dumaa ma okyikyi wɔ bɔne.’

17 "Na nza mmale Yerusalem, bɔ né mebɔ mbaeɛ wɔ asɔre awuro berɛ ne, nikye bie tɔle me so 18 na nwuni kyɛ Awurade ka kyire me kyɛ: ‘Yɛ ye ndɛ, na fi Yerusalem, ofikyɛ adanzeɛ bɔ ɛdi fa me nwo ne, bɛngole bɛngɔto nu.’ 19 Yeɛ ngane kyɛ: ‘Awurade, bɛ bɔbɔ bɛse kyɛ ngyele bɛ bɔ bedɛ wɔ bɛdi ne nguale nu, na ngwale bɛ wɔ sua bɔ beyia nu nemɔ nu; 20 na mmerɛ bɔ bɛhwie Steven bɔ ɔte w'adanzeniɛ ne mogya bɛgua ne, né ngyi berɛ bie na né mefoa bɔ bɛyɛ naso, me yeɛ nneane bɛ bɔ ne bɛku ye ne ndadeɛ so ɔ.’ 21 Nakoso ɔha hyirele me kyɛ: ‘Kɔ, ofikyɛ ngɔsoma wɔ maa ɛkɔhɔ maen-maen nanufoɛ bɔ bɛwɔ dede ne dɔ.’"

22 Betiele ye tonn oodwuli sɔ dwirɛ he aso. Yeɛ bɛmane bɛ konvi so bɛteɛteane nu kyɛ: "Ɛmɔye sona he bɛfi aseɛ naso! Ofikyɛ ɔtte ebie bɔ odikyɛ ɔtena ase ɔ!" 23 Na bɛteɛteane nu bɛgyili bɛ ndadeɛ bɛguale, yeɛ bɛtotole mvuture bɛguale ewienu, yeti 24 sahene ne maa bɛfale Paul bɛwale nekaa bɔ sogyafoɛ nemɔ te ne, na ɔhane kyɛ bɛgwa ye maa ɔha bɔ wayɛ ɔ, kyɛbɔ ɔkɔyɛ a, bekonwu bɔ yeti yeɛ mmenia ne teɛteanu gua ye so sɔ ne. 25 Bɛhwene Paul nu bɔ bɛbaagwa ye ne, obisale sogyaniɛ panyi bɔ ogyi ye nwo berɛ ne kyɛ: "Mmeraa maa ɛmɔ ate maa ɛmɔgwa Romaniɛ, mmerɛ bɔ bɛlili ye dwirɛ ɔ?" 26 Sogyaniɛ ne tele sɔ dwirɛ ne, ɔhɔle sahene ne berɛ, yeɛ ɔha hyirele ye kyɛ: "Nzu yeɛ ɛpena kyɛ ɛyɛ ne? Nea, sɔ biaa he te Romaniɛ." 27 Yeti, sahene ne wale ye berɛ, yeɛ ɔha hyirele ye kyɛ: "Ka kyire me, ɛte Romaniɛ?" Ɔhane kyɛ: "Yoo." 28 Yeɛ sahene ne hane kyɛ: "Esikaa piri paa yeɛ nduale kora yeɛ menya ye nwo atee mebayɛ Romaniɛ ɔ." Yeɛ Paul hane kyɛ: "Nakoso me de, bɛfa bɛwole me." 29 Ɛberɛ ala, mmrienzua bɔ ahaa bɛ baaneɛnea ye dwirɛ nu ne hwene bɛ nwo, na esuronyi hane sahene ne, ofikyɛ wafa kyenyi wakyekye Romaniɛ.

30 Yeti aleɛ hene ne, né ɔpena kyɛ onwu nikye-horɛ deinn ti bɔ Yudafoɛ ne bɔ ye sommoɛ ne, yeti ɔyakyile ye, na ɔfrɛle sɔfo mbanyi nemɔ ne Sanhendrin namukoraati maa beyiale. Na ɔmaa Paul gyinane bɛ nyunu berɛ.